ལེགས་བཤད་ཟིན་བྲིས།

སྐྱབས་རྗེ་ཡིད་བཞིན་ནོར་བུ་༧ངག་དབང་སྣང་བ་སྟོང་གསལ་རྒྱ་མཚོ་མཆོག་གིས།

༼༡༽ཚུལ་ཁྲིམས་ནི་ཡོན་ཏན་ཀུན་གྱི་གཞི་རྟེན་ཡིན། དཔེར་ན་ཚུལ་ཁྲིམས་ནི་ལྗོན་ཤིང་གི་རྩ་བ་ལྟ་བུ་ཞིག་ཡིན་ན་ལྗོན་ཤིང་ལ་རྩ་བ་མེད་ན་ཡལ་ག་དང་ལོ་འདབ་ཇི་ལྟར་རྒྱས། མེ་ཏོག་ནི་དེ་ལས་ཀྱང་བཞད་པ་མེད། དེའི་ཕྱིར་ན། ཚུལ་ཁྲིམས་ནི་མིག་འབྲས་བཞིན་སྲུང་བར་བྱའོ།

༼༢༽སྤྱིར་ཇོ་རྙིང་གསར་གསུམ་གྱི་ཡིག་ཆ་གང་ལ་སྦྱངས་ན་ཡང་ཡིག་ཆའི་ངོས་ནས་བཟང་ངན་གྱི་ཁྱད་པར་ཡོད་ནི་མ་རེད། འོན་ཀྱང་། གང་ཟག་དེ་ཇོ་ནང་པ་ཞིག་ཡིན་ན་དེས་རང་ནུས་ཅི་ལྕོགས་ཀྱིས་རང་ལུགས་དེ་སྦྱངས་བྱ་གཙོ་བོར་བྱས་ནས་བསླབ་རྒྱུ་འདི་གལ་ཆེན་རེད།

༼༣༽གཡོ་སྒྱུའི་འཁྲབ་སྟོན་གྱི་འགོ་བཟུང་ཚར་དུས། ཆོས་ཡང་དག་པ་ཞིག་མ་ཡོང་ཚར་བ་རེད།

༼༤༽ དུས་རབས་ཉེར་གཅིག་པའི་འགྲོ་ལུགས་དང་བསྟུན་དགོས་ཟེར་ནས། འུར་འུར་ཟིང་ཟིང་གིས་མི་ཚེ་རོལ་མཁན་དག་ལ། ཆོས་པའི་རང་ཚུགས་ཡོང་རྒྱུ་དཀའ་མོ་རེད།

༼༥༽དད་པ་རྐྱང་བ་ཙམ་གྱིས་རྨོངས་པ་སེལ་མི་ཐུབ་ལ། ཤེས་རབ་རྐྱང་བ་ཙམ་གྱིས་ཡང་རང་རྒྱུད་འདུལ་མི་ཐུབ་པས་ན། དད་ཤེས་ཟུང་འབྲེལ་བྱེད་རྒྱུ་གལ་ཆེ་བ་ཡིན།

༼༦༽འཆི་བའི་ཚེ་རང་ཉིད་གཅིག་པུར་གཤིན་ཡུལ་འགྲིམ་དགོས་ལ། དེའི་ཚེ་ན་དམ་པའི་ཆོས་རྣམ་པར་དག་པ་འདི་ལས་སྐྱབས་གནས་གཞན་མེད་པས། ཐམས་ཅད་ཀྱིས་ཁ་ཆོས་ཙམ་མ་ཡིན་པར་དོན་ཆོས་ཤིག་ལ་འབད་རྒྱུ་མ་འཆུག

༼༧༽ཁྱེད་རང་དགེ་རྒན་ཞིག་ཡིན་ན་གཙོ་བོ་མཁས་པ་ཡིན་མིན་ལ་མི་ལྟ་བར། རང་སྡེའི་རིགས་ལ་ལྷག་བསམ་ཡང་དག་པ་ཞིག་དང་རང་སྟེང་དུ་མི་གཞི་ལེགས་པོ་ཞིག་ཡོད་མེད་དེ་རྩ་བའི་རྨང་གཞི་རེད།

༼༨༽ ཉོན་མོངས་པ་དབང་བཙན་པའི་རྐྱེན་གྱིས་ཆོས་བསྒྲུབ་པ་ལ་ཕྱི་ནང་གསང་གསུམ་གྱི་བར་ཆད་མང་ན་ཡང་། མི་གཞི་ཅུང་བརྟན་ཆ་ཅན་ཞིག་ཡིན་ན། རང་གི་ཚེ་འདི་དང་ཕྱི་མ། དྲིན་ཆེ་བའི་ཕ་མ་སོགས་ལ་བསམ་བློ་རེ་བཏང་། རང་སེམས་རང་གིས་མནན་ཏེ་བསྡད་ན། ཆོས་པ་མཐའ་འཁྱོངས་བ་ཞིག་ཡོང་ཐུབ་པ་རེད། དེ་ལས་གཞན་མི་གཞི་ཡར་ཡོར་ལས་མེད་པ། བློ་ཁ་ནང་དུ་ཕྱོགས་ཏེ་བསམ་བློ་ཅུང་ཙམ་ཡང་མ་བཏང་ན་མཐར་རང་གིས་རང་ཉིད་ཕུང་སྟེ། ཚེ་འདི་མེད་ཕྱི་མེད་ཅིག་ཡོང་སྲིད།

སྣང་སྟོང་རིག་གཞུང་བསྡུ་སྒྲིག་ཁང་གིས་སྤེལ།