༼ ༡ ༽འཇམ་མགོན་བླ་མར་གུས་བཏུད་ནས།།
བློ་གསལ་སློབ་མའི་བསླབ་བྱ་སྤེལ།།
འཇིག་རྟེན་ཁམས་ཀྱི་བསམ་སྤྱོད་ཀུན།།
ཡ་རབས་མ་རབས་གཉིས་སུ་འདུ།།
༼ ༢ ༽ཡ་རབས་སྤྱོད་པས་འདི་ཕྱིར་བདེ།།
མ་རབས་སྤྱོད་པས་རང་གཞན་འཕུང་།།
ཡ་རབས་ཆུང་ངུ་མིའི་ལུགས་དང་།།
ཆེན་པོ་དམ་པའི་ལྷ་ལུགས་ཡིན།།
༼ ༣ ༽ཡ་རབས་བསམ་བཟང་སྤྱོད་གཙང་ལ།།
ཁྲིད་པ་དགེ་བའི་བཤེས་དང་གྲོགས།།
མ་རབས་བསམ་ངན་འཆལ་སྤྱོད་ལ།།
བསླུ་བྲིད་བྱེད་ཚད་སྡིག་པའི་གྲོགས།།
༼ ༤ ༽ལྟོས་བཅས་གྲོགས་ཀྱི་བཟང་ངན་ལས།།
མི་གཞི་བཟང་ངན་གཉིས་སུ་འབྱུང་།།
བྱིས་པའི་སློབ་གསོའི་ཁ་ཕྱོགས་ལས།།
བསམ་སྤྱོད་ལེགས་ཉེས་ཁྱད་པར་འབྱུང་།།
༼ ༥ ༽བསམ་སྤྱོད་དགེ་དང་མི་དགེ་ལས།།
འབྲས་བུ་འདི་ཕྱིའི་བདེ་སྡུག་གཉིས།།
བདེ་ཐོབ་སྡུག་བསྔལ་བྲལ་འདོད་ན།།
སྐྱོན་ཡོན་སྤང་བླང་ཅིས་ཀྱང་གཟབ།།
༼ ༦ ༽སྐྱོན་མེད་ཡོན་ཏན་ཀུན་ལྡན་པའི།།
སྐྱེ་བོ་གཞར་ཡང་དཀོན་ན་ཡང་།།
རང་གི་སྒོ་གསུམ་སྤྱོད་པར་བརྟག།
སྐྱོན་སྤོང་ཡོན་ཏན་ལེན་ལ་བརྩོན།།
༼ ༧ ༽ཚུལ་འདི་མ་ནོར་ཤེས་བྱས་ནས།།
བྱམས་ལྡན་ཕ་དང་བརྩེ་ལྡན་མ།།
དྲིན་ལྡན་རྒན་དང་མིང་སྲིང་གྲོགས།།
གུས་བཀུར་མཐུན་སྒྲིལ་བྱམས་བརྩེར་བསླབ།།
༼ ༨ ༽ཤེས་ཡོན་འཇོན་ཐང་ཅན་འདོད་ན།།
སྦྱང་བྱ་རིག་པའི་གནས་ལ་བརྩོན།།
སྐྱོན་ཟད་ཡོད་ཏན་འཕེལ་འདོད་ན།།
དགེ་བའི་བཤེས་དང་གྲོགས་བཟང་བསྟེན།།
༼ ༩ ༽བདེ་ཐང་ལྡན་བཞིན་འཚོ་འདོད་ན།།
གཙང་སྦྲ་འཕྲོད་བསྟེན་རྒྱུན་སྐྱོང་གལ།།
སེམས་ཀྱི་བདེ་སྐྱིད་ཡོད་འདོད་ན།།
རྟག་ཏུ་བསམ་པ་དཀར་ལ་བརྩོན།།
༼ ༡༠ ༽ཤེས་ཡོན་མེད་པའི་སྤྱི་སེམས་ནི།།
གཤོག་ཡ་བྲལ་བའི་བྱ་དང་མཚུངས།།
ལྷག་བསམ་བྲལ་བའི་ཤེས་ཡོན་ནི།།
རྣམ་ཤེས་མེད་པའི་འགད་རྫས་འདྲ།།
༼ ༡༡ ༽རིན་ཐང་བྲལ་བའི་དུས་ཚོད་ལ།།
དོན་དང་ལྡན་པར་གཅེས་སྤྲས་ཀྱིས།།
འོད་སྟོང་ལྡན་པའི་མདུན་ལམ་ལ།།
ཤེས་ཡོན་བྱམས་བརྩེའི་གོམ་སྟབས་སྒྱུར།།
༼ ༡༢ ༽དུས་རབས་ཁོར་ཡུག་དང་མཐུན་པའི།།
སྒྲིག་བརྩི་ཁྲིམས་སྲུང་ཐབས་མཁས་ཀྱིས།།
རིག་པའི་གཞུང་ལུགས་རྒྱ་མཚོ་ཡི།།
ཉིང་བཅུད་སྙིང་གི་གསོས་སུ་ལོངས།།
༼ ༡༣ ༽འདི་བྲིས་ལེགས་ཚོགས་འོད་སྟོང་གིས།།
འགྲོ་བློའི་རྨོངས་མུན་རབ་སེལ་ཞིང་།།
ཕན་བདེའི་པད་ཚལ་ཆེར་རྒྱས་པས།།
བློ་གསལ་བུང་བ་ཚིམ་པར་གྱུར།།
ཞེས་སློབ་མའི་བསླབ་བྱ་ཞེས་པ་འདི་ཡང་སྐུལ་བ་པོའི་ཐུགས་བཞེད་སྐོང་བ་དང་གཞན་ལ་ཅུང་ཟད་ཕན་དུ་རེ་ནས་༧སྤྲུལ་མིང་བ་འཇམ་དབྱངས་སྦྱིན་པ་རྒྱ་མཚོས་སྤེལ་བ་དགེ་ལེགས་འཕེལ།། སྤྱི་ལོ་༢༠༡༩ ཟླ་༦ ཚེས་༡༤ ལའོ།།
བཀའ་བསྟན་ཞབས་ཕྱི་མཐུན་ཚོགས་ནས་སྤེལ།