ཇོ་ནང་ཀུན་མཁྱེན་ཆེན་པོས་གསུང་།
ན་མོ་ལོ་ཀི་ཤྭ་ར་ཡ།
ཤེས་བྱ་ཀུན་མཁྱེན་ཤེས་རབ་རྒྱལ་མཚན་དཔལ། །
འཕྲིན་ལས་བཟང་པོའི་ཉི་མའི་དཀྱིལ་འཁོར་གྱིས། །
གླིང་བཞི་མུན་སེལ་ཁམས་གསུམ་ཆོས་ཀྱི་རྗེ། །
ཐུབ་བསྟན་རྒྱལ་མཚན་འཛིན་ལ་སྤྱི་བོས་འདུད། །
སྐུ་མཆོག་བདེ་གཤེགས་སྙིང་པོའི་ཁང་བཟང་ལ། །
ལེགས་བཤད་གསུང་གི་སྒྲ་དབྱངས་རྡོ་རྗེ་འཛིན། །
འཁྲུལ་མེད་ཐུགས་ལྡན་འོད་གསལ་ཆོས་ཀྱི་དབྱིངས། །
མཐའ་འཁོབ་མུན་སེལ་ཁྱོད་ལ་སྤྱི་བོས་འདུད། །
དུས་གསུམ་རྒྱལ་བ་རྒྱ་མཚོས་ལུང་བསྟན་ནས། །
གངས་ཅན་ཁྲོད་དུ་སངས་རྒྱས་བསྟན་པ་སྤེལ། །
སྙིགས་དུས་མགོན་མེད་དཔལ་གྱུར་དོལ་པོ་པ། །
མཚུངས་མེད་ཆོས་རྗེའི་ཞབས་ལ་སྤྱི་བོས་འདུད། །
དེ་ལྟར་བསྟོད་པའི་དགེ་བས་འགྲོ་བ་ཀུན། །
དངོས་གྲུབ་རྣམ་གཉིས་ཆར་གྱིས་མཉེས་བྱས་ནས། །
བྱིན་རླབས་ཆོས་ཀྱི་དཔལ་ལ་འགོད་གྱུར་ཅིང་། །
ཀུན་མཁྱེན་རྒྱལ་བའི་གོ་འཕང་མྱུར་ཐོབ་ཤོག །
བླ་མ་དང་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །
ཐུགས་བརྩེ་བ་ཆེན་པོས་རྗེས་སུ་བཟུང་དུ་གསོལ།
གདོད་ནས་རྣམ་གྲོལ་འོད་གསལ་ཆོས་ཀྱི་སྐུ། །
འགྲོ་ལ་ཕན་པའི་གཟུགས་སྐུ་མཐའ་ཡས་སྟོན། །
འཁོར་བ་སྲིད་དུ་འཕྲིན་ལས་རྒྱུན་མི་འཆད། །
དཔལ་ལྡན་བླ་མའི་ཞབས་ལ་མགོས་ཕྱག་འཚལ། །
ཀུན་མཁྱེན་ཆོས་དབྱིངས་དག་པའི་ནམ་མཁའ་ལ། །
གཟུགས་སྐུ་རྟ་བདུན་རྒྱལ་པོ་ཉི་མ་ཤར། །
གླིང་བཞིར་ཆོས་ཀྱི་འོད་ཟེར་ཁྱབ་མཛད་པ། །
བསྟན་པའི་སྒྲོན་མེའི་ཞབས་ལ་ཕྱག་འཚལ་ལོ། །
གཞན་སྟོང་རིག་པའི་སེང་ཆེན་རོལ་པ་ཡིས། །
རང་སྟོང་མ་རིག་གླང་པོ་ཚར་བཅད་ནས། །
སྟོང་གཞི་བདེ་གཤེགས་སྙིང་པོ་གསལ་མཛད་པ། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་འདུད། །
མ་ནོར་ཇི་བཞིན་འཆད་པའི་དུང་ཆེན་འབུད། །
ལྟ་ངན་ཚར་བཅད་རྩོད་པའི་བ་དན་འཕྱར། །
སྡེབ་ལེགས་རྣར་སྙན་རྩོམ་པའི་རྔ་ཆེན་བརྡུངས། །
ཆོས་ཀྱི་རྒྱལ་མཚན་བླ་མའི་ཞབས་ལ་འདུད། །ཅེས་དང་།
རྒྱལ་བའི་ཕྱག་མཐིལ་ལས་འཁྲུངས་སྤྱན་རས་གཟིགས། །
གཉིས་སུ་མེད་པའི་ཀུན་མཁྱེན་ཆོས་ཀྱི་རྗེ། །
སྡེ་སྣོད་ཀུན་ཤེས་ཤེས་རབ་རྒྱལ་མཚན་དཔལ། །
ཀུན་ཏུ་བཟང་པོས་བདག་ཅག་བྱིན་གྱིས་རློབས། །
ཆོས་གྲགས་དཔལ་གྱིས་གསུངས།
༄༅། །རྒྱལ་བའི་རིགས་ལྡན་སྤྲུལ་པའི་སྐུ་ཆེན་པོ་ཁམས་གསུམ་ཆོས་ཀྱི་རྒྱལ་པོ། འགྲོ་བའི་མགོན་པོ། །དོལ་པོ་པ་ཤེས་རབ་རྒྱལ་མཚན་དཔལ་བཟང་པོའི་ཞབས་ཀྱི་པད་མོ་དྲི་མ་མེད་པ་ལ་སྒོ་གསུམ་གུས་པས་ཕྱག་འཚལ་ཞིང་སྐྱབས་སུ་མཆིའོ། །ཐུགས་བརྩེ་བ་ཆེན་པོས་དུས་དང་གནས་སྐབས་ཐམས་ཅད་དུ་རྗེས་སུ་བཟུང་དུ་གསོལ།
གང་གི་མཁྱེན་བརྩེ་ནུས་པ་རྨད་བྱུང་བས། །
གཞི་ལམ་འབྲས་བུའི་གནས་ལུགས་ཐུགས་ཆུད་དེ། །
ཇི་བཞིན་འགྲོ་ལ་གསལ་བར་སྟོན་མཛད་པའི། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱང་གཞི་བདེ་གཤེགས་སྙིང་པོ་ཆོས་ཀྱི་དབྱིངས། །
འོད་གསལ་འདུས་མ་བྱས་ཤིང་རྟག་པའི་སྐུ། །
ལུས་ཅན་ཀུན་ལ་བཞུགས་པའི་དོན་དམ་དུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱང་བྱ་གློ་བུར་དྲི་མ་ཤུན་པའི་ཚོགས། །
ཐོག་མེད་ལས་དང་ཉོན་མོངས་ལས་ལས་བྱུང་། །
འཁྲུལ་སྣང་རྟེན་འབྲེལ་ཀུན་རྫོབ་ཟག་བཅས་སུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱོང་བྱེད་ཟབ་ལམ་མི་རྟོག་ཏིང་འཛིན་གྱིས། །
སྤང་བྱ་རྣམ་རྟོག་དྲི་མ་ལེགས་སྦྱངས་ནས། །
ཐོབ་བྱའི་དོན་དམ་འོད་གསལ་སྟོན་པའི་ཐབས། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱངས་འབྲས་ཆོས་སྐུ་བསྐྱེད་པ་མ་ཡིན་པར། །
གདོད་ནས་ལྷུན་གྲུབ་ཡོན་ཏན་ཚད་མེད་པ། །
རྟག་མིན་ཆད་མིན་ཡོད་པའི་དོན་དམ་དུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
མི་འགྱུར་མཆོག་གི་བདེ་བ་ཆེན་པོ་དང་། །
སྟོང་ཉིད་རྣམ་ཀུན་མཆོག་ལྡན་སྣ་ཚོགས་ཡུམ། །
ཟུང་འཇུག་དུས་ཀྱི་འཁོར་ལོའི་ངོ་བོ་ཉིད། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
ཧེ་ཡིག་དམིགས་མེད་སྙིང་རྗེ་ཆེན་པོ་དང་། །
བཛྲ་ཤེས་རབ་སྟོང་ཉིད་ཟབ་མོའི་དོན། །
ཟུང་འཇུག་ཀྱེ་ཡི་རྡོ་རྗེའི་ངོ་བོ་ཉིད། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
རྒྱལ་བ་ཀུན་གྱི་ཟག་མེད་བདེ་ཆེན་དང་། །
སྒྱུ་མ་ལྟ་བུའི་སྟོང་ཉིད་ཟབ་མོའི་དོན། །
ཟུང་འཇུག་བདེ་མཆོག་འཁོར་ལོའི་ངོ་བོ་ཉིད། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
ཚད་མེད་བཞི་ཡི་བང་རིམ་མཛེས་པར་བརྒྱན། །
རྣམ་ཐར་བཞི་ཡི་དོན་རྣམས་མངོན་སུམ་གཟིགས། །
བསྡུ་བ་བཞི་ཡིས་གཞན་དོན་ཁོ་ན་མཛད། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྔོན་བསགས་དགེ་བས་དམ་པའི་རིགས་སུ་འཁྲུངས། །
སྐུ་གསུང་ཐུགས་ལ་ཉེས་པའི་སྐྱོན་མ་གོས། །
སྒོ་གསུམ་བྱ་བ་གཞན་དོན་ཁོ་ན་སྦྱོར། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
ཐར་བའི་ལམ་མཆོག་སྟོན་མཛད་ཆོས་ཀྱི་རྗེ། །
སྐྱབས་ཀྱི་དམ་པ་ཀུན་མཁྱེན་གཉིས་པ་བྱོན། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
དེ་འདྲའི་དཔལ་ལྡན་བླ་མ་ཆོས་ཀྱི་རྗེ། །
དྲང་དང་ངེས་པའི་ཚིག་རྣམས་འབྱེད་མཁས་པ། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
ཀུན་གཟིགས་བདེན་པ་གསུང་བ་ཆོས་ཀྱི་རྗེ། །
ཤིན་ཏུ་གཅེས་པའི་གསུང་གི་མཛོད་འཛིན་པ། །
བདག་དང་མཁའ་མཉམ་འགྲོ་བ་མང་བོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
བརྩེ་ལྡན་བཀའ་དྲིན་མྱུར་བ་ཆོས་ཀྱི་རྗེ། །
