ཉེར་གཉིས་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
ཧོར་ཟླ་གསུམ་པའི་ཚེས་བཅུ་གསུམ་ལ་ལྕམ་ཕུན་ཚོགས་དྲུང་གི་སྐྲ་བཅད་དང༌། ཆོས་ཀྱི་དགའ་སྟོན་སོགས་རྒྱས་པ་མཛད། སྔ་སོར་རྒྱལ་རྩེ་ནས་འབོད་མི་རིམ་ཅན་དུ་བྱུང་བའི(བས)། འདི་སྐབས་ཀྱང་དེ་ཕྱོགས་སུ་འགྲོ་བ་གཞིར་བཞག་ལྟ་བུར་ཡོད་ན་ཡང༌། དུས་ཐོག་ཏུ་འབོད་མཁན་ཡང་མ་སླེབ(སླེབས)། རྨི་ལྟས་ཀྱང་འགྱུར།
རིན་སྤུངས་ནས་འབོད་མཁན་བྱུང་བ་ལྟར་རོང་ཕྱོགས་སུ་འགྲོ་བར་ཆས། སང་ཉིན་འགྲོ་རྒྱུའི་དེ་རིང་རང་དེ་རྒྱལ་རྩེ་ནས་འབོད་མཁན་སླེབ(སླེབས)ཀྱང་དེ་སྐོར་ལ་འགྲོ་མ་ཐུབ། རོང་ཆེན་བརྒྱུད་ནས་ཕྱིན། གྲགས་པར་ཞག་མལ་ཞིག་བསྡད། ཆོས་རྗེ་འོད་མཆོག་པ་དེ་ན་བཞུགས་ཀྱི་འདུག་པའང་ངེད་ལ་འཕྲད་པར་ཕེབས་བྱུང༌།
དེ་ནས་བྱམས་ཆེན་དུ་སྡེ་པ་འཇམ་གྲགས་དྲུང་བསུ་བ་ལ་ཕེབས་འདུག་ཅིང༌། བྱམས་སྐུ་ཆེན་མོ་ལ་ཕྱག་མཆོད་སྨོན་ལམ་ཅི་རིགས་པ་བཏབ། སློབ་དཔོན་འགའ་ལ་ཆོས་འབྲེལ་ཙམ་བྱས་ཏེ། རིན་སྤུངས་སུ་ཞག་བརྒྱད་བསྡད། ཚེ་དབང་རྗེས་གནང་འགའ་ཤས་ཀྱིས་ཐོག་དྲངས། ནཻ་གུའི་མགྱོགས་འཁྲིད་དང༌། སྡེ་པ་འཇམ་གྲགས་དྲུང་སྐུ་སྒེར་དུ་གཤེད་དམར་གྱི་དབང་བསྐུར་ཞིག་དགོས་ཕེབས་པ་ལྟར་ཕུལ། ངུར་སྨྲིག་གི་སྒྲོལ་མ་དང༌། ཙན་དན་སྒྲོལ་མ་རང་བྱོན་དང༌། གནས་བརྟན་བཅུ་དྲུག་གི་བྲིས་ཐང་ཡེར་པ་ར་བ་ལ་སོགས་རྟེན་བྱིན་རླབས་ཅན་རྣམས་མཇལ། ཕྱག་མཆོད་སྨོན་ལམ་རྒྱས་པར་བྱས།
དེ་ནས་རིམ་པས་འོངས་ཏེ་བསམ་འགྲུབ་རྩེར་སླེབ(སླེབས)། ཆོས་བཀའ་ཅི་རིགས་པ་དང་རྐྱེན་སེལ་གཙོ་བོར་ཕུལ། {སྔ་སོར་དབུས་ལ་འགྲོ་ཁར་ཀུན་དགའ་དཔལ་བཟང་པ(པས)སྙན་ཞུས་འབུལ་བར་བཏང་བ་ལྟར།} ཤར་སྟེང་ནས{དཔོན་ས་རིན་མོ་ཆེས}ཇོ་ནང་དུ་ཚོགས་ལ་མང་ཇ་ཐོན་པའི་ཁྲོ་སྤུས་གཙང་བ་གཅིག་གནང་བྱུང་། {འཕྲལ་དུ་ཇོ་ནང་དུ་བསྐྱལ}།
