རྩོམ་པ་པོ། དགེ་བའི་བཤེས་གཉེན་ཆེན་མོ་བློ་བཟང་ཆོས་འཕེལ་མཆོག
རྒྱལ་སྲས་ཆེན་པོ་ཞི་བ་ལྷའི་སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང༌། །བཅས་ཏེ་ཡུན་རིང་གནས་གྱུར་ཅིག ཅེས་གསུངས་པ་ལྟར། སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེ་ནི་ཕན་པ་དང་བདེ་བའི་འབྱུང་གནས་དམ་པ་ཡིན་པས་ཕན་བདེ་འདོད་པ་རྣམས་ཀྱིས་སངས་རྒྱས་ཀྱི་བསྟན་པ་ལ་སྙིང་ཁུང་རུས་པའི་གཏིང་ནས་ཡིད་ཆེས་དགོས་པར་མ་ཟད་དེ་ལ་ཐོས་བསམ་སྒོམ་གསུམ་བྱེད་དགོས་པ་ཡིན་ནོ།
དེ་ལ་ལུང་རྟོགས་ཀྱི་བསྟན་པ་གཉིས་ཡོད་ཅིང་ལུང་གི་བསྟན་པ་ལའང་མདོ་སྔགས་གཉིས་ལས་སྔགས་ལས་བཤད་པའི་ལམ་དེ་ནི་ཐབས་མང་པོ་ཡོད་པ་སོགས་ཀྱིས་ཉེ་ཞིང་མྱུར་བའི་ཁྱད་ཆོས་དང་ལྡན་པར་མ་ཟད་མདོ་ལམ་ནས་ཀྱང་མཐར་སྔགས་ལམ་ལ་མ་ཞུགས་པར་འཚང་རྒྱ་མི་ཐུབ་པར་རང་གཞན་གྱི་མཁས་པ་དུ་མས་གསུངས་ཏེ། ཐམས་ཅད་མཁྱེན་པ་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། རེ་ཞིག་མདོ་ལམ་ཁོ་ན་ལ་ཞུགས་པ་རྣམས་ཀྱང་མཐར་རྫོགས་པའི་སངས་རྒྱས་ཐོབ་ཀར་སྔགས་ལ་མི་འཇུག་པའི་ཐབས་གཏན་ནས་མེད། ཅེས་དང་། ཀུན་མཁྱེན་འཇམ་དབྱངས་བཞད་པའི་གྲུབ་མཐའ་རྩ་བ་ལས། ཤེས་སྒྲིབ་ཆུང་ཕྲ་སྔགས་ལས་མདོས་མི་ནུས། །ཞེས་གསུངས་པས་སོ། སྔགས་ལ་ཡང་རྒྱུད་སྡེ་བཞི་ཡོད་ཅིང་རྒྱུད་སྡེ་བཞི་ལས་བླ་མེད་ཀྱི་རྒྱུད་ལས་གསུངས་པའི་ལམ་ལ་སངས་རྒྱས་པ་ལ་ཆེས་མྱུར་བའི་ཐབས་མང་པོ་ཡོད་པས་མཆོག་ཡིན་པ་དང་། དེ་ལས་ཀྱང་དུས་ཀྱི་འཁོར་ལོའི་རྒྱུད་ལས་གསལ་བར་བསྟན་པའི་ཟབ་ལམ་རྡོ་རྗེའི་རྣལ་འབྱོར་ཡན་ལག་དྲུག་ནི་མི་འགྱུར་བའི་བདེ་བ་སྙིང་རྗེ་ཆེན་པོ་དང༌། རྣམ་ཀུན་མཆོག་ལྡན་གྱི་སྟོང་གཟུགས་སྟོང་པ་ཉིད་གཉིས་ཟུང་དུ་འཇུག་པའི་སྟོང་ཉིད་སྙིང་རྗེའི་སྙིང་པོ་ཅན་གྱི་ཟུང་འཇུག་གི་ལམ་ཡིན་པ་དང་། ལམ་དེ་ནི་མདོ་རྒྱུད་ཐམས་ཅད་ཀྱི་དོན་གྱི་བཅུད་མ་ལུས་པ་ཕྱུང་བ། ཐེག་པ་ཐམས་ཅད་ཀྱི་ཡང་རྩེ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱི་འབྱུང་གནས། དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་མཆོག་མཐར་ཐུག