བཅོ་བརྒྱད་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
དེ་ནས་དེ་ཉིན་དོག་སར་འཕོས།{རིམ་པས}གླང་ཐང་དུ{ཕྱིན། འདི་སྐབས}ཞག་གསུམ་པ་ཞིག་བསྡད། ཀྱཻ་རྡོར་གྱི་དབང་ཞིག་མཁན་སློབ་རྣམས་ལ་ཕུལ།
སླར་འཕན་ཡུལ་གྱི་གཞུང་བསྐོར་ཏེ་གླང་རར་ཞག་གཅིག་དང༌། {དེ་མཚམས་ལྷོ་ངོས་ནས་འབོད་མི་གནང་བྱུང་བ་བཞིན}དེ་ནས་ལྷོ་ངོས་སུ་ཕྱིན། ཚེ་དབང་སོགས་ཆོས་ཐན་ཐུན་ཕུལ། བདག་པོ་བཀྲས་སྟོབས་དྲུང་སྐུ་འདས་པའི་གཏམ་ཡང་འདིར་ཁྱེར་བྱུང༌།
ནང(ནངས)པར་ར་ས་འཕྲུལ་སྣང་དུ་སླེབ(སླེབས)། ཞག་ཤས་ཕྱག་མཆོད་སོགས་འཕེལ་བར་བྱུང༌། ཞལ་གསེར་ཞིག་ཀྱང་ཕུལ། བར་སྐོར་ལ་དཀོན་གཉེར་དཔོན་གྱིས་ཞིག་གསོས་བྱེད་ཀྱིན་འདུག་པ་རྟ་གསུམ་སོགས་ཟང་ཟོང་མང་དག་ཞིག་གསོས་ཀྱི་ཐེས་ལ་བཏང༌།{ཐེས་གང་དྲག་ཅིག་ཕུལ།}
ལྷ་ས་ནས་སྔ་བར་ཡོངས(འོངས)ཏེ། སྦུ་བ་གདོང་དུ་སྐྱིད་ཤོད་ནས་སྡེ་པའི་དྲུང་དང་མཇལ་ཙམ་བྱས། རིམ་པས་གཞིས་ཀ་གོང་དཀར་དུ་འབྱོར་བའི(བས)། འདི་སྐབས་ཞག་ཉི་ཤུ་རྩ་གསུམ་བསྡད་ཅིང༌། ཞབས་དྲུང་གདུང་བརྒྱུད(རྒྱུད)རིན་པོ་ཆེས་དེ་གོང་བླ་མེད་ཀྱི་དབང་མ་གསན་པས། ད་ལམ་དབང་བསྐུར་མང་ཙམ་ཞིག་ཀྱང་དགོས་པ་འདུག་ཅིང༌། ཁྱད་པར་དཀོན་ཅིང་བྱིན་རླབས་ཆེ་བར་འདུག་པས། རྗེ་བཙུན་མར་པའི་བཞེད་པ་ལས་འབྱུང་བ་ལྟར་གྱི་དབང་བསྐུར་རྣམས་དགོས་ཕེབས་པ་ལྟར། བཅོམ་ལྡན་འདས་དཔལ་དགྱེས་པ་རྡོ་རྗེ་རྩ་རྒྱུད་ཀྱི་ཡབ་བཀའ་ལྷ་དགུའི་དཀྱིལ་འཁོར་དང༌། ཡུམ་བཀའ་བདག་མེད་ལྷ་མོ་བཅོ་ལྔ། བཤད་རྒྱུད་རྡོ་རྗེ་གུར་ནས་འབྱུང་བ་རིགས་བསྡུས་ཀྱི་དཀྱིལ་འཁོར། དཔལ་སྒྱུ་འཕྲུལ་ཆེན་མོ་ལྷ་ལྔ། རྣལ་འབྱོར་ནམ་མཁའ་ལྷ་དགུ་བཅུ་རྩ་ལྔའི་དཀྱིལ་འཁོར། ཡེ་ཤེས་དབང་ཕྱུག་མ་ལྷ་བཅུ་གསུམ་གྱི་དཀྱིལ་འཁོར། དྲུག་པོ་དེ་རྣམས་མར་རྔོག་གི་ཕྱག་བཞེས་གཙང་མ་ཕྱག་ལེན་ཤིན་ཏུ་དག་པ་དང་། དབང་བཤད་ཆུན་ཡང་གཞན་དང་མ་འདྲེས་པར་བགྱིས། དཔལ་སངས་རྒྱས་ཐོད་པའི་དབང་བསྐུར་བ་རྒྱ་གཞུང་ཉིད་ཀྱི་རྗེས་སུ་འབྲང་དེ(འབྲངས་ཏེ)བསྒྲུབས།
སྐྱིད་ཤོངས་ནས་རབ་གནས་ལ་ཡོང་དགོས་ཚུལ་ནན་ཆགས་བྱུང་བ་ལྟར་ཕྱིན་ཞིང༌། སླེབ(སླེབས)པའི་ཉིན་མོ་ཉིད་རབ་གནས་ཉིན་གཅིག་མའི་ཆོ་ག་བགྱིས། སང་ཉིན་སོ་སོར་དགོངས་བཞེད་ཀྱི་ཆོས་རྣམ་གྲངས་མང་ཙམ་ཕུལ་ཞིང༌། སྲས་མོ་ཞིག་གིས་རབ་བྱུང་ཡང་སྒྲུབ་པར་མཛད། སླར་ཡང་གཞིས་ཀར་ཆོས་ཀྱི་འཕྲོ་རྣམས་ཕུལ།
ལྷུན་རབ{ནས་འབོད་མི་ཡང་ཡང་བྱུང་ནའང་། ཆུ་ཆེས་པ་སོགས་ཀྱི་ཁྱད་པར་འགའ་ཞིག་གིས་འགྲོ་མི་ཐུབ་པར་ཐག་བཅད་པས། ལྷུན་རབ}པའི་ཞལ་ངོ་རྣམས་བཙན་མདོའི་མདུན་དེར་འཕྲད་པར་ཕེབས་ཤིང་། གང་ཅིའི་གཞིས་ལེན་སོགས་བཟབ(གཟབ)མ་རང་མཛད། ཛཾ་ལ(ལྷ)དམར་པོ་སོགས་རྗེས་གནང་འགའ་ཤས་དང་ཚེ་དབང་སོགས་བྱས།
འབྲང་ཕུ་དགོན་པར་སླེབ(སླེབས)ནས་མི་ངོ་རྣམས་ལ་ཡང་ཚེ་དབང་སོགས་འགའ་ཞིག་བྱས། རང་གི་ལྷན་ཅིག་གནས་པ་འགའ་ལ་སྒྲོལ་མ་འདུས་པ་དོན་དམ་པའི་རྒྱུད་རྫོགས་པར་བཤད་ཅིང༌། ཆོས་རྗེ་གྲུབ་ཐོབ་པ་ཡང་སྐྱེད་ཚལ་འོག་གི་མཁན་པོར་ཕེབས་པའི(པས)། ངེད་ལ་འཕྲད་པ་དང་ཆོས་འདྲ་ཞུ་བ་ལ་བྱོན་བྱུང༌།
ལྷུན་རབ་ནས་སྡེ་པ་བླ་མའི་ཐུགས་འདོད་ལྟར་བདེ་མཆོག་ནག་པོ་པའི་དབང་དང༌། སྙིང་པོ་དོན་གསུམ་གྱི་ཁྲིད་སོགས་བཞེད་ཆོས་རྣམས་བྱས། དེ་རྗེས་སུ་ཡོལ་བ་མཁན་ཆེན་ཡང་ཆོས་ཞུ་བར་ཆེད་ཀྱིས་ཕེབས་བྱུང་བ། བཞེད་དོན་གྱི་གཙོ་བོ་ལམ་སྐོར་ཕྱི་མ་བརྒྱད་ཀྱི་ཁྲིད་ཡིན་འདུག་པ་བཞིན། ཕྱག་རྒྱ་ཆེན་པོ་མཆོད་རྟེན་དྲུང་ཐོབ་ཀྱི་ཁྲིད་དེ་འཕྲལ་ནས་བཙུགས་ཤིང༌། ས་འདིར་ཟབ་པའི་ཚུལ་དགུ། ལྷན་ཅིག་སྐྱེས་གྲུབ། གཏུམ་མོ་ལམ་རྫོགས། ཡི་གེ་མེད་པ་རྣམས་གྲུབ་ཅིང༌། ལྷག་མ་རྣམས{མོན་པོ་སྲོང་བ་དང་། བསམ་མི་ཁྱབ་དང་ལུང་རྣམས}འབྲོག་སྟག་ལུང་དུ་བྱས་པ་ཡིན། ཡོལ་མཁན་ཆེན་དང་ངེད་རང་གི་ལྷན་ཅིག་གནས་པ་དགེ་བཤེས་འགའ་ཤས་ལ་མ་ཧཱ་མཱ་ཡའི་རྒྱུད་ཀྱི་རྒྱལ་པོ་ལེའུ་གསུམ་པའི་རྒྱུད་བཤད་ཞིབ་པ་ཞིག་ཀྱང་བྱས།
འདི་སྐབས་ཟླ་བ་ཕྱེད་གཉིས་ཙམ་བསྡད་ཅིང༌། དེ་མཚམས་ནས་ཡར་སྲིས། སྣ་དཀར་རྩེ་རྣམས་བརྒྱུད་ནས་ཡར་འབྲོག་སྟག་ལུང་དུ་ཧོར་ཟླ་དྲུག་པའི་ཚེས་བཅོ་ལྔ་ལ་སླེབ(སླེབས)། ཚེ་དབང་རྗེས་གནང་སོགས་སླེབ(སླེབས)འཕྲལ་ནས་དབུ་ཚུགས་ཤིང༌། སྡེ་པ་ཁུ་དབོན་རང་ལ་ཚེས་བཅོ་བརྒྱད་ནས{གསུང་ངག་རིན་པོ་ཆེ}ལམ་འབྲས་ཞིག(ཤིག)ཀྱང་འགོ་ཚུགས། འདི་སྐབས་ཁུ་དབོན་གཉིས་མ་གཏོགས་གཞན་ལ་མི་བྱེད་པའི་རྒྱུན་མཚན་ཡང་མྱུར་དུ་རྫོགས་པར་བྱེད་དགོས་བྱུང་བའི་དགག་དགོས་ཀྱི་དབང་ལས་ཡིན་ཞིང༌། ཧོར་ཟླ་བརྒྱད་པའི་ཚེས་བརྒྱད་ལ་གྲོལ། ཟླ་གཅིག་ཞག་ཉི་ཤུ་ཙམ་སོང༌།
{སྔ་དྲོ་སྔ་བའི་ཆ་ལ} ལམ་འབྲས {ཀྱི་འཁྲིད་དམིགས་གང་ངེས་དང་། དེ་མཐུན་གྱི་ལུང་རྣམས་བགྱིས་པས། ཆོས་ཐུན་ཆེ་བ་རང་བྱས་པས་ལམ་འབྲས} གླེགས་བམ་མན་ངག་ཕྲ་མོ་པོ་ཏི་ཡོངས་རྫོགས། ལམ་སྐོར་ཕྱི་མ་དང་བཅས་པ་རྣམས་སོང{རྣམས་ཀྱི་ལུང་ཕུལ་ཞིང}། མན་ངག་ལུགས་ཀྱི་རྒྱུད་དབང་རྡུལ་ཚོན་གྱི་དཀྱིལ་འཁོར་ལ་བརྟེན་དེ(ཏེ)དབང་ཆ་གཉིས་ཙམ་ཞིག་ཀྱང་བགྱིས།
ཁུ་དབོན་དྲུང་རང་དུ་ལུས་དཀྱིལ་ཡབ་བཀའ་ཡུམ་བཀའ་གཉིས། ལམ་ཟབ་ཕྱི་ནང་གཉིས། བིར་སྲུང་ཕྱི་ནང་ལ་སོགས་པ་ལམ་འབྲས་ཀྱི་བྱིན་རླབས་རྣམས་ཀྱང་ཆ་ཚང་བར་ཕུལ། ཞལ་ངོ་རྩེ་རྒྱས་དང༌། གཞན་ཡང་གཞི་བྱེས་ཀྱི་དོན་གཉེར་སོ་སོ་དང་བཅས་པ་ལ་མན་ངག་ལུགས་ཀྱི་བདག་མེད་མ། ཀྱཻ་རྡོར་ཌོམྦི་ལུགས། མཚོ་སྐྱེས་ལུགས། ནག་པོ་ལུགས་ལ་ཧེ་རུ་ཀ་བཞིའི་དཀྱིལ་འཁོར་རྣམས་ཀྱི་དབང་སྟེ། བཀའ་བབས་ལྷག་མ་དེ་རྣམས་རིས་བྲིས་ཀྱི་དཀྱིལ་འཁོར་ལ་བརྟེན་ཏེ་བགྱིས།
ཞལ་ངོ་ཐམས་ཅད་དང་། དོན་གཉེར་མང་དག་ལ་ཕྱག་རྒྱ་ཆེན་པོ་གའུ་མའི་ཁྲིད་ཤིན་ཏུ་སྨིན་པ་ཟླ་ཆོས་ཤིག་བགྱིས་ཤིང༌། {ཆུ་ཤུལ་ནས་དཔོན་སའི་དྲུང་དུ་ནི་གུའི་དམིགས་སྐོར་བསྡུས་པ་ཞིག་ཀྱང་ཕུལ།} ཞལ་ངོ་མནའ་རྙིད་སོགས་ལ་བདེ་མཆོག་ནག་པོ་པའི་དབང་ཞིག{དགོས་གསུངས་པ་ལྟར}བྱས་པས། སྟ་གོན་གྱི་སྐབས་སུ་སྲིན་ལག་ནས་ཁྲག་རང་བརྡོལ་ཏིང་ཆུང་ཞིག་ཁེངས་པ་ཙམ་བྱུང༌། དབང་མི་དྲུག་ཅུ་ཙམ་ལ་དུས་ཀྱི་འཁོར་ལོའི་དབང་ཡོངས་རྫོགས་ཤིག་ཀྱང་བགྱིས། སྒྲོལ་མ་རྣལ་འབྱོར་མའི་རྡུལ་ཚོན་གྱི་དཀྱིལ་འཁོར་ཆེན་པོ་བཞེངས་ཏེ། ཞལ་ངོ་བཞི་སོགས་དབང་མི་དགུ་ཙམ་ལ་དབང་ཉིན་བདུན་མའི་ཕྱག་ལེན་རྫོགས་པ་དང་། {འདི་ཉིད་ལ་བརྟེན་པའི་བྱིན་རླབས་རྗེས་གནང་ཆ་ཚང་བ་དང་།} རྒྱུད་ཀྱི་ལུང་ཡང་བགྱིས།
