ལེགས་བཤད་ལྡིང་ཁང་། ཚོགས་ཁག་གང་ཞིག་ཡར་རྒྱས་སུ་འགྲོ་བ་ལ་ཞི་བའི་སློབ་གསོ་ཁོ་ནས་ག་ལ་འོང་།
དགེ་བཤེས་དངོས་གྲུབ་དཔལ།
སེམས་ཅན་ཁམས་དབང་མོས་པ་སྣ་ཚོགས་པའི་དབང་གིས་ཞི་བའི་སློབ་གསོ་ཁོ་ནས་ཀུན་སྤྱོད་དང་རིག་གནས་བསམ་བློ་ཡར་རྒྱས་འགྲོ་དཀའ་ལ། དེས་ན་ནང་ཆོས་ཀྱི་དབང་དུ་བྱས་ན་སྟོན་པ་ཐུགས་རྗེ་ཅན་གྱི་གདུལ་བྱའི་ཁམས་དབང་དང་མཐུན་པར་ཞི་རྒྱས་དབང་དྲག་གི་ལས་དུ་མ་གསུངས་པ་དང་། རྒྱལ་ཁབ་ཅིག་སྐྱོང་བ་ལ་ཞི་དྲག་སྣ་ཚོགས་ཅན་གྱི་རྒྱལ་ཁབ་ཀྱི་རྩ་ཁྲིམས་བཟོས་ཡོད་པ་རེད། གཞན་སློབ་གྲྭ་སོགས་ཚོགས་པ་ཆེ་ཆུང་གང་ཡིན་ཡང་སྒྲིག་འཛུགས་ཅན་ཞིག་ཡིན་ན་ནི་ཞི་དྲག་སྣ་ཚོགས་ཀྱི་ཁྲིམས་ཡོད་པ་རེད། ཁྲིམས་མེད་ན་མགོ་མེད་མཇུག་མེད་དུ་ཆགས་ནས་རྗེས་ལུས་དང་འཐོར་ཞིག་གི་རྣམ་པ་ཅན་ཞིག་ཏུ་འགྱུར་ངེས། དེས་ན་ཐོག་མར་ཞི་བའི་སྒོ་མང་པོ་ནས་སློབ་གཙོ་དང་། དེས་མི་འདུལ་བའི་རིགས་ལ་ཆད་ལས་ཡང་ལྕི་དུ་མས་འདུལ་དགོས། གལ་ཏེ་མ་ཐུལ་ན་བཟང་བོ་དག་ཡང་ལ་ངན་པའི་གྲིབ་མ་ཕོག་ནས་ངན་པར་འགྱུར་བས་བཟང་ངན་གཉིས་ཀ་ལ་ཡར་རྒྱས་མེད་འགྲོ་བ་ཡིན། ངག་གི་སློབ་གཙོ་ལ་ཡང་ངོ་བསྟོད་རྐྱང་བ་ཙམ་གྱིས་མི་འགྲིག་སྟེ། འཇིག་རྟེན་པའི་ཁ་ངག་ལ། ཤ་ཚ་བའི་གཏམ་ལ་སྙན་པོ་མེད། །ཅེས་དང་། ཆོས་ཕྱོགས་ནས། གདམས་ངག་མཚང་ཐོག་ཏུ་རྒོལ་བ། ཞེས་པ་ལྟར་ཡིན་པས་སོ། །ཁ་ཅིག་ཆད་ལས་དང་རྡུང་རྡེག་མི་དགོས་པར་སློབ་གསོ་ཁོ་ནས་འདུལ་དགོས་ཟེར་མཁན་དག་ནི་ཉམས་མྱོང་མེད་པའི་སྐད་ཆ་བབ་ཅོལ་དུ་སྨྲ་བ་ཁོ་ན་རེད། འདས་པ་དང་ད་ལྟའི་ལོ་རྒྱུས་ལ་དེ་ལྟར་ལག་ལེན་དུ་བསྟར་ནས་གྲུབ་འབྲས་ཐོན་པ་དཔེ་ཙམ་ཡང་མེད།