དུས་གསུམ་རྒྱལ་བ་ཀུན་དང་དབྱེར་མེད་པ། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
སྐྱེ་དང་སྐྱེ་བར་ཐེག་ཆེན་ཆོས་སྤྱོད་ཅིང་། །
རྒྱལ་དང་རྒྱལ་བའི་སྲས་ཀྱིས་རྗེས་བཟུང་ནས། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
དཔལ་ལྡན་བླ་མ་རྒྱལ་བའི་སྐུ་གསུང་ཐུགས། །
ཡེ་ཤེས་རྡོ་རྗེའི་བྱིན་རླབས་རྨད་བྱུང་བ། །
ད་ལྟ་ཉིད་དུ་བདག་ལ་འཕོས་གྱུར་ན། །
ཆོས་རྗེ་བླ་མ་ལྟ་བུར་བྱིན་གྱིས་རློབས། །
བདག་ནི་སྐྱེ་ཞིང་སྐྱེ་བ་ཐམས་ཅད་དུ། །
མཚུངས་མེད་མགོན་པོ་ཁྱོད་ཀྱི་ཞབས་དྲུང་དུ། །
སྐྱེ་ཞིང་ཐེག་མཆོག་ཟབ་མོའི་ཆོས་ལ་ཡང་། །
འབྲལ་བ་མེད་པར་ཆོས་ལ་སྤྱོད་པར་ཤོག །
བདག་ནི་འདི་ནས་འཆི་བར་གྱུར་མ་ཐག །
མགོན་པོ་ཁྱོད་ནི་ཞིང་ཁམས་རྣམ་དག་ཏུ། །
བཞུགས་པའི་ཞིང་དེར་བདག་ཀྱང་སྐྱེ་བ་དང་། །
གསུང་གི་བདུད་རྩི་རྟག་ཏུ་སྤྱོད་པར་ཤོག །
ཚེ་འདིའི་སྣང་བ་ནུབ་པར་གྱུར་མ་ཐག །
ལས་ཀྱི་དབང་གིས་ངན་འགྲོ་མྱོང་གྱུར་ན། །
དམ་པ་ཁྱོད་ཀྱིས་ཐུགས་རྗེའི་ལྕགས་ཀྱུ་ཡིས། །
བདེ་ཆེན་ཐར་པའི་གནས་སུ་དྲང་དུ་གསོལ། །
བླ་མ་དཀོན་མཆོག་ཕྱག་འོས་ཐམས་ཅད་ལ། །
ཕྱག་འཚལ་མཆོད་ཅིང་བསྟོད་དེ་སྐྱབས་སུ་མཆི། །
སྡིག་པ་བགྱིས་རྣམས་འགྱོད་པས་སོ་སོར་བཤགས། །
དགེ་བ་ཀུན་ལ་དགའ་བས་རྗེས་ཡི་རང་། །
ཆོས་རྗེ་རྣམས་ཀྱིས་ཆོས་འཁོར་བསྐོར་དུ་གསོལ། །
མྱ་ངན་མི་འདའ་ཡུན་རིང་བཞུགས་གསོལ་འདེབས། །
ཆོས་རྗེ་བླ་མའི་སྤྱན་སྔར་སེམས་བསྐྱེད་བགྱི། །
དགེ་བ་གང་བསགས་བྱང་ཆུབ་ཆེན་པོར་བསྔོ། །
དགེ་བ་འདི་ཡིས་ཚེ་རབས་ཐམས་ཅད་དུ། །
སྡུག་བསྔལ་ཀུན་འབྱུང་མ་ལུས་རབ་སྐེམས་ཤིང་། །
འགྲོ་ཀུན་སྲིད་པའི་རྒྱ་མཚོ་ལས་བསྒྲལ་ཏེ། །
ཀུན་མཁྱེན་རྒྱལ་བའི་སྐུ་གཉིས་མྱུར་ཐོབ་ཤོག །
ཇོ་ནང་དཔལ་གྱི་རི་ཁྲོད་དུ། ཀུན་མཁྱེན་ཆོས་ཀྱི་རྗེའི་ཞབས་རྡུལ་སྤྱི་བོར་བླངས་ནས་གཞན་གྱིས་ཀྱང་བསྐུལ་བའི་ངོར་དགེ་སློང་ལོ་ཙྪ་བས་སྦྱར་བའོ། །མངྒ་ལཾ། །
༄༅། །ཆོས་རྗེ་ཀུན་མཁྱེན་དོལ་པོ་པའི་བསྟོད་པ་ཇོ་ནང་ལོ་ཙྪ་བས་མཛད་པ་བཞུགས་སོ། །
༄༅། །ༀ་སྭཱ་སྟི། དཔལ་ལྡན་བླ་མ་དམ་པ་རྣམས་དང་། །
དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །
གང་གི་མཁྱེན་བརྩེ་ངོ་མཚར་རྨད་བྱུང་གིས། །
གཞི་ལམ་འབྲས་བུའི་གནས་ལུགས་ཐུགས་ཆུད་དེ། །
ཇི་བཞིན་གསལ་བར་འགྲོ་ལ་སྟོན་མཛད་པའི། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱང་གཞི་བདེ་གཤེགས་སྙིང་པོ་ཆོས་ཀྱི་དབྱིངས། །
འོད་གསལ་འདུས་མ་བྱས་ཤིང་རྟག་པའི་སྐུ། །
ལུས་ཅན་ཀུན་ལ་བཞུགས་པའི་དོན་དམ་དུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱང་བྱ་གློ་བུར་དྲི་མ་ཤུན་པའི་ཚོགས། །
ཐོག་མེད་ལས་དང་ཉོན་མོངས་ལས་ལས་བྱུང་། །
འཁྲུལ་སྣང་རྟེན་འབྲེལ་ཀུན་རྫོབ་ཟག་བཅས་སུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱོང་བྱེད་ཟབ་ལམ་མི་རྟོག་ཏིང་འཛིན་གྱིས། །
སྤང་བྱ་གློ་བུར་དྲི་མ་ལེགས་སྦྱངས་ནས། །
ཐོབ་བྱ་དོན་དམ་འོད་གསལ་སྟོན་པའི་ཐབས། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
སྦྱངས་འབྲས་ཆོས་སྐུ་བསྐྱེད་པ་མ་ཡིན་པར། །
གདོད་ནས་ལྷུན་གྲུབ་ཡོན་ཏན་ཚད་མེད་པ། །
རྟག་མིན་ཆད་མིན་ཡོད་པའི་དོན་དམ་དུ། །
ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །
དེ་འདྲའི་དཔལ་ལྡན་བླ་མ་ཆོས་ཀྱི་རྗེ། །
དྲང་དང་ངེས་དོན་རྣམ་དབྱེ་འབྱེད་མཁས་པས། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
ཀུན་གཟིགས་བདེན་པ་གསུང་བ་ཆོས་ཀྱི་རྗེ། །
ཤིན་ཏུ་གཅེས་པའི་གསུང་གི་མཛོད་འཛིན་པས། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
བརྩེ་ལྡན་བཀའ་དྲིན་མྱུར་བ་ཆོས་ཀྱི་རྗེ། །
དུས་གསུམ་རྒྱལ་བ་ཀུན་དང་དབྱེར་མེད་པས། །
བདག་དང་མཁའ་མཉམ་འགྲོ་བ་མང་པོའི་དོན། །
ལྷུན་གྲུབ་རྒྱུན་མི་འཆད་པར་མཛད་དུ་གསོལ། །
སྐྱེ་དང་སྐྱེ་བར་ཐེག་ཆེན་ཆོས་སྤྱོད་ཅིང་། །
རྒྱལ་དང་རྒྱལ་བའི་སྲས་ཀྱིས་རྗེས་བཟུང་ནས། །
བདག་དང་བདག་འདྲའི་འགྲོ་བ་མཐའ་དག་ལ། །
ཀུན་ནས་ཀུན་ཏུ་ཕན་པ་འགྲུབ་གྱུར་ཅིག །
ཅེས་པ་གསོལ་བ་འདེབས་པ་འདི་ཡང་དག་པའི་ཡོངསཀྱི་དགེ་བའི་བཤེས་གཉེན་དོན་ཞབས་པས་སངས་རྒྱས་རིན་ཆེན་གྱིས་བསྐུལ་བའི་ངོར། །ལོ་ཙྪཱ་བས་ཇོ་ནང་དཔལ་གྱི་རི་ཁྲོད་དུ་བཀོད་པའོ།། །།མངྒ་ལཾ།། །།
༄༅། །ཆོས་རྗེ་ཐམས་ཅད་མཁྱེན་པའི་བསྟོད་པ་ཉིད་ཀྱི་རྒྱུད་སྡེ་དང་ལག་ལེན་གྱི་བཀའ་བབས་ས་བཟང་མ་ཏི་པཎྜི་ཏས་མཛད་པ་བཞུགས་སོ། །
༄༅། །ༀ་ན་མཿ གུ་རུ་ཝེ་ཤྲཱི་ཀཱ་ལ་ཙཀྲ་ཡ།
བླ་མའི་རྣལ་འབྱོར་གྱི་དོན་དྲན་པའི་སྒོ་ནས། དུས་གསུམ་སངས་རྒྱས་ཐམས་ཅད་ཀྱི་ངོ་བོ། དཔལ་ལྡན་བླ་མ་དམ་པ་ཆོས་ཀྱི་རྗེ་ཀུན་མཁྱེན་ཆེན་པོ་ལ་བསྟོད་ཅིང་ཕྱག་འཚལ་བ་དང་གསོལ་བ་གདབ་པར་བྱ་སྟེ། དེ་ཡང་དངོས་སུ་རྩ་བའི་བླ་མ་ལ་བསྟོད་པའི་ཤུགས་ལས་བརྒྱུད་པའི་བླ་མ་རྣམས་ཀྱང་དྲན་པ། ཚིག་བཟུང་སླ་ཞིང་མཚན་ཡང་ཡང་སྨོས་པ་དང་། དད་པ་སྐྱེད་པར་བྱེད་པའི་འདི་དག་གིས་སོ། །དེ་ལ་ཚིགས་བཅད་དང་པོ་ནི་ཆོས་རྗེ་ཡབ་སྲས་བཞི། མཚན་སྤེལ་དང་སྦྱར་བ་ཡིན་ལ། དེ་ལས་ཕལ་ཆེ་བའི་རྐང་པ་ཕྱི་མ་གཉིས་ནི་མཚུངས་པ་སྦྱོར་ཞིང་། འགའ་ཞིག་ཕྱི་མ་ཁོ་ན་སྦྱར་པས་ཀྱང་ཕྱག་འཚལ་ཏེ་མཆོད་པ་ལ་སོགས་པའི་ཡན་ལག་བདུན་པ་དང་ཁ་དོན་དུ་ཡང་བྱའོ། །གསོལ་འདེབས་ཀྱི་སྐབས་སུ་ནི། །ཕྱག་འཚལ་ཐམས་ཅད་ཀྱི་མཐར་གསོལ་བ་འདེབས་སོ་བྱིན་གྱིས་བརླབ་ཏུ་གསོལ། ཞེས་པ་འམ། བརྩེ་བ་ཆེན་པོས་རྗེས་སུ་བཟུང་དུ་གསོལ། ཞེས་པ་དང་། དཔལ་ལྡན་རྩ་བའི་བླ་མ་རིན་པོ་ཆེ། །ཞེས་པ་ལ་སོགས་པའམ། ནམ་མཁའི་མཐའ་དང་མཉམ་པའི་སེམས་ཅན་རྣམས། །ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །གནས་སྐབས་ཆོས་སྤྱོད་སྒྲུབ་པ་འཕེལ་བ་དང་། །མཐར་ཐུག་སངས་རྒྱས་ཐོབ་པར་བྱིན་གྱིས་བརླབ་ཏུ་གསོལ། །ཞེས་པ་ལ་སོགས་པ་སྦྱར་ཏེ་གསོལ་བ་ཡུན་རིང་དུ་གདབ་པར་བྱའོ། །
