སྤྱིར་དགེ་འདུན་པའི་སློབ་སྦྱོང་གི་དམིགས་ཡུལ་ནི་འགྲོ་ཀུན་སངས་རྒྱས་སར་འགོད་པའི་ཆེད་ཡིན་པ་སྨོས་མ་དགོས་ཀྱང་། ལམ་སྲོལ་བཟང་པོའི་སློབ་སྦྱོང་གི་ལུགས་སྲོལ་གཞིར་བཟུང་ཐོག་ཚན་རིག་སོགས་དེང་དུས་ཀྱི་སློབ་ཚན་གྱི་ལེགས་ཆ་དང་གནའ་དེང་ཟུང་འབྲེལ་གནང་རྒྱུ་དང་། ལྷག་པར་དུ་དགེ་རྒན་རྣམས་ལ་ཡང་གནའ་དེང་ཟུང་འབྲེལ་གྱི་ཤེས་ཚད་ཡོད་པ་ནི་དེང་སྐབས་ཆེས་གལ་ཆེ་བར་སྣང་།།
ད་དུང་གལ་ཆེ་བ་ཞིག་ནི་སློབ་ཕྲུག་ཚོར་བེད་སྤྱོད་ཀྱི་འདུ་ཤེས་ཕྲ་མོ་ཙམ་ཡང་མེད་པའི་ཐོག་ཕན་སེམས་ཁོ་ནས་བྱིས་པའི་སེམས་ཁམས་དང་མཐུན་པའི་སློབ་ཁྲིད་གནང་རྒྱུ་དེ་ཁ་ཚ་དགོས་གཏུགས་ཀྱི་འོས་འགན་ཞིག་རེད་འདུག
དེས་ན་འདིར་ཇོ་ནང་དུས་འཁོར་གྲྭ་ཚང་དུ་བློ་རྟགས་བསྡུས་གསུམ་གྱི་སློབ་ཕྲུག་རྣམས་ལ་རྟགས་གསལ་གྱི་ལམ་ནས་སློབ་ཁྲིད་གཞིར་བཟུང་ཐོག་སྐབས་རེར་( མུ་བཞིའི་རིགས་རྩེད་) སོགས་བྱིས་པའི་སེམས་ཁམས་དང་མཐུན་ནས་རྩེད་མོའི་ལམ་ནས་སློབ་ཁྲིད་བྱེད་ཀྱིན་ཡོད།
མུ་བཞིའི་རིགས་རྩེད་ཀྱི་རྩེ་ཁྲིམས་ནི།
ཡིག་དྲུག་གི་མོ་རྡེའུ་འཕང་ནས་གྲངས་ལྟར་འགྲོ་ཆོག་མོད། གནས་དེའི་གཡས་དང་ཐོག་གི་མིང་ཚིག་གཉིས་ལ་མུ་གསུམ་མུ་བཞི་གང་ཡོད་ངག་ཐོག་ནས་བཞག་མ་ནུས་ན་རང་སར་འདུག་དགོས་ཀྱིན་ཡོད།
གལ་ཏེ་མ་རིག་པའི་ཁར་བབ་ན་རང་འགུལ་གྱི་མཇུག་ཏུ་བབ་དགོས་ལ། ཤེས་རབ་ཀྱི་རྩར་བབ་ན་ཤེས་རབ་ཀྱི་རྩེའི་མུ་བཞི་ཞོགས་ཐོག་ཏུ་འགྲོ་ཆོག དེ་མིན་ན་རྩ་བའི་མུ་བཞི་བཞག་ནས་ཀྱང་ཐད་གར་འགྲོ་ཆོག རྩེར་དང་པོར་སུ་སླེབ་ན་དེ་སངས་རྒྱས་པ་ཡིན།
༡ མ་རིག་པ་སྦྲུལ་གཟུགས་དང་། ༢ ཤེས་རབ་ནི་སྐས་གཟུགས་ལ་ཟེར།
ད་དུང་ལས་དང་པོ་པར་མུ་བཞི་ལས་གཞན་གཡས་དང་ཐོག་གི་མིང་ཚིག་གང་ཡོད་ཀྱི་མཚན་ཉིད་དབྱེ་བ་ངོས་འཛིན་གྱི་ཐོག་ནས་ཀྱང་དེ་བཞིན་དུ་འགྲོ་ཆོག
ཡིན་ཡང་གལ་ཆེ་བ་ཞིག་ལ་རྒན་ལགས་ཀྱིས་རིགས་རྩེད་དཔང་པོ་གནང་ཐུབ་ན་རབ་ཡིན།
གསར་གཏོད་པ། སློབ་དཔོན་ལྷ་སྐྱབས།