{བྱང་ནས}ལྕམ་ཨ་མཛེས་དྲུང་བྱང་ཕྱོགས་སུ་གཉེན་འཕྲད་ལ་ཐེགས་ནས། རྒྱལ་བུ་འཁྲུངས་སྒོ་ཡང་སེང་གེ་ལུང་དུ་བྱུང་ཞིང་། ཨ་མཛེས་དྲུང་རང་ས་དེར་སྐུ་མ་འཚོ་བ་ཞིག་བྱུང་འདུག །རྒྱལ་བུ་སྐུ་ན་ཕྲ་གྲག(དྲགས)པས་ལམ་དུ་ཉེར་འཚེ་བྱུང་དོགས་ཞལ་ངོ་རྣམས་ཐུགས་མི་བདེ་བ་ལ། འདྲེ་གདོན་རྣམས་ལ་ངེད་ཀྱིས་བར་ཆད་མ་བྱེད་ཞིག(ཅེས)པའི་ཡི་གེ་ཞིག་ཀྱང་བྱས། ཉེས(ཉེ)ཞོ་མེད་པར་བསམ་རྩེར་མྱུར་དུ་ཕེབས་ཐུབ། ཞལ་ངོ་རྣམས་ལ་རྒྱུད་སྡེ་ལྔའི་དབང་དང༌། ནཻ་གུ་ཆོས་དྲུག་སོ་སོའི་བྱིན་རླབས་དང་བཅས་པ་ཞིག་ཀྱང་བྱས། དགོངས་བཞེད་ལྟར་ཕུལ།
སྣར་ཐང་དང་བྱང་ཆེན་དུ་ཡང་ཁོར་ཙམ་ཕྱིན། སླར་ཡང་བསམ་རྩེར་རྒྱལ་བུ་སྐུ་ན་ཕྲ་བ་ལ་བར་ཆད་མི་འབྱུང་ཞིང་། རྟེན་འབྲེལ་དགེ་མཚན་དུ། ཚེ་དབང་དང་གཏོར་དབང་འགའ་རེ་ཕུལ་ནས། ཁྲི་ཁང་གི་ཀླུ་སྡིངས་སུ་རིན་པོ་ཆེ་ཀ་བཞི་ནས་ཕེབས་འདུག་པ་དང་ཡང་མཇལ་ཞིང༌། དགོངས་བཞེད་ལྟར་ཁྲི་ཁང་པའི་ཞལ་ངོ་རྣམས་ཕྱག་ཕྱིར་བཀྲིས་པ་དང་བཅས་པ་ལ། འཇིགས་བྱེད་ཞེ་དགུ་མ་དང༌། བདེ་མཆོག་བོང་ཞལ་ཅན་གྱི་དབང་ཞིག་བྱས། འདི་སྐབས་དད་གུས་ཆེན་པོ་དཔེ་མེད་མཛད། ཐུགས་ནང་གཙང་བའི་གསུང་ཕེབས་པ་སོགས་མཛད་ཀྱིན་འདུག །
སྤ་མནམ་ལྷུན་གྲུབ་རྩེར་སྡེ་པ་ཀར་བསྟན་དྲུང་ཡང་ཕེབས་ཤིང༌། གསུང་ཕེབས་ལྟར་ཞག་གསུམ་བསྡད། ཉིན་གཅིག་དབྱར་དུས་ཀྱི་ཆུ་ཤིན་ཏུ་ཆེས་པས(ཆེ་བས)ཟམ་པ་དང་། ཞིང་ལ་གནོད་ཆེ་བར་དོགས་པ་ཆུ་ལ་རང་རེས་སྔགས་བཟླས་པའི་ནས་གཏོར་བས། དེ་འཕྲལ་རང་ཅུང་ཟད་བྲི། དེ་ནས་ཇེ་ཆུང་ངུ་སོང་། སང་ཉིན་ནས་བཟུང་ཆུའི་གནོད་པ་མ་བྱུང༌། རྫོང་གི་ཁང་པ་ཤིན་ཏུ་གྲུམ་པའི་ཞིག་ཉེན་ཆེ་བར་འདུག་པ་ལ། ཁྲུས་ཆུ་གཏོར་བས་འཕྲལ་འཕྲལ་ས་བྲུགས་ཡོད་པ་ཡང་རྒྱུན་ཆད། ཕྱིས་ཀྱང་ལོ་མང་དུ་བཅོས་མ་བྱས་ཀྱང་རྡིབ་ཆོམས་སོགས་ཉེས་སྐྱོན་མ་བྱུང༌།
བསམ་སྡིངས་སུ་ཞག་བཅུ་བདུན་ཙམ་བསྡད་ཅིང༌། ཤངས་ཆོས་ཐན་ཐུན་དང༌། སྙིང་པོ་དོན་གསུམ་སོགས་ཆོས་ཐན་ཐུན་འདྲ་བཤད། མདོལ་བྱུང་དུ་ཡང་དབང་ཆོས་སྣ་ཚོགས་པ་འཕེལ་བར་བྱུང་ཞིང༌། བསམ་རྩེ་ནས་འདི་བར་ཡན་ལ། ཡོལ་པ་མཁན་ཆེན་དང་དཀའ་བཅུ་རབ་འབྱམས་སོགས་མང་དག་ལ། ཐེག་པ་ཆེན་པོ་མདོ་སྡེ་རྒྱན་གྱི་གཞུང་བཤད་པས། བྱང་ཆུབ་ཀྱི་ལེའུ་རྫོགས་ཀྱི་བར་ལ་ཞིབ་བཤད་མཐའ་ཆོད་པར་བྱས། ཉན་པ་པོ་རྣམས་བློ་གྲོས་འཛིངས་སེ་འདུག་པས། དེ་མན་ཆད་ལ་བཤད་ཚོམ་དང་ལུང་ཙམ་བྱས་ནས་རེ་ཞིག་བཞག །