ཡོད་མེད་ལ་སོགས་མཐའ་གཉིས་ཀུན་སྤངས་ཏེ། །
རང་བས་གཞན་གཅེས་བྱང་སེམས་མཐར་ཕྱིན་ནས། །
ཡོན་ཏན་རྒྱ་མཚོ་འགྲོ་ཀུན་སྨིན་མཛད་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
དང་པོའི་སངས་རྒྱས་འོད་གསལ་ཆོས་སྐུ་དང་། །
བདེ་ཆེན་ངོ་བོ་ཉིད་སྐུ་ཟུང་འཇུག་ཏུ། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ལོངས་སྤྱོད་རྫོགས་སྐུ་དུས་ཀྱི་འཁོར་ལོ་དང་། །
སྤྲུལ་སྐུ་ཤཱཀྱ་ཐུབ་པའི་གསུང་རབ་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཟླ་བཟང་འཇམ་དབྱངས་གྲགས་པ་པད་དཀར་སོགས། །
ཆོས་རྒྱལ་རིགས་ལྡན་རྣམས་ཀྱི་གསུངས་པ་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
དུས་ཞབས་ཆེན་པོའི་སྙན་རྒྱུད་མན་ངག་དང་། །
གཉིས་པ་ན་ལེན་དྲྭ་པ་གསང་རྒྱུད་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
པཎ་ཆེན་ཟླ་བ་བཟང་པོའི་འགྲེལ་བཤད་དང་། །
འབྲོ་སྟོན་ལོ་ཙྪས་བསྒྱུར་བའི་གསུང་རབ་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ལྷ་རྗེ་སྒོམ་པའི་མན་ངག་ཟབ་མོ་དང་། །
སྒྲོ་སྟོན་གནམ་ལ་བརྩེགས་ཀྱི་གསུང་སྒྲོས་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
གྲུབ་ཐོབ་ཡུ་མོ་གསལ་སྒྲོན་རྣམ་བཞི་དང་། །
དྷརྨ་ཤྭ་ར་སྤྲུལ་སྐུའི་མན་ངག་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
མཁས་པ་ནམ་མཁའ་འོད་ཀྱི་ལེགས་བཤད་དང་། །
གྲུབ་ཐོབ་སེ་མོ་ཆེ་ཡི་རྣམ་ཐར་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཆོས་རྗེ་འཇམ་དབྱངས་གསར་མའི་ལེགས་བཤད་དང་། །
ཀུན་མཁྱེན་ཆོས་སྐུ་འོད་ཟེར་མན་ངག་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་རྗེ་ལ་ཕྱག་འཚལ་ལོ། །
ཀུན་སྤངས་ཆོས་རྗེ་བྱང་སེམས་ཆེན་པོ་དང་། །
མཁས་བཙུན་ཡོན་ཏན་རྒྱ་མཚོའི་གསུང་རྒྱུན་རྣམས། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ལུང་རིགས་དབང་ཕྱུག་སྒྲ་བསྒྱུར་དབང་པོ་དང་། །
མཁན་ཆེན་ཕྱོགས་རྒྱལ་མཁས་བཙུན་དཀོན་རྒྱལ་རྣམས། །
ཉིད་ཀྱི་རྒྱལ་ཚབ་དམ་པར་དབང་བསྐུར་བ། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
གཞི་ཡི་མཐར་ཐུག་དོན་དམ་ཆོས་ཀྱི་དབྱིངས། །
བདེ་གཤེགས་སྙིང་པོ་མཁའ་ལྟར་ཀུན་ཁྱབ་པ། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ལམ་གྱི་མཐར་ཐུག་ལམ་བཟང་རྡོ་རྗེ་ཡི། །
རྣལ་འབྱོར་ཡན་ལག་དྲུག་དང་ལྡན་པའི་མཆོག །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
འབྲས་བུའི་མཐར་ཐུག་དྲི་བྲལ་ཆོས་ཀྱི་སྐུ། །
མངོན་དུ་གྱུར་པས་སྤངས་རྟོགས་མཐར་ཕྱིན་པ། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཐེག་པའི་མཐར་ཐུག་ཐེག་པ་ཆེན་པོ་དང་། །
གྲུབ་མཐའི་མཐར་ཐུག་དབུ་མ་ཆེན་པོའི་དོན། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
གསུང་རབ་མཐར་ཐུག་འཁོར་ལོ་གསུམ་པ་དང་། །
གསང་སྔགས་མཐར་ཐུག་རྣལ་འབྱོར་བླ་མེད་དོན། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
སྟོང་ཉིད་མཐར་ཐུག་དམིགས་བཅས་གཞན་སྟོང་དང་། །
སྙིང་རྗེའི་མཐར་ཐུག་དམིགས་མེད་བདེ་བ་ཆེ། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཐབས་ཀྱི་མཐར་ཐུག་འགྱུར་མེད་བདེ་ཆེན་དང་། །
ཤེས་རབ་མཐར་ཐུག་འོད་གསལ་སྟོང་པ་ཉིད། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཕྱག་རྒྱའི་མཐར་ཐུག་ཕྱག་རྒྱ་ཆེན་མོ་དང་། །
བཟླས་པའི་མཐར་ཐུག་རྡོ་རྗེའི་བཟླས་པའི་དོན། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ལུང་གི་མཐར་ཐུག་ངེས་དོན་ཟབ་མོ་དང་། །
རིག་པའི་མཐར་ཐུག་ཆོས་ཉིད་རིག་པའི་དོན། །
སྐལ་ལྡན་གདུལ་བྱའི་ཚོགས་ལ་ལེགས་སྟོན་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
དོན་དམ་ཆོས་སྐུ་ངང་ལས་མ་གཡོས་བཞིན། །
ཀུན་རྫོབ་གཟུགས་སྐུའི་རྣམ་འཕྲུལ་མཐའ་ཡས་པས། །
དཔག་ཡས་གདུལ་བྱའི་ཚོགས་ཀུན་སྨིན་པ་ཡི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
ཁྱད་པར་མངའ་རིས་བོད་ཀྱི་གདུལ་བྱ་ལ། །
ངེས་དོན་ཟབ་མོའི་ཆོས་འཁོར་རབ་བསྐོར་ནས། །
ཡང་དག་ལྟ་བའི་སྣང་བ་རྒྱས་མཛད་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
རླབས་ཆེན་དགེ་བའི་བྱ་བ་མཐར་ཕྱིན་ཞིང་། །
འགྲོ་དོན་མཐར་ཕྱིན་སྐུ་ཚེ་མཐར་ཕྱིན་པས། །
བདེ་བར་བདེ་བ་ཅན་དུ་གཤེགས་གྱུར་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
བདེ་བ་ཆེན་པོའི་ངང་ལས་མ་གཡོས་བཞིན། །
སྡུག་བསྔལ་སྣ་ཚོགས་ཀྱིས་གདུངས་འགྲོ་བ་རྣམས། །
རྣམ་དག་ལེགས་པའི་ལམ་ལ་དགོད་མཛད་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
མི་འགྱུར་ཡེ་ཤེས་དབྱིངས་ལས་མ་གཡོས་བཞིན། །
མི་ཤེས་མུན་པས་བསྒྲིབས་པའི་འགྲོ་བ་རྣམས། །
ལེགས་བཤད་སྣང་བའི་རྒྱུན་གྱིས་སྐྱོང་མཛད་པའི། །
ཀུན་མཁྱེན་ཆོས་ཀྱི་རྗེ་ལ་ཕྱག་འཚལ་ལོ། །
རབ་འབྱམས་ཞིང་གི་མཆོད་རྫས་ཅི་མཆིས་རྣམས། །
མཆོད་གནས་བླ་མ་མཆོག་ལ་གུས་པས་འབུལ། །
སྡིག་སྒྲིབ་ཉེས་ལྟུང་མ་ལུས་སོ་སོར་བཤགས། །
རྣམ་དག་དགེ་བ་ཀུན་ལ་རྗེས་ཡི་རང་། །
