ཆགས་པ་གཡུ་ཡི་རལ་གྲི་གྲི་ཤུབ་ནས་བཏོན་ཚེ། །
སྲིད་པ་སྒྱུ་མའི་གྲོང་གི་བཞིན་མཛེས་ཀྱི་བུ་མོར། །
མཛའ་མཐུན་བརྩེ་དུང་རིང་མོའི་རྟེན་འབྲེལ་དེ་འགྲིག་དུས། །
དམ་ལྡན་རྡོ་རྗེ་སྤུན་གྱི་སྡོམ་པ་ནི་ཤོར་སོང་། །
གྲོགས་དང་ན་ཟླའི་བར་གྱི་འགལ་འདུ་ཡི་རྒྱབ་རྩར། །
ལན་གཅིག་མ་མཐུན་གནག་པའི་མ་རུང་གི་བསམ་སྦྱོར། །
བྱུང་ཚེ་སྡང་བའི་སེམས་ཀྱིས་གཤིན་ཡུལ་དུ་བསྐྱལ་པ། །
ལྷན་སྐྱེས་ཁོང་ཁྲོ་ངར་མའི་ཟིལ་ཤུགས་དེ་ལྕི་ཨང་། །
བདག་རྐྱེན་འཇིག་ཚོགས་ལྟ་བའི་དབང་གྱུར་གྱི་སྤང་བ། །
རྣམ་པ་ཡོན་ཏན་ཆུང་ངུའི་ཁེངས་སེམས་ཀྱི་ངོ་བོ། །
སྨྲ་བའི་དབང་བོ་དག་ལ་བཀུར་སྟི་ནི་མེད་པ། །
ངན་སོང་ཡུལ་ལ་བགྲོད་པའི་སྐས་ཐེམ་ནི་ཁྱོས་བྱེད། །
ཤེས་རབ་འོད་ཀྱི་རལ་གྲི་རྨེག་མེད་དུ་བཏང་ཞིང་། །
མུན་པའི་མགུལ་རྒྱན་འདི་ཡང་མཛེས་ཆོས་སུ་སྤྲས་པའི། །
ཡ་ཐོག་སྲིད་པ་རིང་མོའི་ཡང་སྐྱེས་ཀྱི་རྩ་བ། །
སྐུ་བཞིའི་རྒྱལ་སར་འགྲིམ་ལ་བར་ཆད་ནི་ཁྱོས་བྱེད། །
སྲིད་པ་མེ་འོབ་ཆེན་པོའི་སྐ་རགས་ཀྱིས་འཆིང་ཡང་། །
རྣམ་གྲོལ་ཐར་བའི་ལམ་གྱི་ངེས་འབྱིན་གྱི་དབལ་ཤུགས། །
ཡིད་གཉིས་ཐེ་ཚོམ་བློ་ཡིས་བསླུ་བྲིད་ཀྱི་དབང་གིས། །
སྒྱུ་མའི་གྲོང་ནས་གྱེས་པའི་ཤིང་རྟ་ལ་མ་འཇུས། །
སྐྱེ་བ་སྔ་ཕྱི་གཞལ་བ་གཏན་ཚིགས་ཀྱིས་བསྒྲུབས་ཤིང་། །
རྒྱུ་ལས་འབྲས་བུ་སྐྱེ་བ་མངོན་སུམ་གྱིས་གྲུབ་ཀྱང་། །
བདེན་པའི་གནས་ལུགས་བུ་ལ་ལོག་ལྟ་ཡིས་འཇལ་བས། །
སྐལ་བརྒྱའི་རྣམ་དཀར་རི་བོ་རྩ་བ་ནས་བཤིགས་ཐལ། །
རྩོམ་པ་པོ། བཞིན་འཛུམ
༢༠༢༠ ༨ ༡༨་ལ་མ་ཡུམ་ཇོ་ནང་བསྭ་དགོན་གངས་ལྗོངས་རིས་མེད་ལྔ་རིག་མཐོ་སློབ་ཏུ་སྦྱར།