ཉེར་གཅིག་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
དེ་ནས་ངེད་ཀྱི(ཀྱིས)ལྷུན་གྲུབ་རྫོང་བརྒྱུད། སྟག་ལུང་པའི་སྔར་འཁྱུད་ཀྱི་སྒྲིགས(སྒྲིག)བཀོད་དང་བཅས་སྟག་ལུང་དུ་སླེབ(སླེབས)། དེའི་གནངས་ཉིན་མཆོག་གི་སྤྲུལ་པ་ཞབས་དྲུང་རིན་པོ་ཆེ་དང་མཇལ། དེ་སྐབས་རྟེན་བཞེངས་ཀྱི་རྒྱུ་ཚོགས་ལ་འདྲེ་བའི་དོན་དུ་སྔ་ཕྱིར་གསེར་ཞོ་ལྔ་བཅུ་ཙམ་དང༌། གཞན་ཡང་རང་རེ་ལ་ལྟོས་པའི་གང་ཡོད་དཀྲུགས་པའི་ཚུལ་དུ་ཕུལ། ཟླ་བ་གཉིས་ཙམ་དབང་ལུང་འཁྲིད་སོགས་ཆོས་ཀྱི་རྣམ་གྲངས་མང་པོ་རང་དགོས་ཕེབས་པ་ལྟར། སྔ་དྲོ(དྲོའི)ཉི་མ་ཤར་ཙམ་ནས་ཉི་མ་ཕྱེད་ཡོལ་གྱི་བར་ལ་ཅི་ནུས་ཅི་ལྕོགས་སུ་ཕུལ།
ཞབས་དྲུང་དུའང༌། བླ་མ་གསང་འདུས་དང་། ཐུགས་སྒྲུབ་དང་། དྲག་དམར་པདྨ་གླིང་པའི་ལུགས་སོགས་ཆོས་མང་རབ་ཞུས། ཉིན་ཕྱེད་མན་བཀའ་ཆོས་འབུལ་བ་རྫོགས་ནས། དོན་གཉེར་འདྲ་ལ་ཆོས་ཐན་ཐུན་འདྲ་ཡང་བྱས་ཤིང༌། ཕལ་ཆེར་ནི་ཞབས་དྲུང་གོང་མ་དེ་མི་བཞུགས་པས་བག་གྲང་བའི་རྣམ་པ་དང༌། སྡེ་དེ་དང་རང་རེའི་ལག་གཡོག་སོགས་གང་ལའང་ཡིད་འདྲེ་བ་ཡང་མི་འདུག་ནས། གཡས་གཡོན་གྱི་སྤང་རི། བྲག་འོག །ནེའུ་གསིང་། དུར་ཁྲོད་སོགས་འགོལ་ས་རྣམས་སུ་ཕྱིན་ནས་མཉམ་གཞག་གཙོ་བོར་བྱས།
རིན་པོ་ཆེ་གོང་མའི་གདུང་ནི་ལོ་དེ་ནང་དུ་ཞུ་འབུལ་མི་གནང་བར་ཐག་ཆོད་སོང༌། རབ་གནས་ནི་སྔ་སོར་སྟག་ལུང་ན་དབུ་བླ་རེས་མཛད་པ་ཀ་མང་བ་འདུག་སྟེ། ཞབས་དྲུང་འདི་ཉིད་ཀྱིས་རྟེན་བཞེངས་གནང་བ་ཐམས་ཅད་ལ་ཞལ་ངོ་མ་གཏོགས་བླ་མ་གཞན་གྱིས་རབ་གནས་མི་མཛད་པ་ཅིག(ཞིག)འདུག་པ་དེ། ད་ལྟའི་ཞབས་དྲུང་འདི་རང་གི་དགོངས་གཏད་ཡིན་སྣང་བ། དོན་ནི་རི་བོ་ཆེ་བ་ལ་དཔེ་འདྲ་གནང་བ་ཡིན་པར་འདུག །
དེ་ཕྱིན་ཕྱག་གཡོག་བྱེད་རྒྱུ་ཡང་མི་འདུག་པས། མྱུར་དུ་འགྲོ་བའི་དགོངས་གྲོལ་ཡང་ཡང་ཞུས་ཀྱང༌། ཀར་དགེའི་དུས་འཁྲུག་འདི་ཅི་འགྱུར་མི་ཤེས་པས། སྡོད་དགོས་ཚུལ་གྱི་བཀའ་ནན་མ་ཆོག(ཆོག)།
བདག་ཇོ་བོ་ཡབ་སྲས་རྣམས་ལ་ཤིན་ཏུ་མོས་གུས་ཆེ་བས། སྔ་གོང་ཕྱོགས་འདིར་ཡོང་རེས་ཀྱིས་རྭ་སྒྲེང་མཇལ་བ་དང་ཞབས་ཏོག་གང་དྲག་རེ་བྱེད་ཀྱིན་ཡོད། ཁོང་ཚོ་ཡང་དགའ་ཚོར་ཆེན་པོ་བྱེད་ཀྱིན་ཡོད་ནའང་། རྭ་སྒྲེང་དགོན་མི་དམངས་ལ་སྟག་ལུང་ནས་ཀྱང་སྐྱོང་དར་ཡག་པོ་མ་བྱུང་གདའ། ཁོང་ཚོས་ཀྱང་སྟག་ལུང་ལ་བློ་ལོག་བྱས། སོག་པོ་ལ་འཇུས་འདུག་པས། རྭ་སྒྲེང་བ་ལ་སྔར་ལུགས་ལྟར་བྱས་ན། བླ་མའི་དམ་ཚིག་ལ་གནོད་པར་འདུག་པས། འདི་སྐབས་བཏང་སྙོམས་སུ་བཞག །
