dalai-lama-gettyimages-478851138

གཞེན་སྐུལ།

༄༅།། གངས་ཅན་འགྲོ་བ་ཡོངས་ཀྱི་སྐྱབས་དང་སྐྱོབ་པ་བླ་ན་མེད་པ། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དུས་རྣམས་ཀུན་ཏུ་མི་རིགས་དང་། ཆོས་ལུགས། ཤ་མདོག ཕོ་མོ། རིགས་རུས་སོགས་ཀྱི་དབྱེ་འབྱེད་མེད་པར་སེམས་ཅན་ཐམས་ཅད་ལ་མ་བུ་དང་སྤུན་སྲིང་གི་འདུ་ཤེས་བཟུང་ནས་བརྩེ་གཟིགས་བླ་མེད་གནང་བཞིན་ཡོད་པ་དེ་ལ་ལྡོག་ཕྱོགས་ནས་གོ་བ་ལེན་མཁན་མི་སྲིད་པ་ལྟ་བུ་ཞིག་ཡིན་མོད། ཇི་སྐད་དུ། 

སྤྲེལ་རྒན་རྣམས་ཀྱིས་མི་བཟུང་ནས།། 

མཇུག་མ་མེད་ཅེས་བཞད་གད་བྱེད།།

དེས་ན་ལས་ཀྱིས་མནར་བ་ན།། 

མཁས་པ་བླུན་པོའི་ནང་དུ་འཁྱམས།།

ཞེས་གསུངས་པ་ལྟར། གསར་ཁང་འགའ་རེས་རང་གི་ལྟ་ཚུལ་དང་རིག་གནས་ཀྱིས་གཞན་ལ་ཁྲིམས་ཐག་བཅད་དེ། ༧གོང་ས་༧སྐྱབས་མགོན་ཆེན་པོའི་བྱམས་བརྩེའི་མཛད་བཟང་ལ་ལོག་འགྲེལ་བྱས་པས་ཁོང་གི་དད་འབངས་ཡོངས་དང་། ཞི་བདེ་དང་དྲང་བདེན་ལ་དགའ་བའི་མི་མང་དུང་ཕྱུར་མང་པོའི་སེམས་ཁམས་ལ་བཟོད་ཐབས་བྲལ་བའི་ཕོག་ཐུག་ཆེན་པོ་བཟོས་ཡོད་པས། ད་ནས་བཟུང་སུས་ཀྱང་རང་ལྟ་མཆོག་འཛིན་གྱིས་གཞན་ལ་གཞི་མེད་སྐྱོན་འཛུགས་བྱེད་རྒྱུ་མཚམས་འཇོག་དང་། འབྲེལ་ཡོད་རྣམས་ཀྱིས་ཉེས་པ་ལ་ཉེས་པར་མཐོང་ནས། ༧གོང་ས་༧སྐྱབས་མགོན་ཆེན་པོ་མཆོག་གི་ཞལ་སྔ་ནས་དང་། གནམ་འོག་གི་དད་ལྡན་བྱེ་བ་དུང་ཕྱུར་མང་པོར་དགོངས་དག་དང་། བཟོད་གསོལ་ཞུ་རྒྱུའི་འབོད་བསྐུལ་དང་འབྲེལ། ༧གོང་ས་ཐམས་ཅད་མཁྱེན་པའི་སྐུ་ཚེ་བསྐལ་བརྒྱར་བརྟན་ཅིང་། རླབས་ཆེན་མཛད་འཕྲིན་སྔར་ལྷག་རྒྱས་པའི་སྨོན་འདུན་བཅས། རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་དབུས་སྤྱི་ཁྱབ་ཁང་ནས།    

ཕྱི་ལོ་ ༢༠༢༣ ཟླ་ ༤ ཚེས་ ༢༡ དགེ་བར།

Share on facebook
Facebook
Share on twitter
Twitter
Share on linkedin
LinkedIn
Share on whatsapp
WhatsApp
Share on telegram
Telegram