༄༅།།བཀུར་འོས་འཛམ་གླིང་ཡུལ་གྲུ་གང་སར་བཞུགས་པའི་དྲ་གྲོགས་ཕོ་མོ་ཡོངས་ཀྱི་སྤྱན་ལམ་དུ་ཞུ་རྒྱུར།
བསྟན་དང་འགྲོ་བའི་འཕྲལ་ཕུགས་ཀྱི་དར་རྒུད་དང་བདེ་སྐྱིད་ལ་བསམ་བློ་གཏོང་མཁན་ཞིག་ཡིན་ཕྱིན། མི་རིགས་དང་ཆོས་ལུགས་སུ་ཞིག་ཡིན་ཡང་། རང་ཉིད་ཀྱི་རིག་གཞུང་དག་མི་ཉམས་གོང་འཕེལ་དང་ཉམས་པ་སླར་གསོའི་ཆེད་དུ་གཞུང་ལུགས་དེ་དག་འཛིན་སྐྱོངས་སྤེལ་གསུམ་བྱེད་དགོས་པ་ནི་འོས་འགན་གཙོ་བོར་ཆོས་ཉིད་དུ་གྲུབ་ཡོད།
ལྷག་ཏུ་རང་གཞན་གྱི་འཕྲལ་ཕུགས་ཀྱི་བདེ་སྐྱིད་ཆེད་དུ་བསམ་གཞིག་བྱེད་མཁན་ཞིག་ཡིན་ཕྱིན། དེ་ཐོབ་པའི་ཐབས་ལམ་ཡང་དག་ཅིག་ཤེས་པར་བྱ་དགོས་པ་གནད་ཀྱི་དོན་པོ་ཡིན། དེ་ཡང་ནང་བ་སངས་རྒྱས་པར་མཚོན་ན། ཚད་མའི་སྐྱེས་བུ་ཆེན་པོ་སྟོན་པ་སངས་རྒྱས་ཀྱི་བཀའ་དང་། དེའི་དགོངས་འགྲེལ་གྱི་བསྟན་བཅོས་རྣམས་ལ་ཐོས་བསམ་མཐར་ཕྱིན་གནང་དགོས་པ་ནི་དཔྱོད་ཤེས་ཀུན་གྱི་མཁྱེན་གསལ་ལྟར་ལགས། དེར་བརྟེན་ཡུལ་རཱ་ཤི་ཡ་གནས་བཞུགས་བླ་མ་ཀུན་དགའ་འཇིགས་མེད་ཀྱིས་མཐུན་རྐྱེན་སྦྱར་བའི་བཀའ་དྲིན་ལ་བརྟེན་ནས་དཔལ་ལྡན་རྒྱལ་བ་ཇོ་ནང་བའི་གནའ་དེང་གི་བསྟན་འཛིན་སྐྱེས་ཆེན་དམ་པ་རྣམས་ཀྱི་མཛད་པ་འཕྲིན་ལས་སོགས་གང་འཇོན་གྱི་ངལ་བ་ལ་མ་འཛེམ་པར་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཞེས་དྲ་རྒྱ་འདིའི་ཐོག་ཏུ་བོད་རྒྱ་དབྱིན་གསུམ་ནང་ཀློག་མཁན་དང་འབྲེལ་ཡོད་ཚོར་ལེགས་སྐྱེས་ཚུལ་དུ་ཕུལ་ཡོད་པ་ལགས་ན།
ཀློག་མཁན་དང་འབྲེལ་ཡོད་དག་གིས་དྲ་རྒྱ་འདིའི་འབྱུང་གྱུར་སྤུས་ཚད་དང་། ཁྲིམས་མཐུན་བདེ་འཇགས། ཉེས་འགོག་ལེགས་སྤེལ་གྱི་ཆེད་དུ་རྒྱབ་སྐྱོར་དང་ལམ་སྟོན་དགོངས་ཚུལ་ལྷུག་སྩོལ་གནང་སྐྱོང་ཡོད་པའི་རེ་བ་ཆེན་པོ་ཡོད། བདུན་རེའི་རེས་གཟའ་ལྷག་པ་༧རྒྱལ་བ་ཐམས་ཅད་མཁྱེན་པའི་བླ་གཟའ་ཉིན་བོད་རྒྱ་དབྱིན་གསུམ་གང་རུང་གི་ཐོག་ནས་གསར་འཕྲིན་ཆད་མེད་སྤེལ་འཆར་ཡོད་པས་རྣམ་པ་ཚོའི་ཐུགས་ཡིད་དང་མཐུན་པར་སྨོན། བཀྲ་ཤིས་བདེ་ལེགས།
དྲ་རྒྱ་རྩོམ་སྒྲིག་པ། མགོ་ལོག་ལྕགས་མོ། ཆོས་ཀྱི་ཉི་མ།