སེར་གླེར(གླེང)མཚམས་བདུན་ཕྲག་གཉིས་པ་ཞིག་བྱས། དེར་དགེ་སྦྱོར་འཕེལ་ཞིང་ཉམས་བཟང་བ་ཞིག་བྱུང༌། མཚམས་གྲོལ་ནས་དཔོན་ས་གང་སྐྱིད་དང་། རྗེ་བཙུན་དྲུང་ཕེབས། ནཻ་གུ་སོགས་དགོངས་བཞེད་དང་མཐུན་པའི་ཆོས་འགའ་རེ་བྱས།
ཉིན་གཅིག་དབུ་ཁང་ལ་རི་ལྟས་བྱེད་དུ་ཕྱིན། རྡོ་ལ་འཁར་བའི་རྗེས་ཤིག་བྱུང་ཟེར། ཉམས་འུར་རེ་བ་ཞིག་གིས་ཡིན་མིན་དགའ་མི་དགའི་རྟོག་དཔྱོད་ནི་གང་ཡང་མ་བྱུང་། དེའི་གྲགས་པ་ཡམ་མེ་བ་ཞིག་གིས་ཁྱབ།
དེ་རྗེས་ཕུ་མདོར་ཕྱིན། སྡེ་པའི་དྲུང་ལ་དབང་བསྐུར་སོགས་འགའ་ཤས་ཕུལ། རྨི་ལམ་དུ་རྗེ་བཙུན་མ་འཕགས་མ་སྒྲོལ་མ་སྔོ་ལྗང་གི་སྐུ་ཤིན་ཏུ་གསལ་བ་ཞིག་བྱུང༌། ནང(ནངས)པར་དགོན་པ་བ་ཆེན་པོའི་ཐུགས་དམ་རྟེན་ཡིན་ཟེར་བ་བྲིས་སྐུ་རྙིང་པ་ཞིག་ལག་ཏུ་འབྱོར་པས་དགའ་བ་ཆེན་པོ་སྐྱེས།
གཉན་ཐོག་ཏུ་ཁོར་ཙམ་ཕྱིན། རྗེ་བཙུན་མའི་སྐུ་བརྙན་བྱིན་རླབས་ཅན་དང༌། རྒ་ལོའི་ཐུགས་དམ་འབུམ་ཆ་སོགས་ལ་ཕྱག་མཆོད་སྨོན་ལམ་བཏབ། གཉན་ཐོག་རྫོང་གི་རྣམ་སྲས་ལྷ་ཁང་སོགས་ཀྱང་མཇལ།
སླར་སྟག་ལུང་དུ་སླེབ་སྐབས་ངམ་རིང་ནས་དཔོན་ས་མངའ་བདག་དྲུང་སྐུ་འདས་པའི་བསྔོ་རྟེན་སྐྱེལ་བའི་མི་སྣ་སྦྲེལ་མ་འབྱོར། {དཔོན་ས་རིན་མོ་ཆེའི}དགོངས་རྫོགས་དངོས་གཞི་གྲོལ་ནས། བླ་མ་དགེ་བཤེས་བཟང་དགུ་ལ་ཐུགས་དམ་འདོགས་འབུལ་བར་གནང་བར་གདའ། མངའ་བདག་དྲུང་དེ་ཕྱག་འཚལ་ཁར་མགོ་བོག་པའི་རྣམ་པས་ཁོང་རང་གཤེགས་ཁར་དམ་ཚིག་ཉམས་པ་ཡིན་ཀྱང་། སྙིང་ཐག་པ་ནས་སྨོན་ལམ་ཡང་དག་པ་བཏབ། མི་སྣས་ཡུལ་དུས་གཞན་དུ་སྣ་ཚོགས་ཤིག་གླེངས་འདུག་ནའང་། དེ་ལ་གྲུབ་འབྲས་རང་ནི་ཅང་མ་བྱུང་བ་འདྲའོ། །
རྗེ་བཙུན་མའི་ཐང་ཀ་རྙིང་པ་དེ་ལ་གོང་གཤམ་སོགས་གསར་པ་གསོལ། རབ་གནས་སྐྱར(བསྐྱར)མ་བྱས་པས་མེ་ཏོག་མང་པོ་སྐུ་ལ་ཆགས་པ་དང༌། རྨི་ལམ་ཐབས་སུ་ཡི་གེ་བཅུ་པའི་སྒྲ་ཤིན་ཏུ་གསལ་བར་གྲག་པ་སོགས་ཡ་མཚན་པའི་ལྟས་མང་པོ་བྱུང༌། དམག་བྱུང་དུས་རྒྱལ་ཁམས་འཇིགས་པ་ལས་སྐྱོབ་ཐུབ་པའི་རྟེན་འབྲེལ་ཡང་དེས་འགྲིག་གདའ།
དེ་ནས་ཟླ་བ་གཅིག་ཙམ་དུ་ཆོས་ཞུ་འབུལ་ཐོ་རེ་བ་བྱུང༌། དེ་མཚམས་གཙང་པའི་དམག་འཕན་ཡུལ་དུ་སླེབ(སླེབས)། འབྲི་ཁུང་གོ་གཉིས་ནི་དམག་འབོད་མཁན་དངོས་སུ་ཀ་གནང༌། གཞན་ཐམས་ཅད་ཀྱིས་ཀྱང་མི་སྣ་བསྟུན་ཕྱོགས་སྔ་མོ་ནས་སླེབ(སླེབས)ཡོད་འདུག་ཀྱང་། རྒྱལ་དུ་དམག་མ་སླེབ་པར་སྟག་ལུང་ནས་མི་སྣ་གནང་བ་ཡང་མ་བྱུང༌། སྡེ་པ་དགའ་ལྡན་པ་དང་ཐུགས་འབྲེལ་ཆེས་པས། ཕྱི་ལྟར་ན་ཕྱོགས་སུ་ལྷུང་བ་ལྟར་ཡང་སོང་ནས། ཤིན་ཏུ་ཐུགས་འཚབ་ཆེ་བས་འཕན་ཡུལ་ན་ཡོད་པའི་མངའ་ཞབས་ཚོ་སྲུང་སྐྱོབ་ལ་བདག་མི་འགྲོ་ཁ་མེད་ཀྱི་བཀའ་ནན་གནང༌།