བསམ་འགྲུབ་རྩེ་དང༌། སྤ་མནམ་དང་། མདོལ་བྱུང་རྣམས་སུ་རྒྱལ་རྩེ་ནས་འབོད་མི་ནན་ཅན་བྱུང་ཡང་། འགྲོ་མ་འདོད་པས་ཁས་མ་བླངས།
དེ་རྗེས་རྒྱལ་མཁར{བརྒྱུད་ནས}དབང་ལྡན་དུ་ཕྱིན། གཏིང་སྐྱེས་ལ་འབོད་མི་ནན་ཅན་ཡོད་པའི་དོན་གྱི་རིམ་གྱིས་འདོས་འདྲར་སླེབ་ཅིང(སླེབས་ཤིང)། སྡེ་པ་ཞལ་ངོ་རྣམས་དང་མཇལ་ཙམ་བྱས།
གམ་པ་ནས་ནན་ཆགས་མཛད་པ་ལྟར། ཐོག་མར་གམ་པར་འགྲོ་དགོས་བྱུང་ཞིང་། ཟླ་ཕྱེད་སྐོར་ལ་རྐྱེན་སེལ་འདྲ་ཕུལ། ཀྱཻ་རྡོར་གྱི་དབང་ཞིག་ཀྱང་བྱས།
སླར་གཏིང་སྐྱེས་སུ་འབྱོར་ཏེ་ཟླ་བ་གསུམ་ཙམ་སྡོད་དགོས་བྱུང་བ། ཞལ་ངོ་རྣམས་དང་ཆོས་རྗེ་སྟག་སྣ་བ། དགོན་གསུམ་གྱི་གྲྭ་རིགས་དྲག་བསྡུས་དང་བཅས་པ་རྣམས་ལ། ལམ་འབྲས་བུ་དང་བཅས་པའི་གདམས་ངག་དབང་བྱིན་རླབས་འཁྲིད་དམིགས་གོ་དོན་བཤད་པ་ཡིག་ལུང་དང་བཅས་པ་མཐའ་རྒྱས་དང༌། དུས་འཁོར་གྱི་དབང་ཞིག་ཀྱང་སྒྲུབས། འདི་སྐབས་རྒྱལ་རྩེར་ནང་ཞིག་བྱུང་གདའ། བྲག་དཀར་གྱི་མགོན་པོའི་སྤྱན་ལམ་དུ་གྲི་ཆེ་ཆུང་འདྲེས་པ་ཤིན་ཏུ་མང་བར་ཕུལ་ནས་མངའ་གསོལ་བྱས་སྐབས། བྲག་ཕུག་ལ་རླུང་གསེང་སོགས་གང་ཡང་མེད་ཅིང་། ཕྱི་ནའང་ཡུལ་ཤིན་ཏུ་འཇམ་པ་རང་ཡིན་པ་ལ། ལྕམ་བྲལ(དྲལ)གྱི་ལྡེར་བཟོའི་བར་ནས་རླུང་འཚུབ་ཤུགས་ཆེན་པོ་ཞིག་བྱུང༌། སྙན་དར་དང་དཀར་མེ་རྣམས་གཡོས། ཀུན་དགའ་ཆོས་དབྱིངས་པས་ཞུན་མར་ཁུར་ཡོད་པ་མནལ་བ་དང༌། ཕྱི་རུ་ཁྱི་སོབ་ཀྱི་སྣ་ནས་ཁྲག་ཟགས། དགྱེས་པ་དང་འཚུབ་འགྱུར་སྤེལ་མའི་ཉམས་སུ་གདའ། དེ་ཡང་ང་ལ་དགྱེས། གཞན་ལ་མ་དགྱེས་པ་ཡིན།
ཡང་ཞག་ཤས་ནས་དཀར་ལར་ཕྱིན། མགོན་ཁང་དུ་ཞག་གཅིག་གསོལ་བ་བཏབ། ཆོ་འཕྲུལ་ཆེན་པོ་དཔེ་མེད་རང་དང་། བྱང་ཕྱོགས་ཀྱི་བླ་རུལ་འགའ་ཞིག་འགྱེལ་འགྲོ་བའི་ལྟས་གསལ་བར་ཤར།
