༄༅། །རྗེ་བཙུན་ཏཱ་ར་ནཱ་ཐའི་མཛད་རྣམ་ལ་བསྔགས་པ་སྐལ་ལྡན་དད་པའི་འཁྲི་ཤིང་།

རྩོམ་པ་པོ། མཁན་སྤྲུལ་བསྟན་པའི་རྒྱལ་མཚན།

ཨོ་སྭ་སྟི།

དབྱིངས་དང་ཡེ་ཤེས་དབྱེར་མེད་ཆོས་སྐུའི་ཐུགས།།
འོག་མིན་ཞིང་ན་རྟག་བརྟན་ལོངས་སྐུའི་གསུང་།།
འཇིག་རྟེན་ཁམས་སུ་ཆགས་བྲལ་སྤྲུལ་བའི་སྐུ།།
རྣམ་འདྲེན་ནམ་མཁའི་ཐིག་ལེར་ཕྱག་འཚལ་ལོ།།

རྒྱལ་བས་ལུང་བསྟན་ཀུན་མཁྱེན་ཇོ་ནང་བའི།།
ངེས་གསང་གཞན་སྟོང་དབུ་མའི་ལྟ་གྲུབ་དང་།།
དུས་ཀྱི་འཁོར་ལོའི་བཤད་སྒྲུབ་སྲོག་འཛིན་པ།།
ཀུན་མཁྱེན་ཏཱ་ར་ནཱ་ཐར་བསྔགས་བྱའི་ཕུལ།།

ཕྱི་ལྟར་གནས་ལྔར་མཁས་པའི་པཎ་ཊི་ཏ།།
ནང་ལྟར་གྲུབ་པ་ཐོབ་པའི་སྔགས་རམས་པ།།
གསང་བ་ངེས་དོན་འཁོར་ལོ་སྡོམ་པ་དངོས།།
ཡང་གསང་བསམ་མི་ཁྱབ་ལ་ཕྱག་འཚལ་ལོ།།

དེ་ལྟ་ནའང་ཐུན་མོང་གདུལ་བྱའི་ངོར།།
ཐོག་མར་པཎ་གྲུབ་འབར་བའི་གཙོ་བོ་ནས།།
རྒྱལ་བོའི་སྲས་སུ་དགའ་བྱེད་ས་སྐྱོང་བར།།
སྐྱེ་ཕྲེང་བཅུ་གསུམ་བཞེས་ལ་ཕྱག་འཚལ་ལོ།།

དེ་ནས་ཁ་རག་ཆོས་འཁོར་ལྡིངས་ཞེས་པར།།
རིག་འཛིན་དྲག་པོ་རྭ་ལོའི་གདུང་སྲས་སུ།།
གཟུངས་མ་མཚན་ལྡན་རྡོ་རྗེ་བུ་དགའ་མར།།
ཤིང་ཕག་ལོ་བར་བལྟམས་ལ་ཕྱག་འཚལ་ལོ།།

དྲི་མེད་གྲོད་པུའི་ཁང་བཟང་ཁ་འབྱེད་ཚེ།།
སྐུ་ལ་ཤ་མཚན་ལི་ཁྲིའི་ཚངས་སྐུད་གསལ།།
ཕྱག་ཞབས་འཁོར་ལོའི་རིས་དང་ཞལ་སྔ་ནས།།
དྲག་སྔགས་ལན་གསུམ་བཟླས་ལ་ཕྱག་འཚལ་ལོ།།

དེ་ཡི་དུས་ནས་སངས་རྒྱས་བྱང་སེམས་ཀྱིས།།
ཞལ་གཟིགས་སྣང་བ་བྱུང་ནས་སྤྱན་ཕྱེས་ཚེ།།
མཚན་གྱི་མེ་ཏོག་མེས་པོས་དགོས་ཆེད་ཀྱིས།།
སྲི་གཅོད་རྡོ་རྗེར་བསྩལ་ལ་ཕྱག་འཚལ་ལོ།།