ཞལ་ངོ་རྣམས་ལ་རྣམ་རྒྱལ་ལྷ་མང༌། གཟའ་ཡུམ་ནོར་རྒྱུན་མ་སྟེ་དགེ་ལེགས་སུ་བྱེད་པའི་དཀྱིལ་འཁོར་གསུམ་གྱི་དབང་ཡང་ཕུལ། གནས་བཅུའི་ཞལ་ཐང་ཆེན་མོ་གསར་བཞེངས་ལ་རབ་གནས་བྱས་པས། གནས་བརྟན་ལམ་ཕྲན་བརྟན་དང༌། རྒྱལ་ཆེན་མིག་མི་བཟང་གིས་མེ་ཏོག་བཞེས།
གཞན་ཡང་རང་རེའི་གྲྭ་སློབ་འགའ་ཤས་ལ་ཛ་ལནྡྷ་རའི་དོ་ཧའི་མན་ངག་རྒྱས་པ་ཚར་གཉིས་དང༌། མི་གཡོ་བླ་མེད་ཀྱི་ཁྲིད་སོགས་དང༌། སྔ་སོར་ཧོར་ཟླ་གཉིས་པའི་འགོ་རང་ནས་བཀའ་བབས་བདུན་ལྡན་གྱི་མན་ངག་བཤད་པའི་འགོ་བརྩམས་པ་སྐབས་འདིར་མཐར་ཕྱིན་པ་ཙམ་བྱུང༌། {ལྕམ་དྲུང་དུ་རྣལ་འབྱོར་མའི་ཁྲིད་རྒྱས་པ་ཞིག་ཀྱང་བགྱིས།}
དེ་ནས་རེ་ཞིག་དེ་ཕྱོགས་ཀྱི་བྲེལ(འབྲེལ)བ་ཆོད་པའི་ལུགས་སུ་བྱས་ཏེ། ཧོར་ཟླ་བརྒྱད་པའི་ཚེས་བཅུ་གཅིག་ལ་ལམ་དུ་ཞུགས། གནམ་གྲུར་སླེབ(སླེབས)སྐབས་རྒྱ་གར་ཀྱི(གྱི)ཀླ་ཀློའི་ཆོས་ལུགས་འཛིན་པ་དར་བྷེ་ཤ་གཅིག་དང་འཕྲད། སེམས་མ་དགའ་སེ་བ་ཞིག་བྱུང༌། ཕུགས་རྒྱལ་རྩེར་མི་ལེགས་པའི་རྟེན་འབྲེལ་དུ་འདུག །
རིམ་པས་བརྒྱུད་དེ་རྒྱལ་རྩེར་འབྱོར། ཐོག་མར{ཞལ་ངོ་སོ་སོར་སྐུ་ཚེ་བསྲིང་བ་དང་།} རྐྱེན་སེལ་གྱི་དབང་ཆོས་འདྲ་ཕུལ་ཞིང་། སོ་སོའི་བཞེད་ལྟར་བཅོམ་ལྡན་འདས་གཤིན་རྗེ་གཤེད་དམར་པོ་བཅུ་གསུམ་མའི་དབང་དང༌། འཇིགས་བྱེད་རོ་ལངས་བརྒྱད་སྐོར། མི་གཡོ་བ་རྣལ་འབྱོར་བླ་ན་མེད་པའི་དབང༌། བདག་པོ་རྒྱལ་བའི་དྲུང་དུ་སྨར་ཁྲིད་དང་ཕྱག་ཆེན་གའུ་མ། ཞལ་ངོ་སྤྱི་ཁྱབ་ཏུ་སྤྲོས་མེད་ཀྱི་ཁྲིད་སོགས་ཆོས་ཀྱི་རིམ་པ་རྣམས་འཕེལ་བར་བྱུང་ཞིང༌། བར་སྐབས་དེར་འབྲོང་རྩེ་བརྒྱུད་ནས་འདོལ་བྱུང་ལ་ཕྱིན་པ། གསང་བདག་ཕྱག་ན་རྡོ་རྗེ་འཁོར་ལོ་ཆེན་པོ་དང་། གཤིན་རྗེ་གཤེད་གདོང་དྲུག་གི{ལྷ་ཉི་ཤུ་རྩ་གཅིག་མའི}དབང་བསྐུར། གཞན་ཡང་དགོངས་བཞེད་ཀྱི་ཆོས་སྣ་མང་དུ་བགྱིས།
ལྷ་སྡིངས་སུ་སྔར་ཡང་ཡང་འགྲོ་བ་བཞིན་འདི་རེས་ཀྱང་ཕྱིན། དབོན་ཆེན་ལྷུན་གྲུབ་བཟང་པོ་རང་གིས་མོ་ལ་བཏང༌། ད་ཐོད་པ་ནམ་འབོགས་ཆ་མི་འདུག་པས་ཤི་བ་བྱུང་ན་དགོན་ཆུང་འདི་ལའང་ཐུགས་རྗེས་གཟིགས་ཟེར།
མངའ་བདག་རྒྱས་མོའི་སྐུ་གདུང་ཞུགས་འབུལ་བྱེད་དགོས་སྟབས་སླར་རྒྱལ་རྩེར་ཕྱིན། གམ་པ་ནས་བདག་པོའི་དྲུང་ཡང་ཕེབས་འདུག་པ། ཚེ་དབང་བརྒྱ་ཚར་དང༌། བདེ་མཆོག་ནག་པོ་པའི་དབང་ཞིག་ཀྱང་ཕུལ། ཚེས་བདུན་གྱི་དགོང་མོ(མོར)རྡོ་རྗེ་མི་འཁྲུགས་པའི་སྦྱིན་སྲེག་གི་ཆོ་ག་ལ་བརྟེན་ཏེ་གདུང་འོད་བཞུ་བྱས། ཞུགས་འབུལ་ཤིན་ཏུ་ལེགས་ཤིང་། དབུ་ཐོག(ཐོད)རིལ་པོར་བྱོན་པའི་རྣམ་པ་བྱུང༌། དཔོན་ས་ཡིད་ལགས་དྲུང་དཔོན་གཡོག་བཅུ་སྐོར་ལ་ནཻ་གུའི་མགྱོགས་ཁྲིད་སྒྱུ་ལུས་དབང་མོ་ཆེ་དང་བཅས་པ་དགོངས་བཞེད་ལྟར་ཕུལ།
དེ་ནས་རྩེ་ཆེན་དུ་ཕྱིན། ཞག་ཤས་འགོར། དགོངས་བཞེད་ཀྱི་ཆོས་འདྲ་ཕུལ། རང་རེས་སྟག་ལོ་ཆོས་སྡེའི་ཁུར་བཞག་པ་དེ་ཕྱིན་ཆད་ཆོས་སྡེར་ཅི་ཡང་མ་ཕྱིན་པས། འདི་སྐབས་འཇམ་དབྱངས་དཀོན་མཆོག་བཟང་པོའི་དངུལ་གདུང་ལ་བྱིན་རླབས་ཞུ་བར་ཕྱིན།
