00000

ཆེན་པོ་ཧོར་གྱི་བསྟན་པའི་མངའ་བདག་དང་དཔལ་ལྡན་རྒྱལ་བ་ཇོ་ནང་པའི་བསྟན་བདག་ཆེན་མོ་སྐྱབས་མགོན་ཁལ་ཁ་རྗེ་བཙུན་དམ་པ་རིན་པོ་ཆེ་མཆོག་གི་མཛད་རྣམ་བསྡུས་པ།

༄༅།།ཐུགས་བསྐྱེད་དམ་བཅའ་མི་ལྷོད་པར།།
གདུལ་བྱའི་ཁམས་དབང་མོས་པ་ལ།།
ངེས་དོན་འཁོར་ལོ་ཐ་མ་ཡི།།
བསྟན་པའི་རྒྱལ་མཚན་སྲིད་ན་བསྒྲེངས།

དམ་པ་ཁོང་ནི་ཇོ་ནང་རྗེ་བཙུན་ཀུན་དགའ་གྲོལ་མཆོག་གི་སྐུ་ཕྲེང་བཅུ་གཅིག་པ་དང་། རྗེ་བཙུན་ཏཱ་ར་ནཱ་ཐ་ནས་སྐུ་ཕྲེང་བཅུ་པ་སྐྱབས་མགོན་ཁལ་ཁ་རྗེ་བཙུན་དམ་པ་རིན་པོ་ཆེ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་དཔལ་བཟང་པོ་མཆོག་ནི་ཕྱི་ལོ་ ༡༩༣༢ ལོར་བོད་དབུས་རྭ་ལོའི་གདུང་རྒྱུད་ཡབ་བློ་བཟང་འཇམ་དཔལ་དང་། ཡུམ་དབྱངས་ཅན་ལྷ་མོ་གཉིས་ཀྱི་སྲས་སུ་སྐུ་འཁྲུངས། ཇོ་ནང་ཏཱ་ར་ནཱ་ཐ་དང་གདུང་རྒྱུད་གཅིག་པ་ཡིན། དགའ་ལྡན་ཁྲི་ཐོག་དགུ་བཅུ་པ་དང་། གནས་ཆུང་ཆོས་རྒྱལ་ཆེན་པོ་སོགས་ཀྱིས་སྐྱེས་ཆེན་དམ་པ་ཞིག་ཡིན་པར་ལུང་བསྟན་གནང་། དགུང་གྲངས་བཞིའི་ཐོག་རྒྱལ་ཚབ་རྭ་སྒྲེང་རིན་པོ་ཆེས་ལྷ་བླའི་བཀའ་ལུང་རྩེ་མཐུན་ལྟར། ཇོ་ནང་རྗེ་བཙུན་ཏཱ་ར་ནཱ་ཐ་སྐུ་ཕྲེང་བཅུ་པ་དང་ཁལ་ཁ་རྗེ་བཙུན་དམ་པ་སྐུ་ཕྲེང་དགུ་པའི་ཡང་སྤྲུལ་དུ་ངོས་འཛིན་མཛད། ཁལ་ཁ་རྗེ་བཙུན་དམ་པ་སྐུ་ཕྲེང་རིམ་བྱོན་རྣམས་ཀྱིས་རབ་བྱུང་གི་སྡོམ་བཞེས་སོགས་ཆོས་ཕྱོགས་ཀྱི་གལ་ཆེའི་མཛད་སྒོ་ཕལ་ཆེ་བ་རྣམས་ཆོ་འཕྲུལ་སྨོན་ལམ་དང་བསྟུན་ལྷ་ས་གཙུག་ལག་ཁང་དུ་གནང་སྤྲོལ་ཡོད་པ་ལྟར་མཚུངས་མེད་རྒྱལ་བའི་༧རྒྱལ་ཚབ་རྭ་སྒྲེང་རྡོ་རྗེ་འཆང་ཐུབ་བསྟན་འཇམ་དཔལ་ཡེ་ཤེས་དཔལ་བཟང་པོའི་ཞལ་སྔ་ནས་དབུའི་གཙུག་ཕུད་ཕུལ་ཞིང་རབ་ཏུ་བྱུང་། དེ་ལྟར་༧རྒྱལ་ཚབ་རྭ་སྒྲེང་རིན་པོ་ཆེ་ཆེས་ཐོག་མའི་བླ་མར་བསྟེན་ཏེ། གསུང་གི་བདུད་རྩིའི་ཆ་ཙམ་མྱངས་པ་ནས་བཟུང་བྱིན་རླབས་ཀྱི་ཚན་ཁ་ཐུགས་ལ་ཞུགས་པས། སངས་རྒྱས་དངོས་ཀྱི་འདུ་ཤེས་བཅོས་མིན་དུ་སྐྱེས། དེ་ནས་བཟུང་ཁོང་གི་མདུན་ནས་སྨིན་བྱེད་དབང་དང་རྗེས་གནང་། གྲོལ་བྱེད་ཁྲིད་དང་བཤད་ལུང་། གཞན་ཡང་ཞལ་ཤེས་སྙན་བརྒྱུད་མན་ངག་དང་བཅས་པ་རིམ་བཞིན་གསན་ཏེ། བཀའ་དྲིན་མཚུངས་པ་མེད་པའི་རྩ་བའི་བླ་མ་ཉག་གཅིག་ཏུ་བཀུར་བར་མཛད། གདན་ས་ཆེན་མོ་དཔལ་ལྡན་འབྲས་དཀར་སྤུངས་བའི་སྒོ་མང་གྲྭ་ཚང་དུ་ཆོས་ཞུགས་མཛད་ནས་རྩ་བའི་ཡོངས་འཛིན་དགེ་བཤེས་ངག་དབང་མཆོག་ལྡན་སོགས་བསྟེན་ཏེ་མདོ་ཕྱོགས་ཀྱི་གཞུང་ཆེན་ཁག་ལ་སློབ་གཉེར་ཕུལ་ཕྱིན་མཛད། དགུང་གྲངས་ཉེར་གཅིག་ཐོག་རང་ཉིད་ཀྱི་གདན་ས་རྟག་བརྟན་ཆོས་སྡེར་ཞབས་སོར་འཁོད་ཅིང་། དེའི་དུས་སུ་ཇོ་ནང་བའི་རྣལ་འབྱོར་བ་ཞིག་དང་མཉམ་དུ་ཇོ་ལུགས་དཔལ་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་མི་མངོན་པའི་ཚུལ་དུ་ཉམས་བཞེས་མཛད། ཕྱིས་སུ་དུས་འགྱུར་གྱི་དབང་གིས་འཕགས་ཡུལ་དུ་ཕེབས་ཏེ་གནས་ངེས་མེད་དུ་སྦས་པའི་རྣལ་འབྱོར་བའི་ཚུལ་དུ་བཞུགས། བཀའ་བརྒྱུད་པའི་བླ་མ་ཀ་ལུ་རིན་པོ་ཆེའི་མདུན་ནས་ཇོ་ནང་དང་ཤངས་པའི་ཆོས་སྐོར་མཐོང་བ་དོན་བརྒྱུད་ཀྱི་ཉམས་ལེན་བདག་གིར་བཞེས། ༸གོང་ས་ཐམས་ཅད་མཁྱེན་པ་མཆོག་གིས་གཞུང་འབྲེལ་ཁྲི་སྟོན་མཛད་སྒོ་བྱེད་དགོས་ཞེས་བཀའ་སྩལ་བ་དང་། སོག་པོའི་སྲིད་འཛིན་སོགས་ཆེས་མཐོའི་དཔོན་རིགས་ཁག་དང་སེར་སྐྱ་མི་མང་གིས་རེ་འདུན་ལྟར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཁྲི་སྟོན་གྱི་མཛད་སྒོ་རྒྱ་ཆེར་སྤེལ། ཕྱི་ལོ་ ༡༩༩༧ ལོར་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་པ་མཆོག་གིས་དཔལ་རྒྱལ་བ་ཇོ་ནང་བའི་བསྟན་པའི་བདག་པོར་མངའ་གསོལ་མཛད་དེ་གཞུང་འབྲེལ་མཛད་སྒོ་གནང། དེ་དང་ཆབས་ཅིག་ལོ་དེར་༸གོང་ས་མཆོག་གིས་དཔལ་ལྡན་རྒྱལ་བ་ཇོ་ནང་བའི་ངེས་དོན་གྱི་བསྟན་པ་སླར་གསོའི་ཆེད་རྒྱ་གར་བྱང་ཕྱོགས་ཧི་མ་ཅལ་གྱི་རྒྱལ་སར་སིམ་ལ་སངས་རྒྱས་ཆོས་གླིང་དགོན་པའི་མིང་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་ཞེས་པར་མཚན་གསོལ་ཏེ། དགོན་གནས་རྟེན་དང་བརྟེན་པ་བཅས་ཇོ་ནང་རྗེ་བཙུན་ཏཱ་ར་ནཱ་ཐའི་ཡང་སྤྲུལ་སྐྱབས་མགོན་ཁལ་ཁ་རྗེ་བཙུན་དམ་པ་མཆོག་གི་མཚན་ཐོག་ཏུ་དཔལ་ལྡན་རྒྱལ་བ་ཇོ་ནང་བའི་བསྟན་པའི་གནས་གཞིར་གནང་། བྱེས་འབྱོར་ཇོ་ནང་བའི་མཁན་བླ་སྤྲུལ་དགེ་འདུན་པ་བཞི་བཅུ་ལྷག་བཀའ་འགུགས་ཀྱིས་སྒྲིག་ཁུངས་སུ་བཅུག དེ་ནས་སོག་ཡུལ་དུ་ཕེབས་ནས་གསེར་ཁྲིར་མངའ་གསོལ་མཛད་དེ་མཛད་འཕྲིན་རྒྱ་ཆེར་བསྐྱངས། ཕྱི་ལོ་ ༢༠༠༢ ལོར་གོང་ས་སྐྱབས་མགོན་ཆེན་པོ་མཆོག་ཇོ་ནང་མ་དགོན་དུ་གདན་འདྲེན་ཞུས་ཏེ་ཇོ་ནང་རྗེ་བཙུན་ཀུན་དགའ་གྲོལ་མཆོག་གིས་མཛད་པས་ཇོ་ནང་ཁྲིད་བརྒྱ་སོགས་ངེས་དོན་གྱི་ཆོས་འཁོར་རྒྱ་ཆེར་བསྐོར། ཕྱི་ལོ་ ༢༠༠༨ ཟླ་ ༤ ཚེས་ ༡༡ ཉིན་ཇོ་ནང་མ་དགོན་དུ་རྟག་བརྟན་བླ་བྲང་ལེགས་འགྲུབ་གྱི་མཛད་སྒོར་ཆིབས་སྒྱུར་བསྐྱངས། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་ཕྱི་ལོ་ ༢༠༡༡ ལོར་སོག་པོར་ཕེབས། སོག་པོའི་གཞུང་ཕྱོགས་ནས་སོག་པོའི་རྒྱལ་ཁབ་ཀྱི་ཆོས་ཀྱི་དབུ་འཛིན་དུ་མངའ་གསོལ་མཛད་པ་བཞིན་བདག་གིར་བཞེས་ཏེ་བསྟན་འགྲོའི་དོན་རྒྱ་ཆེར་སྤེལ། ཕྱི་ལོ་ ༢༠༡༢ ཟླ་ ༣ ཚེས་ ༡ ཉིན་གྱི་ཞོགས་པ་རྒྱ་གར་གྱི་དུས་ཚོད་ ༥:༥༨ སྟེང་དགོངས་པ་གཞན་དོན་དུ་གཤེགས་སོ།། །།

Share on facebook
Facebook
Share on twitter
Twitter
Share on linkedin
LinkedIn
Share on whatsapp
WhatsApp
Share on telegram
Telegram

2 Responses

  1. མང་པོ་ནོར་འདུག 
    ༡༽ ཁོང་རྭ་ཤར་བའི་རྒྱུད་པ་ཡིན་པ་ཁོང་གི་ཞལ་ནས་དངོས་སུ་གསུངས་པ་མ་ཟད། ད་ལྟ་ཡང་རྒྱུད་ཁུངས་འདེད་རྒྱུ་ཡོད་པས། གདུང་རྒྱུད་གཅིག་པ་ཡིན་སྙམ་ཟེར་དགོས་དོན་མེད།
    ༢༽ ཁལ་ཁ་རྗེ་བཙུན་དམ་པ་སྐུ་ཕྲེང་དགུ་བ་རེད། འདི་ཡོངས་གྲགས་རེད། ཁལ་ཁ་རྗེ་བཙུན་དམ་པ་སྐུ་ཕྲེང་དང་པོ་བློ་བཟང་བསྟན་པའི་རྒྱལ་མཚན་ནམ་རང་བྱུང་ཡེ་ཤེས་རྡོ་རྗེ་རེད། སོག་པོ་ཁལ་ཁའི་རྒྱལ་པོ་ཐུ་ཤི་ཡེ་ཐུ་མགོན་པོ་རྡོ་རྗེའི་སྲས་སུ་འཁྲུངས་པ་རེད། འདི་རྗེ་བཙུན་ཏཱ་ར་ནཱ་ཐའི་དེ་མ་ཐག་པའི་སྤྲུལ་སྐུ་རེད། འདི་ནས་བཟུང་ཁལ་ཁ་རྗེ་བཙུན་དམ་པ་སྐུ་ཕྲེང་གི་མགོ་བཙུགས་པ་རེད། ཁལ་ཁ་རྗེ་བཙུན་དམ་པ་སྐུ་ཕྲེང་བཅུ་བ་ཟེར་བ་ཧ་ཅང་གི་ནོར་བ་ཆེན་པོ་རེད། གཞན་ཆོས་འབྱུང་དང་ལོ་རྒྱུས་མང་པོ་མ་ཤེས་ན་ཡང་། ཁལ་ཁ་ཞེས་པ་གཅིག་པོར་བསམ་བློ་གཏོང་དགོས། 
    ༣༽ འབྲས་སྤུངས་སུ་སློབ་གཉེར་གནང་སྐབས་ཀྱི་དགེ་རྣམ་རྣམ་པ་ནི། དགེ་བའི་བཤེས་གཉེན་ངག་དབང་ཆོས་ལྡན་ཞབས་པ་དང་།  མཁན་པོ་ངག་དབང་ཉི་མ།  དགེ་བཤེས་བཀྲ་ཤིས་རྒྱ་མཚོ་སོགས་རེད། རྭ་སྒྲེང་རིན་པོ་ཆེ་འབྲས་སྤུངས་སུ་བཞུགས་མེད། 
    ༤༽ ཕྱི་ལོ་ ༡༩༩༡ ལོར་སོག་པོས་ཁལ་་ཁ་རྗེ་བཙུན་དམ་པའི་སྐུ་སྐྱེ་རྩར་གཅོད་བྱས་རྗེས། ༧གོང་ས་མཆོག་གིས་ངོས་འཛིན་བཀའ་ཡིག་གནང་ཤིང་། གཞུང་འབྲེལ་ཁྲི་སྟོན་མཛད་སྒོ་དགོས་སྐོར་བསྒྲགས་པ་རེད།
    ༥༽ ཤིང་དཔར་ཡིག་རྙིང་གི་ཁ་བྱང་ཚུན་ཆད་ལ་ཇོ་ནང་ཁྲིད་བརྒྱ་ཞེས་འཁོད་ཡོད་པ་མ་ཟད། ༧གོང་ས་མཆོག་གིས་ཀྱང་ཇོ་ནང་ཁྲིད་བརྒྱ་ཞེས་གསུང་གིན་ཡོད་དུས་ཁྱེད་ཚོས་ཀུན་དགའ་གྲོལ་མཆོག་གི་ཁྲིད་བརྒྱ་ཞེས་བྲིས་པ་ཤིན་ཏུ་ནོར།

    1. མཁན་རིན་པོ་ཆེས་ལམ་སྟོན་གནང་བར་བཀའ་དྲིན་ཆེ་ལགས། ང་ཚོས་བསྒྱུར་བཅོས་བྱ་ངེས་ཡིན་ལགས། དེ་དང་འབྲེལ་བཀའ་འདྲི་ཞིག་ཞུ་ཆོག་པར་ཞུ་རྭ་སྒྲེང་རིན་པོ་ཆེ་དང་ཆོས་འབྲེལ་ཡོད་མེད་ཀྱི་མཁྱེན་རྟོགས་ཡོད་ན་ལམ་སྟོན་གནང་རྒྱུ་བཀའ་དྲིན་ཆེ།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།