WhatsApp Image 2023-04-15 at 12.04.34

བཀའ་དྲིན་དྲན་པ།། གསལ་བཤད་དང་འབོད་ཚིག བསྔགས་བརྗོད།

༄༅།།༧གོང་ས་ལྷ་མིའི་རྣམ་འདྲེན་༧སྐྱབས་མགོན་རྒྱལ་བའི་དབང་པོ་གང་ཉིད་ཀྱིས་ཉིན་མཚན་དུས་དྲུག་ཏུ་འཛམ་གླིང་ཞི་བདེ་དང་། མི་རིགས་མཐུན་སྒྲིལ། ཆོས་ལུགས་འཆམ་མཐུན། མདོར་ན། རླབས་ཆེན་གྱི་ཐུགས་བསྐྱེད་དམ་བཅའ་བཞི་སོགས་ཀྱི་ཆེད་དུ་ ‘གང་ལ་གང་འདུལ་དེ་ལ་དེར་སྟོན་པའི’་གསུངས་བ་བཞིན་ལོ་ན་རྒན་གཞོན་དང་། མིང་ཆེ་ཆུང་། གོ་ས་མཐོ་དམན། རྒྱུ་དབུལ་ཕྱུག་སོགས་ཀྱི་ཁྱད་པར་ཟུར་ཙམ་ཡང་མེད་པར་མཉམ་ཉིད་བཏང་སྙོམས་ཆེན་པོའི་ངང་རྒན་པ་དང་འཕྲད་ན་རྒན་པ་དང་། གཞོན་པ་འཕྲད་ན་གཞོན་པ། བྱིས་པ་དང་འཕྲད་ན་བྱིས་པའི་ངང་ཚུལ་སོགས་ཐབས་མཁས་སྣ་ཚོགས་ཀྱིས་སྒོ་ནས་འགྲོ་ཀུན་བུ་བཞིན་དུ་བྱམས་སྐྱོང་གནང་བཞིན་པ་འདི་ནི་རང་ཅག་སློབ་འབངས་ཡོངས་ཀྱི་རིན་ཐང་གཞལ་དུ་མེད་པའི་བསོད་ནམས་ཉག་གཅིག་ཡིན།

ཉེ་ཆར་དད་ལྡན་སློབ་མ་ཞིག་ལ་རྣམ་རྟོགས་དང་འཛིན་པ་མེད་པར་ཐུགས་བརྩེ་བ་ཆེན་པོས་མ་ཡིས་བུ་གཅིག་བཞིན་ཞལ་རྩེད་དང་བཅས་བརྩེ་གཟིགས་གནང་བ་དེ་ལ། ལས་སྣང་མ་དག་པ་འགའ་ཞིག་གིས་སོ་སོའི་རང་རྒྱུད་ཀྱི་ཉམས་མྱོང་དང་མི་རིགས་ཀྱི་ལུགས་སྲོལ་གཞི་རྩར་བཟུང་ནས་གཞན་ལ་ཚད་འཇལ་བྱས་པའམ་ཡང་ན་ཀུན་སློང་ངན་པས་དང་སྐབས་འཚོལ་སོགས་ཀྱིས་སྤྱི་ཚོགས་དྲྭ་ལམ་འགའ་ཞིག་ཏུ་ལོག་འགྲེལ་བྱེད་བཞིན་འདུག་མོད། དོན་དངོས་ཐོག་དེ་ནི་སེམས་དཔའ་མཆོག་དགུང་གྲངས་བཅུ་དྲུག་ཙམ་ནས་བཟུང་ད་བར་གཞན་དོན་ལག་ལེན་དངོས་ཀྱིས་སྒྲུབ་པར་རྩེ་གཅིག་ཏུ་གཞོལ་ནས་གཞན་དོན་ཁུར་ཁྱེར་གྱི་སྙིང་རྗེ་བཅོས་མིན་དང་། བྱང་ཆུབ་སེམས་མཆོག་ཐུགས་རྒྱུད་ལ་འཁྲུངས་བས་དགྲ་གཉེན་བར་མ་གསུམ་མཉམ་པ་ཉིད་དུ་བརྩེ་གཟིགས་ཀྱི་རང་མདངས་ཕྱི་རུ་མངོན་པའི་རྟགས་མཚན་གྱི་ཁྱད་ཆོས་ཤིག་ཡིན་པ་ལས་གཞན་ཆགས་སྲེད་སོགས་ཀྱི་དྲི་ཙམ་ཡང་མེད་པ་ནི་བརྙན་དེར་ཧྲིལ་བོར་མཇལ་བ་ཙམ་གྱིས་ཤེས་ཐུབ་མོད་ད་དུང་དེ་ལ་ལོག་འགྲེལ་བྱས་པ་འདིས་པདྨ་འདམ་གྱིས་མ་གོས་པ་ལྟར་༧སྐྱབས་མགོན་མཆོག་གི་མཛད་འཕྲིན་དང་ཡོན་ཏན་སོགས་ལ་ཅི་ཡང་མི་གནོད་མོད་རང་ཉིད་ཀྱི་གནས་སྐབས་ཀྱི་དགེ་རྩ་གཅོད་པ་དང་ངན་འགྲོ་སྐྱེ་བའི་རྒྱུ་གསོག་པ་དང་། སྐྱེ་བུ་དམ་པ་སྐྱོན་མེད་ཡང་དག་ཞིག་ལ་སྐུར་འདེབས་ཀྱི་སྐྱོན་བརྗོད་ཁོ་ན་ལས་མ་འདས་པས་སྤྱི་སྒེར་གྱི་དྲྭ་རྒྱ་སོགས་ལས་ངེས་པར་དུ་ཕྱིར་འཐེན་བྱེད་དགོས་པའི་འབོད་བསྐུལ་སྙིང་ནས་ཞུའོ།།

སྔོན་མ་ཧྥ་རན་སི་ནས་ལྟ་ཕྱོགས་དང་ལུང་ཚན་ཟུར་དུ་བཞག་ནས་མི་མང་མཉམ་འཛོམས་ཐོག་སྐྱིད་སྡུག་མཉམ་མྱོང་གིས་རྡོག་རྩ་གཅིག་སྒྲིལ་གནང་ཡོད་པ་དང་། ད་ལན་ཡང་རྒྱལ་ཁབ་གང་ས་ནས་གཞོན་སྐྱེས་དང་ཤེས་ཡོན་པའི་སྡེ་ཚན་གྱིས་གཙོ་བོར་སྣེ་ཁྲིད་ཐོག་རྡོག་རྩ་གཅིག་སྒྲིལ་གྱིས་དོན་དངོས་གང་ཡིན་གསལ་བཤད་ཅི་ནུས་བྱེད་བཞིན་པ་འདི་དག་གིས་བོད་ཀྱི་བསྟན་སྲིད་ལ་སྲ་བརྟན་གྱི་རེ་བའི་དབུ་ཁྱུད་བྲིས་སོང་བས་གུས་པས་ཡི་རངས་དང་བཅས་བསྔགས་བརྗོད་གྲངས་མེད་ཞུ་བ་ཡིན། མཐར་དོན་༧ མགོན་པོ་གང་ཉིད་ཀྱི་སྐུ་ཚེ་ཁྲི་ལོར་བརྟན་ཅིང་མཛད་འཕྲིན་དབྱར་གྱི་ཆུ་གཏེར་བཞིན་རྒྱས་ནས་འཛམ་གླིང་ཞི་བདེས་ཁྱབ་གྱུར་ཅིག །

                                                             ཇོ་ནང་༧རྒྱལ་ཚབ་ཀྱི་མིང་འཛིན་པ་ཆོས་མིང་གིས་ཕྱི་ལོ་2023་ཟླ་ 4 ཚེས་ 13 ཉིན་སེམས་ཚོར་ཆེན་པོས་བྲིས།

Share on facebook
Facebook
Share on twitter
Twitter
Share on linkedin
LinkedIn
Share on whatsapp
WhatsApp
Share on telegram
Telegram

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།