སྨྲ་ཤེས་ཙམ་ནས་མངོན་ཤེས་ཐོགས་མེད་གྱིས།།
རྗེ་བཙུན་ཀུན་དགའ་གྲོལ་མཆོག་ང་ཡིན་ཞེས།།
གནས་དང་ཉེས་གནས་སྐུ་ཚེའི་མཛད་པ་བཅས།།
སྔོན་གནས་རྗེས་དྲན་མངའ་ལ་ཕྱག་འཚལ་ལོ།།

ལན་རེར་མ་ངེས་སྤྲུལ་བའི་རྣལ་འབྱོར་བ།།
སྟག་ཤམ་ཐོད་རློན་རུས་པའི་རྒྱན་ཅན་གྱིས།།
བྱིན་བརླབ་མཛད་དེ་འཇའ་ལྟར་ཐིམ་པ་སོགས།།
རྟགས་མཚན་བསམ་མི་ཁྱབ་ལ་ཕྱག་འཚལ་ལོ།།

དགུང་ལོ་བཞི་ནས་ཆོས་ལུང་བྱང་རྩེ་རུ།།
རྒྱལ་རྩེའི་མཁན་ཆེན་པ་དང་བྱང་བདག་པས།།
རྗེ་བཙུན་གོང་མའི་བརྡ་ལུང་འཁྲུལ་མེད་ལྟར།།
ཡང་སྲིད་མངའ་གསོལ་མཛད་ལ་ཕྱག་འཚལ་ལོ།།

དེ་ཚེ་གོང་མའི་བུ་ཆེན་ལྷ་དབང་གྲགས།།
རྡོ་རིང་བ་དང་བྱམས་པ་ལྷུན་གྲུབ་དང་།།
རྗེ་དྲུང་པ་དང་ལུང་རིགས་རྒྱ་མཚོ་སོགས།།
མཁས་གྲུབ་ཆེ་དགུས་བཏུད་ལ་ཕྱག་འཚལ་ལོ།།

དགུང་ལོ་བརྒྱད་ནས་རྗེ་བཙུན་སྟག་ལུང་ལས།།
རབ་བྱུང་མནོས་ཏེ་ངུར་སྨྲིག་གར་བསྒྱུར་བས།།
ཀུན་དགའ་སྙིང་བོ་བཀྲ་ཤིས་རྒྱལ་མཚན་ཞེས།།
མཚན་བཟང་མེ་ཏོག་བསྩལ་ལ་ཕྱག་འཚལ་ལོ།།

ས་འབྲི་ཇོ་ཞལ་ཤངས་པ་བཀའ་བརྒྱུད་དང་།།
འབྲུག་པ་གམ་ཚང་སྟག་ལུང་ལ་སོགས་པའི།
བཤེས་གཉེན་དུ་མའི་ཞབས་པད་ལ་བསྟེན་ནས།།
མཁས་གྲུབ་གོ་འཕང་བརྙེས་ལ་ཕྱག་འཚལ་ལོ།།

སྤྲུལ་བའི་བཤེས་གཉེན་ཛཱ་ལ་ནཱ་ཐ་ཡིས།།
ཞལ་གཟིགས་སྣང་བ་དངོས་སུ་བྱུང་བའི་ཚེ།།
ཏཱ་ར་ནཱ་ཐ་ཞེས་བྱའི་མཚན་མཆོག་བསྩལ།།
མཚན་དེས་ས་གསུམ་ཁྱབ་ལ་ཕྱག་འཚལ་ལོ།།

དགུང་ལོ་ཉི་ཤུར་གནས་བརྟན་གསེར་གྱི་རི།།
རྗེ་བཙུན་བླ་མ་ཀུན་དགའ་རྒྱལ་མཚན་ལས།།
བསྟེན་པར་རྫོགས་ཏེ་དབུས་གཙང་རུ་བཞི་ཡི།།
འདུལ་འཛིན་མཆོག་ཏུ་གྱུར་ལ་ཕྱག་འཚལ་ལོ།།

གནས་ལྔ་ཀུན་གཟིགས་པཎ་ཆེན་ཀྲིཏྣ་ལས།།
ཕྱི་ནང་རིག་གནས་མཐའ་དག་ཐུགས་ཆུད་དེ།།
མཁས་པའི་རྩེར་སོན་སྟན་པའི་གྲགས་འབར་བའི།།
ཚད་མའི་སྒྲ་ཎཱིག་བརྩམས་ལ་ཕྱག་འཚལ་ལོ།།