རྣལ་འབྱོར་གྱི་དབང་ཕྱུག་ཐམས་ཅད་ཀྱི་གཤེགས་ཤུལ་ལམ་འཇུག་ངོགས། ཁམས་དྲུག་ལྡན་པ་རྡོ་རྗེའི་ལུས་དང་ལྡན་པའི་གང་ཟག་ཅིག་ཚེ་གཅིག་ལུས་གཅིག་ལ་སངས་རྒྱས་ཀྱི་ས་ལ་འཁྲིད་པར་བྱེད་པའི་ཉེ་ལམ་མྱུར་ལམ་ཁྱད་པར་ཅན། རྒྱུད་ཀྱི་རྒྱལ་པོ་གཞན་དུ་མ་རྣམས་སུ་རྡོ་རྗེའི་ཚིག་གིས་སྦས་ཤིང་གསང་བའི་དོན་མཆོག་གི་དང་པོའི་སངས་རྒྱས་དུས་ཀྱི་འཁོར་ལོར་མ་སྦས་པར་གསལ་བར་བསྟན་པ། ཕྱག་རྒྱ་ཆེན་པོ་ཟབ་ལམ་རྡོ་རྗེའི་རྣལ་འབྱོར་ཡིན་པས་འཛམ་གླིང་ས་ལྒང་འདིའི་སྟེང་གི་ཡིད་བཞིན་གྱི་ནོར་བུ་རིན་པོ་ཆེ་ཉག་གཅིག་ལྟ་བུ་ཡིན་པས་འདི་ལ་ཐོས་བསམ་སྒོམ་གསུམ་བྱེད་རྒྱུ་ཧ་ཅིང་གལ་ཆེ་བ་དང་། དེང་སང་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་ཉམས་ལེན་བྱེད་མཁན་འདི་ཉིན་མོའི་སྐར་མ་ལྟར་དཀོན་པའི་ཚོད་དུ་སླེབས་ཡོད་པས་འདི་མྱུར་སྐྱོབས་བྱེད་དགོས་སོ། ཁྱད་པར་དུ་ཇོ་ནང་པ་ནི་སྒྲུབ་བརྒྱུད་ཤིང་རྟ་བརྒྱད་ལས་དུས་འཁོར་གྱི་བཀའ་བབས་ཡིན་པས་དུས་འཁོར་གྱི་རྫོགས་རིམ་སྦྱོར་བ་ཡན་ལག་དྲུག་གི་ཉམས་ལེན་འདི་ཉམས་པ་སླར་གསོ་དང་མི་ཉམས་གོང་འཕེལ་དུ་གཏོང་དགོས་པར་མ་ཟད་དུས་འཁོར་གྱི་བསྐྱེད་རིམ་དང་སྒྲུབ་མཆོད་གར་ཐིག་དབྱངས་གསུམ་རྡུང་ཕྱག་ལེན་ཡན་ཆད་ཉམས་སུ་མི་འཇུག་རྒྱུའི་འོས་འགན་ཡོད།
དེས་ན་སྤྱིར་ཆོས་བསྒྲུབ་པའི་རྟེན་དལ་བརྒྱད་འབྱོར་བཅུའི་ལུས་རྟེན་ཁྱད་པར་ཅན་ཐོབ་ཅིང་ཁྱད་པར་དུ་ཉེ་ཞིང་མྱུར་བའི་ལམ་མཆོག་དུས་ཀྱི་འཁོར་ལོའི་བསྐྱེད་རྫོགས་ཀྱི་ཟབ་ལམ་བསྒོམ་པའི་རྟེན་མཆོག་ཁམས་དྲུག་ལྡན་གྱི་ལུས་རྟེན་ཐོབ་པའི་གང་ཟག་ཐམས་ཅད་ཀྱིས་གསེར་ལས་དཀོན་པའི་ཟབ་ཆོས་འདི་ལ་ཐོས་བསམ་སྒོམ་གསུམ་གནད་དུ་འགྲོ་བ་རེ་གནང་རྒྱུ་ནི་སངས་རྒྱས་ཀྱི་བསྟན་པའི་སྙིང་པོ་མི་ཉམས་དར་སྤེལ་གྱི་ཆེད་དང་ཁྱད་པར་དུ་མི་སྒེར་གྱི་ཆེས་གོ་སྐབས་བཟང་པོ་ཞིག་ཡིན་པས་འདི་འཆོར་དུ་མི་འཇུག་པར་རང་དོན་རང་གཟུ་དགོས་པར་སྙམ།
ནང་དོན་ཡོངས་ཁུངས། རིག་པའི་བང་མཛོད་སྤྱི་སྟེགས།