དེ་ནས་ཞག་འགའ་སོང་ནས་བྲག་དཀར་དུ་རྒྱ་ནག་གི་སྐ་རགས་སྤུགས་ཐགས་མ་ཞིག་ལ། བཀའ་བསྒོ་དང་འདོད་གསོལ་བྲིས། དམ་རྫས་ཡོ་བྱད་འགའ་རེ་དང་བཅས་ནས་ཀུན་དགའ་དཔལ་བཟང་འབུལ་དུ་བཏང་བས། ཉམས་ཆགས་བསྐང་བའི་རྟགས་གསལ་པོར་བྱུང༌།
དེ་ནས་རྩ་བའི་བླ་མ་དམ་པ་མཇལ་བར་བསམ་སྟེ། བྲག་སྟོད་ཕྱོགས་སུ་ཆས། ཕ་དྲུག་གི་ཚ་ནས་སྔ་དྲོ་ལངས་ནས་ཡོངས་པའི་ཉིན་བདེ་བ་ཅན་གྱི་གདོད་ཐད་དེར། བསམ་གླིང་མཁན་ཆེན་སྔགས་གྲྭ་པ་བསུ་བར་སླེབ(སླེབས)བྱུང༌། ཁོང་ལ་རྒྱལ་འགོང་རྗེས་སུ་འབྲང་པའི་ཆོ་འཕྲུལ་དུ་མ་འདུག་ནས། དེ་ལ་གཟིར་གྱིན་ཕྱིན། ཁོང་ཡང་མདོག་རོ་ཤོར། ཞུམ་ཞུམ་པ་བྱས་སོང༌།
དེ་ནས་བླ་མ་མཆོག་གི་སྐུ་དྲུང་དུ་སླེབ(སླེབས)། ད་རེས་འཕྲད་པ་འདི་དགའ་ཞེས་ཤིན་ཏུ་དགྱེས་པ་རང་གནང་གིན་འདུག །ཟླ་གཅིག་ལྷག་ཙམ་སྐུ་དྲུང་དུ་བསྟེན་རྒྱུ་བྱུང༌། གཙོ་བོར་སྔར་གྱི་ཉམས་མྱོང་རྣམས་ལ་བོགས་འདོན་པ་དང༌། གེགས་བསལ་བ་ལམ་དུ་གཏོང་ཚུལ་ཁོ་ནའི་བཀའ་སྩལ་པ་རྣམས་བཀའ་དྲིན་དུ་ཐོབ་ཅིང༌། གདམས་པའི་གནད་ཀྱི་ཆོས་ཅི་རིགས་པ་ཡང་སྩལ(བསྩལ)། རང་རེས་མ་ཐོབ་པའི་ཆོས་ཞུ་རྒྱུ་འགའ་རེ་ཡོད་ཀྱང༌། ཐོབ་རྒྱ་དང་ཐོས་རྒྱས་ཆོག་པ་ཡོད་སྙམ་པ་ཁོ་ན་སྙིང་ལ་བཞག་སྟེ་ཞུ་བ་མ་བྱུང༌།
དེ་སྐབས་བཀའ་ལས། འུ【ཅག】ཡང(ཀྱང)ནམ་འཆི་ཆ་མི་གདའ། གྲྭ་རིགས་ལག་གཡོག་གྲུལ་བཏུབ་ཙམ་ཡོད་པ་ཚོ་ཡང་ཕལ་ཆེར་ཤི །ད་ལྟ་ནི་འདི་ཚོ་ན་སྣ་ཚོགས་ལས་མི་འདུག་པས། འུ་ཅག་ཤི་བ་བྱུང་ནའང་། ཤུལ་འདི་ལ་ཁྱོད་ཀྱིས་བལྟ་དགོས་ཞེས་ཡང་ཡང་གསུང(གསུངས)།
ལན་ཅིག་འདི་ན་མནོ་བསམ་ཐ་དད་པ་འགའ་རེ་ཡོད་པས། དགོན་གནས་འདི་མི་འགྱུར་བའི་རྟེན་འབྲེལ་དུ་ཆོས་སྐྱོང་གི་རྟག་གཏོར་ཞིག་ཚུགས་ཕེབས་པ་ལྟར། བསྒྲུབས་ཡར་རྒྱབ་ནས་ཞིང་སྐྱོང་ཟེར་བའི་དཔོན་རིགས་ཤིག་འདས་པའི་བསྔོ་ཞུས་ཕྲན་བུ་སྐྱེལ་བ་ལ། སྡེ་པའི་དྲུང་རང་གི་ཕྱག་དམ་ཞིག་ཀྱང་གནང་བྱུང༌། ཡར་རྒྱབ་སྡེ་པས་བར་སྐབས་དེར་འབྲེལ་བཅད། དེ་ནས་འབྲེལ་མཐུད་པའི་ཐོག་མ་དེ་མི་ཤི་བའི་སྣེ་སྦྱོར་དེ་མཛད། རྟེན་འབྲེལ་དེ་འདྲས(འདྲ)ཡོང༌།