{ཡང་འདུས་བྱུང་དུ་ཞག་གཅིག་བསྡད། དྲག་པོའི་རྗེས་གནང་འགའ་ཤས་ཕུལ་ཏེ}། རང་གནས་བསམ་གཏན་སྡིངས་སུ་སླེབ(སླེབས)། སྒྲུབ་སྡེ་བ་རྣམས་ལ་ནཻ་གུ་འབྲིང་པོ་ཞིག་བཤད་ཅིང༌། འཇག་ནས་རིན་པོ་ཆེ་སྤྲུལ་སྐུ་དཔོན་སློབ་རྣམས་དང་། སྨན་ཐང་བློ་བཟང་པ་ཡང་འཕྲད་པར་བྱོན་བྱུང༌། ཐུགས་དགོངས་ལྟར་གྱི་ཆོས་འདྲ་བྱས། གསེར་མདོག་ཅན་ནས་ཤངས་པ་སློབ་དཔོན་པ་ཆོས་ཁྲིམས་དང་བཅས་པ་ངེད་ཡོང་དགོས་ཚུལ་ལ་ཕེབས་བྱུང་ཞིང་། མ་ཧཱ་མཱ་ཡའི་དབང་བསྐུར་ཞིག་ཀྱང་བཞེད་པ་ལྟར་བྱས། སྐབས་འདིར་བསམ་སྡིངས་སུ་ཟླ་ཕྱེད་ཙམ་སོང༌།
ཧོར་ཟླ་བཅུ་གཅིག་པའི་ཚེས་བཅུ་གསུམ་ལ་སྤ་མནམ་རྫོང་དུ་འོངས། ནང(ནངས)པར་རྗེ་གྲུབ་ཐོབ་ཀརྨ་པ་དགུ་པ་ཡང་ཕེབས་པའི(པས)། སྐུ་གཞོགས་མཇལ་བར་ཕྱིན། ཞག་བཞིའི་བར་དུ་ཉིན་རེ་བཞིན་མཇལ་བའི་ཆོས་འབྲེལ་གྱི་ཐོག་མར་སྐུ་གསུམ་ངོ་སྤྲོད་ཆོས་ཐུན་གཅིག་ལ་འདུས་པ་ཞིག་གནང་ཞིང༌། སྔོན་གྲུབ་ཐོབ་པག་ཤིས(པཀྵིས)ཀྱང{རྒྱལ་བ}ཨོ་རྒྱན་པ་ལ་ཆོས་ཐམས་ཅད་ཀྱི་དོན་བརྒྱུད་གཏད་པའི་ཆོས་འབྲེལ་དངོས་སུ་སྩལ་བ་ནི་འདི་ཁོ་ན་ཡིན། འདི་གསན་པས་ཀརྨ་ཀམ་ཚང་གི་ཆོས་ཐམས་ཅད་དོན་གྱིས་གསན་པ་ཡིན་ནོ་གསུང(གསུངས)།
གཞན་ཡང་ལྷན་ཅིག་སྐྱེས་སྦྱོར་གྱི་ཁྲིད་ཐུན་གཅིག་ལ་ཚང་བ་ཞིག་དང༌། སྒྲུབ་ཐབས་ཟབ་པ་འགའ་ཤས་དང༌། ཚེ་དབང་གྲུབ་རྒྱལ་མ། རྩ་གསུམ་དྲིལ་སྒྲུབ། རྒྱལ་བ་རྒྱ་མཚོའི་དབང༌། བེར་ནག་ཅན་གྱི་གཏོར་དབང་། བླ་མའི་རྣལ་འབྱོར་ཐུགས་ལ་ཤར་བ་གཅིག་སོགས་དགྱེས་བཞིན་དུ་བསྩལ། སྔ་ཕྱིར་ཐུགས་སུ་བྱོན་པའི་བཀའ་ལུང་བག་ཕེབས་པར་གནང༌།
དེ་མཚམས་ཚོང་འདུས་སུ་ཕྱིན་པའི་ཞག་བདུན་བསྡད་ཅིང༌། འདི་སྐབས་རྗེ་ཀརྨ་པ་དབང་ཕྱུག་རྡོ་རྗེས་དངོས(ངོས)ལ་བསྟོད་པ་བརྟན་བཞུགས་སྨོན་ལམ་ཤླཽ་ཀ་གསུམ་པ་ཞིག་ཆེད་གཏད་སྐྱེལ་བར་གནང་བྱུང༌། དགེ་བཤེས་ནོར་བུ་དཔལ་བཟང་པ་ལ{དཔལ་བཟང་པས་ཆེད་ཀྱི་ནན་ཏན་དུ་བསྐུལ་བ་ལ་བརྟེན་ཏེ}། འཕགས་པ་སྤྱན་རས་གཟིགས་པད་མ་དྲ་བའི་དབང་བསྐུར་ཞིག་ཀྱང་བྱས། སོ་སོའི་འདོད་པ་དང་བསྟུན་པའི་ཆོས་གཞན་ཡང་མང་དུ་བགྱིས།
དེ་ནས་དཀར་པོ་ལ་ལ་བརྒྱུད་ནས་ཆོས་གྲྭ་ཆེན་པོ་གསེར་མདོག་ཅན་དུ་ཕྱོགས།ལ་རྩ་ནས་མཁན་སློབ་རྣམས་ཀྱང་བསུ་བ་ལ་ཕེབས། དགེ་འདུན་རྣམས་ཀྱི་སེར་འཕྲེང་བཀོད་པ་རྒྱ་ཆེན་པོ་དང་བཅས་ཏེ་འབྱོར། བཀྲ་ཤིས་བརྩེགས་པ{པར་ཞག་གསུམ་པ་ཞིག་བསྡད་ཅིང}། མཁན་སློབ་སོགས་རགས་བསྡུས་ལ་འཁོར་ལོ་བདེ་མཆོག་སྡོམ་འབྱུང་ལྷ་བཅུ་གསུམ་མ་དང༌། སྒྲོལ་མ་བླ་མེད་མའི་དབང་ཞིག་བྱས།
{དེ་མཚམས་ནས}ཤངས་པ་གྲྭ་ཚང་དུ{བསྡད་ཅིང་། འདིར}ཡང་མཁན་སློབ་སོགས་དྲག་བསྡུས་ལ་འཁོར་ལོ་བདེ་མཆོག་རྡོ་རྗེ་མཁའ་འགྲོའི་དབང{དང་། ཤངས་པ་སློབ་དཔོན་པ་རང་དུ}རྡོ་རྗེ་གདན་བཞིའི་དབང{དང་། ཐུན་མོང་མ་ཡིན་པའི}རྗེས་གནང{གི་བཞེད་དོན}འགའ་ཞིག་རྣམས་བགྱིས། ཚོགས་ཆེན་ལ་རྗེས་གནང་ཟུར་བཀའ་ཉི་ཤུ་ཙམ་དང༌། གསང་འདུས་རིམ་ལྔ་འགོས་ལུགས་ཀྱི་ཁྲིད། པཎ་ཆེན་ཆོས་ཀྱི་རྒྱལ་པོའི་རྣམ་ཐར་ཞིབ་མོ་རྣམ་དག་གི་ཆོས་འཁོར་ཡན་ཆད་ཙམ་གྱི་ལུང་སོགས་དང༌། མཁན་སློབ་རྣམས་ལ་རིམ་ལྔ་མར་ལུགས་ཀྱི་ཁྲིད་ཡོངས་རྫོགས་དང༌། སྤྱོད་བསྡུས་སྒྲོན་མེའི་ལུང་སོགས་ཕུལ།
