མཛད་པ་པོ། སྐྱབས་རྗེ་ངག་དབང་པདྨ་རྣམ་རྒྱལ་མཆོག
རྟེན་འབྲེལ་སྒོམ་ཐབས་ལ། གང་ཟག་གི་བདག་མེད་གཏན་ལ་ཕབ་ནས་སྒོམ་ཚུལ་དང༌། ཆོས་ཀྱི་བདག་མེད་གཏན་ལ་ཕབ་ནས་སྒོམ་ཚུལ་ལོ།།
དང་པོ་ནི། རྒྱལ་བའི་གསུང་རབ་རྣམས་ལས་བདག་མེད་གཏན་ལ་འབེབས་པའི་རིགས་པའི་རྣམ་གྲངས་མཐའ་ཡས་པ་ཞིག་གསུངས་ཀྱང༌། ལས་དང་པོ་པ་རྣམས་ཀྱིས་གནད་བཞིའི་སྒོ་ནས་གཏན་ལ་ཕབ་ན་འཆར་སླ་བས་དེའི་ཚུལ་ནི། རང་ཅག་རྣམས་གཉིད་འཐུག་པོ་ལོག་བཞིན་པའི་གནས་སྐབས་ཚུན་ཆད་དུ། ང་ང་སྙམ་དུ་སྙིང་གི་དཀྱིལ་དུ་དམ་སྤྲིང་ངེ་བློས་འཛིན་པ་ནི་ངར་འཛིན་ལྷན་སྐྱེས་ཡིན་ལ། དེ་ཡང་རང་གིས་ཉེས་པ་དེ་ལྟ་བུ་མ་བྱས་པ་ལ་གཞན་ཞིག་གིས་ཁྱོད་ཀྱི་ཉེས་པ་འདི་དང་འདི་ལྟ་བུ་ཞིག་བྱས་སོ་ཞེས་བསྙོན་བཙུགས་པ་ན། ངས་ཉེས་པ་འདི་ལྟ་བུ་མ་བྱས་པ་ལ་བསྙོན་འདི་འདྲ་བ་ཞིག་འཛུགས་པ་དང་སྙམ་དུ་སྙིང་གི་དཀྱིལ་དུ་དམ་སྤྲིང་སྤྲིང་འཆར་བ་ལྟ་བུའི་ཚེ་ངར་འཛིན་ལྷན་སྐྱེས་ཀྱི་ང་འཛིན་ཚུལ་གསལ་བོར་ཡོད་པས། དེའི་དུས་སུ་ཤེས་པའི་ཆ་ཕྲ་མོ་ཞིག་གིས་བློ་དེ་དང་ང་གང་དུ་བཟུང་ཚུལ་ཇི་ལྟར་བཟུང་བ་བརྟག་པར་བྱའོ།། དེ་ཡང་བློ་ཕྱི་ཤུགས་ཆེ་ན་བློ་སྔ་མ་དེ་ཡེ་ནས་སྟོང་སང་ཞིག་མ་གཏོགས་གང་ཡང་མི་ཡོང་བས་ཤེས་པ་བྱིངས། ང་འོ་སྙམ་པའི་བློ་དེའི་ངོ་བོར་བྲང་ཆགས་སུ་བསྐྱེད་ནས་ཤེས་པའི་ཆ་ཤེས་ཕྲ་མོ་ཞིག་གིས་བརྟག་དགོས་ལ། དེ་བརྟགས་པའི་ཚེ་ངར་འཛིན་ལྷན་སྐྱེས་ཀྱིས་ང་གང་དུ་བཟུང་བའི་གནས་ནི་རང་གི་ཕུང་པོ་ལྔ་བོ་ལུས་སེམས་གཉིས་ལས་དོན་གཞན་མ་ཡིན་ཞིང༌། ཕུང་པོ་ལྔ་བོ་རེ་རེ་བ་དང་ལུས་སེམས་གཉིས་རེ་རེ་བའི་སྟེང་དུ་ཡང་མ་ཡིན་ཀྱང་ཕུང་པོ་ལྔ་ཚོགས་ཙམ་པའམ་ལུས་སེམས་གཉིས་ཚོགས་ཙམ་པའི་བམ་མེ་བ་དེའི་སྟེང་དུ་རྟོག་པས་བཏགས་པ་ཙམ་མ་ཡིན་པར།