ལན་ཅིག་མགོན་པོའི་གཏོར་ཆེན་བྲག་སྟེང་དུ་བསྐྱལ་བས། ལྕམ་དྲལ་ལམ་མེ་བ་ཞིག་གི་གསལ་སྣང་མཐོང༌། བསྐང་གསོའི་ཐུན་གཏོར་སྐྱེལ་མཁན་ལ་ཡང་མཐོང་སྣང་མང་པོ་བྱུང་གདའ། ཆོས་རྗེ་སྔགས་གྲྭ་པས་གཞི་བྱས་རྣམས་ལ་ཚོགས་འཁོར་ཞིག་བཏང༌། ཚོགས་རྫས་ཁམ་རེ་བསྟེན་པ་ལ་བླ་མ་དམ་པ་དང་། ངེད་དང་། ཀུན་དགའ་དཔལ་བཟང་དང་། གཞན་ཡང་འགའ་རེ་ལ་ཡང་བྱུང༌། ལྷག་པར་ངེད་རང་གྲིབ་ཤིན་ཏུ་ན་བས། འཁྲིད་བརྒྱ་སོགས་འཆད་འཕྲོ་ཚོ་ཡང་འཇོག་དགོས་ལ་ཁད་བྱུང༌། བླ་མ་དམ་པའི་ཞལ་ནས། ཁ་སང་ཁོ་བའི་ཚོགས་འཁོར་དེ་མ་དག་པའི་གྲིབ་ཏུ་འདུག །ཚོགས་ཀྱི་གྲིབ་ཚོགས་ཀྱིས་སེལ་བྱ་བ་ཡིན་གསུངས་ནས། ཕྱག་ནས་ཚོགས་འཁོར་ཞིག་གནང་བས། ཚོགས་ཀྱི་ཕྱེད་ཙམ་ཟོས་ཟིན་ཅིང་། མ་ད་ན་ཞལ་གང་བསྟེན་པའི་མོད་ལ་སངས་ཏེ་གྲག(དྲག)སོང༌།
འདི་སྐབས་འཇགས་པ་སྤྲུལ་པའི་སྐུ་གློ་བུར་དུ་སྐུ་གཤེགས་པའི་བསྔོ་རྟེན་དང་གནས་ཚུལ་སྐྱེས་མཁན་འབྱོར། ཁོང་གཤེགས་རྐྱེན་འཇགས་རང་གི་ཆོས་སྐྱོང་མ་དགྱེས་པས་སྲུང་སྐྱོབ་བྲལ་བའི་རྣམ་པར་བྱུང་བ་འདྲ། འཕྲལ་རྐྱེན་རྣམ་གླིང་ཆོས་སྡེ་པར་གཏོགས་པའི་བླ་མ་གཅིག་གིས་འཇགས་པའི་དགོན་གཞིས་ཕྲན་བུ་དེ་པ་མིག་འོག་ཏུ་བཅུག་པ་ལ། ལོ་རེ་ལོ་གཉིས་ཙམ་ཡང་རང་གིས་མ་ཐུབ་པར་དུག་སྦྱོར་བྱས་འདུག་པས་ཡིད་སྐྱོ་ཤས་ཆེ་བ་ཞིག་ཀྱང་བྱུང༌།
སྤ་ལུང་དུ་ཆོས་རྗེ་ངག་དབང་པའི་སྐུ་སྐྱེ་ཡང་སྤྱན་དྲངས། ངེད་ལ་འབོད་མི་བྱུང་བ་ལྟར་ཁོར་ཙམ་ཞིག་ཕྱིན། སྒོམ་ཆེན་སེམས་ རྒྱུད་མ་ཐུལ་བ་རྣམས་ཟིངས་ཤིག་ཁོ་ནས་དུས་འདའ་བ་དེ་གཤིས་སུ་འདུག་པས། ཟིར་ཟིར་བ་ཞིག་ལས་ནི་མི་གདའ།
སླང་ཡང་བྲག་སྟོད་དུ་འོངས་ཏེ་ཚེ་དབང་ཞིག་རྟེན་འབྲེལ་དུ་ཞུས། ཕྱིར་འོངས་དུས་བརྟན་བཞུགས་ཤིག་ཕུལ། ཞབས་པད་བརྟན་པའི་གསོལ་བ་བཏབ་དུས་ཅང་མི་གསུང༌།
སྤྱིར་རྗེ་བཙུན་འདི་ངེད་ཀྱི་ལོ་བཞི་ལོན་པའི་དུས་སུ་མཇལ་བ་ནས། ལོ་ཉེར་ལྔ་ལོན་པའི་གཏིང་སྐྱེས་སུ་མཇལ་བའི་བར་དེ་ལ། སྔ་ཕྱིར་སྐུ་ལ་བགྲེས་སུ་འགྲོ་བའི་རྣམ་པ་འགྱུར་བ་ཡེ་མེད། དེ་དུས་ཕག་ལོ་ཡིན། དེ་རྗེས་ཀྱི་ཡོས་ལོ་དེ་ལ་གཏིང་སྐྱེས་སུ་མཇལ་དུས། ཅུང་ཟད་བགྲེས་པའི་རྣམ་འགྱུར་གྱི་ཚུལ་བསྟན་འདུག །དེ་ནས་རྟ་ལོའི་སྐབས་ཀྱི་བར་འདི་ལ་བགྲེས་ཚབས་ཆེ་བའི་ཚུལ་བསྟན་འདུག་སྟེ། སྐུ་དབྱིངས་སུ་བསྡུ་བའི་དགོངས་པ་གཏད་པ་དེར་གདའ།