འདི་སྐབས་རྩེ་ཆེན་ནས་དཔོན་སའི་དྲུང་ཤིན་ཏུ་བསྙུང་བའི་འཕྲལ་སླེབ་དགོས་ཚུལ་ཕེབས་བྱུང་ནའང༌། སྐུ་ཁམས་སྐྱོན་མི་ཡོང་བའི་ཁག་ཐེག །ད་ལམ་མི་ཡོང་ཞུས་ནས་མ་ཕྱིན། འབོད་མི་ཡིད་མ་ཆེས་བྱེད་ཀྱིན་འདུག་ནའང་ཕྱིས་དེ་ཀ་ལྟར་བྱུང༌།
དེ་ནས་བསམ་གྲུབ་རྩེར{སླེབས་པ}། སྡེ་པ་སྐུ་གཞོན་པའི་དྲུང་དང༌། སྲས་ཡུམ་རྣམས་སུ་དཔལ་རྡོ་རྗེ་འཇིགས་བྱེད་བཅུ་གསུམ་མའི{བདག་ཉིད་ཅན་དུ}དབང་བསྐུར་བ་དང༌། དཀྱིལ་འཁོར་དེ་ཉིད་ལ་བརྟེན་ཏེ་ཞལ་ཐང་འགའ་ཞིག་ལ་རབ་གནས་ཀྱང་བགྱིས་ཤིང་། དགའ་སྟོན་ཚོགས་འཁོར་སོགས་ཀྱང་དཔེ་མེད་བྱུང༌།
འདི་སྐབས་རབ་གནས་ཀྱི་སེང་བར་ལ་དཀར་མེ་ཞིག་དར་ཡོལ་ལ་མཆེད། རྣམ་པ་གཅིག་ཙམ་ཚིག །རྟོག་པ་ཟ་བར་བྱུང{ནའང}། ཡོན་བདག་ཚོར་ཐུགས་རྟོག་བྱུང་དོགས་དང་། དེ་ཀ་འདྲ་བས་སྤོས་པས་སུས་ཀྱང་མ་རིག །
གཞན་ཡང་ཚེ་བཀའ་སོགས་དགོངས་བཞེད་ལྟར་ཕུལ་ནས། {དེ་ཉིན}དཔལ་སྣར་ཐང་དུ{སླེབས}། ཞག་ལྔ་ཙམ་བསྡད་པས། ཡབ་ཡུམ་སོ་སོར་ཆོས་ཐན་ཐུན་དང༌། སྡེ་པའི་དྲུང་དུ་སློབ་དཔོན་ས་དཱེ་ན་ཐ་ནས་བརྒྱུད་པའི་ཧེ་རུ་ཀའི་བྱིན་རླབས་ཤིག་ཀྱང་དགོངས་བཞེད་ལྟར་ཕུལ། ཆོས་ཀྱི་གསུང་གླེང་འཕེལ་བར་བྱུང༌། ཆུ་མིག་གི་སྒྲོལ་མ་དང་། བྱམས་པ་སོགས་རྟེན་རྣམས་ལ་ཕྱག་མཆོད་རྒྱས་པར་བྱས།
བྱང་ཆེན་དུ་འབྱོར་པའི(པས)། དགོན་པ་བྱང་དུ་ཁྲོམ་དབང་ཞིག་བྱས་པ་མི་ཚོགས་ཀྱང་ཆེ། སྒྲུབ་སྡེ་རྣམས་ལ་སྐྱེས་བུ་གསུམ་གྱི་ལམ་རིམ་དང་སྨར་ཁྲིད་ཞིག(ཅིག)བཤད། རྣལ་འབྱོར་མའི་བྱིན་རླབས་དང༌། མི་འཁྲུགས་པ་ཇོ་བོ་ལུགས་ཀྱི་དབང་བསྐུར་ཞིག་ཀྱང་བྱས་ཤིང༌། དེ་གཉིས་ཀྱི་ཆོ་ག་འཛུགས་པའི་བཀོད་པའང་དེ་དུས་བྱས་པས་མྱུར་སྟབས་ཚུགས།
དེ་ནས་རིམ་པས(པར)ལམ་བསྲངས་སྟག་ལའི་ལ་ཐོག་ནས་ཐལ་རླུང་ཆེན་པོ་རང་གཅིག་བྱུང༌། རེ་ཤིག(ཞིག)སྟོད་ཕྱོགས་མ་འགྲོ་ཟེར་བའི་བརྡར་འདུག །{བོ་དོང་ནས་བསུ་བ་ཀུན་དགའི་གྲོང་གིས་མཐུན་རྐྱེན་ཡང་དག་པར་མཛད་ཅིང་། བྱ་རྒོད་ཤོངས་ནས་སློབ་དཔོན་པ་ཡང་ཡུད་ཙམ་འཕྲད་པར་ཕེབས་བྱུང་།}
རི་ཁྲོད་ཆེན་པོ་ཇོ་མོ་ནང་དུ་འབྱོར་མ་ཐག་དཔོན་ས་རྒྱལ་དྲུང་གིས་ཇ་འདྲེན་བཟབ(གཟབ)མ་ཞིག་བྱུང༌། གཞན་ནི་གང་ཡང་མེད། བྱང་གི་སྤྱན་འདྲེན་པ་ནི་ལྡོག །དེའི་སང་ཉིན་རང་ནས་དུས་ཁྲིད་ཞིག(ཅིག)ཀྱང་བཙུགས། འདི་སྐབས་གཏམ་གསར་པའི་སྔ་ལྟས་ཤིག་དང་། རྨི་ལམ་གྱི་འཆར་སྒོ་གསལ་བ་འདྲ་བྱུང་བས། རྒྱུན་སྡོད་ཀྱི་ཟླ་བོ་ཐམས་ཅད་ལ་གཏམ་གསར་ཆེན་པོ་ཞིག་ཡོང་བ་འདུག་སྨྲས་པ་ལྟར། དེ་འཕྲལ་རྗེ་དབང་ཕྱུག་རྡོ་རྗེ་ཞིང་བརྗེས་སོང༌།
སྔོན་འགྲོའི་རིང་ལ་སྒྲུབ་ཐབས་བརྒྱ་རྩའི་རྗེས་གནང་བྱས། ཁྲིད་འཛུགས་པ་འཕྱིས་པའི་སྟབས་ཁྲིད་གསར་པ་མི་ནག་པའི་རིགས་མང་པོ{བཞི་བཅུ་ཙམ་ལས}མ་བྱུང་ནའང༌། ཁྲིད་གསར་པ་གྲྭ་པ་བྱིས་པ་འདྲ་དང་། བཙུན་གསར་མ་རང་ལྔ་བཅུ་ཙམ་ཡང་བྱུང་ཞིང༌། གཞན་ཡང་ལས་དང་པོ་རྣམས་དང་བཅས་པས་དམ་པོ་འདེབས་མཁན་མང་རབ་བྱུང༌། སྔར་མཁྱུད་ཀྱི་ཕྱག་ལེན་ལྟར་དུས་ཆོས་ཤིན་ཏུ་སྨིན་པར་བྱས།
