ལྔ་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
དེ་ནས་མི་རིང་བར་དུས་ཆེན་ཡང་ཚུགས། དེ་གྲོལ་ནས། {ཆེན་མོ་སོགས་ཀྱི་དགེ་མཚན་ཡང་མཐོང་ཞིང་།} དཔལ་ལྡན་བླ་མ་དམ་པ་རྗེ་བཙུན་རྡོ་རིངས་པ་ཆེན་པོ་འཇམ་དབྱངས་ཀུན་དགའ་རྒྱལ་མཚན་གྱི་དྲུང་དུ། སྒྲོལ་དཀར་གྱི་རྗེས་གནང་ཐོག་མའི་རྟེན་འབྲེལ་དུ་ཞུས། སླར་གཤེད་དམར་ལྷ་ལྔའི་དབང་ཞུས། དེ་དུས་དབང་ཞུ་བའི་འདུན་པ་དང་བླ་མ་ལྷར་བསྒོམས་པ་སོགས་གསལ་ཞིང་མོས་གུས་སྐྱེ་བར་བྱུང༌།
གཞན་ཡང་དེ་སྐབས་སྒྲུབ་སྡེར་གསུང་ངག་ལམ་འབྲས་ལ་སོགས་པ་ཆོས་འཁོར་རྒྱ་ཆེན་པོ་བསྐོར་བ་གནང་གིན་འདུག་པས། གང་ལ་གང་འཚམ་གྱི་རྗེས་གནང་བྱིན་རླབས་སོགས་ཀྱང་ཞུས་ཤིང༌། ཁྱད་པར་དཔལ་ཀྱཻ་རྡོ་རྗེ་ཡབ་བཀའ་ཡུམ་བཀའི་དབང་གི་མངོན་པར་རྟོགས་པ་བདུན་ལྡན་གྱི་ཚུལ་གྱིས་ནོས། འདི་དག་གི་གོང་དུ་བླ་མེད་ཀྱི་དབང་གཉིས་གསུམ་ཙམ་ཞུ་མྱོང་ཡང་གསང་མཚན་ཙམ་ཡང་བློ་ལ་མ་ཟིན་འདུག །འདི་སྐབས་ཚིག་དོན་གྱི་གོ་རྟོགས་ཇི་བཞིན་རྙེད་པ་མ་བྱུང་རུང༌། མཎྜལ་འབུལ་མཚམས་དང་དབང་རྫས་སོགས་ཀྱི་རིམ་པ་ཀྲིགས་སེ་བློ་ལ་ཆགས། དཀྱིལ་འཁོར་དུ་བླ་མས་དབང་བསྐུར་བའི་གོ་བ་དང་། བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་དུ་བྱེད་པ་སོགས་ཀྱི་རྣམ་གཞག་ཆགས་པ་ཙམ་བྱུང༌། གཤེད་དམར་གྱི་དབང་དང༌། ཀྱཻ་རྡོར་གཉིས་ཀ་ལ་མེ་ཏོག་གཙོ་བོས་བཞེས། དེ་དང་མཐུན་པའི་མིང་བསྩལ། གསང་མཚན་ཡང་གྲོགས་ཀྱིས་འཛིན་པ་ལ་མ་ལྟོས་པར་རང་བློས་མ་བརྗེད་པར་གཟུང་ཐུབ།
དཔལ་ལྡན་བླ་མ་དམ་པ་གྲུབ་པའི་ཁྱུ་མཆོག་ཆེན་པོ་རྗེ་བཙུན་བྲག་སྟོད་པར་ཡང༌། སྒྲོལ་དཀར་གྱི་རྗེས་གནང་དང༌། བླ་མེད་ཀྱི་དབང་འགའ་ཞིག་དང༌། ཚེ་དབང་བརྒྱ་ཚར། ཁྱུང་ཁྲ་དུས་འཁོར་ལུགས། སྒྲུབ་ཐབས་རྒྱ་མཚོ། གྲུབ་བརྒྱའི་ཆོས་སྐོར་སོགས་ཐོབ།
རྗེ་དྲུང་རིན་པོ་ཆེ་ཇོ་ནང་པའི་དྲུང་དུ་ཡང༌། པུ་ཊའི་ཟུར་བཀའ་སོགས་རྗེས་གནང་འགའ་ཞིག་ཞུས།
དབྱར་སྨད་བྱང་དུ་སྡེ་པ་སྐུ་མཆེད་གཟིགས་ཕྱོགས་མི་གཅིག་པའི་དུས་མི་བདེ་ལ་བརྟེན་ཞབས་དྲུང་སྟོབས་དྲུང་ཡང་ཡུལ་བུད་གལ{ཤར་ཕྱོགས་ལ་ཕེབས་དགོས་ཤར། དེ་སྔོན་ཆོས་རྒྱལ་ཀུན་དགའ་རིན་ཆེན་བཞུགས་དུས་དངོས་ཀྱིས་ཅུང་ཟད་མ་སླེབས། དེ་ཕྱིན་ཆད་ནས་ཞབས་དྲུང་སྟོབས་རྒྱས་ཀྱིས་ཀྱང་། ཁོང་པ་ཡོད་ན་རྗེ་དམ་པའི་བསྟན་པ་ཅུང་ཟད་སྤེལ་བའི་འདུན་པ་དར་རྒྱས་སུ་སྤེལ་བའི་དགོངས་གཏད་ཡོད་མོད་ཀྱི}། སོ་སོའི་དུས་མཚམས་ཀྱི་དར་རྒུད་འབྱུང་བ་འདུས་བྱས་སྤྱིའི་ཆོས་ཉིད་དུ་འདུག །དེ་རྗེས་སུའང་སྐུ་མདུན་ཞིང་ཤག་པ་ལོ་ཤས་བཞུགས་ནའང་། འཕྲལ་ཕུན་སུམ་ཚོགས་པ་ཡོང་བ་ཡོད་ནའང་དེའང་དེ་ལྟའོ། །
འོན་ཀྱང་། གནས་སྐབས་འཇིག་རྟེན་ཕྱོགས་ཀྱི་སྤྲོས་སྤྲོས། བཀུར་བཀུར། ཅོག་ཅོག་མེད་པ་དེ་ཀ་ཕན་ཡོན་དུ་སོང་སྟེ། རང་གི་ཚུགས་ཁྱེར་ལ་ལྟོས་པའི་ཐོས་བསམ་སྒོམ་གསུམ་འཕེལ་བར་བྱུང་བས། བླ་མ་དཀོན་མཆོག་གི་ཐུགས་རྗེས་མ་དོར་པར་ངེས་ཤེས་སྐྱེས་སོ། །
དེ་སྐབས་ཡར་ལམ་ཡོན་བདག་སོ་སོས་བྱིན་པའི་རྫས་ཀྱང་བཟང་རབ་ཡོད་པ། སྨོན་གྲོ་བ་དང་ཡོན་མཆོད་གཅིག་བྱེད་པའི་ཁུངས་བྱས། སྐྱོས་མར་མིང་བཏགས་པའི་སུམ་ཆ་ཙམ་སྨོན་གྲོར་བསྟབས་པ་ཡིན་ནའང་། གཞན་གྱིས་སེལ་བཅུག་པ་ཡིན་ནམ་སེམས། བར་སྐབས་ནས་འཕན་ནེ་རང་གིས་ཀྱང་རེག་ལ་མ་འབྱར་བའི་འཕྲལ། ལག་པ་དམ་ལ་བསམ་ངན་གྱི་དོགས་པ་ཁོང་འཆང་རང་བྱས།
གཞན་བྱང་ཕྱོགས་ཀྱི་བླ་མ་འདྲ་དང་ཅི་རིགས་པས{ལྟེམས་སེ་མཛད}། དེ་སྐབས་ངེད་རང་རྩེད་མོའི་བྱ་བ་ལ་གཏོར་རྒྱག་དང༌། འཇིགས་བྱེད་ཀྱི་ཕྱག་མཚན་ཐམས་ཅད་དཔལ་ལགས་ཀྱིས་བཅོས་ཤིང་། དེ་རྣམས་ཐོགས་པའི་འཆམ་བྱེད་ཚུལ་སོགས{ཆོས་ཀྱི་སྣང་བ་དང་འབྲེལ་བའི}རྩེད་མོ་ཙམ་ལ་སྒྲོ་བཏགས་པའི་བདག་པོ་ནམ་མཁའ་རྒྱལ་པོ་སོགས་ལ། ཁོང་དཔོན་སློབ་ཀྱིས་ཞབས་དྲུང་སྟོབས་ཀྱི་ཕྱོགས་ཞེན་བྱས། གཏོར་རྒྱག་བྱེད་ཀྱིན་ཡོད་པར་འདུག་ཚུལ་སོགས་མང་པོ་བྱུང་སྟེ་ཡ་ཆ། དེ་ལ་བདེན་ཟེར་འཆའ་བ་ནི་དེ་ལས་ཀྱང་དགོད་བྲོ། {སྙན་དུ་འབུལ་མི་ཡང་བྱུང་འདུག} གཞན་ཡང་བརྗོད་གླེང་སྣ་ཚོགས་ལ་བརྟེན་པའི་བདག་པོ་སྐུ་མཆེད་དེ་ཀུན། ཁོང་ཚོ་རང་འདས་འདས་ཀྱི་བར་དུ་མ་མགུ་པའི་ཁུངས་རང་གདའ།
དེ་སྐབས་ཆོས་ལུང་གི་ཆོས་ར་ན། ཀུན་མཁྱེན་དོན་དཔལ་བའི་ཐུགས་དམ་འཇིགས་བྱེད་ཀྱི་རས(རིས)བྲིས་ཞལ་བ་ལ་སྦྱར་བ་དེ་མཐོང་རེས་ཀྱི(ཀྱིས)ཡིད་ལ་དགའ་བ་དཔག་ཏུ་མེད་པ་སྐྱེ་ཞིང༌། ཁྱད་པར་དུ་འཕགས་པའི་མངོན་རྟོགས་ཀྱི་ཚིགས་བཅད་དང༌། འཇིགས་བྱེད་ཀྱི་སྔགས་གསུམ་པོ་དཔལ་ལགས་ཀྱིས་ལན་རེ་ཙམ་འདོན་གྱིན་འདུག་པ་འཛིན་རྩོལ་མ་དགོས་པར་རང་བབས་སུ་བློ་ལ་ཆགས།
སྐབས་ཤིག་མཆོད་ཁང་རྩེ་ནས་རྒྱུད་སྡེ་ལྔའི་དཀྱིལ་ཐང་ཆེན་མོ་དེ་བླངས་ནས་ལྟ་ཡིན་ཡོད་སྐབས། ལྷ་མགྲོན་མྱུར་མཛད་མགོན་པོའི་སྐུ་དང་ངེད་རང་གི་བར་དེར་བྱ་རོག་ཅིག་ལྷུང་ཐབས་སུ་བབས། མ་ཧཱ་ཀ་ལ་དེ་ན་ཟེར་ད་བྱས་གདའ། དགུན་དུས་ཡིན་ནའང་ཐུགས་ལ་མེའི་རྣམ་པ་ཅི་ཡང་འབར་བ་ཞིག་བྱུང༌།
{ལོ་དེ་ཉིད་ཀྱི་ཧོར་ཟླ་བཅུ་པའི་ནང་དུ} སྨོན་གྲོར་ཡང་ཕྱིན་ནས་ཟླ་གཅིག་ཙམ་བསྡད། ཡང་ཆོས་ལུང་དུ་འོངས། དགུན་ཟངས་ཀྱི་འཕྲལ་ཆས་དཀོན་ནེ་བ་བྱུང༌། དེ་ལ་རྒྱུ་མཚན་མང་པོ་བདོག །
འབྲུག་ལོ་ཧོར་ཟླ་དང་པོའི་ཚེས་གཅིག་ལ་ཀློག་ཡིག་སློབ་པའི་འགོ་ཚུགས། ཀ་མད་སུམ་ཅུ་ལ་དེ་ཉིན་ཚར་གསུམ་བཞི་ཞིག་ངོས་སྦྱོར་བྱས། སང་ཞོགས་ཀློག་པས་ཧའི་ཐད་དུ་ཅུང་ཞིག་བསམ་དགོས{པ་བྱུང}། གཞན་རྣམས་ཐོགས་མེད་དུ་ཤར་གྱིས་བྱུང༌། བརྩོན་འགྲུས་ཆེར་མ་བྱས་པས། ཀློག་བྱང་རབ་ཏུ་འགྲོ་བ་ལ་ལོ་ལྷག་ཙམ་ཐོགས།