འདི་སྐབས་སྐུ་གཞོགས་ནས་ཚུར་འོངས་དུས། ཆོས་རྗེ་སྔགས་གྲྭ་བ་བློ་བཟོའི་རིག་རིག་གྲས་ཀྱི་བྱེད་པ་ཕུགས་ཀྱི་རྟེན་འབྲེལ་དུ་འགྲོ་ལ་རེ་ནས། ངེད་ལ་སྐྱེལ་མ་ཡང་བླ་བྲང་གི་སྒོའི་ཐེམ་པའི་མཚམས་སུ་བྱེད་པ་སོགས་སྙིང་རྗེ་ཞིང་གད་མོའི་རྒྱུ་མང་པོ་བྱེད།
སྔ་སོར་རྒྱང་ནས་ཐོས་ཚོད་ལ་ཁོང་པ་བྲག་སྟོད་དུ་ཡང་ཡང་ཡོང་ཞིང་། བླ་མ་དམ་པ་ལ་མོས་གུས་དང་ཞབས་ཏོག་ཆེ། ཕྱག་གཡོག་འགྲུབ་པོ་ཡོད་ཟེར་བའི་གྲགས་པ་ཞིག་ཀྱང་འདུག་པས། བློ་སེམས་དཀར་བར་ཡོད་ཀྱང༌། འདི་སྐབས་ཁོང་གི་མཚན་ཉིད་རྟོགས་འཕྲལ་བླ་མའི་ཕྱག་ནས་གནང་སྦྱིན་ཞུ་བ་དང་། ཁོ་པ་མི་རྟ་མང་པོ་ལ་ལྟོ་ཆས་དགོས་པའི་ཕྱིར་དུ་ཆོས་ཞུ་བ་ལ་ཁག་དཀྲིས་ནས་སྐུ་གཞོགས་ཡང་ཡང་ཡོངས་པར(ཡོང་བར)འདུག་ཅིང༌། གནང་སྦྱིན་ལྐོག་ཏུ་ཞུས་ནས། མཚན་མོ་རྩིབས་རི་ལ་སྐྱེལ། འབུལ་བ་གང་ཡོད་ཁྲོམ་བསགས་ནས་བྱེད། གང་སྡོད་ཀྱི་རིང་ལ་ཡང་སྐྱུག་བྲོ་ལ། སྔོན་སླུ(བསླུ)བའི་སྤྱོད་ངན་ཁོ་ན་བྱེད། ཕུགས་ཀྱི་འདོད་པ་གྲྭ་རིགས་རྣམས་རིམ་པས་སླད་ནས་ཁོ་རང་ལ་འདུ་བར་བྱས། བླ་མ་ལ་འཆི་སྒུགས(སྒུག)དང་ཤུལ་ལ་རྔམས་པ་ཁོ་ནར་འདུག །
སྔ་སོར་ཕྱག་གཡོག་ཅུང་གོ་ཆོད་པའི་ཁུངས་འགའ་ཤས་ཡོད་པ་རྣམས་ཀྱང་། ལོ་གཅིག་གི་ཁོངས་སུ་ན་ལུགས་གཅིག་པར་བྱུང་ནས་ཐམས་ཅད་འདས་གདའ་བ་ཡང་དོགས་པའི་གཞིར་གདའ། སྤྱིར་ཁོང་པར་མ་ཟད་འདི་བའི་སྡེ་འདི་ཚོ་ཕལ་ཆེར་བསམ་སྦྱོར་ཤིན་ཏུ་རྩོག་པ་འདིའི་རིགས་ཁོ་ན་ཡོང་གིན་འདུག །འོན་ཀྱང༌། གང་ཕྱིར་འཇིག་རྟེན་སྐྱོན་ལ་དགའ། །སྐྱོན་ཡང་ཡོན་ཏན་ལྟར་མཐོང་ནས། །ཞེས་པ་ལྟར། སྐྱེ་དམན་རླུང་ཁྱེར་མ་ཚོས་སྣ་དྲངས་པའི་མི་ནག་པ་ཕལ་དང་། བཙུན་པ་ཀླད་མེད་ཚོ་དད་པ་མི་སྐྱེ་དགུ་སྐྱེ་ཅི་བྱེད་ལས་ཟད་ལ་འགྲོ་བ་གཅིག་ནི་གདའ་ལགས།
