རྒྱལ་བ་ཇོ་ནང་པའི་ལྟ་སྒོམ་སྤྱོད་གསུམ་གྱི་ཁྱད་ཆོས།

དགེ་བའི་བཤེས་གཉེན་ཆེན་པོ་མཁན་ཆེན་ཨ་བཟང་མཆོག་གིས།
ཇོ་ནང་པའི་ལྟ་སྒོམ་སྤྱོད་གསུམ་ལས་ལྟ་བ་ནི། འཁོར་ལོ་ཐ་མའི་དངོས་བསྟན་མཐར་ཐུག་གཞན་སྟོང་དབུ་མ་ཆེན་པོ་ཚུལ་བཞིན་དུ་རྟོགས་པའི་སྤྲོས་བྲལ་རྣམ་པར་མི་རྟོགས་པའི་ཤེས་རབ་སྟེ་ཆོས་ཉིད་བདེན་གྲུབ་ཚུལ་བཞིན་དུ་གཞལ་བའི་བློ་ཤེས་རབ་ཞིག་ལ་འཇོག །
སྒོམ་པ་ནི།
སྟོང་གཟུགས་ཕྱག་རྒྱ་ཆེན་པོ་མངོན་དུ་གྱུར་པའི་ཐབས་ལ། དུས་ཀྱི་འཁོར་ལོའི་བསྐྱེད་རྫོགས་ཀྱི་རིམ་པ་བསྒོམ་པ་ཡིན་ཞིང་། དེ་ཡང་བླ་མ་མཚན་ཉིད་དང་ལྡན་པ་ཞིག་བསྟེན་ཏེ། དལ་འབྱོར་རྙེད་དཀའ་སོགས་ཡང་ཡང་བསམ་སྟེ། བསྐྱེད་རྫོགས་ཀྱི་ཡེ་ཤེས་དངོས་སུ་སྨིན་བྱེད་ལ་བྱིས་པ་འཇུག་པའི་དབང་བདུན་དང་། བུམ་དབང་དང་གསང་དབང་སོགས་ལེགས་པར་ཐོབ་པ་དང་དམ་ཚིག་ཚུལ་བཞིན་བསྲུང་སྟེ། སྔོན་འགྲོ་འབུམ་ལྔ་སྔོན་དུ་སོང་ནས་སྣོད་བཅུད་མ་དག་པའི་སྣང་ཞེན་བཀག་པ་ལ་དུས་འཁོར་ལྷན་སྐྱེས་དང་། ཐུན་མིན་སྔོན་འགྲོ་དབེན་པ་གསུམ་བསྟེན་པ་དང་། དེ་ནས་མི་གཡོ་གསུམ་ལྡན་གྱི་སྦྱར་བའི་རླུང་བཅུའི་ཆ་ཤས་ཅི་རིགས་པ་དབུ་མར་ཐིམ་པ་ལས་བྱུང་བའི་སྟོང་གཟུགས་ལ་རྩེ་གཅིག་ཏུ་མཉམ་པར་བཞག་པ་སོགས་དངོས་གཞི་སྦྱོར་བ་ཡན་ལག་དྲུག་བསྒོམ་པ་ཡིན་ནོ།།
གསུམ་པ་སྤྱོད་པ་ནི།
ལྟོས་མེད་བཞི་ལྡན་གྱི་སྒོ་ནས་བྱམས་སྙིང་རྗེ་བྱང་ཆུབ་ཀྱི་སེམས་དང། བསོད་ནམས་ཀྱི་ཚོགས་ཀྱིས་བསྡུས་པའི་སྤྱོད་པ་ཕ་རོལ་ཏུ་ཕྱིན་པ་རྣམས་དང་། བསྡུ་བའི་དངོས་པོ་བཞི་དང་ཁྱད་པར་དུ་མདོ་སྔགས་གང་གི་སྐབས་སུ་ཡང་མྱོས་འགྱུར་གྱི་ཆང་དང་། ཕྱི་དྲོའི་ཁ་ཟས་སྤོང་བ་དང། བྱིན་ལེན་དང་རུང་ཆུ་འདེབས་པ་སོགས་བཅས་ཁྲིམས་ཕྲ་མོ་རྣམས་ཀྱང་ཕྱག་ལེན་དུ་འདེབས་པར་མཛད་དོ།།