ཡུལ་ཚོ་སོ་སོ་དང་། ལྕང་ལུང་ཆོས་སྡིངས་པ་སོགས་དབུ་ཙུགས་ཀྱི་འབོད་མི་ནན་ཅན་མང་པོ་བྱུང༌། དེ་མཐུན་འགྲོ་དགོས་ཤར་བས། ཐོག་མ་ཉན་པོར་ཕྱིན། ཞག་བཞི་ཙམ་བསྡད།
དེ་རྗེས་ལྕང་ལུང་ཆོས་སྡིངས་སུ་ཕྱིན། ཡུལ་ཚོ་སོ་སོར་ངེད་རེའི་གྲྭ་པ་རེ་རེ་ཙམ་བསྡད་པས་ཀྱང་སྲུང་སྐྱོབ་ཐུབ་ཅིང་ཕན་འདོགས་ཆེ་བ་རང་བྱུང༌། ཡོངས་བསྒྲིལ་དམག་གི་འགྲོས་དང་བསྟུན། ཟླ་གཅིག་ལྷག་ཙམ་འཕན་ཡུལ་དུ་འགོར།
དགའ་མོར་སྡེ་པ་ཀར་བསྟན་དྲུང་དང་མཇལ་དུས་ད་ལོའི་དམག་འདི་ཀུན་ཡང་ཕུགས་སྡེ་པ་རང་ལ་ཕན་ཆུང༌། ད་དུང་ཀར་དགེའི་འཁྲུག་པ་ཡོང་ཤས་འདུག་ནའང་། ད་ནི་སླར་དམག་མི་གནང་བ་རང་ལེགས། གནང་ན་སྐུ་ཚེ་ལ་ཤིན་ཏུ་རང་གནོད་ཐག་ཆོད་ཞུས་ཏེ། སྡེ་པའི་དགོངས་པ་ལ་ཀར་ལུགས་ལ་ཀོ་ལོང་བྱེད་པར་འདུག་སྙམ་པའི་གོ་བ་ལོག་པ་ཤར་སོང་ནའང༌། རང་རེའི་དྲང་པོ་རང་ཡིན་པ་ཕྱིས་རང་རྟགས་བསྟན་པ་དེར་གདའ།
གཞན་ཡང་འཕན་ཡུལ་སྤྱི་ལ་ཞྭ་དམར་བའི་རྫོང་ལ་དགོས་རྒྱུའི་ཤིང་གཅོད་ཀྱང་ཞུ་ངོ་བྱས་པས། དེ་སྐབས་ནི་རྩ་བ་ནས་ཆོགས(ཆོག)། ཇ་པ་དང་དགོན་གནས་སོ་སོར་ཇ་འདོན་མཛད་པ་ཀུན་ལའང་ཞུ་ངོ་ཕལ་ཆེར་འགྲུབ་པ་སོགས། འདི་སྐབས་རང་རེས་སྐྱེ་བོ་མང་པོ་ལ་ཕན་ཐོགས་པར་བྱུང་ཞིང༌། དེ་མིན་ན་ཁྱད་པར་སྟག་ལུང་པ་ལ་མངའ་ཞབས་ལ་གོད་ཤོར་ཆེན་པོ་ཡོང་ངེས་པར་འདུག་ཀྱང་། རང་རེས་ཞབས་ཏོག་རེ་འགྲུབ་བྱུང་བསམ་པ་ཡོད།
དང་པོ་ཁྱི་ལོའི་སྐབས་ཀྱི་རྨི་ལམ་དེ་ཡང་ཐོག་ཏུ་ཁེལ་བར་གདའ། འོན་ཀྱང་སྙིགས་དུས་ཀྱི་མི་རྣམས་ངོ་མཚར་ཆེ་སྟེ། དམག་མ་ལོག་བར་ལ་སྐྱིད་སྡུག་ཐམས་ཅད་ཁྱེད་ལ་རག་ལས་ཟེར། ལན་ཅིག་མ་ཡིན་པར་སྒྲོག་པ་ལ། དམག་ཕྱིར་ལོག་འཇིགས་པ་དང་བྲལ་བ་ན། འཕྲལ་དུ་རང་འགྱུར་ཏེ་ངོ་ཤེས་བྱེད་པ་ཡང་དཀའ་ཞིང་། ཚིག་གི་གཏང་རག་རེ་ཡང་མི་གཏོང་སྟེ། སྟག་ལུང་པ་ཆོས་སྐྱོང་བཟང་བ་ལ་འཇིགས་པ་ཡིན་ནོ་ཞེས་བྱ་བ་དང་། སོག་པོ་ལ་འཛེམས་པ་ཡིན་ནོ་ཞེས་དྲིལ་སྒྲོག་པར་བྱེད་དོ། །
དུས་འཁྲུགས་འདི་དུས། རྩེ་ལ་སྒང་པའི་མཁན་པོ་སོགས་ཀོང་པོ་ཀར་སྲིད་ཀྱི་དགེ་འདུན་སེར་དམག་རྣམས་ཀྱི(ཀྱིས)རྨེ་རུ་བླ་མའི་དགོན་པ་བཤིག །དེའི་གསེར་ཆོས་མང་པོ་སྡེབས་ལ་བཞུ(བཞུས)ནས། དཔོན་སློབ་ཡོན་བདག་དང་བཅས་སྒོ(བགོ)བཤའ་བྱེད་པ་སོགས་ཆོས་འགལ་གྱི་སྤྱོད་པ་ཧ་ལས་ཀོ་ལས་རྣམས་ལ་ཡིད་སྐྱོ་ཤས་ཆེ་ཞིང༌། ཅིས་ཀྱང་དགོས་མེད་ཀྱི་བློ་དང་། དགེ་སྦྱོར་ལ་བསྐུལ་མ་ཆེར་བྱུང༌།