མཁའ་མཉམ་སེམས་ཅན་འཁོར་བའི་རྒྱ་མཚོ་ལས། །
བསྒྲལ་སླད་ཆོས་ཀྱི་འཁོར་ལོ་བསྐོར་བར་བསྐུལ། །
ཡོངས་དག་ཞིང་དུ་སྐལ་ལྡན་གདུལ་བྱའི་དོན། །
སླན་ཆད་མྱ་ངན་མི་འདའ་བཞུགས་སུ་གསོལ། །
སངས་རྒྱས་ཀུན་དངོས་དཔལ་ལྡན་བླ་མ་ལ། །
རྟག་ཏུ་གུས་པའི་ཡིད་ཀྱིས་སྐྱབས་སུ་མཆི། །
རྫོགས་པའི་བྱང་ཆུབ་ཆེན་པོར་སེམས་བསྐྱེད་ཅིང་། །
བྱང་ཆུབ་སྤྱོད་པའང་རྗེས་སུ་གནས་པར་བགྱི། །
དགེ་བ་འདི་ཡིས་མཁའ་མཉམ་འགྲོ་བ་ཀུན། །
རྣམ་རྟོག་མ་རིག་མུན་པ་ལས་གྲོལ་ཏེ། །
མི་རྟོག་ཡེ་ཤེས་སྣང་བ་རབ་རྒྱས་ནས། །
ཀུན་མཁྱེན་རྒྱལ་བའི་གོ་འཕང་མྱུར་ཐོབ་ཤོག །
ཚེ་འདིར་འགལ་རྐྱེན་བར་ཆད་ཉེར་ཞི་ཞིང་། །
མཐུན་རྐྱེན་བསམ་པ་ཆོས་བཞིན་འགྲུབ་པ་དང་། །
མཉམ་བཞག་ཏིང་འཛིན་ཟབ་མོ་འཕེལ་བ་དང་། །
རྗེས་ཐོབ་གཞན་ཕན་རྒྱ་ཆེར་འགྲུབ་གྱུར་ཅིག །
ཕྱི་མར་བདེ་བ་ཅན་དུ་སྐྱེ་བ་དང་། །
སྐྱེས་མ་ཐག་ཏུ་ཆོས་རྗེ་དང་མཇལ་ཞིང་། །
མཇལ་མ་ཐག་ཏུ་ས་བཅུ་ཡོངས་རྫོགས་ནས། །
རྫོགས་པའི་སངས་རྒྱས་མྱུར་དུ་ཐོབ་གྱུར་ཅིག །
ཅེས་པ་འདི་ནི་ཆོས་རྗེ་བ་བདེ་བར་གཤེགས་པའི་དུས་སུ། མཁན་པོ་རྒྱལ་འབུམ་པས་བསྐུལ་ནས། པཎྜི་ཏ་མ་ཏིས་བསྡེབས་པ་ལས། སླར་ཡང་ཕྱག་མཆོད་ཀྱི་དོན་དུ་ཡན་ལག་བདུན་པའང་ཚང་བར་བྱས་པ་ལགས་པས། དད་པ་ཅན་རྣམས་ཀྱིས་བཟུང་ནས། ཁ་དོན་དང་ཕྱག་མཆོད་པ་དང་གསོལ་འདེབས་ལ་བརྩོན་པར་ཞུ། བསྡུས་པ་ལ་མོས་པ་ལ་ཚིགས་བཅད་དང་པོ་དང་གཞི་ལམ་འབྲས་གསུམ་མན་ཆད་འདོན་པས་ཀྱང་རུང་བས། རྒྱས་བསྡུས་སྐབས་དང་སྦྱར་ཏེ་བྱའོ། །
འདི་བཞིན་བསྒྲུབ་པའི་དད་ལྡན་རྣམས། །
ལྷ་བཞིན་ཕུན་ཚོགས་དང་ལྡན་ཞིང་། །
ཆོས་བཞིན་བསམ་པ་འགྲུབ་གྱུར་ནས། །
དེ་བཞིན་གཤེགས་པ་ཉིད་གྱུར་ཅིག །
མངྒ་ལཾ།
༄༅། །ཆོས་རྗེ་ཐམས་ཅད་མཁྱེན་པའི་བསྟོད་པ་ཆོས་རྗེ་ཕྱོགས་ལས་རྣམ་རྒྱལ་གྱིས་མཛད་པ་བཞུགས་སོ། །
༄༅། །ན་མོ་གུ་རུ་ཝེ། ན་མ་ཤྲཱི་ཀཱ་ལ་ཙཀྲ་ཡ། དཔལ་ལྡན་བླ་མ་དམ་པ་རིགས་ལྡན་རྒྱལ་བ་རྣམས་ཀྱི་སྤྲུལ་པའི་སྐུ་ཆོས་ཀྱི་རྗེ་ཀུན་མཁྱེན་ཆེན་པོ་ལ་བསྟོད་པ་མཁས་པའི་འཇུག་ངོགས་ཞེས་བྱ་བ།
རྣམ་པ་ཀུན་བྲལ་ཀུན་འགྲོའི་ཡེ་ཤེས་ཟླ་བའི་འོད་ཅན་དགའ་བའི་གཟུགས་ཀྱི་རྣམ་གྲོལ་བ། །
རྣམ་པ་ཀུན་གཟིགས་གདོད་ནས་རྣམ་དག་བཅོམ་ལྡན་སྐྱེ་དགུའི་སྒྲོན་གཅིག་མཐའ་ཡས་འགྲོ་བའི་མིག །
རྣམ་པ་ཀུན་ཏུ་མི་བསླུའི་སྐྱབས་གཅིག་དུས་གསུམ་དུས་མེད་དུས་ཀྱི་འཁོར་ལོས་བདག་ལ་སྐྱོངས། །
ཐུགས་མཆོག་རིགས་ལྡན་གཙུག་གི་རྒྱན་གྱུར་ཀུན་ནས་དགའ་བའི་གཙུག་གི་ནོར་བུས་མཆོད་འོས་པ། །
དཔལ་ལྡན་བླ་མ་མཛད་པ་རྨད་བྱུང་རྒྱལ་བ་ཀུན་གྱི་མཛད་པ་བསྒྲུབ་མཛད་དེ་ལ་འདུད། །
གང་ཞིག་རྒྱལ་བའི་སྲས་ཀྱི་ཐུ་བོ་སྐྱོབ་པ་རྣམས་ཀྱི་ལྷག་པའི་ལྷ། །
ལྷ་ཆེན་གཙུག་རྒྱན་ཟླ་བའི་དཔལ་འཛིན་མདའ་ལྔ་ལྡན་པའི་ཡིད་རབ་གདུངས། །
གདུང་བ་ཀུན་འཇོམས་གསུང་གི་བདུད་རྩི་རྣ་བའི་དབང་པོའི་དཔལ་གཏེར་བ། །
དཔལ་ལྡན་སྨྲ་མཁས་ཚིག་གི་རྗེ་ཡིས་བདག་ལ་ཡུན་དུ་གསལ་བར་མཛད། །
དམིགས་མེད་སྙིང་རྗེ་མི་འགྱུར་བདེ་བའི་རིན་ཆེན་མཆོག་གིས་རབ་གང་བ། །
ཀུན་ནས་རབ་དང་སྲིད་པའི་མཚོ་གཞན་གཏིང་མཐའ་དབེན་ཞིང་ཞི་བའི་དབུས། །
གང་གིས་རབ་བརྙེས་རྣམ་ལྔའི་ཡེ་ཤེས་གདེངས་ཀའི་དཔལ་རབ་མངོན་གསལ་བ། །
སྐྱེས་མཆོག་ཀླུ་དབང་བླ་མ་མཆོག་དེའི་བསྔགས་པ་ཆ་ཙམ་འདིར་བརྗོད་ཀྱི། །
དཔལ་ལྡན་འཆི་མེད་བདུད་རྩིའི་སྣོད་ཡངས་ཡོན་ཏན་དུ་མའི་གཏེར་གྱུར་བ། །
འཇིག་རྟེན་མཚམས་ལས་ཤིན་ཏུ་འདས་ཀྱང་ཀུན་གྱི་བལྟར་འོས་ཁྱོད་ཀྱི་སྐུ། །
རྒྱུ་དང་རྐྱེན་བྲལ་ནམ་མཁའ་ལས་བྱུང་ནམ་མཁའི་རང་བཞིན་མི་འདོར་ལ། །
ཚོགས་གཉིས་རྒྱུན་ཅན་བརྡ་ཡི་སྐུར་ཡང་འགྲོ་ལ་སྟོན་མཛད་ངོ་མཚར་ཆེ། །
དཔེ་བྱད་མཛེས་པའི་མེ་ཏོག་མདངས་བཀྲ་མཚན་བཟང་ཡལ་གའི་ཁྱོན་ཡངས་ཤིང་། །
རྣམ་དག་ཚུལ་ཁྲིམས་ཕུང་པོ་དྲི་ལྡན་ཡོངས་འདུའི་དཔལ་ཡང་རྣམ་གནོན་པ། །
གང་སྐུ་ལུས་ཅན་ཀུན་གྱི་ཡིད་འཕྲོག་ཕན་དང་བདེ་བའི་འབྲས་སྟེར་ཏེ། །
ལམ་རིང་ཀྱིས་དུབ་འགྲོ་བའི་དཔལ་དུ་ཡུན་རིང་བསྐལ་བར་བརྟན་གྱུར་ཅིག །
ཟབ་ཡངས་མཁྱེན་བརྩེའི་ཆུ་གཏེར་ལས་འོངས་ཆོས་སྤྲིན་རྒྱ་མཚོའི་སྒྲ་དབྱངས་ཀྱིས། །
འགྲོ་རྣམས་མ་རིག་གཉིད་ལས་སློངས་མཛད་འགྲོ་བའི་ཡབ་གཅིག་ཉིད་ཀྱིས་གསུངས། །
མིང་ཚིག་རྣམ་བྲལ་གཞོམ་དུ་མེད་པ་ནཱ་དའི་རང་བཞིན་མི་འདོར་ལ། །
སྣ་ཚོགས་ཁམས་ཅན་མོས་པའི་སྣོད་བཞིན་གཞན་ལ་རྣམ་པར་རིག་བྱེད་ལགས། །
གང་གིས་དབྱངས་སྙན་རྣ་བའི་བདུད་རྩི་དྲི་ཟའི་དབང་པོའི་གླུ་དབྱངས་དང་། །
བློ་ལྡན་རྣམས་ཀྱི་ཡིད་གཉིས་མུན་སེལ་རྟ་བདུན་དབང་པོའི་འོད་ཟེར་གྱིས། །
སྐྱེ་དགུའི་ཡིད་རབ་ཚིམ་པར་མཛད་ཕྱིར་རྒྱུ་སྐར་དབང་པོ་རྗེས་འགྲོ་དེས། །
འཇིག་རྟེན་མུན་པའི་ལམ་དུ་ཞུགས་རྣམས་ངན་འགྲོའི་གཡང་ལས་བསྲུང་བར་མཛོད། །
ཚུལ་ཁྲིམས་ཏིང་འཛིན་རྣམ་གྲོལ་ཤེས་རབ་འཕགས་པའི་འབྱོར་པ་ཕུན་ཚོགས་ཀུན། །
ཟབ་ཡངས་ཡོན་ཏན་དུ་མའི་གཏེར་མཛོད་ཁྱོད་ཀྱི་ཐུགས་ལས་བསྡུས་པ་ཡིས། །
སྐྱེ་དགུ་འདི་རྣམས་དབུལ་བར་དགོངས་ནས་ཉིད་ཀྱི་ལེགས་བྱས་ཕུང་པོ་ཡང་། །
འགྲོ་ལ་སྩོལ་ཞིང་བུ་ལྟར་བརྩེ་བའི་ཐུགས་རྗེ་མངའ་བ་ཅི་སླད་མེད། །
འོན་ཏེ་རྗེར་གྱུར་ཡབ་གཅིག་ཉིད་ཀྱི་དགེ་ཚོགས་འབྱོར་པ་དཔག་ཡས་རྣམས། །
སྔོན་དུས་ཉིད་དུ་ལྷུག་པར་བསྩལ་ཡང་ད་དུང་ཕོངས་ལས་ཐར་མེད་པ། །
ཀྱེ་མ་མི་བཟད་ལས་ལ་སྤྱོད་གྱུར་ཤིན་ཏུ་སྐལ་དམན་འཇིག་རྟེན་འདི། །
སྣ་ཚོགས་ཐབས་ཚུལ་འདོད་དགུའི་དཔལ་གྱིས་རྒུད་པ་ཀུན་ལས་རབ་བསྲུངས་ཤིང་། །
ཁྱོད་ཞབས་ཆུ་སྐྱེས་སྡོང་བུ་ལ་བརྟེན་ཡོན་ཏན་བསྔགས་པའི་འདབ་འཕྲེང་ཡང་། །
དཔེ་རྣམས་ཀུན་གྱིས་མཚོན་བྱ་མིན་ན་མ་ལུས་ཡོན་ཏན་ཇི་འདྲར་འགྱུར། །
