དབྱངས་ཅན་མའི་ལོ་རྒྱུས་མདོར་བསྡུས།

               ཇོ་ནང་ཏཱ་ར་ནཱ་ཐས་མཛད།

                         ༡
                     “དེ་ལ་འཕགས་མ་སཱ་ར་སྭ་སྟཱི་འདི་ནི། དོན་དུ་ནི་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ཉིད་ཡིན་ལ། འཇིག་རྟེན་འདིར་སྤྲུལ་པས་འཆི་མེད་དབང་མོའི་སྐུར་བསྟན་པ་ནི། འཇིག་རྟེན་འདི་ཆགས་ནས་མི་རིང་བ་རྫོགས་ལྡན་གྱི་ཐོག་མའི་སྐབས་ཤིག རི་རབ་ཀྱི་ལྷོ་ཕྱོགས་རྒྱ་མཚོ་ཆེན་པོ་བདུད་རྩིའི་རང་བཞིན་དུ་གནས་པ་ལ། ཕྱོགས་ཀུན་ནས་རླུང་བཀོད་པ་མཐའ་ཡས་པ་ལངས་ཏེ། དེས་རྒྱ་མཚོ་རྦ་རླབས་རྣམ་པ་དུ་མར་གཡོས་པ་ལས། སྲིད་པ་གསུམ་གྱི་བརྟན་གཡོའི་སྒྲ་སྐད་ཐམས་ཅད་དྲི་ཟའི་གླུའམ་མིའམ་ཅིའི་དབྱངས་ལྟ་བུར་སྒྲ་སྙན་ཅིང་རྣ་བར་འཇེབས་པས་དཔག་ཚད་བྱེ་བར་ཁྱབ་ཅིང་གནས་སོ། །དེའི་ཚེ་ཚངས་པ་ཆེན་པོ་མི་འཆི་བ་ཞེས་བྱ་བ་ཚངས་པའི་གྲོང་ཁྱེར་ན་སྤྱོད་པས་སྒྲ་དེ་རབ་ཏུ་གསན། ལོ་སྟོང་གི་བར་དུ་རྒྱ་མཚོ་གཡོ་བ་ལ་བལྟས་ཤིང་སྒྲ་དེ་ལ་མངོན་པར་དགའ་བའི་རོ་མྱང་བས་འདུག་གོ །དེའི་ཚེ་སྲིད་པ་གསུམ་གྱི་སྒྲ་དབྱངས་དེ་རྣམས་འདུས་པ་ལས། ལྷ་མོ་འཆོར་སྒེག་ཤིན་ཏུ་རྒྱས་པ་ས་འོག་ས་སྟེང་ས་བླ་གསུམ་ན་འགྲན་ཟླ་མེད་པ་ཞིག་བྱུང་ངོ་། །”