དེ་ནས་སྟག་ལུང་དུ་ཁོར་ཙམ་ཕྱིན། གླིང་གི་གྲྭ་པ་ཕལ་ཆེར་ཞིག་ད་རེས་ཁྱེད་ཀྱིས་ཕོ་བྱས་པ་ཡིན་ཟེར། དགའ་ཚོར་ཆེན་པོ་བྱེད་དུ་བྱུང༌། ཞབས་དྲུང་རིན་པོ་ཆེ་ཐུགས་ཟབ་པའི་རང་བཞིན་དུ་སྣང་ཡང༌། དཔོན་ནི་ཞབས་ཏོག་སྒྲུབ་པ་ལ་ལེགས་སོའི་ཚིག་ཙམ་ཡང་མི་མཛད་ཀྱི་སྟེང་དུ་གནས་སྐབས་གཞན་ལ་བསྙད་ནས་བཀའ་བཀྱོན་པར་མཛད་དོ། །དེ་ལྟ་ན་ཡང་བླ་མའི་ཞབས་ཏོག་ཡིན་བསམ་བློས་ལོངས་པར་བྱས། ངེད་ལྟ་བུ་ལ་བྱང་ཆུབ་སེམས་དཔའི་རེ་བ་ཅི། འོན་ཀྱང༌། གང་ལ་བདག་གིས་ཕན་བཏགས་པའི། །རེ་བ་ཆེ་བ་འགའ་ཞིག་གིས། །ཤིན་ཏུ་མི་རིགས་གནོད་བྱེད་ནའང༌། །བཤེས་གཉེན་དམ་པར་ལྟ་བར་ཤོག །ཅེས་པའི་དོན་ཡང་དེ་སྐབས་སྙིང་ཐག་པ་ནས་སྐྱེས།
སྟག་ལུང་ནས་ཕྱིར་འོངས་དུས་ལྷུན་གྲུབ་རྫོང་དུ་ཞག་གསུམ་བསྡད། སྡེ་པའི་དྲུང་གིས་དགེས་དགེས་སུ་མཛད་ཅིང༌། མི་སྡེའི་ཁོག་གི་ཇ་པ་སོགས་ཕལ་ཆེ་བས་ཀྱང་ཕན་གདགས་ཀྱི་དྲིན་གཟོ་འཕྲན(ཕྲན)ཚེགས་དང་། ཐ་ན་ཚིག་གི་གཏང་རག་ཚུན་ཆོད་ནས་འོས་སུ་འགྲོ་བ་ཙམ་བྱེད་ཀྱིན་སྣང་བས། བསམ་པ་ལ་ཆོས་པའི་ས་ལས་འཇིག་རྟེན་པའི་ས་མི་གཞི་ལེགས་ཤིང་བྱེད་པ་བཟང་བ་འདི་ནི་ཡ་རེ་ཆ་བསམ་པ་ཡང་ཡང་ཤར།
དེ་ནས་ལྕང་རྒྱབ། གླང་ཐང༌། ཤིང་གྲོང་སོགས་སུ་འབོད་མི་བྱུང་བ་ལྟར་ཕྱིན་དུས། ཁོང་རྣམས་ནི་སྟག་ལུང་པ་དང་ངེད་རྣམས་མོས་གུས་ནི་ངེད་རྣམས་ཆེ་ཆེ་ཙམ་ཡིན་པ་ལ། སྟག་ལུང་ཁོ་ན་ལ་ཕྱོགས་སུ་ལྷུངས་པའི་ཕན་འདི་ཙམ་འདོགས་པ་སྙམ་པའི་མཐོང་ལྟས་རེ་བྱེད་ཀྱི་འདུག་སྟེ། སྟག་ལུང་ལྷ་སྡེ་ནི་དེ་འདྲ་ཁྱེད་ཀྱིས་མ་གོ་འདུག་པ། འཇིག་རྟེན་སྒྱུ་མའི་གར་མཁན་འཁྲུལ་སྣང་གང་ཤར་གྱི་ཉམས་སྐྱོང་བ་བདེན་མེད་ལ་བདེན་ཞེན་ཅན་ཏུ་གདའ། རང་རེ་ལ་ས་ཆ་འདི་ཚོར་ཆགས་སྡང་གི་བཅོལ་གཉེར་མེད་སྙམ་ཞེ་ལ་འཛིན་པ་ཡང་མ་བྱས། སེལ་སྦྱངས་དང༌། དག་ཚངས་དང་། བཤད་སྦྱངས་ཡང་མ་བྱས། གང་དགའ་གྱིས། ཕཊ་སྙམ་ནས་ཡོངས།
སྒོ་ལའི་ནང་ཁུགས་སུ་ཤུན་ནས་རབ་གནས་ལ་འབོད་མི་གནང་བ་དང་འཕྲད་དུས། ས་ཆ་དེ་ཁ་ནས་དུང་ཆུང་ལེགས་པོ་ཞིག་རྙེད། རྟེན་འབྲེལ་ལེགས་སམ་སྙམ་པ་ཤར། ཅུང་ཟད་ལེགས་པར་ཡང་འདུག །
ལྷོ་ངོས་སུ་དཔོན་སའི་དྲུང་གིས་སྟག་ལུང་པ་ལ་ཕན་འདོགས་ཆེ་འདུག་ཅེས་དགྱེས་དགྱེས་དཔེ་མེད་མཛད། དེ་རེས་ཐུགས་སྟེང་ཤོད་ཀྱི་སྟབས་ཅི་ཡིན་པ་འདུག །དགའ་ལྡན་ཁང་གསར་དུའང་ཡོང་དགོས་ཚུལ་ནན་ཆགས་གསུང་བ་ལྟར་ཕྱིན། ཞལ་ངོ་རྣམས་ལ་རྡོ་རྗེ་འཇིགས་བྱེད་ཀྱི་དབང་སོགས་འདོད་ཆོས་འདྲ་ཕུལ། ལྟས་བརྟག་པ་འདྲ་གྱིས་གསུང་བ་ལ། ད་ལོའི་གནས་ཚུལ་འདི་ཡང་མ་ལེགས་པ་ཆེ་སྟེ། ད་དུང་ལོ་ཤས་འཇམ་གང་ཆགས་དང་བརླིང་ཆ་གང་ཆེ་མ་མཛད་ན་སྐྱོན་ཆེ་བ་རང་གདའ་ཞུས།