ཡང་དེ་སྐབས་ཟླ་བོ་འགའ་དང་ལྷན་ཅིག་རྡོ་ཆལ་དུ་རྩེད་མོ་བྱེད་འཕྲོ་ལ་འཕྲལ་དུ་ཟླ་བོ་ཚོ་ལ་མ་སྡོད་འགྲོ་བྱས། ནང་དུ་སླེབ་འཕྲལ་རྦབ་ཤིན་ཏུ་རང་ཆེ་བ་ཞིག་ལྷུངས་པས། ངོ་མཚར་དུ་བརྩི་བ་བྱུང༌།
དེ་སྐབས་གཏིང་སྐྱེས་ནས་འབོད་མི་བྱུང་ཞིང་། ལམ་ཀུན་ན་ཙེག་གེའི་བག་ཆེ་བར་ཡོད་ཟེར་བས། འཕན་ནེ་སོགས་ཕལ་ཆེར་གྱིས་མ་ཕྱིན་པ་ལེགས་ཚུལ་མཛད་ཀྱིན་འདུག་ནའང༌། ཙེག་གེ་ལ་རྡོ་བརྡུང་བཏང་བས་ཆོག་བྱས།
ཧོར་ཟླ་གསུམ་པའི་ཚེས་བཅུ་གཅིག་ལ་བཏེག(བཏེགས)ནས་རིམ་གྱིས་གདོང་དགར་འབྱོར། དེ་སྐབས་དཔོན་ས་དཔོན་སྒྲེས་པོ་དང་། རྣམ་རྒྱལ་ལགས་གཉིས་ཡོད། རིམ་པས་མདོས་འདྲར་ས་སྐྱོང་རབ་མཛེས་པ་དང་མཇལ་ཞིང༌། དེའི་སང་ཉིན{ཡོན་མཆོད་ལྷན་དུ་གཏིང་སྐྱེས}མཁར་ཆེན་དུ་འབྱོར། བསུ་བ་སོགས་ཀྱི་བཀོད་པ་རྒྱ་ཆེན་པོ་ཡང་མཛད། བླ་མ་རིན་པོ་ཆེ་འཇམ་དབྱངས་ཀུན་དགའི་མཚན་ཅན་དང་ཡང་མཇལ། དེ་སྐབས་མོས་གུས་དགའ་ཚད་ཡོད། རྗེས་སུ་མོས་གུས་ཆེར་གཏོང་དགོས་རྒྱུར་འདུག་སྟེ། དྲེད་པོ་གསུམ་ལ་ཆོས་དྲེད་ཐུ་ཟེར་བ་དེ་རང་ཡོད་པར་གདའོ། །
{སྔ་གོང་ཆོས་ལུང་ནས་ཕེབས་སོང་དུས། བླ་མ་དང་འབྲལ་མི་ཕོད་པ་ཤིན་ཏུ་སེམས་འཕྲེང་བའི་ཉིན། རྩེར་གྱི་མཆི་མ་རྒྱུན་མི་ཆད་པར་བྱུང་ཞིང་། དེ་སྐབས་མཇལ་བ་ན་ཡང་དགའ་བ་བླ་ན་མེད་པ་ཐོབ།} དེ་ནས་ཞག་ལྔ་ནས་བླ་མ་རིན་པོ་ཆེ་ནི་གསེར་མདོག་ཅན་དུ་ཆོས་འཁོར་ལ་ཐེགས་སོང༌། ངེད་ཀྱིས{ཞག་བཅུ་སྐོར་མཁར་ཆེན་རང་དུ་བསྡད་ཅིང་།}དེ་མཚམས་ཆོས་གྲར་སྤོས།
བྲག་སྟོད་དུ་སྤྱན་འདྲེན་བརྫངས་པ་བཞིན། རྗེ་བཙུན་རྡོ་རྗེ་འཆང་ཆེན་པོ་ཕེབས། ནི་གུའི་ཁྲིད་གནང་སྐབས་ཉིད(ཉིན)མཚན་ཐམས་ཅད་ཡིད་དགའ་བས་ཁྱབ་པའི་གཉིད་ཀྱང་འདི་བྱུང་མི་ཤེས་པ། ཡུལ་ཡུལ་པ་ཟླ་བ་ལྷག་ཙམ་གྱི་བར་དུ་བྱུང་ཞིང༌། ཁྲིད་གནང་བའི་ཚིག་དོན་གསལ་བར་གོ །ཅི་རིགས་བློ་ལ་ཡང་ཆགས། ཕག་དཀར་གྱི་རྗེས་གནང་ཞིག་ཞུས་ནས། ཆོས་དབང་པས་གྲོགས་བྱས་ཏེ་ཞག་བདུན་བསྙེན་པ་བསྐྱལ། བདེ་མཆོག་ནག་པོ་པའི་དབང་ཞུས་དུས། སྟ་གོན་གྱི་ནུབ་མོ་རྨི་ལམ་ཡ་མཚན་ཅན་མང་པོ་བྱུང༌། ཕྱིས་མཆེད་གྲོགས་པ་རྣམས་ཀྱིས་ནང་དུ་དམ་སེལ་བྱེད་པའི་རྨི་ལྟས་ཀྱང་གསལ་བར་བྱུང༌།
{སྤྱི་ལོང་ནས་གཏིང་སྐྱེས་སུ་གསང་དམག་ཅིག་བྱུང་བ། གཏིང་སྐྱེས་ཀྱི་དམག་རྒྱས་པ་མེད་ནའང་གཡུལ་ངོ་རྒྱལ། དེ་སྐབས་རྗེ་བཙུན་རྡོ་རྗེ་འཆང་ཆེན་པོར} གཞན་ཡང་ཆོས་བཀའ་དཔག་ཏུ་མེད་པ་ཐོབ། {ཟླ་བ་ལྔ་ཙམ་བཞུགས། དངོས(ངོས)ཅག་གིས} གཏིང་སྐྱེས་ཆོས་གྲྭར་ཟླ་བ་དྲུག་བསྡད།
དེ་སྐབས་ཡར་འབྲོག་ནས་མྱུར་བཤད་ཡོང་དགོས་ཚུལ་ཕེབས་པ་བཞིན་ཤར་ཕྱོགས་ལ་བསྐྱོད་དེ། གམ་པ་རྫོང་དུ་བདག་པོ་རྣམ་རྒྱལ་དྲུང་དང་མཇལ། གད་དང་རྒྱང་རོའི་གཞུང་དེད་ནས་ཕྱིན། {ས་སྐྱོང་ཡབ་སྲས་རྣམས་དང་མཇལ་བས} སྟག་ལུང་རྫོང་དུ་ཞག་བཅུ་སྐོར་སོང༌།
དེ་ནས་ཆོས་སྡེའི་བླ་བྲང་དཀར་པོར་སྤོས། སྟོན་དང་དགུན་དེའི་རིང་འདུལ་བ་ལུང་གི་པོ་ཏི་གཉིས་གསུམ་དང༌། སྐྱེས་རབས་བརྒྱ་རྩ་སོགས་ལ་ཀློག་དར་འདྲ་བྱས་པས། ལོ་རྒྱུས་མང་པོ་བློ་ལ་ཟིན། གཞན་ལ་བཤད་དུ་བཏུབ་ཙམ་བྱུང༌།
འདི་ཡན་ལ་བསྟན་པ་སྤྱིའི་ཆོས་སྤྱོད་རྣམས་བློ་ལ་ཆུད་ཅིང༌། སྟོན་ཀ་འདི་ནས་བཟུང་སྟེ། དཔལ་རྡོ་རྗེ་འཇིགས་བྱེད་ཀྱི་མངོན་རྟོགས་དང་། ཡི་དམ་ཆོས་སྐྱོང་གི་གཏོར་བསྔོ་མ་ཆག་པར་བྱས་པ་ཡིན།
ཧོར་ཟླ་བཅུ་གཉིས་པའི་ནང་དུ་ཙེག་གེས་ཐེབས་པ་ཡང་མྱུར་དུ་སོར་ཆུད། དེ་སྐབས་ཉིན་མོ་སྐད་འགགས་པ་ལ། མཚན་མོ་གཉིད་ཀྱི་སྐབས་བླ་རྡོལ་ཐབས་སུ་མཚན་བརྗོད་སོགས་ཆོས་སྤྱོད་ཀྱི་རིགས་དང༌། ཡི་དམ་གྱི་མངོན་རྟོགས་ཆེ་ཆུང་རྣམས་མ་ནོར་བར་གཙང་སིང་ངེ་སྐད་གསལ་པོར་འདོན་པ་ཁོ་ན་དེའི་རིང་ལ་རྟག་ཏུ་བྱུང་འདུག །ཟླ་བོ་ཚོ་ནི་དཀྱུས་མ་མིན་པ་བར་ཆད་ཡིན་ནམ་སྙམ་བློ་སྐྱོག་ཟེར། ཆོ་འཕྲུལ་གྱི་སྒང་ལ་ཚེ་དཔག་མེད་ཀྱི་བཟླས་མཚམས་ཞག་བདུན་མ་ཞིག་དང་། སྒྲོལ་དཀར་གྱི་བཟླས་པ་མཚམས་ཞག་བདུན་མ་ཞིག་བྱས། ཟླ་བ་གཟའ་འཛིན་ཞིག་དང་བསྟུན་ནས། ཕྱག་རྡོར་གྱི་བཟླས་པ་མཚམས་ཞག་བདུན་མ་ཞིག་ཀྱང་བྱས་ཏེ། ཟླ་བ་གང་ཡིན་བརྗེད་འདུག །
དཔྱིད་ཕྱོགས་རྗེ་བཙུན་དཔལ་སྟག་ལུང་པ་ཆེན་པོ་ལྷ་སའི་ཞིག་གསོས་དང་། གསེར་ཕིབས་འབུལ་བར་ཕེབས་སྐབས། སོག་ཡུལ་དུ་འགྲོ་དོན་རྒྱ་ཆེ་བའི་ལེགས་ལམ་འབུལ་བར་ཀུན་དགའ་སྙན་གྲགས་བཏང༌། དེ་ནས་བླ་མ་རིན་པོ་ཆེ་འཇམ་དབྱངས་ཀུན་དགའི་མཚན་ཅན་སྤྱན་འདྲེན་དུ་ཆོས་མཛད་ཀུན་རྒྱན་བཏང༌། ཁོང་ཚོས་ཀྱང་འཕྲལ་དུ་སྐུ་གཞོགས་སུ་འབྱོར།
ཧོར་ཟླ་དྲུག་པའི་ཚེས་ལྔ་ལ་ཡར་འབྲོག་སྟག་ལུང་གི་ཆོས་སྡེར་ཞབས་ཟུང་དགོད(འཁོད)པར་མཛད།
ཚེས་བཅུ་གཅིག་ནས་ཐར་གླིང་ཆོས་སྡེའི་བླ་མ་སློབ་དཔོན་དྲག་བསྡུས་ཐུགས་དམ་ལ་གཞོལ་བ་ལྔ་བཅུ་སྐོར་དང༌། བདག་ཅག་ལ་སོགས་པ་ཀུན་བསྒྲིལ་བ་བརྒྱ་སྐོར་ཞིག་ལ་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་དབུ་ཚུགས་པར་གནང་ཞིང༌། འདི་སྐབས་ལམ་འབྲས་ཀྱི་ཆོས་སྐོར་ཡོངས་སུ་རྫོགས་པ་དང༌། སྔ་ཕྱིར་རྗེས་གནང་ཟུར་བཀའ་བཞི་བཅུ་ལྷག་ཙམ་དང༌། དེ་དག་དང་འབྲེལ་བ་སོ་སོའི་ཆོས་སྐོར་ཡོངས་སུ་རྫོགས་པ་མཐའ་རྒྱས་སུ་གནང་ཞིང༌། བདག་གིས་ཀྱང་འདི་ནས་བརྩམས་ནས་ལམ་དུས་ཐུན་རེ་རེ་དང༌། ལམ་ཟབ་དང༌། བིར་སྲུང་ཐུན་མོང་བ། རྣལ་འབྱོར་མ་རྣམས་ཆག་མེད་དུ་འགྲུབ་ཅིང༌། རྣལ་འབྱོར་མའི་བྱིན་རླབས་ཞུས་པའི་ནུབ་རྨི་ལམ་གྱི་སྣང་བ་ཤིན་ཏུ་གསལ་བ་ལ། བདག་རང་གངས་བཟང་གི་མགུལ་ནས་ཡར་གོས་དམར་པོ་ཞིག་གྱོན་ནས་འགྲོ་ཡིན་འདུག་པ། གངས་ཀྱི་ཕུག་ཅིག་ནས་བུད་མེད་གཞོན་ནུ་ཞིག་བྱུང་ནས་ངས་ལམ་སྣ་བྱའོ་ཞེས། གངས་ལ་ཞིག་རྒལ(བརྒལ)ནས་ཕྱིན་པ་ན། ས་ཕྱོགས་ཉམས་དགའ་བ། མེ་ཏོག་ཤིན་ཏུ་ཆེ་བས་ཁྱབ་པ་ཞིག་ནས་ཕར་སླེབ(སླེབས)པས། སྣང་བ་འགྱུར་ཞིང་། ཡིད་དགའ་སེམས་ཆེན་པོ་ཞིག་ལ་ལུང་པ་དེ་གང་ཡིན་དྲིས་པས་ཨོ་རྒྱན་ཡིན་ཟེར། དེའི་མཐར་དུར་ཁྲོད་ཀྱི་རྣམ་པ་འཇིགས་ཤིང་སྐྱི་གཡའ་བ་ཞིག་གི་སྦུབས་ནས་ཡར་ཕྱིན་ཙ་ན། ཕུག་པ་ཆེན་པོ་ཞིག་གི་ནང་ན་བུད་མེད་སྟོང་ཙམ་འདུག་ཅིང༌། དབུས་ན་ཁྲི་ཆེན་པོ་ཞིག་ལ་གཟི་བརྗིད་དཔག་ཏུ་མེད་པ་དང་ལྡན་པའི་མིའི་བུད་མེད་ཀྱི་རྣམ་པ་ལས་འདས་ཤིང་། འདི་ལྟ་བུའོ་ཞེས་བརྗོད་པར་དཀའ་བའི་གཙོ་མོ་ཞིག་བཞུགས་འདུག་པ། དེ་ལ་ཕྱག་ཅིག་བྱས་ནས་དྲུང་དུ་འདུག་ཙ་ན། གཙོ་མོ་དེས་ཕྱག་བདག་གི་སྤྱི་བོར་བཞག་པའི་མོད་ལ། བུད་མེད་དེ་ཐམས་ཅད་གད་མོ་ཐེག་ཐེག་པ་ཞིག་བྱེད་ཀྱིན་འདུག་པ། དེ་ཀའི་ངང་ལ་གཉིད་སད་དེ་རྡོ་རྗེ་རྣལ་འབྱོར་མས་རྗེས་སུ་འཛིན་པར་འགྱུར་པའི་མཚན་མར་གོ །
དེ་སྐབས་གསུང་ངག་སོགས་མཐར་ཕྱིན་ཙ་ན། ཡར་རྒྱབ་ཀྱི་དཔུང་ཆེན་ཐམས་ཅད་ཡར་འབྲོག་སྟག་ལུང་དུ་ལྷགས་ཤིང༌། འོན་ཀྱང་བདག་ཅག་དཔོན་སློབ་རྣམས་ཀྱིས་ཆོས་སྡེ་དེ་ཉིད་དུ་གདན་ཕབ་པའི་བར་ཆིངས་ཡང་ཡང་འབྱུང་བ་ལ་བརྟེན་ནས། རྫོངས་འཚངས་དྲག་པོ་རང་ཧ་ཅང་མང་བ་མ་བྱུང༌། སྤྱིར་སྟག་ལུང་རྫོང་ལ་ཟླ་བ་གསུམ་ཙམ་དམག་གིས་བསྐོར། མཐར་ཁྲིགས་ཀྱང་ལེགས་པར་ཐུབ། སྐབས་དེར་བྱང་སྟག་ལུང་ནས་རྗེ་བཙུན་བླ་མས་ཨ་ཧོ་བཀྲ་ཤིས་ཕུན་ཚོགས་པ་ཇ་འདྲེན་དུ་གནང༌། བདག་ཅག་དེར་ཡོད་པས་ཀྱང་ཡར་འབྲོག་ཏུ་ཕན་ཐོགས་ཤིན་ཏུ་ཆེ་བར་བྱུང༌།
དུས་གཟིངས་དེ་སྐབས་ཐམས་ཅད་དུ་ཡང་བཀའ་ཆོས་ཐུན་གཅིག་ཀྱང་མ་ཆག་ཅིང༌། ཡར་རྒྱབ་ནས་སྡེ་པ་དཔོན་ཆེན་དྲུང་སྐུ་མཆེད་དཔོན་གཡོག་རྣམས་ཀྱང་ཐུགས་ཤིན་ཏུ་མོས་གུས་ཆེ་བར་འདུག །
ཧོར་ཟླ་བཅུ་གཅིག་པའི་ཚེས་བཅུ་བདུན་ལ་དམག་རྣམས་ཀྱང་གྱེས། {བླ་མ་དམ་པའི་ཕྱག་ཕྱིར་དཀྲིས་ཏེ}ཚེས་བཅུ་དགུ་ལ་ཡར་འབྲོག་སྟག་ལུང་ནས་གཞི་བཏེག(བཏེགས)།
འབྲུག་སྦྲུལ་གྱི་ལོ་འདི་ཚོ་ལ་ཞབས་དྲུང་སྟོབས་དང་ཡང་ཡང་ཀ་མཇལ་བྱུང༌། {ཉི་ཤུའི་ཉིན་ར་ལུང་མདར་ཞབས་དྲུང་བཀྲས་སྟོབས་དྲུང་དང་མཇལ་ཙམ་བྱས།} རིམ་པས་རྒྱལ་རྩེར་ཕེབས། དེ་སྐབས་ངོས་ཀྱིས་ཀྱང་མཁན་རིན་པོ་ཆེ་དང་མཇལ་བའི་ཆོས་བཀའ་ཅི་རིགས་ཞུས། དེ་མཚམས་གཏིང་སྐྱེས་སུ་སྡེ་པ་རབ་མཛེས་དྲུང་གཤེགས་པར་བརྟེན། བླ་མ་དམ་པ་སྤྱན་འདྲེན་བྱུང་བས་གཏིང་སྐྱེས་ཕྱོགས་ལ་ཕེབས་སོང༌། རྒྱལ་རྩེ་ཞལ་ངོ་རྣམས་ལ་ཚེ་དབང་ཞིག་ཕུལ། ངོས་ཀྱིས་རིམ་པས་སྤོས་ཁང་དུ། མཁན་ཆེན་ཀུན་དགའ་ཆོས་སྐྱོང་བས་འབོད་མི་གནང་བ་ལྟར་ཕྱིན། པཎ་ཆེན་ཤཱཀྱ་ཤྲཱིའི་སྣམ་སྦྱར་དང་། རྫ་སྐུ་དོན་ཞགས་ཀྱི་བྲིས་ཐང་སོགས་ཚོགས་ཆོས་ལུང་པའི་རྟེན་ཁྱད་པར་ཅན་ཐམས་ཅད་མཇལ།