སློབ་གསོ་ཁོ་ནས་མིང་སྙན་སྙན་ཡོད་པ་དང་ཆད་ལས་དང་ཁྲིམས་ཞེས་པ་མིང་མི་སྙན་པ་ལྟར་སྣང་ན་ཡང་ལག་ལེན་ལ་ཡར་རྒྱས་བཏང་བ་ལ་ཁྲིམས་ཆད་མེད་དུ་མི་རུང་། སྔོན་ཆད་ཀྱང་དགེ་བསྐོས་སོགས་ལས་སྣེ་ཐོག་ཏུ་བབས་ཚེ་ལག་ལེན་སློབ་གསོ་ཁོ་ན་དགོས་ཞེས་སྒྲིག་ཁྲིམས་འཐོར་ཞིག་ཏུ་སོང་ནས་མཐའ་མ་འཁྱོལ་བ་དང་། དགོན་པ་རེ་ཟུང་རེའི་བཤད་སྒྲུབ་འཐོར་ཞིག་སོང་བ་སོགས་མངོན་སུམ་གྱིས་གྲུབ་པ་ཡིན་པས་གང་འདོད་ལ་གཡམ་རྒྱུགས་མི་བྱེད་པར་【དགེ་འདུན་ཁྲིམས་ཀྱིས་འཚོ། ཉ་མོ་ཆུ་ཡིས་འཚོ། 】ཟེར་བ་ལྟར་དགོས་ལ། སྟོན་པས་ཀྱང་དགེ་སློང་ཕ་ཁྲིམས་ཀྱི་དབང་དུ་བྱས་ནས་ཁྲིམས་ཉིས་བརྒྱ་ལྔ་བཅུ་རྩ་གསུམ་གསུངས་པ་རེད། ཆོས་རྒྱལ་ཁྲི་སྲུང་ལྡེ་བཙན་གྱིས་མི་ཆོས་གཙང་མ་བཅུ་དྲུག་གི་ཁྲིམས་བྱས་ནས་རྒྱལ་ཁྲིམས་ཆོས་བཞིན་དུ་བསྐྱངས་པ་རེད། ལུགས་གཉིས་ལ་རྨོངས་པའི་མི་འགའ་ཞིག་དགེ་རྒན་སོགས་ཀྱིས་རང་ལ་སློབ་གསོ་ལེགས་པར་མི་གནང་བར་བག་མེད་བྱེད་དུ་བཅུག་སྟེ། གཡོ་སྒྱུ་བྱས་པ་ལ་མི་ཐབས་ཅན་དང་མི་བཟང་བོའི་མིང་བཏགས་པ་དང་། རང་ལ་བྱམས་བརྩེས་བསྐྱངས་ནས་སློབ་གསོ་གནད་ཐོག་ཏུ་ཁེལ་པ་གནང་བ་ལ་སྒྲོ་འདོགས་དང་སྐུར་འདེབས་བྱེད་པ་དང་མི་ངན་དང་ཐབས་མེད་ཅེས་སྨྲ་བ་ནི་རྨོངས་པ་ལས་ཀྱང་ཆེས་རྨོངས་པའོ། །ཆོས་འདུལ་བ་ལས། མཁན་པོས་སློབ་བུ་རྒོད་བག་ཅན་དུ་བཏང་ན་ཤན་པ་བྱས་པ་ལས་ཉེས་པ་ཆེ་བར་གསུངས་པ་གནད་ཅིག་ཡོད་དོ། །
གངས་ལྗོངས་རིས་མེད་ལྔ་རིག་མཐོ་སློབ་ཀྱི་བཀའ་པོད་ལྔའི་དཔྱད་རྩོམ་ལུང་རིགས་གཏེར་མཛོད་ཐེངས་གསུམ་པ་ལས་དྲངས་སོ། །
ནང་དོན་ཡོང་ཁུངས། ཇོ་ནང་རིག་གཞུང་སྟེབས་བུ།