དེ་ནས་དགོན་པ་བདེ་བ་ཅན་དུ་སླེབ་ཅིང(སླེབས་ཤིང)། ཡ་བྱང་མཚོ་སྒོ་ཉི་ཤར་རྣམས་བརྒྱུད་དེ་ཡོངས(འོངས)། བྲག་སྟོད་ནས་ཡོངས(འོངས)པ་ནས་བརྩམས། ཉིན་རེ་བཞིན་རླུང་ཆེན་པོས་རྗེས་བཅད་པ་བཞིན་དུ་བྱུང་སྟེ། རང་གི་སེམས་ཉིད་ཆོས་སྐུར་ངོ་སྤྲོད་པའི་བླ་མ་དེ་དང་། ཚེ་འདི་ལ་ཕྱིས་མི་མཇལ་བའི་རྟགས་སུ་གདའ། མཚོ་སྒོར་ཤིན་ཏུ་འཚུབ་ཅིང་རླུང་ནག་སྤྱི་དང་མི་འདྲ་བ་བྱུང་བའང་ཁོང་རང་རྣམས་ལ་འཕྲལ་དུ་བལྟ་བར་འདུག །ཕུག་དམར་གྱི་ལ་ལ་མི་རྟ་འཁྱེར་བའི་རླུང་ཙམ་བྱུང༌། ངས་དམ་ཉམས་ཀྱིས་ཁེངས་པའི་ལུང་བ་ཕ་གི་ཚོ་ལ་འགྲོ་དགོས། འདིས་ཡིན་བྱས་པས་ཆོས་རྗེ་དཀོན་བློ་སོགས་འབོད་མི་ཚོ་ལྕེ་ནར་བྱེད་ཀྱིན་འདུག །
གདོང་དགའ་བདེ་གླིང་སོགས་བརྒྱུད། གྲོམ་པ་ལྷ་རྩེའི་རྫོང་དཔོན་འཕོས་འཕྲལ་གྱི་དྲང་སྲོང་བ་དང་། གྲོ་ལུང་པ་འདུག་པས་ཐབ་འཛིན་བཏེག(བཏེགས)།
ཧོར་ཟླ་བཅུ་གཉིས་པའི་ཉེར་ལྔ་ལ་རི་ཁྲོད་ཆེན་པོ་ཇོ་ནང་དུ་སླེབ(སླེབས)། དེ་ཉིན་ནས་ཀ་འཁྲིད་ཀྱང་བཙུགས། སྔ་སོར་ནགས་ཕུག་མི་དཔོན་ལ་བརྟེན་པའི་ཁམ(ཁ)མཆུའི་སྐབས། ངེད་མྱུར་དུ་འཆི་བའི་ལུང་བསྟན་དང་། བསྡིགས་རི་བྱེད་མཁན་རྣམས་ལ་ཕལ་ཆེར་ཁོང་རང་ཚོ་འདུས་བྱས་ཀྱི་གནས་ཚུལ་བསྟན་གྲུབ། བྱང་རང་གི་དབུ་བླའི་ཁུངས་གྱག་གྱོག(ཀྱག་ཀྱོག)དེ་འདྲ་བཞི་ལྔ་ཞིག་བཏུད་བཏུད་ལ་འུད་ཚར་འདུག །ཨང་ཡིག་པ་སངས་མ་རྒྱས། ཉེ་གནས་སངས་རྒྱས་པའི་དཔེར་སོང༌། མང་པོ་ཞིག་ནི་ཁ་སྐྱེངས་སེ་བ་གཞན་ལས་འཛུམ་བག་པ་གཅིག་འདུག །ཁ་གཅིག(ཅིག)ནི་ངེད་ལ་དབང་དང་དྲག་པོའི་ལས་མཐའ་བྱེད་དོ་སྙམ། རང་ངམ་རང་ཕྱོགས་རྣམས་མི་ཤེས་དགུ་ཤེས། མི་དྲན་དགུ་དྲན། ལག་ཏུ་མི་འགེལ་དགུ་འགེལ་བྱེད་པའི་རིགས་འགྲེས་གཞན་ལ་ཡང་དོགས་པ་བྱེད་ཅིང་། འཕྲལ་ཁྱེད་བྱིན་རླབས་ཅན་ཡིན་ཞེས་ཚིག་གི་མོས་མོས་ལྟར་བྱེད།
ངེད་རང་ཚང་གི་མདོག་སྨོན་འགྲོ་བ་སོགས་ནི་བར་སྐབས་དེར་གྲུབ་མཐའ་ཆོས་བརྒྱུད་སོགས་ཀྱང་གཞན་ལ་ངོ་ལོག་གི་ཁུངས་དང༌། དངོས་དང་བརྒྱུད་པའི་སྒོ་ནས་སྣ་ཚོགས་སུ་སྨོད་ཅིང་བཟློག་པ་དང་། ངན་བྱེད་ཤེས་ཟེར་བ་ཐམས་ཅད་གསོག་པར་ཡང་འདུག་སྟེ། ཐམས་ཅད་སྙིང་རེ་རྗེ། སྙིང་རེ་རྗེ། ཕཊཿ