སྣེ་གདོང་རྩེ་ནས་ལྕམ་དྲུང་གིས་ཀྱང་དེ་མཐུན་གྱི་གསུང་ཕེབས་དང༌། སྦུ་བ་གདོང་གི་ཁུར་གཞེས་མཛད་ན་ཇི་ལྟར་གསུང་བ་ལ་ཡང་གཞན་ནི་མི་ཤེས། སྐྱོང་དར་གང་གནང་གི་རིང་ལ་གཡོག་རིགས་ལ་བྱམས་པོ་གནང་དགོས་ཞུས། ལྷ་སར་ཇོ་བོའི་སྐུ་གཞོགས་སུ་ངེད་དང་ཁོང་དཔོན་གཡོག་རྣམས་སྨོན་ལམ་ལྷན་ཅིག་མཛད་རྒྱུའི་ཁུངས་ལ་རིག་པ་འུར། སྨོན་ལམ་བྱེད་འཕྲོ་ལ་བཞག་ནས་གནས་ཚང་དུ་ལོག །
དེ་རྗེས་ཤུན་དུ་སླེབ(སླེབས)ནས་ཟླ་གཅིག་ཙམ་བསྡད། ཐུབ་པ་གནས་བཅུའི་གསེར་སྐུ་གསར་བཞེངས་གནང་བ་རྣམས་ལ་རབ་གནས་རྒྱས་པར་བྱས། རབ་གནས་གྲུབ་མཚམས་ལ་རྟེན་གཟི་བྱིན་རྒྱས་པ་དང་། བག་དྲོ་བའི་རྣམ་འགྱུར་དེར་འདུས་ཐམས་ཅད་ལ་གསལ་བར་སྣང་བ་སོགས་བྱིན་རླབས་ཀྱི་རྟགས་མཚན་བྱུང༌།
ཤུན་ནས་ཞབས་དྲུང་དུ་རྒྱུད་སྡེ་ལྔའི་དབང་སོགས་ཤངས་ཆོས་ཆ་ཚང་ཞིག་དགོས་གནང་བ་ལྟར་ཕུལ་ཞིང༌། {དེར་ཡོན་མཆོད་ཐུགས་ནང་གཙང་བས་སྐྱིད་དུ་ཚོར་བ་ཙམ་བྱུང་ཞིང་།} དེ་ནས་སྙེ་ཐང་དུ་གསེར་ཁང་པའི་སར་ཞག་གཅིག་བསྡད། ཁྲོམ་དབང་ཞིག་ཀྱང་བྱས།
སང་ཉིན་ཡུལ་ཚོ་ཐ་དད་པའི་རྩེད་སྣ་སྣ་ཚོགས་ཀྱི་བསུ་བ་དང་བཅས་བླ་ཆེན་དྲུང་གིས་འབོད་མི་གནང་བ་ལྟར་བདེ་བ་ཅན་དུ་ཕྱིན། དེར་ཡང་ཚེ་དབང་དང་མ་ཎིའི་ལུང་སོགས་དང་། བླ་བྲང་དུ་ཡང་ཆོས་ཐན་ཐུན་སོགས་ཕུལ།
ནང(ནངས)པར་མཁར་རྔ་བས་ནན་ཆགས་བྱས་པ་ལྟར་ཁོར་ཙམ་ཕྱིན་ནས། ཆུ་ལྷོའི་ནོར་བུ་དགེ་འཕེལ་གྱི་རྫོང་དུ་སླེབ(སླེབས)ཙམ་བྱས། སྐྱི་རུ་བ་སྡེ་པ་ཀུན་རྒྱལ་གྱིས་མཐུན་རྐྱེན་ཕུན་སུམ་ཚོགས་པ་སྦྱར། ཁྲོམ་དབང་ཞིག་བྱས{པ་ཡང་རྟེན་འབྲེལ་ཅུང་ཟད་ལེགས་པ་མངོན་ཙམ་བྱུང་།}
དཔལ་ལྡན་གསང་ཕུར་ཕྱིན། རྗེ་བཙུན་སྒྲོལ་མ་རྩོད་རྒྱལ་མ། ཇོ་བོ་གདུང་རྟེན། ཇོ་བོའི་ཐུགས་དམ་རྣམ་རྒྱལ་མཆོད་རྟེན། ལོ་ཙཱ་བ་ཆེན་པོའི་སྐུ་ཐང་ཕྱག་གནས་མ་དང༌། སློབ་དཔོན་རིན་པོ་ཆེ་འཁོན་བསོད་ནམས་རྩེ་མོས་བཞེངས་པ་ཕྱཱ་བ་ཆེན་པོའི་བྲིས་སྐུ་སོགས་རྟེན་ངོ་མཚར་ཅན་མང་པོ་དེ་རྣམས་ལ་སྤོས་མར་མེ་སྙན་དར་སོགས་བཟང་དུ་ཕུལ། སྨོན་ལམ་མང་དུ་བཏབ།
དེ་ནས་རིམ་པས་བརྒྱུད་དེ་འོངས་ནས་དྲང་སྲོང་སྲིན་པོ་རིར་རྟེན་གསུམ་རྣམས་ལ་ཕྱག་མཆོད་ཕུལ། བསམ་རྩེར་སྡེ་པ་སྲང་སྟོད་ནས་སྐུ་གཤེགས་པའི་བསྔོ་རྟེན་ཡང་འདིར་སླེབ(སླེབས)།
ནང(ནངས)པར་གོང་དཀར་དུ་ཕྱིན། ཟླ་བ་ཕྱེད་གཉིས་ཙམ་བསྡད། ཞབས་དྲུང་ཁུ་དབོན་སོགས་དང་། བླ་མ་སློབ་དཔོན་དགེ་བཤེས་ཅི་རིགས་དང༌། དོན་གཉེར་སྣ་ཚོགས་འདུས་པ་གཞི་བཅུ་སྐོར་ལ། འཕྲེང་བའི་དཀྱིལ་འཁོར་བཞི་བཅུ་ཞེ་གཉིས། དགེ་ལེགས་སུ་བྱེད་པའི་དཀྱིལ་འཁོར་གསུམ་དང་བཅས་པའི་དབང༌། ཕྱག་ལེན་མཐའ་རྒྱས་རྫོགས་པ་དང༌། གཡའ་བཟང་སྤྱན་མངའ་དང༌། ར་བ་སྨད་པའི་གྲྭ་ཚང་རྣམས་ལ། སྒྲོལ་མ་ཉི་ཤུ་རྩ་གཅིག་ཉི་མ་སྦས་པ་ལུགས་ཀྱི་རྗེས་གནང་དང༌། གཞན་ཡང་སོ་སོར་གང་ལ་གང་འདོད་ཀྱི་ཆོས་ཀྱི་རྣམ་གྲངས་མང་དུ་བྱས།