དེ་ལྟ་བུ་ཉིད་སེམས་དཔའི་དབང་གིས་བདག་གི་བློ་གྲོས་ལ་གྱུར་ན། །
དཔག་ཡས་ཡོན་ཏན་བསྟན་པའི་འཕྲེང་བ་མངོན་པར་བརྗོད་ལའང་བརྩོན་པ་ཅི། །
སླར་ཡང་འདི་ལྟར་ནམ་མཁའི་དབྱིངས་ལྟར་ཆོས་ཀྱི་རང་བཞིན་མཐའ་ཡས་ཤིང་། །
ཐུབ་པ་རྣམས་ཀྱི་མ་འདྲེས་ཡོན་ཏན་ཆོས་ཀྱི་དབྱིངས་ལྟར་མཐའ་ཡས་པ། །
རྒྱལ་བའི་ཡོན་ཏན་བགྲང་ཡས་ཉིད་བཞིན་རྒྱལ་སྲས་མཆོག་གི་འང་ཡོན་ཏན་རྣམས། །
གཞན་དུ་མེད་ཅེས་གང་གི་ཡོན་ཏན་ཆ་ཙམ་བརྗོད་པའང་མངོན་ཕྱོགས་འགྱུར། །
རང་བཞིན་འོད་གསལ་རྒྱལ་བའི་སྙིང་པོ་རྒྱལ་བ་ཀུན་གྱི་ཡེ་ཤེས་སྐུ། །
དཔལ་གྱི་འབྱུང་གནས་གྲགས་པའི་དཔལ་དེ་འཛིན་མའི་གཞི་དེར་དཔེར་བྱའི་སླད། །
རྣམ་དག་འཕྲིན་ལས་འོད་ཟེར་སྟོང་གི་ཆོས་ཀྱི་ཉིན་མོར་བྱེད་པའི་མགོན། །
འཇིག་རྟེན་པད་མོའི་གཉེན་གཅིག་ཁྱོད་ནི་ཐུབ་མཆོག་རྣམས་ཀྱིས་བསྟན་པར་ངེས། །
དེ་ཚེ་ལུས་ཅན་སྙིང་གི་ཕུག་ཞུགས་མི་ཤེས་མུན་པའི་དྲྭ་བ་རྣམས། །
འཆར་ནུས་རྣམ་བྲལ་སྔོན་མེད་ནམ་མཁའི་ནོར་བུ་འདི་ཡིས་གསལ་ལོ་ཞེས། །
རྣམ་པར་དགོངས་ཏེ་གསུང་གི་དབང་ཕྱུག་ཡེ་ཤེས་སྒྲོན་མེ་གསལ་བའི་སྐུ། །
ཞི་བའི་དབྱིངས་སུ་མཆོག་བདེའི་དཔལ་ལ་སྙོམས་པར་ཞུགས་པས་གཡོ་མེད་བཞིན། །
སྡུག་བསྔལ་རླབས་འཁྲུགས་སྲིད་པའི་ཆུ་གཏེར་འཇིགས་རུང་འདི་ལས་འགྲོ་བ་རྣམས། །
འཕྲིན་ལས་གྲུ་འཛིན་ཐུགས་རྗེའི་སྐུ་ཅན་དེད་དཔོན་ཁྱོད་ཀྱིས་གྲོལ་གྱུར་པས། །
ཐུགས་རྗེས་རློན་པའི་པད་དཀར་ཅན་ཡང་དཔལ་ལྡན་གྲུ་འཛིན་ཉམས་དགའི་རྩེར། །
མཛད་པའི་ཁུར་ཆེན་བཏང་སྙོམས་མཛད་ནས་ཐུགས་ལ་ཆུང་ངུར་གཞོལ་བ་སྙམ། །
ཐུན་མོང་པ་དང་ཕུལ་དུ་བྱུང་བའི་དངོས་གྲུབ་ཀུན་གྱི་རིན་ཆེན་གཏེར། །
སྐྱོབ་པ་ཀུན་གྱིས་གསང་བའི་མཚོ་ཆེན་ཉིད་ཀྱི་ཐུགས་ལས་བསྡུས་པ་ཡིས། །
མཐུ་སྟོབས་དབང་ཕྱུག་གསང་བའི་བདག་པོ་དཔལ་ལྡན་རྡོ་རྗེ་འཛིན་པ་ནི། །
མཛད་པ་མཐའ་ཡས་མཉམ་དུ་བསྒྲུབ་ཕྱིར་ཁྱེད་ལ་ནན་གྱིས་ཞུགས་པ་འདྲ། །
གང་ཞིག་མཐའ་ཡས་སྲིད་པ་རྒྱ་མཚོའི་ཕྱི་མཐར་ཐུག་གི་བར་དུ་ཡང་། །
སེམས་ཅན་དོན་ཕྱིར་སྤྱད་པ་སྤྱོད་ཅིང་སངས་རྒྱས་བདེ་ལའང་ཆགས་མི་མཛད། །
དེ་ལྟའི་དགོངས་སྤྱོད་ཤིན་ཏུ་དཔེ་མེད་ཕུལ་བྱུང་བློ་ལས་འདས་པའི་དོན། །
བཀའ་དྲིན་འོད་ཀྱིས་འགྲོ་ལ་གསལ་མཛད་ཁྱོད་ནི་སྙིགས་དུས་མཚན་མོའི་མགོན། །
དེང་འདིར་ཁྱེད་ཀྱིས་ཆོས་ཀྱི་འཁོར་ལོ་རྣམ་པ་སྟོང་དུ་བསྐོར་བ་ཡིས། །
འཁོར་ལོ་ཅན་བཞིན་བདུད་སྡེའི་དཔུང་དང་ལྷན་ཅིག་ཀླ་ཀློའི་ཆོས་མཐར་མཛད། །
ཐུགས་རྗེའི་སྤྲིན་ལས་བདུད་རྩིའི་ཆབ་ཆུན་རྣམ་པ་སྟོང་དུ་ཕབ་པ་ཡིས། །
ཞིང་འདི་ཡང་ནི་རྫོགས་ལྡན་དུས་བཞིན་ཕན་བདེའི་ལོ་འབྲས་ལྡན་པར་མཛད། །
དེ་ཚེ་ལྷ་མིན་དོགས་པ་མེད་ཅེས་ལྷ་རྣམས་དགའ་བའི་ཚུལ་ཞུགས་ནས། །
སིལ་སྙན་མང་ལྡན་འཆི་མེད་བུ་མོ་སྙན་པའི་གླུ་དབྱངས་ལེན་བྱེད་ཅིང་། །
ཐུགས་རྗེ་ལྡན་འདིས་འབད་པ་མེད་པར་བདག་ཅག་འཆི་ལས་དཀྲོལ་འགྱུར་ཞེས། །
སྐྱེ་དགུ་འདི་རྣམས་སྲིད་པའི་བཙོན་རར་འཇིགས་མེད་དགའ་མགུར་སྤྱོད་པ་རྣམས། །
མདོར་ན་དཔལ་ལྡན་ཁྱོད་ཀྱི་མཁྱེན་རབ་རྒྱལ་བ་ཀུན་གྱི་ཡེ་ཤེས་ཏེ། །
སྐྱོབ་པ་རྣམས་ཀྱིས་ཚད་མེད་ཐུགས་རྗེའང་མགོན་པོ་ཁྱོད་ཀྱིས་བརྩེ་བ་ཉིད། །
དེ་སླད་ཁྱོད་དང་རྒྱལ་བ་རྒྱ་མཚོའི་འཕྲིན་ལས་གཉིས་སུ་མ་མཆིས་པས། །
གཅིག་ཉིད་ཡིན་ཡང་དུ་མའི་སྐུ་ཅན་དཔེ་མེད་ཁྱོད་ལ་སྐྱབས་སུ་མཆིའོ། །
རྒྱུ་དང་རྐྱེན་བྲལ་གང་གི་མཆོག་བདེ་ལྷན་ཅིག་སྐྱེས་སྐུ་རྡོ་རྗེ་འཛིན། །
གདོད་ནས་ཡོངས་དག་གང་གིས་ཡེ་ཤེས་མ་ལུས་ཆོས་ཀྱི་སྐུ་ཅན་ཉིད། །
སྐྱེ་མཆེད་ཀུན་བྲལ་གང་གི་དབང་པོ་བློ་ལྡན་ཕྱིར་མི་ལྡོག་པའི་ཚོགས། །
གཏན་གྱི་སྐྱབས་གསུམ་དམ་པའི་སྐྱབས་གཅིག་དཔལ་ལྡན་བླ་མ་ལ་ཕྱག་འཚལ། །
རབ་འབྱམས་ཞིང་ན་ཡིད་འོང་མཆོད་སྤྲིན་བདག་གིར་མ་བཟུང་གང་མཆིས་དང་། །
མོས་པས་བཀོད་པའི་ཞིང་ཁམས་རྒྱ་མཚོའི་ནམ་མཁའི་དབྱིངས་ཀྱི་མཐའ་ཀླས་ཤིང་། །
བསླབ་གསུམ་དྲི་མེད་པད་མོའི་འཕྲེང་བ་སྒྲུབ་པའི་མཆོད་པ་བླ་མེད་ཀྱིས། །
མི་རྟོག་དབྱིངས་ལས་གཡོ་བ་མེད་བཞིན་ཡོན་གནས་མཆོག་ཁྱོད་མཆོད་པར་བགྱི། །
ལས་དང་ཉོན་མོངས་བདུད་ཀྱི་དབང་སོང་བདག་གིས་ཉེས་པ་ཅི་བགྱིས་ཀུན། །
བསམ་པ་ཐག་པས་བླ་མ་དང་ནི་འཕགས་པའི་ཚོགས་ཀྱི་སྤྱན་སྔར་བཤགས། །
མགོན་པོ་ཁྱོད་ཀྱིས་རྣམ་མང་དགེ་ཚོགས་སྟོན་ཟླའི་འོད་ལྟར་དཀར་བ་དང་། །
དཔག་མེད་སྐྱོབ་པ་སྲས་བཅས་རྣམས་ཀྱིས་བསྐྲུན་པའི་དགེ་ལ་རྗེས་ཡི་རང་། །
ཐུབ་པའི་བསྟན་པ་རང་བཞིན་འོད་གསལ་འཇིག་རྟེན་གསུམ་གྱི་རིན་ཆེན་སྒྲོན། །
སྡིག་པའི་བློ་ཅན་ཆོམ་རྐུན་རྣམས་ཀྱིས་རྣམ་པ་སྟོང་དུ་སྒྲིབ་ལ་བརྩོན། །
ལྟ་ངན་མུན་པའི་ཁོང་དུ་རབ་ཞུགས་སྐྱེ་བོ་འདི་རྣམས་རང་དགར་སྤྱོད། །
ཨེ་མ་ཧོ་ཀུན་གཟིགས་ཐུགས་རྗེ་ལྡན་པའི་ཆོས་ཀྱི་སྒྲོན་ཆེན་སྦར་དུ་གསོལ། །
བློ་མིག་ཟིམ་གྱུར་དམུས་ལོང་ལྟ་བུའི་འཇིག་རྟེན་མ་ལུས་དྲང་བའི་སླད། །
མགོན་པོ་གྲངས་མེད་བསྐལ་བའི་བར་དུ་མྱ་ངན་མི་འདའ་བཞུགས་གསོལ་ཞིང་། །
ཀུན་ད་ལྟ་བུར་རྣམ་པར་དཀར་བའི་རང་བཞིན་དགེ་བ་ཇི་སྙེད་རྣམས། །
ལུས་ཅན་ཀུན་གྱི་མཆོག་བདེའི་གོ་འཕང་མཁའ་འདྲའི་ཡེ་ཤེས་ཐོབ་ཕྱིར་བསྔོ། །
ཟབ་ཡངས་ཡོན་ཏན་ཆུ་བོའི་གཏེར་ཆེན་དཔལ་ལྡན་བླ་མ་ཡིད་བཞིན་འཚོ། །
བདག་ཀྱང་བསྟོད་པའི་ཀླུ་[གླུ]རྒྱུན་སྙན་ཚིག་ལྷུང་ལྷུང་སྒྲ་འདིས་བསྟོད་པ་ཡིས། །
ཉོན་མོངས་བརྒྱ་ཕྲག་ཚ་གྲང་སྟོང་གིས་ཀུན་ནས་གདུངས་པའི་འགྲོ་བ་རྣམས། །
བདེ་གཤེགས་སྙིང་པོ་སྲིད་མཚོ་དཔག་ཡས་དྲི་བྲལ་དབྱིངས་སུ་འཇུག་པར་ཤོག །