སྔོན་འགྲོའི་སྐབས་ཤིག་རྨི་ལམ་དུ་སློབ་དཔོན་པདྨ་ཡིན་ཟེར་བའི་སྐུའི་རྣམ་པ་ཤིན་ཏུ་གསལ་བ་ཞིག་དང༌། དེ་ལ་གུས་པས་བསྟོད་པ་ཞིག་ཀྱང་བྱས་པ་སད་ནས་མ་བརྗེད་པར་ཡི་གེར་བྲིས། དེ་ཉིན་གུ་རུའི་སྐུ་འདྲ་ཞིག་ཀྱང་སྟེར་མཁན་བྱུང༌། ཡང་རྒྱལ་བ་མི་ཕམ་པ་བབས་པ་ཡིན་ཟེར་ནས་ཆོས་ཅི་ཡང་ཞིག་བཤད་ཀྱིན་འདུག །གཉིད་སད་ཙ་ན་གཞན་མི་དྲན། ཤེར་སྙིང་དངོས་པོ་བརྒྱད་དང་སྦྱར་ནས་བཤད་པ་དེ་བློ་ལ་རམ་མེ་འདུག །ཕྱིར་མི་ལྡོག་པ་འཁོར་ལོའི་གཏམ་ལ་སྙིང་ཐག་པ་ནས་ངེས་ཤེས་ལྷང་ངེར་ཤར། ཀུན་མཁྱེན་རྟོན་པ་བཞི་ལྡན་ཆེན་པོའི་བྱིན་རླབས་ཀྱི་འཇུག་སྒོ་ཡིན་པར་མངོན།
ཁྲིད་གྲོལ་ནས་ཟླ་ཕྱེད་ཙམ་མཚམས་དམ་པར་བཅད། དེ་མཚམས་བསམ་འགྲུབ་རྩེ་ནས་དཔོན་སའི་དྲུང་ཆབ་ཚན་གྱི་ཞོར་ལ་མཚེད་དུ་མཇལ་བ་དང༌། དེ་མཐུན་ཇོ་ནང་དུ་ཡང་ཕེབས་པའི(པས)རྟེན་མཇལ་སོགས་ཞིབ་མོར་གནང༌། {ཚེ་དབང་སོགས་ཀྱང་ཕུལ།} སྒྲུབ་སྡེར་ནས་ཁལ་ལྔ་བརྒྱ་གནང༌།
དེ་རྗེས་སུ་ཡང་ཟླ་གཅིག་ཙམ་མཚམས་དམ་པར་བྱས། དེ་ཡང་དེ་གོང་ཕག་བྱི་གླང་གསུམ་གྱི་ལོ་ལ་ཉམས་ཀྱི་རྩལ་ཆུ་ལྟར་འཁྲུག་པ་ཐུན་མོང་གི་ཡོན་ཏན་མང་པོ་སྐྱེ་སྐྱེ་འདྲ་བ་ཡོད། སྟག་ལོ་ཡང་དེའི་རྒྱུན་ཕྱོགས་འདྲ་ཙམ་བྱུང༌། ཡོས་ལོ་འདི་ནས་དེ་ཡང་རིམ་པས་ཡལ། ཞུན་མར་རྩེག་ཆོད་པ་ན་ཁོལ་མི་ཡོང་བ་དང་འདྲ་བ་ཉམས་སངས་ནས་རྟོགས་པ་ཉག་གཅིག་མཉམ་ཉིད་དུ་སོང་སྙམ་པའི་དགའ་དགའ་འདྲ་མོ་ཞིག་སྣང་ནའང་། ཕུགས་ནི་ལོ་གོང་མ་གསུམ་བཞི{གཞི}དེ་ལ་འཇིག་རྟེན་ཆོས་བརྒྱད་ཀྱི་དབང་དུ་སོང་། ཉམས་ཀྱི་རྩལ་ཕྱོགས་མེད་དུ་སྦྱོང་བ་མ་བྱུང་བས། དུས་ལ་བབ་པའི་རྟེན་འབྲེལ་ལས་ཡོལ། དགེ་སྦྱོར་ལ་བོགས་མ་ཐོན་པ་ཁོ་ནའི་སྐྱོན་དུ་སྣང༌། འདིས་རང་དོན་དང་གཞན་དོན་གཉིས་ཀ་ལ་སྐྱོན་ཆེན་པོ་ཞུགས་ཏེ། རེ་ཤིག(ཞིག)བརྗོད་པའི་གནས་མེད་དོ། །
དེ་སྐབས་གཏིང་སྐྱེས་ནས་སྡེ་པ་མ་ཆེན་དྲུང་སྐུ་ཁམས་ཀྱང་ལྟེམས་ཡུན་རིང་བ་དང༌། སྐུ་ཞུད་སོགས་སྐུ་དོག་གི་རྣམ་པ་ཆེ་བ་འདུག་པས་འཕྲལ་སླེབ་དགོས་ཚུལ་བྱུང་བ། དེ་མཚམས་ཆོས་ལུང་བྱང་རྩེར་ཁོར་ཙམ་ཕྱིན། ཆུ་སེར་གྱིས་པུས་མོ་ན་བ་ལ་ཕན་དུ་རེ་བའི(བས)ཆུ་ཚན་ཞག་ལྔ་ཙམ་བསྟེན། སྒྲུབ་སྡེ་རྣམས་ལ་རྩ་དབུ་མའི་ཁྲིད་ཅིག་བཤད་ཅིང་། {བདེ་མཆོག་ལྷ་ལྔ། དུར་ཁྲོད་བདག་པོ། ཏྲཀ་ཤད་རྣམས་ཀྱི}དབང་རྗེས་གནང་འགའ{མ་ཐོབ་པ་འགའ་ལ}བསྒྲུབས།
ངེད་དབུས་ན་ཡོད་དུས། ངམ་རིང་ནས་མི་སྣ་གནང་བའི་རྟེན་སྒམ་ཞལ་འབྱེད་ལན་གཉིས་ཙམ་མཛད་པའི(པས)བདུད་རྩི་རིལ་བུ་གཅིག་ཀྱང་མ་ལུས་འདུག །གྲྭ་པ་རྣམས་ཀྱང་རྟེན་མཇལ་མ་མྱོང་བ་ཤ་སྟག་ཡིན་པས། རྟེན་སྒམ་ཞལ་འབྱེད་བྱས་པས་སྔར་གྱི་ས་ན་མེད་པ་གཉིས་གསུམ་ཞིག་སྣང༌། ངེད་རང་དོལ་དུ་མཚམས་བཅད་སྐབས། མཁའ་འགྲོས་སྩལ(བསྩལ)བའི་སྨན་མཆོག་དབང་པོའི་འབྲས་བུ་དེ་ཡང༌སྔ་ཕྱིའི་རྟེན་འབྲེལ་འགའ་ལ་རྟེན་སྒམ་དུ་བཞུགས་སུ་གསོལ།
དེ་ནས་གཙང་མགོ་གཉིས་མར་ཚེ་དབང་རྗེས་གནང་གང་འོས་དང༌། གཟུངས་གྲྭ་ལྔའི་དབང་ཞིག་དང་ཁྲོམ་དབང་ཞིག་ཀྱང་བྱས་ཤིང༌། ཉིན་གཅིག་བདེ་མཆོག་རྩེར་ཕྱིན་པའི(པས)བཀའ་བརྒྱད་ལྷ་ཁང་ལ་རབ་གནས་དང་། ཚོགས་ཁང་དུ་བླ་མའི་རྣལ་འབྱོར་ཞིག་ཀྱང་བྱས།