                       ༢
                  “འདིའི་ཡུམ་གྱི་དོད་རྒྱ་མཚོ་ཡིན། ཚངས་པས་བསམས་པ་ནི་ཕའི་ས་བོན་གྱི་དོད། སྒྲ་དབྱངས་སྣ་ཚོགས་ནི་མའི་རྡུལ་གྱི་དོད་དེ། དེ་དག་ཚང་བ་ལས་སྐུ་འཁྲུངས་པས་མཚོ་བྱུང་མ་དང་། རྒྱ་མཚོའི་བུ་མོ་དང་། ཚངས་པའི་སྲས་མོ་དང་། སྒྲ་དབྱངས་ལྷ་མོ་ཞེས་གྲགས་སོ། །ལྷོ་ཕྱོགས་ཀྱི་རྒྱ་མཚོ་དེ་གཤིན་རྗེ་ཆོས་ཀྱི་རྒྱལ་པོའི་གནས་ཡིན་པས། གཤིན་རྗེའི་སྲིང་མོ་ཞེས་ཀྱང་ངོ་། །དེ་ནས་གང་གི་ཚེ་ལྷ་མོ་དེ་ནམ་མཁའི་དཀྱིལ་ན་འདུག་སྟེ། གང་སྐྱེ་བོ་རྣམས་བདེན་པ་དང་བརྟུལ་ཞུགས་དང་ལྔན་ཅིང་འཚེ་བ་མེད་པར་འདུག་པ་ན། ལྷ་མོ་དེ་དགའ་བས་གར་དག་བྱེད་པ་ན་བརྟན་གཡོ་ཐམས་ཅད་ལས་ཡིད་དུ་འོང་བའི་སྒྲ་མཐའ་ཡས་པ་བྱུང་ཞིང་། ཡིད་ཅན་རྣམས་ཉམས་བག་བདེ་ལ། བློ་གྲོས་རྒྱས་པས་སྙན་པའི་དབྱངས་ཀྱིས་དོན་དཔག་ཏུ་མེད་པ་རང་བརྗོད་པར་གྱུར་ཏོ། ། ལྷ་དང་གནོད་སྦྱིན་དང་མི་དང་ཀླུ་རྣམས་སྤྱོད་པ་ལོག་པར་འདུག་པ་ནི། ལྷ་མོ་དེ་ཡང་ཕྱིར་ཕྱོགས་ཏེ་འདུག་ན། སྒྲ་ཐམས་ཅད་ཉམས་ཤིང་སྐྱེ་བོ་ཐམས་ཅད་ལྡབ་ལྡིབ་ཏུ་སྨྲའོ། །དེའི་ཚེ་དབྱངས་ཅན་མ་ཞེས་གྲགས་སོ། །འདི་བདེན་པ་དང་ཚུལ་ཁྲིམས་དང་། འཚེ་བ་སྤངས་པ་རྣམས་ལ་ཆེས་འགོ །དེ་ལས་ལྡོག་པ་ལ་མི་དགྱེས་སོ། ། ཞེས་ཀྱང་དེ་ནས་གྲགས་སོ། །སྒྲ་དབྱངས་ལྷ་མོ་མང་པོ་སྐུ་ལས་སྤྲུལ་ནས། སེམས་ཅན་རྣམས་ཀྱི་དོན་སྤྱོད་པར་བཞེད་པ་ལས། སྒྲ་དབྱངས་ལྷ་མོ་རབ་བཀྲམ་ཞིག་བྱུང་ན། སྐྱེ་འགྲོ་ཐམས་ཅད་མཁས་པ་འབའ་ཞིག་ཏུ་འགྲོ་རྒྱུ་ལས། སྤྱི་མཐུན་ལས་ཀྱི་རྒྱུས། ལྷ་མོ་བརྒྱད་ཁྲི་བཞི་སྟོང་སྤྲོས་པའི་མཚམས་སུ། ཡིད་སྲུབས་བྱེད་པས་རྒྱུན་ལོག་སྟེ། དོན་འཇིག་རྟེན་ན་མཁས་པ་ཉུང་བ་དེས་ཡིན་ནོ་ཟེར་རོ།།”

                       ༣             
           “འདིའི་གཏམ་རྒྱུད་མང་པོ་ལིང་ག་དང་མརྐཎྜེའི་སྔོན་རབས་ན་འདུག་སྟེ་འདིར་རྒྱ་མི་བཀྱེད་དོ། ། དེ་ལ་བྲམ་ཟེའི་གཞུང་ལས། བྱེད་པ་པོ་ཉེར་བཞི་ཡོད་པ་ལས་སྨྲ་བ་ངག་གི་བྱེད་པོ་དབྱངས་ཅན་མ་ཞེས་འདོད་དོ། །དེ་ལ་སཱ་ར་སུ་ཏཱི་ཅེས་པ། སཱ་ར་ནི་མཚོ། སུ་ཏཱི་ནི་བུ་མོ་སྟེ། སུ་དང་ཏཱིའི་བར་ཏུ་སཀ྄་དང་ཨཱ་གློ་བུར་བ་བཅུག་པས། སྭཱ་སྟཱི་རུ་སོང་། མཚོ་བྱུང་ངམ་རྒྱ་མཚོའི་བུ་མོའོ། །སྭ་ར་སྭསྟཱི། དབྱངས་ཅན་མ་ནི། སྭརཿ དབྱངས་བ་ཏཱི་ལྡན་པ་མོའི་དོན་ཡིན། ཚེག་དྲག་ས྄་རུ་སོང་དྲངས། སྭ་ར་སྭ་ཏཱིའམ། སཀ྄་སྦྱར་བས། སྭ་ར་སྭ་སྟཱི། ཞེས་སོ། །”  དབྱངས་ཅན་སྒྲ་མདོའི་འགྲེལ་བ་མཆོག་ཏུ་གསལ་བ་ལས་བཏུས་པའོ། །

ཏཱ་ར་ནཱ་ཐའི་རིག་གཞུང་སྟེགས་བུ་ལས་བཤུས།