བདག་ཀྱང་དེང་ནས་སྐྱེ་བ་ཀུན་ཏུ་འཕགས་པ་དགྱེས་པའི་ཚུལ་ལྡན་ཏིང་འཛིན་མཆོག་གིས་ཉེར་འཚོ་ཞིང་། །
བློ་གྲོས་ལྗོན་ཤིང་མང་དུ་ཐོས་པའི་འབྲས་ལྡན་ཕན་བདེའི་གྲིབ་བསིལ་བརྟན་གྱུར་ཀུན་གྱི་བསྟི་གནས་དང་། །
དཔལ་ལྡན་བླ་མ་མཐའ་ཡས་མཆོད་སྤྲིན་བསྟོད་པའི་ཆུ་རྒྱུན་རྒྱུན་མང་རླབས་ལྡན་སྟོང་གིས་མཉེས་བྱེད་ཅིང་། །
འཇམ་པའི་རྡོ་རྗེ་ཉིད་བཞིན་རྒྱལ་བའི་ཞིང་སྤྱོད་ཐུབ་པ་རྣམས་ཀྱི་བསྟན་པ་རིན་ཆེན་འཛིན་གྱུར་ཅིག །
ཅེས་པ་འདི་ནི་མང་དུ་ཐོས་པའི་བློའི་ནོར་ཅན་བཤེས་གཉེན་དམ་པ་རྣམས་ཀྱིས་ཉེ་བར་བཟུང་ཞིང་། ཁྱད་པར་ཡང་མཁྱེན་རབ་དང་ཐུགས་རྗེའི་ཡོན་ཏན་དཔག་ཏུ་མེད་པས། ཉེ་བར་སྤྲས་པ། དཔལ་ལྡན་བླ་མ་ཀུན་མཁྱེན་ཆོས་ཀྱི་རྗེའི་གསུང་གི་ཉིན་མོར་བྱེད་པས། བློ་གྲོས་ཀྱི་པད་མོ་ཅུང་ཟད་ཁ་ཕྱེ་བས་འཆད་པ་དང་། །རྩོད་པ་དང་། རྩོམ་པ་དང་། སྒོམ་པའི་ཚུལ་ལ་སྤོབས་པ་མི་དམན་པ། ཤཱཀྱའི་དགེ་སློང་མངའ་རིས་པ་ཕྱོགས་ལས་རྣམ་རྒྱལ་གྱིས་ཉེ་བར་སྦྱར་བའོ།། །། མངྒ་ལཾ། བྷ་ཝན་ཏུ། ཤུ་བྷཾ།
མཁའ་ལྟར་ཁྱབ་བདག་ཆེན་པོ་བདེ་བའི་མཆོག །
ཕུན་སུམ་ཚོགས་པའི་རྒྱལ་བ་ལྷན་ཅིག་སྐྱེས། །
བསྟན་པའི་གཙོ་བོ་རྡོ་རྗེ་འཆང་ཆེན་གྱི། །
ངོ་བོ་དཔལ་ལྡན་བླ་མའི་ཚོགས་ལ་འདུད། །
འཇམ་དབྱངས་སྨན་ཆུ་ཁ་བས་མཛད་པའོ། །མངྒ་ལཾ། ཤུ་བྷཾ།
ཚོགས་གཉིས་རླུང་གི་སྒྲིབ་གཉིས་སྤྲིན་སངས་ཏེ། །
སྐུ་གཉིས་མངོན་གྱུར་དོན་གཉིས་ལྷུན་གྲུབ་པས། །
འགྲོ་བའི་དཔལ་གྱུར་ཚོགས་གཉིས་ལམ་སྟོན་པའི། །
དཔལ་ལྡན་བླ་མ་དུས་ཀྱི་འཁོར་ལོར་འདུད། །རིན་ཚུལ་པས་གསུངས།
༄༅། །ཆོས་རྗེ་ཐམས་ཅད་མཁྱེན་པའི་བསྟོད་པ་ཁྱད་འཕགས་ཉིད་ཀྱི་ལུང་རིགས་ཀྱི་བཀའ་བབ་པ་མཁས་པ་ཆེན་པོ་ཞང་སྟོན་བསོད་ནམས་གྲགས་ཀྱིས་མཛད་པ་བཞུགས་སོ། །
༄༅། །དཔལ་ལྡན་བླ་མ་དམ་པ་ཆོས་ཀྱི་རྗེ་ཐམས་ཅད་མཁྱེན་པ་ཆེན་པོའི་ཡོན་ཏན་བསྔགས་པ་ཁྱད་པར་དུ་འཕགས་པར་བསྟོད་པ་ཞེས་བྱ་བ། བླ་མ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །
རྣམ་དག་རྒྱལ་བའི་བཀའ་བཞིན་དུ། །
གཞི་དང་ལྟ་སྒོམ་སྤྱོད་འབྲས་སོགས། །
ཁྱད་པར་འཕགས་པ་འགའ་ཞིག་སྟོན། །
ཆོས་ཀྱི་རྗེ་ལ་ཕྱག་འཚལ་ལོ། །
ཁ་ཅིག་མཁས་པར་རློམ་བྱས་ནས། །
གཞི་མེད་རྩ་བྲལ་ཡིན་ནོ་ཞེས། །
དྲི་བཅས་དེ་བཞིན་ཉིད་ལ་ནི། །
སྐུར་འདེབས་འབའ་ཞིག་སྨྲ་བར་བྱེད། །
ཁྱེད་ནི་སངས་རྒྱས་གསུང་བཞིན་དུ། །
སྙིང་པོ་ཀུན་ལ་ཁྱབ་པོ་ཞེས། །
གཞི་ནི་རང་བཞིན་རིགས་ཡིན་པར། །
སྟོན་པས་ཁྱད་པར་འཕགས་པ་ལགས། །
༄༅། །ཆོས་རྗེ་ཀུན་མཁྱེན་ཆེན་པོ་ལ་ཕྱག་འཚལ་ལོ། །
སྐྱེ་ཞིང་སྐྱེ་བ་དག་ནི་ཐམས་ཅད་དུ། །
མཁས་པ་མཁས་པ་དུ་ནི་སྔོན་སྦྱངས་པའི། །
ཚེ་འདིར་ལན་རེ་བཟུང་རེ་ཐོས་ཙམ་གྱིས། །
གཞུང་ལུགས་ཀུན་ཤེས་ཤེས་རབ་རྒྱལ་མཚན་དཔལ། །
སྤྱན་རས་གཟིགས་དབང་རྒྱལ་སྲས་ཐུགས་རྗེ་ཅན། །
འདས་པའི་དུས་ན་མངོན་པར་སངས་རྒྱས་ཀྱང་། །
ཐུགས་རྗེའི་དབང་གིས་ས་བཅུའི་ཚུལ་སྟོན་པ། །
ཐབས་ཚུལ་དཔག་མེད་རིགས་ལ་གསོལ་བ་འདེབས། །
གྷ་རུང་པས་གསུངས།
གདོད་ནས་ལྷུན་གྲུབ་དོན་དམ་ཆོས་ཀྱི་སྐུ། །
ཚོགས་གཉིས་ལས་འཁྲུངས་ཕུན་ཚོགས་གཟུགས་ཀྱི་སྐུ། །
ཐོག་མཐའ་བར་དགེ་ལུང་རྟོགས་ཆོས་རྣམས་དང་། །
མཆོག་གསུམ་ངོ་བོ་བླ་མར་ཀུན་ནས་འདུད། །
༄༅། །རྒྱལ་བའི་མདུན་ན་རྒྱལ་སྲས་ལི་ཙཱ་བི། །
ཀ་ལཱ་པ་རུ་རིགས་ལྡན་པདྨ་དཀར། །
དཔལ་གྱི་རི་ལ་ཀླུ་སྒྲུབ་ཆེན་པོར་གྲགས། །
འགྲོ་མགོན་ཇོ་ནང་པ་ལ་གསོལ་བ་འདེབས། །
སྤོས་ངད་ལྡན་ན་ཆོས་འཕགས་སེམས་དཔའ་ཆེ། །
ལྷ་ལྡན་གྲོང་དུ་སྲོང་བཙན་སྒམ་པོ་སྟེ། །
རྔ་ཡབ་གླིང་ན་པདྨ་འབྱུང་གནས་དཔལ། །
ཤེས་རབ་རྒྱལ་མཚན་ཞབས་ལ་ཕྱག་འཚལ་ལོ། །
གང་གི་བློ་གྲོས་ནམ་མཁའི་ཁྱོན་ལྟར་ཡངས་། །
དེ་བློས་གསུང་རབ་ངེས་དོན་རྫོགས་པར་དགོངས། །
དམ་ཆོས་དོན་དུ་སྲོག་ཀྱང་འདོར་ནུས་པའི། །
དོལ་པོ་པར་གྲགས་བླ་མའི་ཞབས་ལ་འདུད། །
གངས་རིའི་ཁྲོད་འདིར་ངེས་དོན་བསྟན་པའི་བདག །
འགྲན་མེད་དམ་པ་ཆོས་ཀྱི་འཁོར་ལོ་བསྐོར། །
འཇིག་རྟེན་མགོན་པོའི་རྣམ་འཕྲུལ་ཇོ་ནང་པ། །
ཀུན་མཁྱེན་ཆེན་པོའི་ཞབས་ལ་མཆོད་པ་འབུལ། །
མཆོད་བསྟོད་ཕྱག་འཚལ་གསོལ་བ་བཏབ་པའི་མཐུས། །
སྐྱབས་མཆོག་ཁྱེད་ཀྱི་བསྟན་པ་དར་བ་དང་། །
བདག་ཅག་རྣམས་ཀྱི་འགལ་རྐྱེན་ཀུན་ཞི་ནས། །
དངོས་གྲུབ་འདོད་དོན་མ་ལུས་འགྲུབ་པར་ཤོག །
རྗེ་ཉིད་ཀྱི་སློབ་མ་ཉ་དབོན་ཀུན་དགའ་དཔལ་གྱིས་མཛད་པར་གྲགས་པའོ། །
༄༅། །ཆོས་རྗེ་ཐམས་ཅད་མཁྱེན་པའི་བསྟོད་པ་དེ་ཉིད་ཀྱི་སློབ་མ་ཐང་ཆེན་ཀུན་དགའ་འབུམ་གྱིས་མཛད་པ་བཞུགས་སོ། །
༄༅། །ཆོས་རྗེ་ཐམས་ཅད་མཁྱེན་པའི་རྣམ་ཐར་གྱི་སྒོ་ནས་བསྟོད་པ། ཡོན་ཏན་གསལ་བའི་ཉི་འོད་ཅེས་བྱ་བ་བླ་མ་སངས་རྒྱས་རྡོ་རྗེ་འཆང་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་ནས་བྱིན་གྱིས་བརླབ་ཏུ་གསོལ། །
ཆོས་ཀྱི་དབྱིངས་ལས་ནམ་ཡང་མ་གཡོས་བཞིན། །
དད་ལྡན་གདུལ་བྱའི་བསོད་ནམས་སྐལ་བ་དང་། །
འཚམ་པའི་གཟུགས་ཀྱིས་ཆོས་ཀུན་སྟོན་མཛད་པ། །
འདྲེན་མཆོག་ཀུན་མཁྱེན་ཆོས་རྗེའི་ཞབས་ལ་འདུད། །
རྣམ་ཐར་སྒོ་བཞིའི་ཏིང་འཛིན་འཁོར་ལོ་ཡིས། །
གནས་སྐབས་རིགས་བཞིའི་དྲྭ་བ་ཀུན་བཅད་ནས། །
མཁྱཻན་པ་རྣམ་བཞིའི་ཆོས་འཁོར་ལེགས་བསྐོར་བ། །
རྒྱལ་བ་སྐུ་བཞིའི་འཁོར་ལོ་རྗེ་ལ་འདུད། །
མགོན་ཁྱོད་ལ་ལར་མཛད་པ་བཅུ་གཉིས་སྟོན། །
ལ་ལར་རྟེན་དང་བརྟེན་པ་དུ་མའི་ཚུལ། །
སྣ་ཚོགས་སྤྲུལ་པ་སྒྱུ་མའི་གཟུགས་འཛིན་པའི། །
ཨེ་མ་ངོ་མཚར་ཆོས་རྗེའི་ཞབས་ལ་འདུད། །
དེ་ལྟའི་དེ་བཞིན་གཤེགས་པ་དེ་དྲུང་དུ། །
བསྟན་མཆོག་བསྟན་པའི་ཐ་མར་གྱུར་པའི་ཚེ། །
སྙིགས་དུས་སྙིགས་མའི་སེམས་ཅན་གདུལ་བའི་ཕྱིར། །