དེ་ནས་ཡར་ལམ་དགོན་པ་འབྲས་སྤུངས་ཀྱི་མདུན་དེར། འབྲས་སྤུངས་གདན་ས་པ་ཤཱཀ་མཆོག་པའི་དྲུང་དང་། དགེ་འདུན་རྣམས་དངོས(ངོས)ལ་འཕྲད་པར་ཕེབས་བྱུང༌།
དེ་ནུབ་ཁྱུང་དཀར་ཞོལ་དུ་སླེབ(སླེབས)། སང་ཞོགས་ལྷ་རྩེ་རྫོང་དབོན་གཉིས་རང་ལ་ཚེ་དབང་ཞིག་དགོས་ཟེར་བ་བྱས་དུས། ཉི་མ་གཟའ་འཛིན་བྱུང་བའི་མུན་ཤིན་ཏུ་ནག་པར་སོང་བ། ཕྱིས་དམ་སེལ་ཆེན་པོར་འགྲོ་བའི་རྟེན་འབྲེལ་དུ་སྣང༌།
དེ་ནས{ཁྱུང་དཀར་གྱི་གྲུ་ལ་ཐོན། ཡར་ལམ་འདར་གྱི་སྐྱེད་ཚལ་དེར་སྡེ་པ་སྐུ་བགྲེས་པའི་དྲུང་གིས་ཇ་འདྲེན་གཟབ་མར་མཛད་ཅིང་། དེ་ནུབ}བདེ་གླིང་དུ་སླེབ(སླེབས)། གནས་བཅུའི་ཞལ་ཐང་གསར་བཞེངས་ལ་རབ་གནས་བྱས།
རིམ་པས་མཁར་ཆེན་དུ་འབྱོར་ཞིང༌། སྡེ་པ་རིན་པོ་ཆེའི་དྲུང་ཡང་སྐུ་ཁམས་ཡར་སོར་བྱུང་འདུག །མོ་ལོན་སོགས་ཅུང་ཟད་རྩུབ་བ་ལ་བརྟེན་པའི་དགོངས་བཞེད་ལྟར། སྡེ་པ་མ་ཆེན་སྐུ་རྐྱང་དུ་ཚེ་དབང་གྲུབ་རྒྱལ་མ་བརྒྱ་ཚར་གཉིས་དང༌། ཛེ་ཏ་རིའི་ལུགས་བརྒྱ་ཚར། དཔལ་མགོན་པོའི་རྗེས་གནང་ཚར་ལྔ་བཅས{ལྔ་སོགས་ཕུལ་ཞིང་། བདེ་མཆོག་ནག་པོ་པ་དང་། མགོན་པོ་ཏྲཀ་ཤད་ཀྱི་ཞལ་ཐང་། དབུས་སུ་གསར་དུ་བཞེངས་ཡོད་པ་སྐྱེས་སུ་ཕུལ།}
སླེབ(སླེབས)ནས་མི་རིང་བར་མཆོད་ཡོན་ལྷན་རྒྱས་ཀྱི་ཁུལ་ནས་བྲག་སྟོད་དུ་རྩ་བའི་བླ་མ་དམ་པ་སྤྱན་འདྲེན་དུ་བཏང༌། ཞང་འབྲུག་སྒྲའི་སྒྲུབ་གནས་གདོང་ཁྲ་བལྟ་བར་ཕྱིན། དེ་ན་དགྲ་ནག་གི་དཀྱིལ་ཐང་རྒྱ་གར་མ་ཡིན་ངེས། རི་མོ་ལེགས་ཉེས་འབྲིང་ཙམ་ལ་ཆུད་ཟོས་ཤིན་ཏུ་ཆེ་བས་མངོན་མི་མངོན་ཙམ་དུ་སོང་བ་ཞིག་འདུག །དེ་ལ་བལྟས་དུས་ལ་ལི་ཏའི{ལ་ལི་ཏཱི་བཛྲ་གྱིས་མཛད་པ}གཤིན་རྗེ་གཤེད་འབྱུང་བའི་དགོངས་པ་ཞང་ལུགས་པ་རྣམས་ཀྱི་ཐུན་མོང་མ་ཡིན་པའི་དཀྱིལ་འཁོར་བཀོད་པའི་རྣམ་གཞག་ལ་ངེས་ཤེས་སྐྱེ་བར་བྱུང༌།
བར་འདིར་ཆམ་པ་ཤིན་ཏུ་ན་བས་ཞག་གཉིས་ཙམ་ཆོས་མཚམས་བྱས། དེ་ནས་དོན་གཉེར་སོ་སོ་དང་བཅས་པ་ལ་བདེ་མཆོག་ནག་པོ་པའི་དབང༌། འཇིགས་བྱེད་རོ་ལངས་བརྒྱད་སྐོར་གྱི་དབང་དང༌། {གཞན་ཡང་བདེ་མཆོག་ནག་པོ་པའི་དབང་སྡེ་པ་སྐུ་རྐྱང་དུ་ཕུལ་ཞིང་། ཞལ་ངོ་ཁ་ཤས་དང་། གཞན་ཡང་དོན་གཉེར་སོ་སོ་དང་བཅས་པ་ལ་འཇིགས་བྱེད་རོ་ལངས་བརྒྱད་སྐོར་གྱི་དབང་དང༌།} རྣལ་འབྱོར་བཞི་རིམ་གྱི་ཁྲིད་དང༌། ནཻ་གུའི་ཁྲིད་རྐྱང་ཞིག་དང༌། མི་གཡོ་བླ་མེད་ཀྱི་དབང༌། ཞལ་ངོ་རྣམས་ལ་གཤེད་དམར་བཅུ་གསུམ་མའི་དབང་དང༌། དྲག་པོའི་རྗེས་གནང་མང་དག་དང་བཅས་པ་སོ་སོ་སྒོས་ཀྱི་འདོད་ཆོས་ཐང་ཐུང་རྣམ་གྲངས་སྣ་ཚོགས་དང༌། ཁྲོམ་དབང་སེམས་བསྐྱེད་དང་བཅས་པ་ཞིག་ཀྱང་བགྱིས།
རྗེ་བཙུན་དཔལ་ལྡན་བླ་མ་དམ་པའང་སྤྱན་འདྲེན་ཞུས་པ་ལྟར། ཧོར་ཟླ་བཞི་པའི་ཉེར་ལྔ་ལ་མཁར་ཆེན་དུ་ཞབས་ཟུང་འགོད་པར་གནང༌། ཡིད་ཀྱི་གདུང་བ་ཐམས་ཅད་དབྱིངས་སུ་ཐིམ། ཐུགས་ཡིད་དབྱེར་མེད་བརྗོད་བྲལ་མཁའ་མཉམ་ཁྱབ་བདག་ཆེན་པོའི་རང་ཞལ་ལྟ་བ་ནི་ནམ་ཡང་ཡོང་མོད་ཀྱི། མདོར་ན་སྐུ་རྣམ་པ་ཐམས་ཅད་པ་ཡེ་ཤེས་ཀྱི་རང་སྣང་རྒྱལ་བ་ཀུན་གྱི་སྐུའི་རྡོ་རྗེ་དང༌། གསུང་གཞོམ་མེད་སྒྲ་སྐད་ཐམས་ཅད་པ་སངས་རྒྱས་ཀུན་གྱི་གསུང་གི་རང་བཞིན་མིག་དང་རྣ་བའི་བདུད་རྩིར་གྱུར་པ་ཉིད་ཀྱིས། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་གཞན་ལ་གུས་པ་དབྱིངས་སུ་ཡལ་ཏེ། འདི་ཉིད་ཁོ་ན་བདག་དང་འགྲོ་བ་མཐའ་ཡས་པའི་གཏན་གྱི་ཉེར་འཚོའོ། །ཞེས་པ་འདི་འབའ་ཞིག་ཡིད་ལ་བྱེད་པ་དང་། ཉིན་དང་མཚན་དུ་ནང་གི་དགའ་བ་དང་བདེ་བས་ཁྱབ་པར་གྱུར་ཏོ། །