དང་པོ་ནས་ཚུགས་ཐུབ་ཏུ་གྲུབ་པའི་ང་ཞིག་ཡོད་པར་འཛིན་པ་ནི། ངར་འཛིན་ལྷན་སྐྱེས་ཀྱིས་ངའི་འཛིན་ཚུལ་ཡིན་ལ། དེའི་འཛིན་སྟངས་ཀྱི་ཡུལ་གྱི་ང་དེ་འགོག་རྒྱུའི་ངའམ་བདག་ཡིན་པས་གཞན་གྱིས་བཤད་པའི་གོ་བ་དང་ཚིག་སྤྱི་ཙམ་མ་ཡིན་པར་རང་གི་རྒྱུད་སྟེང་དུ་ཚུལ་དེ་ཉིད་རྗེན་འཆར་གྱིས་ངེས་པར་བྱ་སྟེ། དེ་ནི་གནད་དང་པོ་དགག་བྱ་ངེས་པའི་གནད་དོ།།
གཉིས་པ་ཁྱབ་པ་ངེས་པའི་གནད་ནི། ང་འོ་སྙམ་དུ་སྙིང་གི་དཀྱིལ་དུ་དམ་སྤྲིང་སྤྲིང་འཛིན་པའི་བློ་དེས་བཟུང་བའི་ང་དེ་རང་གི་ཕུང་བོ་ལྔའི་སྟེང་དུ་ཡོད་ན། ང་དེ་ཕུང་པོ་ལྔ་དང་གཅིག་ཏུ་ཡོད་དམ་ཐ་དད་དུ་ཡོད། ཡོད་ཚུལ་དེ་གཉིས་ལས་གཞན་པའི་ཡོད་ཚུལ་ཕུང་གསུམ་པ་གཏན་མི་སྲིད་དེ། ཆོས་གང་དང་གང་ཡིན་ཡང་ན་གཅིག་གི་རྣམ་པར་ཡོད་དགོས། ཡང་ན་དུ་མའི་རྣམ་པར་ཡོད་དགོས་ལ། ཡོད་ཚུལ་དེ་གཉིས་ལས་གཞན་པའི་ཡོད་ཚུལ་ཕུང་གསུམ་པ་གཏན་མི་སྲིད་སྙམ་དུ་ཐག་བཅད་པར་བྱའོ།།
གསུམ་པ་བདེན་པའི་གཅིག་བྲལ་ངེས་པའི་གནད་ནི། དེ་ལྟར་བཟུང་བའི་ང་དེ་ཕུང་པོ་ལྔ་དང་གཅིག་ཏུ་ཡོད་དོ་སྙམ་ན་གང་ཟག་གཅིག་ལ་ཕུང་པོ་ལྔ་ཡོད་པ་བཞིན་དུ་ང་ཡང་ལྔ་ཡོད་པར་འགྱུར་བ་དང༌། ཡང་ན་ང་གཅིག་ཡིན་པ་བཞིན་དུ་ཕུང་པོ་ལྔ་ཡང་ཆ་མེད་དུ་གཅིག་དུ་གྱུར་པ་སོགས་ཀྱི་ཉེས་པ་དུ་མ་ཡོད་པས། དེ་ལྟར་བཟུང་བའི་ང་དེ་ཕུང་བོ་ལྔ་དང་གཅིག་མ་ཡིན་སྙམ་དུ་བསམ། བཞི་བ་བདེན་པའི་དུ་བྲལ་ངེས་པའི་གནད་ནི། དེ་ལྟར་བཟུང་བའི་ང་དེ་ཕུང་པོ་ལྔ་དང་གཅིག་ཏུ་མ་གྲུབ་ཀྱང༌། ཕུང་པོ་ལྔའི་སྟེང་དུ་ཐ་དད་དུ་གྲུབ་སྙམ་ན། ཕུང་པོ་ལྔ་ཡང་གཟུགས་ཀྱི་ཕུང་པོ་ལ་སོགས་པ་རེ་རེ་ནས་བསལ་བའི་རྗེས་སུ་འདི་རྣམ་ཤེས་ཀྱི་ཕུང་པོའོ།། ཞེས་ཟུར་དུ་ངོས་འཛིན་རྒྱུ་ཡོད་པ་བཞིན་དུ། ཟུགས་ཕུང་སོགས་རེ་རེ་ནས་བསལ་བའི་འོག་ཏུ་དེ་ལྟར་བཟུང་བའི་ང་དེ་འདི་འོ་ཞེས་ཐ་དད་དུ་ངོས་འཛིན་རྒྱུ་དགོས་པ་ལས་དེ་ལྟར་མི་འདུག་པས། དེ་ལྟར་བཟུང་བའི་ང་དེ་ཕུང་པོ་ལྔ་དང་ཐ་དད་དུ་མ་གྲུབ་སྙམ་དུ་བསམ། དེ་ལྟར་གནད་བཞིའི་དཔྱད་པ་བྱས་པ་ལ་བརྟེན་ནས་ངར་འཛིན་ལྷན་སྐྱེས་ཀྱིས་བཟུང་བ་ལྟར་ཀྱི་ང་དེ་མེད་པར་ངེས་པ་ན་ངེས་ཤེས་དེ་ཉིད་ཀྱི་རྒྱུན་བྱིང་རྒོད་དང་བྲལ་བར་རྩེ་གཅིག་ཏུ་བསྐྱངས་བར་བྱའོ།། དེ་ཡང་ངེས་ཤེས་དེ་ཉིད་ཤུགས་ཅུང་ཟད་ཆུང་དུ་སོང་བ་ན། ལས་དང་པོ་པ་རྣམས་ཀྱིས་སྔར་བཤད་པ་ལྟར་གནད་བཞིའི་དཔྱད་པ་ལ་བརྟེན་ནས་བདེན་མེད་ཀྱི་ངེས་ཤེས་འདྲེན་པར་བྱེད་ལ། བློ་མཐོ་བ་རྣམས་ཀྱིས་ངར་འཛིན་ལྷན་སྐྱེས་ལ་ང་ཇི་ལྟར་སྣང་བ་ལྟར་གྲུབ་མ་གྲུབ་དཔྱད་པ་བྱས་པ་ལ་བརྟེན་ནས་གནད་བཞིས་དཔྱད་པ་བྱས་པ་དང་འདྲ་བར་བདེན་མེད་ཀྱི་ངེས་ཤེས་འདྲེན་པས། དེའི་ཚེ་ངས་ངོར་ང་རང་བཞིན་མེད་པར་ངེས་ཤེས་དམ་སྤྲིང་བ་དང༌། སྣང་ངོར་དགག་བྱ་བདེན་གྲུབ་བཀག་ཙམ་གྱིས་སྟོང་སོང་བའི་ཁྱད་པར་གཉིས་ལྡན་དུ་བྱས་ནས་རྩེ་གཅིག་ཏུ་སྐྱོང་བ་ནི་མཉམ་བཞག་ནམ་མཁའ་ལྟ་བུའི་སྐྱོང་ཚུལ་ལོ།། རྗེས་ཐོབ་ཏུ་ང་ལ་སོགས་པའི་ཆོས་ཐམས་ཅད་སྒྱུ་མ་ལྟ་བུའི་རྣམ་རོལ་དུ་བསྒོམ་པར་བྱ་སྟེ། དེ་ང་མཉམ་བཞག་ཏུ་བདེན་རྫུན་པ་ལྟ་བུའི་རྣམ་རོལ་དུ་འཆར་བ་ལ་བསླབ་པར་བྱའོ།།
གཉིས་པ་ཆོས་ཀྱི་བདག་མེད་གཏན་ལ་ཕབ་ནས་སྒོམ་ཚུལ་ལ་གཉིས། འདུས་བྱས་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་དང༌། འདུས་མ་བྱས་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་ལོ།།
དང་པོ་ལུས་ལྟ་བུ་ལ་མཚོན་ན། དེ་ཡང་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདིའི་སྟེང་དུ་རྟོག་པས་བཏགས་ཙམ་མ་ཡིན་པར་ཚུགས་ཐུབ་ཏུ་གྲུབ་པའི་ལུས་ཡོ་རེ་བ་ཞིག་ཡོད་པར་རང་ཅག་རྣམས་ལ་བསྙོན་མེད་དུ་འཆར་བ་ནི་དགག་བྱའི་སྣང་ཚུལ་ཡིན་ལ། དེ་ལྟ་བུའི་ལུས་དེ་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདིའི་སྟེང་དུ་ཡོད་ན། ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་འདི་དང་གཅིག་ཏུ་གྲུབ་བམ་ཐ་དད་དུ་གྲུབ། གཅིག་ཏུ་གྲུབ་ན་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་ཕ་མའི་ཁུ་ཁྲག་ལས་གྲུབ་པ་ཡིན་པས། རྣམ་ཤེས་འཇུག་པའི་གཞིར་གྱུར་བའི་ཁུ་ཁྲག་གི་ཐིགས་པ་དེ་ཡང་ཤ་རུས་གདོས་བཅས་ཀྱི་ཡན་ལག་ལྔ་ཚོགས་ཙམ་གྱི་ལུས་སུ་གྱུར་བ་དང༌། ཡན་ལག་ལྔ་ཡོད་པ་བཞིན་དུ་ལུས་ཀྱང་ཡན་ལག་ལྔ་ཚོགས་པས་ལུས་ལྔར་འགྱུར་ལ། ཐ་དད་དུ་གྲུབ་ན་མགོ་ལ་སོགས་པའི་ཡན་ལག་རེ་རེ་ནས་བསལ་བའི་རྗེས་སུ་ལུས་ལ་འདི་འོ་ཞེས་བསྟན་རྒྱུ་ཡོད་དགོས་པ་ལས་དེ་ལྟར་མི་འདུག་པས་དེ་ལྟ་བུའི་ལུས་གཏན་ནས་མེད་སྙམ་དུ་ངེས་ཤེས་དྲངས་ནས་བསྐྱང་བར་བྱའོ།།
གཉིས་པ་འདུས་མ་བྱས་པ་རང་བཞིན་མེད་པར་གཏན་ལ་ཕབ་ནས་སྒོམ་ཚུལ་ནི། དེ་ཡང་ནམ་མཁའ་ལྟ་བུ་ལ་མཚོན་ན་ཕྱོགས་མཚམས་ཀྱི་ནམ་མཁའི་ཆ་དུ་མ་ཞིག་ཡོད་པས་དེ་རྣམས་དང་གཅིག་ཏུ་གྲུབ་བམ་ཐ་དད་དུ་གྲུབ། དཔྱད་དེ་བདེན་མེད་ཀྱི་ངེས་ཤེས་དྲངས་ནས་སྔར་ལྟར་བསྒོམ་པར་བྱེད་དོ།། མདོར་ན་ང་དང་ཕུང་པོ་དང་རི་ར་བ་ཁང་ཁྱིམ་ལ་སོགས་པ་འཁོར་འདས་ཀྱི་ཆོས་ཐམས་ཅད་རྟོག་པས་བཏགས་པ་ཙམ་མིན་པར་རང་ངོས་ནས་གྲུབ་པ་རྡུལ་ཙམ་མེད་པར་ངེས་པའི་ངེས་ཤེས་དེ་ཉིད་རྩེ་གཅིག་ཏུ་སྐྱོང་བ་མཉམ་བཞག་ནམ་མཁའ་ལྟ་བུ་དང༌། རྗེས་ཐོབ་ཏུ་ཡུལ་སྣང་ཐམས་ཅད་རྒྱུ་རྐྱེན་ཚོགས་པ་ལ་བརྟེན་ནས་བྱུང་བའི་བདེན་མེད་རྫུན་པའི་རང་བཞིན་དུ་ཤེས་པའི་རྗེས་ཐོབ་སྒྱུ་མའི་རྣལ་འབྱོར་གཉིས་ལེགས་པར་བསྐྱངས་བ་ལ་བརྟེན་ནས་དཔྱད་པ་བྱས་སྟོབས་ཀྱིས་དྲངས་བའི། ལུས་སེམས་ཤིན་སྦྱངས་ཀྱི་བདེ་བའི་ཟིན་པའི་མཉམ་བཞག་དེ་ཉིད་ལྷག་མཐོང་མཚན་ཉིད་པར་འཇོག་དགོས་པ་ཡིན་ནོ།། ལས་དང་པོའི་དཔྱད་སྒོམ་ལགས་ལ་ཆོས་ཚན་གསུམ་པོས་གཟིགས་རྟོག་མཛད་དེ་ཤེས་དགོས་ལགས། གལ་ཆེ་ངེས་ཡུལ་གྱི་འཛིན་སྟངས་ཀུན་ཞིག་དགོས་ལགས་སོ།། ང་གསར་མ་ཡིན་པའི་དེ་ལྟར་བྲིས།། བློ་གསར་བ་རྣམས་ལ་ཨེ་ཕན་སྙམ།། ལས་དང་པོ་རྣམས་ཀྱིས་དང་ལེན་མཛོད།། བློ་རྒན་པ་རྣམས་ལ་དགོས་པ་ཆུང༌།།
ནང་ཡོན་ཡོངས་ཁུངས། གོང་སྨད་རྩོམ་རིག་སྤྱི་སྟེགས།