ཁོ་བོ་ནམ་མཁའ་ལྟ་བུའི་རྣལ་འབྱོར་པ། རྒྱུད་སྡེ་ནས་གསུངས་པའི་ལས་ཚོགས་ཏེ་ཐམས་ཅད་ལ་མཁས་ཀྱང༌། ལས་མཐའ་སྒྲུབ་པའི་དོན་དུ་རྫས་སྣ་ཅིག(གཅིག)ཀྱང་གསོག་མ་མྱོང༌། འཁོར་ལོ་སྦར་མཐིལ་ཙམ་འབྲི་མ་མྱོང༌། ངན་སྔགས་འཕྲེང་སྐོར་གཅིག་བཟླ་མ་མྱོང༌། སྒྲུབ་མཚམས་གཅིག་སྡོམ་མ་མྱོང༌། དམྱལ་རྒྱུ་སྐད་ཅིག་ཀྱང་གསོག་མ་མྱོང༌། ཁོ་བོས་བལྟས་ན་ནི་སེམས་ཅན་རྣམས་སྐལ་བ་དམན་པས། ང་ཡི་འདོད་དོན་མ་འགྲུབ་པ་ཁོ་ནར་སོང་སྙམ་གྱིན་གདའ། གཞན་གྱི་བློར་སྣང་ལ་ཁྱོད་ལ་དབང་དྲག་རྒྱས་པ་སོགས་བྱས་པའི་ཞད་རེ་མང་གདའ། འདོད་དོན་ཡང་འགྲུབ་ཀྱིན་འདུག་པ་རེ་མཚར་སྙམ་ན། རྣམ་པར་མི་རྟོག་པ་སྙིང་རྗེའི་རང་བཞིན་དུ་ཤར་བས། ཡེ་ཤེས་སྨྲ་བ་པོ་རྣམས་ལ། །ཡེ་ཤེས་གཅིག་པུས་ལས་ཀུན་བྱེད། །ཅེས་པ་དེ་ཡིན་ཏེ་འོང(འོངས)།
སྨྲས་པ།
དབང་བསྡུད(སྡུད)མཁན་དང་དྲག་སྔགས་མཁན། །
བསམ་ངན་པོ་རྣམས་བླ་ཚུགས་འཛིན། །
རང་འདོད་དབང་གིས་ལས་ཚོགས་བསྒྲུབས། །
དམྱལ་བའི་སྒོ་ཆེ(ཆེར)མ་ལགས་སམ། །
སྙིང་ལ་ནོར་སྒྲུབ་སྣ་ཚོགས་བཅངས། །
ཡོང་ནི་ཡི་དྭགས་ཁྱུ་ཞིག་ཡོང༌། །
ཉིན་མཚན་དབང་བསྡུད་བསྒྲུབས་པ་ལ། །
དབང་ཐང་གཞན་ལ་ཤོར་བ་མང༌། །
མཐུ་ཆེན་འདོད་པའི་དྲག་ལས་མཁན། །
དགྲ་རྣམས་ཚེ་རིང་ཕྱུག་ལ་བཙན། །
རང་གི་ཕྱོགས་ལ་གོད་ཁ་མང༌། །
བཟློག་པ་བྱས(བྱེད)ཀྱིན་འདྲེ་གདོན་གནོད། །
དགེ་བཤེས་བླ་མ་ཤེས་ལྡན་རྣམས། །
གྲོང་སྔགས་ནག་པོའི་རིང་ལུགས་སྤོང༌། །
དད་པ་བརྟན་པོས་དགེ་ཕྱོགས་སྤེལ། །
བསམ་དོན་ཡིད་བཞིན་འགྲུབ་པ་ལགས། །
བླ་ཆེན་མང་ཚད་འདི་འདྲ་གདའ། །
ཆོས་ཀྱི་ལག་ལེན་ལྟ་ཅི་སྨོས། །
ཁ་སྐད་ཙམ་ཡང་ཡེ་མེད་པ། །
འཇིག་རྟེན་ཁེངས་གྲགས་ཁོ་ནས་འདའ། །
བདེན་མེད་ལ་བདེན་པར་འཁྲུལ་པ་སྙིང་རེ་རྗེ། །
བདེན་པ་ལ་དོགས་པ་སྐྱེ་བ་སྙིང་རེ་རྗེ། །
མགོ་སྐོར་ལ་ཤ་ཚར་ནོར་བ་སྙིང་རེ་རྗེ། །
དྲང་པོ་ལ་རྫུན་དུ་འཛིན་པ་སྙིང་རེ་རྗེ། །
ཨ་ཙ་མ་ཨ་ཙ་མ་སྙིང་རེ་རྗེ། །
འུད་གོང་གི་ལེའུ་མ་ལགས་སམ། །