༄༅། །མཚུངས་མེད་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་འགན་འཛིན་ ༧སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་༧ མཁན་སྤྲུལ་རྡོ་རྗེ་སློབ་དཔོན་༧ ངག་དབང་ཆོས་ཀྱི་སྣང་བ་མཆོག་གི་གཙོས་འགན་འཛིན་རྣམ་པ་དང་སློབ་སྟོན་པ། མཁན་བླ་སྤྲུལ་དགེ་བའི་བཤེས་གཉེན་རྣམ་པ་དང་ས་རྒྱུན་རྣམ་པ། འཛམ་གླིང་ས་ཕྱོགས་གང་སར་བཞུགས་པའི་དགོན་པ་དང་། ཆོས་ཚོགས། ཚོགས་སྡེ་ཁག་གི་དབུ་འཛིན་གཙོས་འབྲེལ་ཡོད་དད་ལྡན་སེར་སྐྱ་ཡོངས་ཀྱི་སྙན་ལམ་དུ།
གུས་པས་ཞུ་གསོལ། རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ནས་ལོ་རེ༌ལ་ལོ་འཁོར་ཚོགས་ཆེན་ཞིག་སྐོང་ཚོགས་གནང་དགོས་པ་སྒྲིག་གཞི་ནང་གསལ་ལྟར་ད་ལན་གནས་མཆོག་རྡོ་རྗེ་གདན་ཇོ་ནང་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་སྐབས་བཅོ་བརྒྱད་ཀྱི་རྗེས་ཕྱི་ལོ་༢༠༢༥ ཟླ་༠༡ ཚེས་༡༠ དང་༡༡ ཉིན་གཉིས་རིང་འཚོགས་རྒྱུར་གཏན་འཁེལ་ཡོད་པ་ལགས།
དེ་མཚུངས་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་རྒྱུན་ལས་དུས་ཡུན་ནི་ལོ་གསུམ་ཧྲིལ་བོ་ཡིན་པ་༼སྒྲིག་གཞི། དོན་ཚན་ལྔ་པ། རྒྱུན་ལས་གསར་བརྗེ། ནང་གསེས་དང་པོ། ལྷན་ཚོགས་ཀྱི་རྒྱུན་ལས་གསར་བརྗེ་ནི་ལོ་གསུམ་གྱི་མཚམས་ནས་ཡིན་ལ། འོས་བསྡུའི་སྐབས་བསྐྱར་འདེམས་བྱ་བར་དགག་བྱ་མེད།༽ཅེས་མཁྱེན་གསལ་ལྟར་ད་ལན་ང་ཚོ་དབུས་རྒྱུན་སྐབས་ལྔ་པའི་དུས་ཡུན་ནི་ཕྱི་ལོ་༢༠༢༥ ཟླ་༣ ཚེས་༣༡ ནས་ལོ་གསུམ་ཧྲིལ་བོར་འཁོར་བ་དང་། དེ་མཚུངས་སུ་ཇོ་ནང་ཐེབས་རྩ་ཁང་གི་རྒྱུན་ལས་ཡང་ལོ་གསུམ་འཁོར་བས། ལྷན་ཚོགས་སྐབས་དྲུག་པ་དང་། ཐེབས་རྩ་ཁང་སྐབས་བཞི་པའི་རྒྱུན་ལས་འོས་འདེམས་མི་བྱེད་ག་མེད་བྱུང་ཡོད་པས་འདི་ལོའི་ལོ་འཁོར་ཚོགས་ཆེན་སྐབས་ཚོགས་པ་གཉིས་ཀྱི་རྒྱུན་ལས་འོས་འདེམས་དང་། ལོ་འཁོར་ལས་བསྡོམས། རྩིས་བསྡོམས། མ་འོངས་པའི་ཁ་ཕྱོགས་གསུམ་གྱི་ཆེད་དུ་ལས་རིམ་ལ་གཞིག་ནས་ཚོགས་ཆེན་ཚོགས་རྒྱུར་གཏན་ཁེལ་ཡོད་པ་ལགས་ན། དགོན་པ་དང་། ཆོས་ཚོགས། ས་གནས་ཁག་ནས་མ་མཐའ་འཐུས་ཚབ་གཅིག་རེ་ངེས་ཕེབས་གནང་རྒྱུའི་འབོད་སྐུལ་དང་། ས་གནས་རེ་ནས་ལྷག་བསམ་རྣམ་དག་གིས་བསྲེག་བཅད་བརྡར་གསུམ་བྱས་ཏེ་ཚོགས་པ་རེ་ལ་འོས་མི་ལྔ་རེའི་མཚན་གཞུང་བསྣམ་རྒྱུ། དེ་བཞིན་འཐུས་མི་རྣམས་ཀྱིས་འགན་དང་ལེན་ཐོག་མི་མང་ཡོངས་ཀྱིས་མ་གོ་མ་ཐོས་མེད་པར་གནང་རྒྱུའི་རེ་འབོད་བཅས་དེ་དོན་དགོངས་འཇགས་ཡོད་པར་མཁྱེན་མཁྱེེན་ཞུ།
ཞེས་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་དབུས་རྒྱུན་ལས་ཁང་ནས།
ཕྱི་ལོ་༢༠༢༤ ཟླ་༨ ཚེས་༢༩ ཉིན་ཕུལ།