རྒྱལ་ཀུན་དགྱེས་པའི་སྤྱན་རས་པད་དཀར་མདངས། །
གངས་ལྡན་རི་བོ་མཛེས་པའི་དཔལ་དུ་ཤར། །
རྗེས་ཆགས་ཞི་བ་ཆེན་པོའི་ཕྱག་རྒྱ་ཡིས། །
ཟླུམ་གཟུགས་གོ་ལའི་བདེ་སྡུག་སྙོམས་པོར་སྐྱོར། །
གྲགས་པའི་རྒྱལ་རྔ་གཟུར་གནས་མཁས་པས་བརྡུངས། །
སྙན་པའི་བ་དན་མཐའ་དག་སྐྱེ་དགུས་འཕྱར། །
ཆེ་བའི་འཕྲིན་ལས་སྲིད་པའི་ཁྱོན་ལས་བརྒལ། །
ཐུགས་བསྐྱེད་དམ་བཅའ་མཁའ་དང་མཉམ་པར་བརྡལ། །
གང་གི་གསང་གསུམ་རྟག་པ་དམ་པའི་ཁམས། །
ཞིང་འདིའི་གདུལ་བྱའི་རྒྱན་དུ་རྟག་འགྲོགས་ཤིང་། །
བརྩེ་ཆེན་ཞི་བ་ཆེན་པོའི་དགྱེས་སྤྱན་གྱིས། །
ད་དུང་བུ་བཞིན་སྐྱོངས་ཤིག་གངས་རིའི་མགོན། །
འཇིག་རྟེན་ཞི་བདེའི་དེད་དཔོན་ས་སྟེང་རྒྱལ་བསྟན་ཡོངས་ཀྱི་མངའ་བདག་གངས་ཅན་བོད་ཀྱི་མགོན་དཔུང་ ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ནོ་བྷེལ་ཞི་བདེའི་གཟེངས་རྟགས་བཞེས་ཏེ། མི་ལོ་༣༡ འཁོར་བའི་བཀའ་དྲིན་རྗེས་དྲན་ལ་གཞིས་བྱེས་རྒྱལ་བ་ཇོ་ནང་པ་ཡོངས་ཀྱི་ཚབ་ཞུས་ནས་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ནས་ཕྱི་ལོ་༢༠༢༠ ཟླ་༡༢ ཚེས་༦ཉིན་གསོལ་འདེབས་སྨོན་ཚིག་འདི་གུས་པ་ཆེན་པོས་ཕུལ།