འཕགས་ཡུལ་སློབ་དཔོན་བླུདྷ་སྦས་པ་ལས།།
རྒྱུད་སྡེ་བཞི་དང་ཁྱད་པར་བླ་མེད་གསན།།
བོད་འདིར་སྔར་མེད་བློ་བསྐྱེད་ལྔ་བརྒྱ་བཞེས།།
ཡོན་ཏན་རྒྱ་མཚོའི་གཏེར་ལ་ཕྱག་འཚལ་ལོ།།

གཞོན་ནུ་ཉིད་ནས་རིག་པའི་གནས་ལྔ་དང་།།
ཁྱད་པར་ལེགས་སྦྱར་སྐད་ལ་ཐོགས་མེད་པས།།
རྒྱ་གར་མཁས་པས་བོད་ལས་ཆོས་གསན་པ།།
ཁྱོད་ཉིད་གཅིག་པུར་གྱུར་ལ་ཕྱག་འཚལ་ལོ།།

རིགས་ཀྱི་བདག་པོས་རིག་ངོ་སྤྲད་པ་ལས།།
ཐིག་ལེ་སྟོང་ཆེན་འགྱུར་མེད་ཡིག་དྲུག་ཨེ།།
རྣམ་ཀུན་ཤེས་རབ་ཡིག་ལྔའི་རང་བཞིན་ཝེ།།
ཟུང་འཇུག་སྐུ་བཞིར་དབང་ལ་ཕྱག་འཚལ་ལོ།།

ཉེར་གཅིག་དགུང་ལོར་ཇོ་ནང་གདན་ས་མཛད།།
རྫོགས་ལྡན་དུས་ཁྲིད་ཆེན་མོའི་བཀའ་སྲོལ་ཕྱེས།།
ཀུན་མཁྱེན་ཆོས་རྗེ་དགྱེས་པས་ཞལ་གཟིགས་ཏེ།།
བསྟན་པའི་བདག་པོར་བསྔགས་ལ་ཕྱག་འཚལ་ལོ།།

འཕགས་པའི་གནས་སུ་སྤྲུལ་བའི་ཤན་པ་དང་།།
གངས་ཅན་དབུས་སུ་ཕལ་བའི་སྔགས་པ་དང་།།
མདོ་སྨད་ཡུལ་དུ་བསྟན་འཛིན་དགེ་བཤེས་ཏེ།།
རྫུ་འཕྲུལ་ཅིག་ཆར་འབྱེད་ལ་ཕྱག་འཚལ་ལོ།།

ཉེར་དྲུག་དགུང་ལོར་སྟག་ལུང་རྭ་བསྒྲེང་ལས།།
རྒྱ་དཔེར་གཟིགས་ཚེ་གཤིན་རྗེ་དགྲ་ནག་རྒྱུད།།
སྐད་གཉིས་སྒོ་ནས་འཆད་ལ་ཐོགས་མེད་པས།།
ལོ་ཙཱ་ཆེན་པོར་གྲགས་ལ་ཕྱག་འཚལ་ལོ།།

ལྷ་ལྡན་ཇོ་བོར་གསེར་ཆབ་གསོལ་བའི་སྐབས།།
ཀུན་མཁྱེན་ང་འདྲ་མ་ཡིས་གསུང་འབྱོན་ལྟར།།
སྨོན་ལམ་རྒྱལ་བ་རྒྱ་མཚོའི་ཐུགས་བསྐྱེད་ཀྱིས།།
བསྟན་འགྲོའི་རྒུད་པ་གསོས་ལ་ཕྱག་འཚལ་ལོ།།

ར་མོ་ཆེ་ཡི་གཙུག་ལག་ཁང་བཟང་རྩེར།།
བཀྲ་ཤིས་ཁྲ་རིང་ཞེས་སུ་ཡོངས་གྲགས་པའི།།
རྫོགས་ལྡན་ཆོས་ཀྱི་དར་ཆེན་བསྒྲེང་བ་སོགས།།
ལུང་བསྟན་དུས་བབ་མཛད་ལ་ཕྱག་འཚལ་ལོ།།