རྒྱལ་རྩེ་ནས་ཁྱིམ་ཆུང་བ་ཚང་ངེད་ལ་སྔར་ནས་མི་དད་པ་རང་ཡིན་ནའང༌། གཙང་ནས་བཀའ་བཀྱོན་བྱུང་བ་དང་། ངེད་ལ་ཞུ་ངོ་དགོས་ཚུལ་ནན་ཆགས་བྱེད་པ་ཞིག་བྱུང༌། ཁྱིམ་ཆུང་བ་དབང་ལགས་ཟེར་བ་ཁོང་རས(རང)ངེད་ཀྱི་ཟླ་ལ་ཟླ་བ་གཉིས་ལྷག་བསྡད། རིམ་པས་ངོ་ཆེན་ཞུ་རྒྱུའི་ཁུངས་ལ། འབྲུག་པ་ཡོན་མཆོད་ཀྱི་ངོ་ཆེན་ཡོང་རྒྱུ་ཡིན་ཟེར། འབྲང་ཕུ་ནས་གློ་བུར་དུ་ལོག་སོང་བས་ངོ་ཆེན་མ་དགོས་པས་སྙིང་སངས་པ་ཞིག་བྱུང་ནའང༌། ཁོ་པ་ཚོ་ལ་དོན་མ་མཐོང་བའི་ངང་ནས་མི་རིང་བར་བཀའ་བཀྱོན་གནས་ཚུལ་དེ་ལྟར་ཤར་སོང༌། དབང་ལགས་ཟེར་བ་ཁོང་རང་བར་སྐབས་ས་སྐྱ་ཁྲི་ཆེན་ལ་བློ་གཏད་ཞུས་འདུག །ཕྱིས་ས་སྐྱ་བདག་པོ་ཨ་མིས(མེས)དྲུང་གིས་གཟིམས་ཆུང་སྒོ་རྩར་ཁྲིམས་གཅོད་ལག་ཐལ་ལ་བཏང༌ངོ་། །
དེ་མཚམས་སྐྱིད་བཤག་གཉིས་ཀྱིས་འབོད་མི་ནན་ཅན་ཡོད་པ་ལྟར། སྐྱི་གཤོངས་སུ་ཞག་དགུ་བསྡད། ཞལ་ངོ་སོགས་དོན་གཉེར་མང་དག་ལ། བདེ་མཆོག་དང་འཇིགས་བྱེད་ཀྱི་དབང༌། ནཻ་གུའི་མགྱོགས་འཁྲིད། སྒྱུ་ལུས་དབང་མོ་ཆེ། ཟླུམ་པོ་བཞིའི་དབང་སོགས་ཆོས་བཀའ་མང་དུ་བྱས།
དེ་རྗེས་གཞུང་རྣམ་རྒྱལ་རབ་བརྟན་དུ་བསུ་བའི་བཀོད་པ་རྒྱ་ཆེ་བ་དང་བཅས་ནས་སླེབ(སླེབས)། འདིར་ཡང་ནཻ་གུ་ཆོས་དྲུག་སོ་སོའི་བཀའ་དང་བཅས་པ་དང༌། གཞན་ཡང་འདོད་ཆོས་རྣམ་གྲངས་མང་རབ་བྱས། ཞག་བཅུ་གསུམ་བསྡད། ཁོང་ཚོའི་ཕྱག་ན་ལས་སྟོད་ལྷོ་པ་བདག་པོའི་ཕྱག་གི་བྱིན་རླབས་རྟེན་མང་དུ་འདུག་པ་རྣམས་ལ་རྟེན་མཇལ་བྱས།
ཉིན་གཅིག་རྔོག་པའི་གདན་ས་སྤྲེ་ཞིང་མཇལ་དུ་ཕྱིན། སྤྲེ་ཞིང་ན་བཞུགས་པའི་རྗེ་མར་པའི་གདུང་ཁང་དེ་ལ། སྤྲུལ་པའི་སྐུ་ངག་དབང་ནོར་བུས་བཅོས་དང་། ནང་བཞུགས་ལ་གཟིགས་རྟོག་མཛད{པ་སོགས་ཕ་གནས་ལ་སྐྱོན་བྱུང}རིགས་སུ་འདུག་ནའང༌། ད་རུང་རྗེ་བཙུན་མར་པའི་གདུང་རུས་བཞུགས་བདེན་ཡིན་འདུག་པས་གུས་པ་ཆེན་པོས་མཆོད་པ་ཕུལ། གསོལ་བ་བཏབ། གདུང་བརྒྱུད(རྒྱུད)པ་དང་གསུང་གླེང་འདྲ་བྱས་ནའང་། ཁོང་པ་དབུ་གུག་གུག་ཀྱོག་ཀྱོག་ཙམ་མ་གཏོགས་ཆོས་ཀྱི་ཕྱོགས་ལ་སྨྲ་བཅད་དམ་པོར་འདུག །
མི་ལ་ཕུག་དང་དབེན་གནས་སོགས་ཀྱང་མཇལ་ཏེ། རྗེ་བཙུན་ཆོས་སྐུ་རྡོ་རྗེའི་སྐུ་འདྲ་ཞིག་འདུག་པ་སྐུ་བཞུགས་དུས་ཀྱི་ཕྱག་གནས་མ་ཡིན་ཟེར་ཡང་མིན་པ་འདུག །ལུང་ཆུང་གི་དཔལ་ལྷ་མོ་བྱིན་རླབས་ཅན་དེ་ཡང་མཇལ།