སྐབས་འདིར་གསུང་གི་བདུད་རྩི་ཐོབ་པའི་རིམ་པ་ནི། གླིང་གི་བཀའ་འབུམ་ཡོངས་རྫོགས་བདག་ཉིད་ཀྱིས་མྱུར་བར་བཀླགས་ཏེ་འཕར་ལུང་དུ་ཞུས། རོ་སྙོམས་ཆེན་མོ་ཡོངས་སུ་རྫོགས་པའང་ཐོབ། གཙོ་བོར་བདག་ཉིད་ཀྱིས་ཇི་ལྟར་མངོན་དུ་བགྱིས་པ་ལས་བརྩམས་ཏེ། ཉིན་རེ་བཞིན་དུ་ཡང་ཡང་དུ་ཞུས་པ་དེ་དང་དེའི་འཕྲང་སྒྲོལ་བ་དང་། གོང་ནས་གོང་དུ་ཁྱད་པར་དུ་བོགས་དབྱུང་བའི་བཀའ་དྲིན་སྩལ(བསྩལ)བ་ནི་བགྲང་བ་ལས་འདས་པ་ཞིག་ཡོད་དོ། །འདིར་རྡོ་རྗེའི་གནས་པ་བཅུ་གཅིག་པ་སྦྱར་རོ། །
དེ་ནས་དངོས(ངོས)ལ་བླ་མ་དམ་པས་རྟེན་འབྲེལ་གྱི་གནད་ཡོད་ཅེས་ཕེབས་ནས་བརྟན་བཞུགས་ཤིག་ཀྱང་གནང༌། ཚེ་དབང་བརྒྱ་ཚར་གྱི་བཀའ་དྲིན་ཡང་སྩལ་ཞིང(བསྩལ་ཅིང)། ད་ལམ་ཆོས་ཐམས་ཅད་ཀྱི་དོན་གྱི་དབང་བསྐུར་ཐོབ་པའི་དབང་དགོངས་པས་བཅད་པ་ཞིག་གནང་དགོས་ཞེས་གསོལ་བ་བཏབ་པས། དཔལ་འཁོར་ལོ་བདེ་མཆོག་སློབ་དཔོན་སྤྱོད་པ་པའི་བཞེད་སྲོལ་ལྟར་དབང་བཞི་རྫོགས་པ་དང༌། དེ་ཉིད་ཀྱི་མཐར་བདག་ཕྱོགས་ཀྱི་གོས་ཅན་ཕྱག་རྒྱ་དྲུག་ལ་སོགས་པའི་ཧེ་རུ་ཀའི་ཆས་རྣམ་པར་བཀོད་དེ། སྤྱོད་པའི་བརྟུལ་ཞུགས་ཀྱི་རྗེས་སུ་གནང་བ་ཤིན་ཏུ་རྒྱས་པར་སྩལ(བསྩལ)།
རིགས་ཀྱི་བདག་པོ་ཉིད་ཀྱིས་བདག་ལ་རབ་གནས་ཀྱི་མེ་ཏོག་ཀྱང་འཐོར་བར་གནང༌། བདག་པོ་དང་བདག་པོ་ཆེན་པོའི་དབང་གི་དོན་ཡང་འདི་ལ་འདོམས་པར་འདུག །ག་ཎ་ཙ་ཀྲའི་དགའ་སྟོན་ཡང་ཉམས་སུ་མྱོང་སྟེ། ཨེ་མ་ཧོ། ད་ནི་ཁྱབ་བདག་རྡོ་རྗེ་འཆང་ཆེན་པོས་མ་ལུས་ཤིང་ལུས་པ་མེད་པའི་རྒྱུད་ལས་ཇི་སྐད་གསུངས་པ་ལྟ་བུའི་རིག་པའི་བརྟུལ་ཞུགས་ཀྱང་ཅིའི་ཕྱིར་སྤྱོད་པར་མི་ནུས་ཞེས་དབུགས་ཕྱུང༌། རྣམ་པ་བརྒྱ་ཕྲག་དུ་མས་མངོན་པར་མཐོ་བའི་གཟེངས་བསྟོད་པར་ཡང་གྱུར་ཏོ། །འདིར་རྡོ་རྗེའི་གནས་པ་བཅུ་གཉིས་པ་སྦྱར་རོ། །
བཅུ་གཉིས་པོ་འདི་དག་བོད་སྒོམ་རྣམས་ཀྱི་གསུང་ལྟར་ན་ཉམས་ཡིན་ཀྱང་འདྲ། རྟོགས་པ་ཡིན་ཀྱང་འདྲ། གང་ཡིན་ཀྱང་ཁྱད་མེད། འཆར་སྒོ་དེ་དང་དེ་འདྲ་གཅིག་ནི་བྱུང་བ་ལགས་སོ། །
སྨྲས་པ།
སྔར་མ་ཤེས་རྣམས་ཅི་ཡང་གོ །
གོ་བ་ཙམ་ཡིན་ནའང་ཡིན་དུ་ཆུག །
མྱོང་ཡང་མྱོང་བྱ་དང་མྱོང་བྱེད་སྟོར། །
འདི་མ་ཤར་བྱ་བ་གཅིག་ཀྱང་མེད། །
ཉམས་ཡིན་ཞེས་གསུང་ནའང་གསུང་བར་ཞུ། །
རང་བཞིན་ལ་འགྱུར་བ་མེད་པར་རྟོགས། །
རྟོགས་པ་ལ་ཡིད་དུ་རེ་བ་མེད། །
ཡིན་ཟེར་ནའང་འགལ་བ་མི་འདུག་གོ །
ས་བཅུ་གཉིས་དག་པའི་གནས་པ་འདི། །
ང་སྒྱུ་མའི་སྐྱེས་བུས་ཐོབ་པར་འདོད། །
དོན་འཐོབ་བྱ་འཐོབ་བྱེད་དབྱིངས་སུ་ཡལ། །
ཚིག་སྨྲ་བརྗོད་བྲལ་བ་ཨ་ལ་ལ། །
འཇིག་རྟེན་འདི་ནི་སྤྲོས་པའི་རྗེས་སུ་འཇུག །
གཞན་དག་སྤྲོས་བྲལ་ཚིག་གིས་མཚོན་པར་འདོད། །
སྤྲོས་དང་སྤྲོས་མེད་རོ་མཉམ་གྱུར་པ་དག །
དོན་དམ་གནས་ན་ཅི་བདེར་གནས་ཞེས་ཐོས། །