རྒྱལ་བའི་རྒྱལ་ཚབ་ཆེན་པོའི་ཞབས་ལ་འདུད། །
བདག་གིས་བདག་གི་སྲོག་ལའང་མི་ལྟ་བར། །
ཡང་དག་ལྟ་ལ་ཡང་དག་དགོད་བྱར་ཞེས། །
སེམས་བསྐྱེད་སེམས་དཔའ་ཇི་ལྟར་སྨོན་བཞིན་དུ། །
བླ་མེད་བླ་མ་ཆོས་རྗེའི་ཞབས་ལ་འདུད། །
སྐྱེད་བྱེད་ལྷུམས་ཀྱི་གཞལ་མེད་ཁང་ཆེན་དེར། །
བྱང་སེམས་ཟླ་བའི་དཀྱིལ་འཁོར་རབ་རྒྱས་ནས། །
ཕན་བདེའི་བསིལ་ཟེར་འོད་སྟོང་འཕྲོས་པ་ཡིས། །
ཉོན་མོངས་དུག་སེལ་ཆོས་རྗེའི་ཞབས་ལ་འདུད། །
ལྷུམས་ནས་མངོན་པར་བལྟམས་པ་དེ་ཡི་ཚེ། །
དོན་གྲུབ་ལུམ་བུའི་ཚལ་དུ་འཁྲུངས་པ་ལྟར། །
འཛིན་མ་རབ་གཡོས་སྒྲ་སྒྲོགས་འཇའ་འོད་ཀྱིས། །
འཇིག་རྟེན་སྣང་མཛད་ཆོས་རྗེའི་ཞབས་ལ་འདུད། །
གང་གིས་མཐོང་ཐོས་རེག་པ་ཙམ་གྱིས་ཀྱང་། །
ཉོན་མོངས་ནད་དང་མྱ་ངན་ཀུན་སེལ་ཞིང་། །
དགའ་བདེའི་དཔལ་གྱིས་འགྲོ་རྣམས་ཚིམ་མཛད་པའི། །
གཞོན་ནུའི་རོལ་རྩེད་ཆོས་རྗེའི་ཞབས་ལ་འདུད། །
ཤེས་བྱའི་གནས་ཀུན་མ་ལུས་ཐུགས་ཆུད་ཀྱང་། །
གློག་ཡིག་རྩིས་ཀྱི་གྲྭར་ཡང་འཇུག་པར་མཛད། །
མཁས་གྲུབ་རྣམས་ལ་བསྒྲུབ་པ་བཀའ་བརྒྱད་སོགས། །
ལན་རེ་ཞུས་པ་ཙམ་གྱིས་མཁྱེན་ལ་འདུད་། །
མཁས་བཙུན་མཆོག་གྱུར་མཁན་སློབ་དེ་དྲུང་དུ། །
དགེ་བའི་མཆོག་གྱུར་ཚུལ་ཁྲིམས་སྡོམ་པ་ནོད། །
ཐུགས་བསྐྱེད་མཆོག་གྱུར་བསླབ་བྱ་ཀུན་ལ་བསླབ། །
སྦྱངས་པའི་སྟོབས་གྱུར་ཆོས་རྗེའི་ཞབས་ལ་འདུད། །
ཤེས་རབ་མཆོག་གྱུར་བསྟན་པའི་རྒྱལ་མཚན་དེས། །
དཀའ་བའི་མཆོག་གྱུར་སྲོག་ཀྱང་ཡལ་བར་དོར། །
བླ་མའི་མཆོག་གྱུར་འཇམ་པའི་དབྱངས་དང་མཇལ། །
རིགས་པའི་མཆོག་གྱུར་ལྟ་ངན་འཇོམས་ལ་འདུད། །
ཤེས་རབ་མཚན་ཅན་ཡིད་བཞིན་ནོར་བུ་ཡི། །
སྨོན་ལམ་དེད་དཔོན་མཆོག་གིས་རབ་བསྐངས་ནས། །
དཔལ་ལྡན་ས་སྐྱ་འདོད་དགུའི་འབྱུང་གནས་དེར། །
སྐྱེ་དགུའི་རེ་འདོད་ཡིད་བཞིན་སྐོངས་ལ་འདུད། །
སྐྱི་སྟོན་འཇམ་དབྱངས་མཁྱེན་བརྩེའི་ཕྱག་གིས་ནི། །
ལུང་རིགས་བྱི་དོར་ལེགས་བྱས་རིན་ཆེན་འདི། །
སྡེ་འཛིན་རྒྱལ་མཚན་རྩེ་ལ་མངོན་པར་འཁོད། །
དབང་གི་རྒྱལ་པོ་ཆོས་རྗེའི་ཞབས་ལ་འདུད། །
མི་དབང་སེང་ཆེན་ཐུགས་རྗེའི་ལུས་བསྒྱིངས་ཏེ། །
ཚད་མེད་བཞི་ཡི་ཡན་ལག་རབ་རྒྱས་པ། །
ཐུབ་དབང་གངས་རིའི་ངོས་ལ་ལེགས་གནས་ནས། །
སྟོང་ཉིད་སྙིང་རྗེའི་ཆོས་སྒྲ་སྒྲོགས་ལ་འདུད། །
རྣམ་དག་ལུང་རིགས་རྟོགས་པའི་མཆེ་སྡེར་ཅན། །
བསླབ་གསུམ་རལ་པའི་ཁུར་གྱིས་བརྗིད་པ་དེ། །
ལྟ་སྤྱོད་ལོག་འཛིན་ཝ་ཚོགས་འཇོམས་ལ་བརྩོན། །
སྨྲ་བའི་སེང་གེ་ཀུན་མཁྱེན་རྗེ་ལ་འདུད། །
གཞོན་ནུའི་དུས་ནས་བསླབ་གསུམ་མཐར་ཕྱིན་པས། །
འཁོར་ལོ་གསུམ་གྱི་བཀའ་དང་བསྟན་བཅོས་རྣམས། །
མ་ལུས་མཐར་ཕྱིན་མཁས་པའི་མདུན་སར་གྲགས། །
བསྟན་པའི་མངའ་བདག་ཆོས་རྗེའི་ཞབས་ལ་འདུད། །
ལུང་རིགས་སྒྲ་ཡིས་ལོག་བློའི་ལྟ་བ་བཅོམ། །
འཆད་རྩོད་རྩོམ་པས་བསྟན་པའི་སྒྲོན་མར་གྱུར། །
ལང་ཚོའི་དུས་ན་མཁས་པའི་གཙུག་རྒྱན་མཆོག །
རྒྱལ་བའི་རྒྱལ་མཚན་ཆོས་རྗེའི་ཞབས་ལ་འདུད། །
གང་ཐུགས་ཡེ་ཤེས་གསལ་བས་ཤེས་བྱ་ཀུན། །
མེ་ལོང་ནང་གི་གཟུགས་བརྙན་ལྟར་གཟིགས་ཀྱང་། །
འགྲོ་བའི་དོན་དུ་སླར་ཡང་གསན་པའི་ཚུལ། །
སྟོན་མཛད་ཀུན་མཁྱེན་ཆོས་ཀྱི་རྗེ་ལ་འདུད། །
རྡོ་རྗེ་རྒྱལ་པོ་ཆེན་པོའི་གཞུང་ལུགས་རྣམས། །
སྔོན་དུ་ལེགས་པར་ཐུགས་སུ་ཆུད་པའི་མཐུས། །
སྐུ་ཚེ་འདིར་ནི་ལན་རེ་གསན་ཙམ་གྱིས། །
མཁས་པའི་མཆོག་གྱུར་ཀུན་མཁྱེན་རྗེ་ལ་འདུད། །
ཆོས་ཚུལ་རྒྱ་མཚོ་ཕ་རོལ་ལེགས་སྟོན་པ། །
ཆོས་ཀྱི་མངའ་བདག་སྐྱི་སྟོན་འཇམ་དབྱངས་ཀྱིས། །
ཆོས་ཀྱི་འཁོར་ལོ་དྲི་མེད་བསྐོར་བའི་ཚེ། །
ཆོས་ཀུན་སྒྲིབ་མེད་མཁྱེན་པའི་རྗེ་ལ་འདུད། །
ཆོས་རྗེ་ཆོས་ལ་གོམས་པ་སྔོན་སོང་ཕྱིར། །
ཆོས་ཀྱི་ཚུལ་རྣམས་ལན་རེ་གཟིགས་ཙམ་གྱིས། །
ཆོས་ཀྱི་དེ་ཉིད་ཇི་ལྟ་ཇི་སྙེད་མཁྱེན། །
ཆོས་ཀྱི་སྤྱན་མངའ་ཆོས་རྗེའི་ཞབས་ལ་འདུད། །
སྙིང་ནས་སྙིང་པོ་མེད་པའི་བྱ་བ་ཀུན། །
དེ་ནས་དེ་ཚེ་དེ་མ་ཐག་དོར་ཏེ། །
གང་དང་གང་དུ་གསང་སྤྱོད་ལ་གཤེགས་པ། །
བླ་མེད་བླ་མ་ཆོས་ཀྱི་རྗེ་ལ་འདུད། །
ཁྱོད་ཀྱིས་འཁོར་བའི་བདེ་བ་བར་སྣང་གི །
གློག་བཞིན་གཡོ་བའི་སྙིང་པོ་མེད་གཟིགས་ནས། །
དབེན་པའི་གནས་སུ་ཐར་བའི་འཇུག་ངོགས་མཆོག །
ཞི་གནས་ལྷག་མཐོང་རྟོགས་པའི་རྗེ་ལ་འདུད། །
ཡོན་ཏན་རྒྱ་མཚོའི་དུས་འཁོར་རིན་པོ་ཆེ། །
ཤེས་རབ་རྒྱ་མཚོ་རྒྱལ་བའི་མཚན་ཅན་གྱིས། །
མདོ་རྒྱུད་ཟབ་མོའི་གཟེངས་སུ་ལེགས་ཞུགས་ནས། །
སེམས་འགྲེལ་རྒྱ་མཚོའི་ཐབས་ཀྱིས་འདྲེན་ལ་འདུད། །
སེམས་ཅན་རྒྱ་མཚོའི་དབུལ་བ་བསལ་བའི་ཕྱིར། །
དབང་བསྐུར་རྒྱ་མཚོའི་ཐབས་ཀྱིས་རབ་བཀྲུས་ནས། །
གདམས་ངག་རྒྱ་མཚོས་བྱི་དོར་ལེགས་བྱས་ཏེ། །
གདུལ་བྱ་རྒྱ་མཚོའི་རེ་འདོད་སྐོངས་ལ་འདུད། །
མཁས་གྲུབ་རྣམས་ལ་སྨིན་གྲོལ་དབང་དང་ཁྲིད། །
མདོ་རྒྱུད་བསྟན་བཅོས་ལུང་རིགས་མན་ངག་དང་། །
སྒྲ་དང་སྙན་ངག་བཟོ་དང་གསོ་བ་རིག །
ལེགས་གསན་ཀུན་མཁྱེན་ཆོས་རྗེའི་ཞབས་ལ་འདུད། །
ཆོས་རྣམས་ཀུན་གྱི་ཚིག་དོན་མ་ལུས་པ། །
ཐོས་དང་དོན་རྟོགས་དུས་མཉམ་འབྱུང་བ་འདི། །
ཁྱོད་ཀྱི་ལུགས་ཡིན་གཞན་དུ་ག་ལ་སྲིད། །
འཇམ་དབྱངས་ཀུན་མཁྱེན་ཆོས་རྗེའི་ཞབས་ལ་འདུད། །
ཤེས་བྱའི་མཁའ་ལ་ཐུགས་རྗེའི་སྤྲིན་བསྡུས་ཤིང་། །
རབ་མཆོག་ཆོས་ཀྱི་འབྲུག་སྒྲ་ཆེར་བསྒྲགས་ཏེ། །
སྟོང་ཉིད་གློག་འགྱུ་རྫིང་བུ་ཆར་རྒྱུན་གྱིས། །
རྒྱལ་སྲས་ཐུགས་རྗེ་འཛིན་མ་ཚིམ་ལ་འདུད། །
དེ་ཡིས་ཐར་པའི་ས་བོན་འཕེལ་བའི་མཐུས། །
བྱང་ཆུབ་སེམས་ཀྱི་རྩ་བ་རབ་བརྟན་ཞིང་། །
མཚན་དཔེ་མྱུ་གུའི་འདབ་ཚོགས་རབ་རྒྱས་པ། །
ཀུན་མཁྱེན་མེ་ཏོག་རྒྱས་པར་མཛད་ལ་འདུད། །