དགུང་ལོ་ཞེ་བཞིར་རྟག་བརྟན་དམ་ཆོས་གླིང་།།
གསར་དུ་བཏབ་ནས་སྟོང་ཕྲག་འདུས་སྡེ་རྒྱས།།
བསྟན་པ་འདི་ལ་སྟོན་པའི་མཛད་བརྒྱ་བཞིན།།
ཆོས་ཀྱི་རྒྱལ་མཚན་འཛུགས་ལ་ཕྱག་འཚལ་ལོ།།

གཞན་ཡང་ཆེན་པོ་ཧོར་སོགས་ཕྱོགས་ཀུན་ཏུ།།
ས་དགེ་བཀའ་རྙིང་ཇོ་ནང་གྲུབ་མཐའ་བཅས།།
ཡོངས་རྫོགས་རྒྱལ་བསྟན་སྤེལ་ལ་ཟླ་བྲལ་བའི།།
འཕྲིན་ལས་ཕྱོགས་མཐར་རྒྱས་ལ་ཕྱག་འཚལ་ལོ།།

གསུང་ལས་སྐྱེས་པའི་སློབ་ཆེན་གཙོ་བོ་ཡང་།།
ཚད་མའི་སྐྱེས་བུ་རྒྱ་མཚོའི་མཚན་ཅན་གསུམ།།
སྡེ་སྲིད་བྱང་བདག་ས་སྐྱོང་རྣམ་གཉིས་སོགས།།
བསྟན་པའི་སྲོག་ཤིང་བཙུགས་ལ་ཕྱག་འཚལ་ལོ།།

མཛད་པ་ཀུན་ལས་གསུང་གི་མཛད་པ་ནི།།
མཆོག་ཏུ་གསུང་ཕྱིར་གསུང་གི་གདུལ་བྱ་ལ།།
སྔར་ན་མེད་པའི་ལེགས་བཤད་ལུང་གི་གཏེར།།
གླེགས་བམ་བཞི་བཅུ་མཛད་ལ་ཕྱག་འཚལ་ལོ།།

དེ་ལྟར་དམ་པའི་རྣམ་ཐར་ནགས་ཀླུང་ལས།།
མཆེད་པའི་ལེགས་ཚོགས་མ་ལ་ཡ་ཡི་རླུང་།།
ཆ་ཙམ་རེག་ཀྱང་ཟག་མེད་བདེ་བའི་གཏེར།།
ཉེ་བར་ལེན་འདིར་དཔྱོད་ལྡན་སུ་ཞིག་ཚོམ།།

འོན་ཀྱང་བློ་དམན་བློ་ཡི་མུན་ཁང་འདིས།།
མ་རྟོགས་སྤྲིན་ནག་གཡོ་བའི་རྡུལ་ཆགས་པ།།
སྐྱེ་མེད་དད་པའི་རླུང་གི་སྟོབས་ཤུགས་ཀྱིས།།
ཆོས་ཉིད་ནམ་མཁའི་ཀློང་དུ་བཤགས་བགྱིའོ།།

ཨེ་མ་དད་པའི་ཉིན་བྱེད་རྩེ་དགའ་དང་།།
ནང་གི་རྟེན་འབྲེལ་ཟླ་བའི་འདུ་འགོད་ཟུང་།།
སྣང་བའི་མཁའ་ལ་ལམ་མེར་འཆར་བ་ལས།།
བསྟོད་ཕྱག་སྙེ་མའི་མཆོད་པ་གཏན་ཏུ་དགེ།

འདི་འབད་རྣམ་དཀར་འོ་མའི་རྒྱ་མཚོ་རུ།།
གཟི་ལྡན་ཟླ་ཤེལ་བྱེ་བས་འཁྱུད་པ་འདིའི།།
ག་བུར་རྡུལ་གྱི་ཐིགས་པའི་ཟེགས་མ་རེས།།
རྣམ་གྲོལ་གཏན་གྱི་འབྲས་བུ་སྨིན་གྱུར་ཅིག།།

ནང་དོན་ཡོངས་ཁུངས། གོང་སྨད་རྩོམ་རིག་སྤྱི་སྟེགས།