དེ་ནས་སྤ་གནམ་དུ་སྡེ་པ་ཀུན་ལྷའི་དྲུང་དང་མཇལ། བཀྲ་ཤིས་རྫོང་ཁར་ཡང་ཕྱིན། ཞག་བདུན་ཙམ་བསྡད། མཁས་མཆོག་བྱམས་པ་ལྷུན་གྲུབ་དང་ཐོག་མར་འདི་དུས་མཇལ། གནས་བཅུའི་ཐང་ཀ་ཅིག(ཞིག)བཀྲམ་འདུག །དེའི་ཡན་ལག་འབྱུང་དང་སྐུའི་རྣམ་པ་འདྲ་བའི་གཏམ་རྒྱུད་ཅིག་ཡོད།
དེ་ནས་ཚོང་འདུས་སུ{སླེབ(སླེབས)།} མཁན་ཆེན་ཟླ་བ་བཟང་པོ་སོགས་གསེར་མདོག་ཅན་གྱི་མཁན་སློབ་རྣམས་དངོས་འཕྲད་པར་ཕེབས། ཆོས་འབྲེལ་ཙམ་ཕུལ། ལུ་གུ་རིར་ཞག་གསུམ་བསྡད། མྱུར་ཤད་དུ་ལམ་བཅད་དེ། མདའ་རྒྱབ་ཀྱི་དར་ལ་ཐོན་ནས་དགའ་པོར་སླེབ(སླེབས)པའི་ནུབ། ཇོ་ནང་གི་སྒྲུབ་པ་མོ་ཐམས་ཅད་འཕྲད་པར་བྱུང{ཞིང}། དེ་ནུབ་རང་ཇོ་མདའི་ཐད་ཀར་དར་མི་ཐེག་ཙམ་ཆགས། སང་སྔ་དྲོ་ཁོང་ཐམས་ཅད་ལ་མ་ཎིའི་ལུང་ཞིག་བྱས། རྩེད་ཆུང་གི་འཕྲང་མཚམས་པར་སྒྲུབ་པ་མོ་བྱིངས{ཀྱི}སྐྱེལ་མ་ལ་བྱུང༌། ཁོང་རྣམས་ལོག་དུས་དར་ཁྱེར་གྲུབ་འདུག་ཟེར། ཀུན་ཆོས་པ་ནས་དང་པོ་རྗེ་དམ་པ་ལ་ཡང་འདི་བཞིན་བྱུང་། ཡ་མཚན་པོ་ཡིན་པ་འདུག་ཟེར།
དེ་ཉིན་ཉེར་ལྔ་ཡིན་ཞིང་དེ་ནུབ་ཆོས་ལུང་དུ་སླེབ(སླེབས){པའི་དུས}། དེ་རེས་ཆོ་འཕྲུལ་དུས་ཆེན་གྱི་སྐབས་སུ་ཚོགས་ལ་སྡོད་རྟག་པར་བྱས། ཆོ་ག་རྣམས་བློ་ལ་བྱང་བར་ཡོད་ཅིང༌། དམིགས་པ་རྣམས་ཀྱང་གསལ་རབ་དང་། ཚོགས་ལ་སྡོད་པ་ལ་མི་སུན་ཞིང་དང་། སྤྲོ་བར་བྱུང་ངོ༌། །
མཁན་རིན་པོ་ཆེའི་ཞབས་དྲུང་དང༌། དཔལ་ལྡན་བླ་མ་དམ་པ་འཇམ་དབྱངས་རིན་པོ་ཆེ་སོགས་ཞལ་མཐུན་པའི་བཀའ་བཀོད་དུ། ཁྱོད་ཀྱི་གནས་ཀྱི་སློབ་དཔོན་དང་ཀློག་པའི་སློབ་དཔོན་དུ་བསྟེན་པར་འོས་པ་ནི། མཁས་པའི་དབང་པོ་བྱམས་པ་ལྷུན་གྲུབ་ཉིད་ཡིན་ཏེ། མཁས་བཙུན་བཟང་པོའི་ཡོན་ཏན་ཐམས་ཅད་ཀྱིས་ཉེ་བར་བརྒྱན་པ་དང་། གྲུབ་མཐའ་བཟང་ཞིང་། རྗེ་དམ་པའི་དངོས་སློབ་གཙང་མར་གྱུར་པ་དང་། ཁྱད་པར་གསེར་མདོག་ཅན་དུ་རྗེ་དམ་པས་ཆོས་འཁོར་མཛད་སྐབས་མཇལ་དར་འབུལ་བར་མཛད་པ་ལ་ཡང་དར། འདི་དར་བ་ཆེན་པོ་ཆོས་ཀྱི་ཏོག་བྱ་བ་ཡིན་ཞེས་པའི་ལུང་བསྟན་ཁྱད་པར་ཅན་བརྙེས་པ་ཡིན་པས་སོ། །ཅེས(ཞེས)ཕེབས་པ་ལྟར། བླ་མ་གཉིས་ཀྱི་བཀའ་ལ་བརྟེན{བླ་མ་རིན་པོ་རྣམ་གཉིས་ཀྱིས་མཁས་པའི་དབང་པོ་ཉིད་ལའང་བཀའ་སྩལ(བསྩལ)ཕེབས་ཤིང་། བཀྲ་ཤིས་རྫོང་མཁར་ངེད་འཕྲད་པ་ལ་ཕེབས་བྱུང་སྐབས་ཀྱང་། དངོས(ངོས)ཅག་དྲུང་ཐུན་ཆོས་པ་དང་བཅས་པའི་གསོལ་བ་བཏབ་པ་ལྟར།} དུས་ཆེན་གྲོལ་མཚམས་ཀྱི་ཚེས་བཅུ་བདུན་ལ་ཕེབས{གནང་ཐུབ་བྱུང་ཞིང}། ཟླ་འཕྲོ་དེ་ནི་ཅི་བདེར་བཞུགས{པ་གནང}།