ཉིན་གཅིག་ཆོས་འཁོར་གླིང་ལ་ཕྱིན་དུས། དགོན་པའི་སློབ་དཔོན་རྔོག་ལུགས་ཀྱི་ཆོས་མཁས་པོ་ཡིན་ཟེར་བ་ཞིག་དང་འཕྲད་བྱུང་བས། གསུང་གླེང་འདྲ་བྱས་དུས། འབྲུག་པ་གསར་པའི་ཆོས་སྐད་གདོལ་ཐབས་ཀྱི་ཅལ་ཅོལ་ལས་རྔོག་ལུགས་རང་གི་ཕྱོགས་འགོ་ཐིངས་པ་ཙམ་ཡང་མི་འདུག །
འདི་སྐོར་ལ་ཡར་ལུང་བཀྲ་ཤིས་རྩེ་པ་གསར་འགྲོགས་ནི་སངས། ཁོང་རང་ཚོའི་བླ་མ་འདྲའི་བསླབ་སྟོན་ལ་བརྟེན་ལྡེམ་འགྱང་ལོག་གེ་བ་ཞིག་དང༌། ཡར་རྒྱབ་ནས་སྡེ་པས་ནི་གསུང་འགྲོས་འབུག་བཅག་ཡི་གེ་སོགས་འབྲེལ་ཐག་ཐམས་ཅད་བཅད། ཡིག་འབྲེལ་སོགས་ཅུང་ཟད་བྱས་ན་རྒྱལ་འགོང་བཞིན་ཞུད་བྱུང་དོགས་ཐུགས་ལ་ཤར་བ་ཡིན་ཏེ་འོང་། གང་ནའང་ངོ་མི་ཤེས། མིག་གིས་མ་མཐོང་། རྣ་བས་མ་ཐོས་པ་ལྟ་བུར་མཛད་དོ། །
ཆོས་རྗེ་སྐེད་སྲོངས་པ་འཕྲད་དུ་བྱོན། ཁོང་དང་གཞན་འགའ་ཤས་ལ་བསླབ་བསྡུས་ཆེན་མོའི་བཀླགས་ལུང་གཞུང་རྩ་བ་རྣམས་ལ་འབྲུ་བཤད་དང་བཅས་པ་བྱས།
ཡར་ལམ་ཡང་གོང་དཀར་དུ་འོངས། ས་འདིར་འདི་སྐབས་སོགས་སྔ་ཕྱིར་འབྲུག་པ་གསར་པའི་ཡིག་ཆ་མང་དུ་མཐོང་བྱུང་སྟེ། མཐོང་བ་ཀུན་ལ་འུམ་བསམ་པ་ལས་ནི་མ་ཤར།
དེ་ནས་རིམ་པས་ཆས་ཏེ། ཀ་བརྒྱད་མར་ལྷུན་རབ་པའི་ཞལ་ངོ་རྣམས་ཀྱིས་མཐུན་རྐྱེན་སྦྱར། སྔ་སོར་དཔྱིད་ཀ་སྐྱིད་ཚལ་འོག་ཏུ་ཕྱིན་སྐབས། སློབ་དཔོན་གྲུབ་ཐོབ་པ་དང་རང་སྟོང་གཞན་སྟོང་ལས་བརྩམས་པའི་ཆོས་སྐད་བརྒལ་བརྟག་མང་དུ་བྱུང༌། ཁོང་གི་དེ་ནས་རྗེ་གོ་རམ(རམས)པ་དང༌། རྩེ་ཐང་སངས་ལྷུན་དང༌། དངོས་གྲུབ་དཔལ་འབར་བས་མཛད་པ་སོགས་གཞན་སྟོང་འགོག་བྱེད་ཀྱི་དཔེ་མང་པོ་ལ་ལྟ་རྟོག་མཛད། འདི་སྐབས་ཁོང་བྱོན་ནས། དོགས་གཅོད་ཀྱི་འབེལ་གཏམ་ལ་ཉིན་རྩེར་ཞིག་སོང༌། ཕྱིས་ཁོང་རང་ཡང་གྲུབ་མཐའི་བབས་ལ་དད་པ་རྙེད་ཙམ་བྱུང་བའི་ཁུངས་མཛད་ཀྱིན་གདའ།
སང་ཉིན་གཙུབ་མོའི་བྲག་ཕུག་མཇལ་དུ་འགྲོ་བའི་ནུབ་ཏེ(སྟེ)། ཆོ་འཕྲུལ་ཡང་ཤིན་ཏུ་ཆེ་བར་བྱུང་ཞིང་། ནང་བར(ནངས་པར)མཇལ་དུས། ཕུག་ན་ལེགས་ལྡན་ནག་པོ་རིབ་རིབ་ཡོད་པ་སྙམ་བྱེད། རྟེན་རྡོ་གྲུ་གསུམ་སྐུ་འོལ་བྱི་ཡོད་ཙམ་ཡོད་པ་ཅིག(ཞིག)ཀྱང་རྙེད་བྱུང་ངོ༌། །
སྔ་སོར་ནས་ཆོས་བརྒྱུད་ཐ་དད་པའི་ཀོ་ལོང་ཁོག་ཏུ་བཅུག །ཕྲག་དོག་གིས་ངེད་ལ་ངན་སྨྲས་ལྷུར་བྱེད་པ་མི་ཆེ་ཆུང་དབུས་ཀྱི་ལྷོ་ཁ་སྟོད་སྨད་འདི་ཀུན་ནས་མང་པོ་བྱུང་བ་ཡོས་འབྲུག་གཉིས་ལ་ཕལ་ཆེར་དེངས་ཚར་གདའ།
