རྒྱལ་ཡོངས་བོད་ཡིག་ཡིག་གཟུགས་ཉིན་མོའི་འབྱུང་ཁུངས།
བོད་ཡིག་གི་ཡིག་གཟུགས་ནི་བོད་ཀྱི་རིག་གནས་སྒྱུ་རྩལ་གྱི་གལ་ཆེའི་གྲུབ་ཆ་ཞིག་ཡིན་ཞིང་། སྤྱི་ལོའི་དུས་རབས་བདུན་པར་བོད་བཙན་པོའི་དུས་སྐབས་སུ་བློན་ཆེན་ཐོན་མི་སམ་བྷོ་ཊས་དེ་སྔའི་ཡི་གེའི་རྨང་གཞིའི་ཐོག་གནའ་བོའི་རྒྱ་གར་གྱི་ཡི་གེ་མི་འདྲ་བའི་ལེགས་ཆ་བསྡུ་ལེན་གྱིས་བོད་རིགས་ཀྱི་རིག་གནས་དང་ཟུང་འབྲེལ་གྱིས་བོད་ཀྱི་ཡི་གེ་འཐུས་ཚང་ཞིག་བཟོས་པ་དང་དེ་རྗེས་ཡིག་གཟུགས་མཁས་ཅན་བརྒྱད་ཐོན་ནས་ཡིག་གཟུགས་མ་ལག་ཆེན་པོ་བརྒྱད་གྲུབ་ཡོད། ཡིག་གཟུགས་མཁས་པ་ཁྱུང་པོ་གཡུ་བྲིས་ཀྱི་དབུ་ཆེན་ཞེས་པའི་ཡིག་གཟུགས་ལ་ཚན་རིག་དང་མཐུན་པའི་ཚད་གཞི་བྱས་ཤིང་། ཕྱིས་སུ་ཆེས་རྒྱ་ཆེ་བའི་ངང་བེད་སྤྱོད་བྱས་པའི་ཡིག་གཟུགས་སུ་གྱུར་ཏེ། ཁྱུང་བྲིས་（ཁྱུང་པོ་གཡུ་བྲིས་ལ་ཟེར་）ཞེས་འབོད།
སྤྱི་ལོ་༢༠༠༨ལོར་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། བོད་ཡིག་ཡིག་གཟུགས་དེ་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་གི་མིང་གཞུང་ཁག་གཉིས་པའི་ནང་བཅུག་ཡོད།
སྤྱི་ལོ་༢༠༡༧ལོའི་ཟླ་༤པར་མཚོ་སྔོན་མི་རིགས་སློབ་ཆེན་དུ་རྒྱལ་ཡོངས་ཀྱི་བོད་ཡིག་ཡིག་གཟུགས་བགྲོ་གླེང་ཚོགས་འདུ་སྐབས་དང་པོ་འཚོགས་ཤིང་། ཚོགས་འདུར་ཞུགས་མཁན་བོད་ཡིག་ཡིག་གཟུགས་མཁས་ཅན་དང་། སྤྱི་ཚོགས་མི་སྣ། དགེ་སློབ་ཀྱི་འཐུས་མི་བཅས་ཀྱིས་ས་གནས་ས་ཐོག་ཏུ་དམངས་གཙོའི་འདེམས་ཤོག་འཕེན་པའི་རྣམ་པའི་ཐོག་ནས་ལོ་ལྟར་སྤྱི་ཟླ་བཞི་པའི་ཚེས་༣༠ཉིན་རྒྱལ་ཡོངས་ཀྱི་བོད་ཡིག་ཡིག་གཟུགས་ཉིན་མོར་གཏན་འཁེལ་བྱས་པ་དང་། ༤ཡིས་བོད་ཡིག་ཡིག་གཟུགས་ཀྱི་དབྱངས་བཞི་མཚོན་པ་དང་། ༣༠ཡིས་བོད་ཡིག་གི་གསལ་བྱེད་༣༠མཚོན་པར་བྱེད་ཀྱི་ཡོད།
ནང་དོན་ཡོང་ཁུངས། རིག་གཞུང་འཆད་འཁྲིད་འཕྲིན་སྟེགས།
ཁོ་བོ་ནི་ཁམས་གསེར་རྟའི་འབྲོག་སྡེ་དཀྱུས་མ་ཞིག་ནས་འཚར་ལོངས་བྱུང་བ་ཡིན།
ཡོང་ཁུངས། འོད་རབ་གསལ་མཛེས་རྩལ།