ཧོར་ཟླ་གཉིས་པའི་ཚེས་གཅིག་གཟའ་སྐར་བཟང་པ་ནས། ཚད་མ་རིགས་པའི་གཏེར་གྱི་དཔེ་འཛིན་གྱི་འགོ་བརྩམས་ཤིང་། དེ་ཉིན་རང་བསྡུས་རྐང་བརྩི་བའི་ཡང་འགོ་ཚུགས། ཕེབས་སྒོ་ལ་ཡང་དང་པོ་རྗེ་དམ་པ་ལ་ཡང་འདི་བཞིན་མཛད་འདུག་པ་བཞིན། དོན་བཟང་ཞིང་ཚིག་བཀྲ་ལེགས་པ་ཞིག་བྱེད་དགོས་གསུང་ཞིང(གསུངས་ཤིང)། གཞི་གྲུབ་ན་བརྩོན་འགྲུས་མ་ཡིན་པ་བུད་ཟེར་ན། ཤེས་རབ་ཆོས་ཅན། {བརྩོན་འགྲུས་ཡིན་པར་ཐལ། གཞི་གྲུབ་པའི་ཕྱིར།} ཞེས་པ་ནས་བརྩམས། ཞལ་ནས་སླངས (བླངས)། རྟགས་ཆོས་དོན་གསུམ་ཁྱབ་པ་འབུད་ཤོག །རྗེས་ཁྱབ་ཟློག(ལྡོག)ཁྱབ་རྣམས་ལན་གཅིག་གསུངས་པ་ཙམ་གྱིས་མོད་ལ་གོ་བ་ཆགས།
དཔྱིད་ལ་དབྱར་བཏགས་ཏེ་བརྩོན་འགྲུས་ཆེ་བ་རང་མ་བྱུང་ནའང༌། བསྡུས་རྐང་སུམ་བརྒྱ་ཙམ། རྣམ་འགྲེལ་གྱི་ཐལ་འཕྲེང་ཅི་རིགས་པ་དང་བཅས་གསུང་ངག་ལས་བླངས་པ{རྣམས}སླ་བར་བྱུང༌། གོ་བ་དང་བློ་ནུས་འབྲིང་ཙམ་ཡོད་པ་ལ། གཞུང་དཔེ་འཛིན་ཤིན་ཏུ་ཁ་དོག་པར་བྱུང་སྟེ། རིགས་གཏེར་འཛིན་པ་ལའང་ཟླ་བ་ལྔ་ཙམ་ཐོགས། དེ་ལ་སློབ་དཔོན་རིན་པོ་ཆེ་ནས། ངེད་ལ་ཆུང་ངུའི་དུས་ནས་ཡུལ་སྤྱོད་ཉིད་ཀྱིས་ཉ་ཕག་སྒོང་གསུམ་དང་སྲོག་ཆག་སྣ་ཚོགས་པའི་ཤ་ཟོས་པས། དེ་ལྟ་བུའི་ཟས་གྲིབ་ཀྱིས་བསྒྲིབས་པ་ཡིན་ནམ། རིགས་པའི་འཇུག་སྒོ་འདི་ལ་དཔགས་ན། དཔེ་འཛིན་ཡང་ཡངས་པོ་ཞིག་ཡོང་ཐང་བ་ལ། སྔོན་དཔང་ལོ་ཆེན་པོ་སྐུ་ཆུང་ངུའི་དུས་ལུག་གི་འོ་མས་གསོས་པས་རྣམ་དཔྱོད་ཀྱི་ཕྱེད་འགྲིབས། ཞེས་གསུང(གསུངས)པ་སོགས་ལོ་རྒྱུས་དང་བཅས་ཡང་ཡང་གསུང་བ(གསུངས་པ)། དེ་དུས་ཁོ་བོའི་སེམས་ལ་ཤེས་རབ་ཆེ་ཆུང་སྐལ་བ་བཟང་ངན་ཡིན། ཟས་ཀྱིས་སྒྲིབ་རྒྱུ་རང་ཅི་ཡོད་སྙམ་པ་ཤར་མོད། ལར་ནི་རྟེན་འབྲེལ་མཐའ་ཡས་པས། དེ་འདྲའང་སྲིད་པ་འདུག །
དཔྱིད་དུས་བླ་མ་དམ་པ་འཇམ་དབྱངས་ཀུན་དགའི་མཚན་ཅན་ཡང་ཕེབས། གསང་འདུས་འཇམ་རྡོར་གྱི་དབང་འཕགས་ཞབས་ལུགས་གཉིས་ཀའི་རྒྱུད་ལུང་མན་ངག་ཡོངས་རྫོགས། དམར་ནག་འཇིགས་གསུམ་གྱི་ཆོས་སྐོར་དཔག་ཏུ་མེད་པ་དང༌། ལམ་སྐོར་ཕྱི་མ་རྣམས་དང༌། བདེ་མཆོག་ལཱུ་ཡི་པའི་དབང་ཁྲིད་ལུང་མན་ངག་ཡོངས་རྫོགས་དང༌། རྒྱུད་སྡེ་ལྔའི་དབང་ཆེན་པོ་སོགས་སྔ་ཕྱིར་བཀའ་ཆོས་གྲངས་མེད་སྩལ(བསྩལ)བས། སེར་ཁ་ལ་ཐུག་གི་བར་ཉིན་ཟངས་ཀྱི་ཆོས་ཞུ་བས་དུས་འདས་པ་ལྟ་བུ་བྱུང༌། སྐབས་དེར་སློབ་དཔོན་དམ་པ་སྤྱན་ཤིན་ཏུ་བསྙུང་བ་ཞིག་བྱུང་བས། བསམ་སྡིངས་ཀྱི་ཆོས་སྐྱོང་འཁྲེན་དུ་ཐུགས་དོགས་པ་དང་། ཐུགས་བྲེལ་འགའ་ཞིག་གི་དབང་ལས་རེ་ཞིག་ཤར་ཕྱོགས་སུ་ཐེགས།
སྔ་སོར་དུས་ཆེན་གྲོལ་འཕྲལ་ཆོས་མཛད་ཀུན་རྒྱན་ལ་སོགས་པ་བྱང་སྟག་ལུང་དུ། ས་གསུམ་འགྲོ་བའི་མགོན་པོ་དཔལ་སྟག་ལུང་པ་ཆེན་པོ་སྤྱན་འདྲེན་པའི་ཕྱིར་བརྫངས་པ། འབྲི་སྟག་གི་ཟིར་བུན་འཕྲོ་ཅུང་ཟད་ཡོད་འདུག་པས་ཐུགས་འགོར་ཆེ་སྟེ། {ཧོར་ཟླ་དྲུག་པའི་ནང་ཡན་ཆད་ལ་ཕེབས་ཐུབ་པ་ཞིག་མ་བྱུང་ནའང་།} ཟླ་བ་བདུན་པའི་ཚེས་བཅུ་བདུན་གྱི་ཉིན་པར་དཔོན་སློབ་ཟབ་རྒྱས་ཅོག་གྲྭ་དང་བཅས་པ་ཆོས་ལུང་བྱང་ཆུབ་རྩེ་མོར་ཞབས་ཟུང་འཁོད་ཅིང༌། དེའི་སང་ཉིན་ཆོས་གྲྭར་དཔལ་ལྡན་བླ་མ་དམ་པ་རྗེ་བཙུན་རྡོ་རིངས་པ་ཆེན་པོ་དང༌། རྡོ་རྗེ་འཆང་ཆེན་པོ་རྗེ་བཙུན་བྲག་སྟོད་ནས་དང༌། རྗེ་དྲུང་རིན་པོ་ཆེ་རྣམས་དང་བཅས་དཔལ་སྟག་ལུང་པ་ཆེན་པོ་དང་མཇལ། གྲལ་དང་གདན་ལ་རྩོད་པ་དང་ཆེ་འདོད་སོགས་ཡེ་མེད། ཐམས་ཅད་ཆུ་ལ་ཆུ་བཞག་གི་ཐུགས་སྣང་དག་པ་ལེགས་ཚོགས་ཤིན་ཏུ་ཆེ་བར་བྱུང༌།
ཉེར་གསུམ་གཟའ་སྐར་བཟང་བ་ནས་བཀའ་གདམས་གླེགས་བམ་གྱི་ལུང་ཞུས་ཞིང(ཤིང)། དཔལ་སྟག་ལུང་རིན་པོ་ཆེ་སྤྱན་འདྲེན་ཞུས་པའི་དོན་གྱི་གཙོ་བོར་བཀའ་དྲིན་ཞུ་བ་ཉིད་ཡིན་པ་ལྟར། རང་ལོ་བརྒྱད་པ་སྣ་ཚོགས་ཞེས་བྱ་བའི་ལོ་ཁྲུམས་སྟོད་ཀྱི་ཟླ་བའི་ཚེས་ལྔའི་ཉིན། ཆོས་ལུང་བྱང་རྩེའི་རྩེ་མཆོད་ཁང་གི་ཡང་ཐོག་ཏུ་སྔ་མོར་སློབ(བསླབ)པ་བྱས། སྐྲ་བྲེགས། རབ་ཏུ་བྱུང་བའི་རྟགས་མ་ཡིན་པ་རྣམས་དོར། སྐྲ་འབྲེག་མཁན་མ་ཆེན་ཆོས་ཡེ་བ་ཡིན། དོན་གྱི་སླད་དུ་མཚན་ནས་སྨོས་ཏེ་དཔལ་སྟག་ལུང་བ་ཆེན་པོ་རྗེ་བཙུན་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་མཁན་པོ་དང༌། མཚན་བརྗོད་པར་དཀའ་བ་འཇམ་དབྱངས་ཀུན་དགའ་རྒྱལ་མཚན་དཔལ་བཟང་པོའི་ཞབས་ཀྱི་སློབ་དཔོན་དང༌། རྗེ་དྲུང་ཀུན་དགའ་དཔལ་བཟང་པོས་དུས་གོ་བ་དང༌། ཆོས་རྗེ་མཆོད་གནས་པས་གྲོགས་དན་པ་མཛད།
གཞན་ཡང་དགེ་བའི་བཤེས་གཉེན་བཟང་པོ་ལྔ་ཞུ་བའི་ཡུལ་དང་། ལས་གྲལ་དུ་བཞུགས་ཏེ། ཉི་མ་བཞི་ཆ་ཤར་བའི་དུས་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ་ཆོས་ལུང་བྱང་རྩེའི་མཆོད་ཁང་རྩེར། ཡོངས་རྫོགས་དགེ་བསྙེན་དང་། བར་མ་སྔོན་དུ་འགྲོ་བས་དགེ་ཚུལ་གྱི་སྡོམ་པ་ཡང་དག་པར་མནོས་ཏེ། འཇིག་རྟེན་གསུམ་དུ་ཐོབ་པར་དཀའ་བའི་ངུར་སྨྲིག་གི་རྒྱལ་མཚན་དྲང་སྲོང་གི་རྟགས་ཀྱིས་ཡང་དག་པར་བརྒྱན་པའི་བཀའ་དྲིན་སྩལ(བསྩལ)ལོ། །
དེ་མཚམས་མཁན་སློབ་དགེ་འདུན་བླ་མ་དམ་པ་སོ་སོ(སོའི)ཕྱོགས་ཀྱི་མི་སྣ་སོགས་གཞི་བྱེས་ཤིན་ཏུ་མང་བ་ལ། དགའ་སྟོན་རྒྱ་ཆེ་བ་དང༌། མཁན་པོ་དམ་པར་གསེར་ཞོ་སུམ་ཅུ་སོ་བདུན་གྱི་མཎྜལ་སོགས་། གཞན་ཡང་སོ་སོར་བཀའ་དྲིན་རྗེས་དྲན་གྱི་འབུལ་བ་རང་ཉིད་ཀྱི་རྒྱུ་དངོས་ལ་བལྟོས་པའི་གང་འགྲུབ་བགྱིས། དངོས(ངོས)ཅག་གི་ཆ་ནས་བློ་ཚིམ་ཞིང(ཚིམས་ཤིང)། ལེགས་ཚོགས་ཆེ་བའི་མཐར་ཐུག་ཏུ་བྱུང་ངོ༌། །
སྲིད་གསུམ་མ་ལུས་སྐྱེས་སུ་ཐོབ་གྱུར་ཀྱང༌། །
ངུར་སྨྲིག་རྒྱལ་མཚན་ཐོབ་པའི་ཆར་མི་ཕོད། །
སྲིད་ཀྱི་འབྱོར་བ་འདི་ནི་ནམ་ཡང་འཇིག །
ངུར་སྨྲིག་ཐོབ་པས་འཆི་མེད་གྲོང་དུ་བགྲོད། །
{ཅེས་པ་ནི་རང་གི་གནས་ཚུལ་བརྗོད་པའི་རྣམ་པར་ཐར་པ་ལས། རབ་བྱུང་ཡང་དག་པར་བླངས་པ་ལས་བརྩམས་པའི་རིམ་པར་ཕྱེ་བ་སྟེ་ལྔ་པའོ། །}