སྔ་སོར་བྱི་གླང་སྟག་གསུམ་དང་། འདི་སྐབས་སྦྲུལ་ལོ་འདི་ཀུན་ལ་དབུས་ཀྱི་ཡུལ་སོ་སོ་དང་། སྡེ་རིགས་སོ་སོར་རྟེན་འབྲེལ་ལེགས་ཕྱོགས་སྒྲིག་རྒྱུ་མང་པོ་འདུག་སྟེ། གེགས་ཕྱི་ནང་གསང་གསུམ་ཀ་ཡོང་བ་གཅིག་གིས་ཕལ་ཆེར་ལག་ཏུ་མི་ལོངས། ཅུང་ཟད་བསྒྲིགས་པ་ཚོའང་འགལ་རྐྱེན་གྱིས་འཆུགས་འགྲོ་བ་གཅིག་རང་ཡོང་གིན་འདུག །ལར་སེམས་ཅན་སྤྱི་མཐུན་གྱི་ལས་དང་། སྒོས་སུའང་མྱོང་བར་ངེས་པ་ལ་འཕགས་མཆོག་རྣམས་ཀྱིས་ཀྱང་མཛད་ཐབས་བྲལ་ཙ་ན། རང་རེ་ཕལ་པས་ཅི་བྱར་ཡང་མེད་མོད། འཕྲལ་མ་ངེས་པ་བསྒྱུར་དུ་རུང་བ་འདི་ཚོ་ལ་མང་པོ་ཞིག་ལ་སོ་སོར་རྟེན་འབྲེལ་འགྲིག་ན་ཕན་ཐོགས་ངེས་པ་ཇི་སྙེད་ཡོད་དེ་འདོད་པ་གེགས་སུ་སོང༌། ལར་རྟེན་འབྲེལ་ལེགས་བྱ་བ་བྱ་བྱེད་རྩོམ་པ་གཅིག་པོ་དེ་ལེགས་པར་ཡོང༌། རྟེན་འབྲེལ་ཡང་འདུས་བྱས་ཡིན་པས་རྟག་པ་ག་ནས་ཡིན། ལེགས་པའི་རྒྱུན་དེ་མ་འཆུགས་པའི་རིང་ལ་དགའ་བར་ཡོང༌། ཕྱིས་འགལ་རྐྱེན་གྱིས་རྟེན་འབྲེལ་ལོག་འཆུགས་བྱུང་ན། ཐོག་མ་ལན་ཅིག་འགྲིག་པ་ཅིག(གཅིག)པོས་མི་ཆོག་པ་འདི་ཀུན་གྱིས་གོ་དགོས་པའི་གལ་པོ་ཆེ་རང་ཡིན་ནོ། །
དེ་ནས་རིམ་པས་འབྲང་ཕུ་དགོན་པར་སླེབ(སླེབས)། ནང་མི་རྣམས་ཟི་རེ་བ་ཞིག་འདུག་ནས་ཁང་པའི་ནང་དུ་བློ་མ་ཆགས། ཉིན་མོ་ཕལ་ཆེར་ཕྱི་ལ་བསྡད། རི་ཕུག །གང(གངས)ཕུག །རི་རྩེ་སོགས་གང་དབེན་དབེན་དུ་མཉམ་གཞག་འདྲ་དང་། ཁང་རྒྱབ་ཀྱི་ཞིང་སྟེང་དེར་ཆོས་ར་ཚོ་གཉིས་གསུམ་རེ་ཆག་མེད་བྱས། སྐྱ་སེར་སྣ་ཚོགས་འདུས་པ་ལ་སྐྱེས་བུ་གསུམ་གྱི་ལམ་རིམ་དང་སེམས་བསྐྱེད། རབ་འབྱམས་པ་ཀོང་ཕྲུག་དང་སྦྱིན་པ་སོགས་དོན་གཉེར་ཁ་ཤས་ལ། དགྱེས་པ་རྡོ་རྗེའི་བསྐྱེད་རིམ་གྱི་བཤད་པ་འཛིན་ཆོས་སུ་བཏང༌། རྡོ་རྗེ་གུར་གྱི་རྒྱུད་ལ་དཔེ་བཀྲམ་ནས་རྒྱས་པར་བཤད། འདི་སྐབས་ཟླ་གཅིག་ཞག་པོ་ཉི་ཤུ་ཙམ་བསྡད།
དེ་རྗེས་སྣ་དཀར་རྩེར་ཟླ་ཕྱེད་ཙམ་བསྡད་པའི་སྐབས། ཞལ་ངོ་རྣམས་སུ་ཕག་མོ་ཞལ་གཉིས་མའི་བྱིན་རླབས། གཤིན་རྗེ་གཤེད་ནག་པོ་ཞང་ལུགས་དང་གདོང་དྲུག་ར(རྭ)ལུགས་ཀྱི་དབང༌། ཟླུམ་པོ་བཞི་སོགས་དབང་རྗེས་གནང་རྣམ་གྲངས་མང་ཙམ་ཕུལ། རང་དང་ལྷན་ཅིག་རྒྱུ་བའི་སློབ་མ་འགའ་ཤས་ལ། དཔུང་བཟངས་ཀྱི་བཤད་པ་དང༌། ཀྱཻ་རྡོར་གྱི་འཛིན་ཆོས་ཀྱི་འཕྲོ་རྣམས་བཏང༌།
གསལ་བཤད།
རང་རྣམ་འདིའི་མ་དཔེ་ནི་རྟག་བརྟན་པར་མ་དང་ཛམ་ཐང་པར་མ་གཉིས་ཡིན་མོད། {}མཆན་ཁུང་འདིའི་ནང་དུ་བཀོད་ཡོད་པ་དག་ནི་རྟག་བརྟན་དང་ཛམ་ཐང་པར་མ་དེ་གཉིས་སུ་མེད་ཅིང་། འབྲས་སྤུངས་གནས་བཅུ་ལྷ་ཁང་ནས་བྱུང་བའི་དཔེ་རུ་ཡོད་པ་དག་དྲངས་པ་ཡིན། ()མཆན་ཁུང་འདིའི་ནང་དུ་བཀོད་ཡོད་པ་ནི་ཡིག་ནོར་རེད་སྙམ་པ་དག་མ་བཅོས་པར་རང་སོར་བཞག་སྟེ་མཆན་གྱི་ཚུལ་དུ་བཀོད་པའི་ཁུལ་ཡིན། []མཆན་ཁུང་འདི་རུ་ཡོད་པ་ནི་ཆད་འདུག་སྙམ་པ་དག་ཡིན་ནོ། །