ཆོས་རྗེ་ཡོན་ཏན་རྒྱ་མཚོ་ཆོས་རྒྱལ་དེས། །
ཆོས་ཀུན་བདག་པོར་ལུང་བསྟན་ཆོས་རྗེ་ལ། །
ཆོས་ཀྱི་རིན་ཆེན་ནོར་དང་ཆོས་མཛོད་གཏད། །
ཆོས་ཀྱི་དབང་ཕྱུག་ཆོས་རྗེའི་ཞབས་ལ་འདུད། །
ཆོས་ཀྱི་རྒྱལ་པོར་དབང་བསྐུར་ཆོས་རྗེ་དེ། །
ཆོས་ཀྱི་རྒྱལ་སྲིད་ཆེན་པོ་ཆོས་ཀྱིས་སྐྱོང་། །
ཆོས་ཀྱི་སེང་གེའི་ཁྲི་ལ་ཆོས་སྟོན་པའི། །
ཆོས་རྒྱལ་རིགས་ལྡན་ཆོས་རྗེའི་ཞབས་ལ་འདུད། །
མཐའ་དྲུག་ཚུལ་བཞིའི་དཔལ་གྱི་སྒོ་ཕྱེས་ནས། །
མཐའ་དྲུག་ཚུལ་བཞིའི་དོན་རྣམས་ལེགས་སྟོན་པའི། །
མཐའ་དྲུག་ཚུལ་བཞིའི་མཛད་པས་གདུལ་བྱ་རྣམས། །
མཐའ་དྲུག་ཚུལ་བཞིའི་བདག་ཉིད་རྗེ་ལ་འདུད། །
མཐའ་དྲུག་ཚུལ་བཞིའི་མཛད་པས་གདུལ་བྱ་རྣམས། །
མཐའ་དྲུག་ཚུལ་བཞིའི་ལམ་ལ་ལེགས་དྲངས་ནས། །
མཐའ་དྲུག་ཚུལ་བཞིའི་དཔལ་ལ་འགོད་མཛད་པའི། །
མཐའ་དྲུག་ཚུལ་བཞིའི་འཕྲིན་ལས་མཆོག་ལ་འདུད། །
ཚར་གཅོད་རྣམ་ལྔའི་གདན་ས་ལེགས་དག་ཅིང་། །
རིག་པའི་གནས་ལྔ་སྔོན་དུ་སྦྱངས་པའི་མཐུས། །
ཉོན་མོངས་དུག་ལྔ་གྲོལ་བ་འཇམ་པའི་དབྱངས། །
སྤྱན་ལྔ་ཆགས་མེད་གདོད་ནས་འཆང་ལ་འདུད། །
སྙིགས་མ་ལྔ་ཡི་ནགས་ཚལ་མུན་ཁྲོད་དུ། །
འགྲོ་བ་རྒྱུད་ལྔར་འཁོར་བའི་སེམས་ཅན་ལ། །
རྣམ་དག་ལམ་ལྔ་ལེགས་པར་སྟོན་མཛད་པའི། །
ཡེ་ཤེས་ལྔ་ལྡན་ཆོས་ཀྱི་རྗེ་ལ་འདུད། །
ཨེ་མ་ངོ་མཚར་ཆོས་རྗེའི་སྐུ་གསུང་ཐུགས། །
རྨད་བྱུང་མཛད་པ་འཕྲིན་ལས་མདོར་བསྡུ་ན། །
ནམ་མཁའི་དབྱིངས་ཀྱི་མཐར་ཐུག་ཅི་ཙམ་པ། །
ཁྱོད་ཀྱིས་སྐུ་གསུང་ཐུགས་ཀྱིས་ཁྱབ་ལ་འདུད། །
ཅི་ཙམ་སེམས་ཅན་ཁམས་ཀྱི་མཐར་ཐུག་པ། །
ཁྱོད་ཀྱི་འཕྲིན་ལས་མཐུ་ཡང་དེ་ཙམ་ལགས། །
དེ་སླད་བསམ་གྱིས་མི་ཁྱབ་བརྟག་དཀའ་བའི། །
ཡོན་ཏན་དཔག་ཡས་ཆོས་རྗེའི་ཞབས་ལ་འདུད། །
ཀུན་མཁྱེན་ཆེན་པོའི་ཐུགས་རྗེ་བསམ་མི་ཁྱབ། །
སྐུ་འབུམ་ཆེན་པོའི་ཡོན་ཏན་བསམ་མི་ཁྱབ། །
དཀྱིལ་འཁོར་ཆེན་པོའི་བྱིན་རླབས་བསམ་མི་ཁྱབ། །
འཕྲིན་ལས་ཆེན་པོ་བསམ་མི་ཁྱབ་ལ་འདུད། །
བླ་མ་ཆེན་པོའི་དགེ་བསྐུལ་བསམ་མི་ཁྱབ། །
དད་གུས་ཆེན་པོའི་འབུལ་བ་བསམ་མི་ཁྱབ། །
སྨོན་ལམ་ཆེན་པོའི་འབྲས་བུ་བསམ་མི་ཁྱབ། །
ཁྱད་འཕགས་ཆེན་པོ་བསམ་མི་ཁྱབ་ལ་འདུད། །
བླ་མེད་བླ་མ་ཀུན་མཁྱེན་ཆོས་རྗེ་དེ། །
ཤེས་དང་ཤེས་བྱ་མ་ལུས་ཐུགས་ཆུད་པས། །
གང་དང་གང་དུ་གདུལ་བྱ་འདུལ་བ་ལ། །
ཐུགས་རྗེའི་ཐུགས་མངའ་ཆོས་རྗེའི་ཞབས་ལ་འདུད། །
རྒྱལ་དང་རྒྱལ་སྲས་རྣམས་ཀྱི་བཀའ་བཞིན་དུ། །
དེ་དང་དེ་ཡི་ཁམས་དང་བསམ་པ་བཞིན། །
ཆོས་དང་ཆོས་ཉིད་ལེགས་པར་རྣམ་ཕྱེས་ནས། །
སྟོན་མཛད་སྟོན་པ་ཤཱཀྱའི་རྒྱལ་ལ་འདུད། །
ཚོགས་གཉིས་ཆུ་གཏེར་ལས་འཁྲུངས་གདུལ་བྱ་རྣམས། །
དབང་གཉིས་ཆབ་ཀྱི་སྒོ་གསུམ་དྲི་མ་སྦྱངས། །
རིམ་གཉིས་ལམ་བསྟན་སྐུ་བཞིའི་དཔལ་ལ་བཀོད། །
དོན་གཉིས་མཐར་ཕྱིན་ཆོས་རྗེའི་ཞབས་ལ་འདུད། །
སྐྱེ་ཤི་བར་དོར་སྤྲུལ་བ་སྒྱུ་མ་ཡིས། །
རྨི་ལམ་བར་དོ་ལྟ་བུའི་ཆོས་བསྟན་ནས། །
སྲིད་པ་བར་དོའི་འགྲོ་རྣམས་གྲོལ་མཛད་པའི། །
གཞན་མཆོག་བར་དོ་ཆོས་རྗེའི་ཞབས་ལ་འདུད། །
ཆོས་ཀྱི་རྒྱལ་པོ་ཆོས་རྗེའི་རྒྱལ་ཚབ་མཆོག །
ཆོས་ཀྱི་བློ་གྲོས་ཆོས་ཀྱི་དཔལ་ལ་སྤྱོད། །
ཆོས་བཞིན་བསྒྲུབས་རྣམས་ཆོས་ཀྱིས་ཚིམ་པར་མཛད། །
ཆོས་རྗེའི་ཐུགས་སྲས་ཆོས་རྗེའི་ཞབས་ལ་འདུད། །
ཆེན་པོའི་ཆེན་པོ་གདུང་རྒྱུད་སྨིན་ཅིང་གྲོལ། །
ཆོས་རྗེའི་ཆོས་རྗེ་ཀུན་བཟང་མཆོད་པས་མཆོད། །
དྲག་པོའི་དྲག་པོ་ཐབས་ཀྱིས་གདུལ་བར་མཛོད། །
བླ་མའི་བླ་མ་ཆོས་རྗེའི་ཞབས་ལ་འདུད། །
ཀུན་མཁྱེན་ཀུན་སྤངས་ཆོས་ལྔ་ཡབ་སྲས་ཀྱིས། །
སྐུ་འབུམ་སྐུ་བཟངས་གཙུགས་ལག་ཁྱད་འཕགས་བཞེངས། །
གསེར་གདུགས་གསེར་ཏོག་རིན་ཆེན་དུ་མས་བརྒྱན། །
རབ་གནས་རབ་མཛད་ཆོས་རྗེའི་ཞབས་ལ་འདུད། །
འཁོར་འདས་བདེན་གཉིས་ཁམས་གསུམ་དུས་གསུམ་དང་། །
ཐེག་གསུམ་སྐུ་གསུམ་བདེན་བཞི་སྐུ་བཞི་སོགས། །
དབྱེར་ཡོད་དབྱེར་མེད་གསུངས་པའི་དོན་རྟོགས་ནས། །
འགྲོ་ལ་སྟོན་མཛད་ཆོས་རྗེའི་ཞབས་ལ་འདུད། །
དབང་པོ་དམན་དང་འབྲིང་དང་མཆོག་རྣམས་ལ། །
ཉན་ཐོས་རང་རྒྱལ་ཐེག་པ་ཆེན་པོ་ཡང་། །
མདོ་སྔགས་རྒྱུ་འབྲས་དབྱེར་མེད་ཟུང་འཇུག་ཏུ། །
ལེགས་པར་སྟོན་མཛད་ཆོས་རྗེའི་ཞབས་ལ་འདུད། །
གདོད་ནས་བདུད་དང་ཉོན་མོངས་ངེས་བཅོམ་ཕྱིར། །
ཕུང་ཁམས་སྐྱེ་མཆེད་ལས་དབང་ཡུལ་བཅས་ཀྱི། །
དབུས་ན་བཞུགས་ཀྱང་དྲི་མས་མི་བརྫི་བ། །
སྲོག་གཟུགས་དབང་འབྱོར་ཆོས་རྗེའི་ཞབས་ལ་འདུད། །
ཆོས་ཀྱི་ཕོ་བྲང་དཔལ་ལྡན་ཤམ་བྷ་ལར། །
ཆོས་ཀྱི་རྒྱལ་པོ་འཇམ་དབྱངས་གྲགས་པ་ཡིས། །
རིགས་བཞི་རིགས་གཅིག་མཛད་པ་ཇི་ལྟ་བར། །
རིགས་ཀུན་མངའ་བདག་ཆོས་རྗེའི་ཞབས་ལ་འདུད། །
འདུས་བྱས་ཆོས་ལས་གདོད་ནས་ངེས་གྲོལ་ཡང་། །
འདུས་བྱས་འདུས་མ་བྱས་པའི་དགེ་བ་ཡིས། །
འདུས་བྱས་མཁའ་མཉམ་འགྲོ་བ་མ་ལུས་པའི། །
འདུས་བྱས་རྒུད་སེལ་ཆོས་རྗེའི་ཞབས་ལ་འདུད། །
ཁྱད་འཕགས་རྟེན་གསུམ་གཙུག་ལག་མཆོད་རྟེན་དང་། །
ཁྱད་འཕགས་བཀའ་དང་བསྟན་བཅོས་ཕུལ་བྱུང་སོགས། །
ཁྱད་འཕགས་ཐུགས་དམ་བཞེངས་པའི་མཛད་པས་ཀྱང་། །
ཁྱད་འཕགས་དོན་མཛད་ཆོས་རྗེའི་ཞབས་ལ་འདུད། །
འགྲོ་དྲུག་མ་རིག་གཉིད་ལ་སངས་ཕྱིར་དུ། །
ཡིག་དྲུག་རྡོ་རྗེའི་འབྲུག་སྒྲ་སྒྲོགས་མཛད་ཅིང་། །
སྦྱོར་དྲུག་ཞུ་བདེའི་ཆར་ཆེན་ཕབ་པ་ཡིས། །
རིགས་དྲུག་མངོན་མཛད་ཆོས་རྗེའི་ཞབས་ལ་འདུད། །
སྙན་པའི་གྲགས་པས་ས་གསུམ་ཁྱབ་པའི་མཐུས། །
གོང་མའི་གདན་འདྲེན་འོང་བར་སྔོན་ནས་མཁྱེན། །
རི་ཁྲོད་དབེན་གནས་བས་མཐར་བསམ་གཏན་མཛད། །
རྫུ་འཕྲུལ་མཐའ་ཡས་ཆོས་རྗེའི་ཞབས་ལ་འདུད། །
དགའ་བཞིའི་འགྲོས་ཀྱིས་འཇིགས་པ་བཅུ་དྲུག་བཅོམ། །
ཏིང་འཛིན་ངང་ནས་ཆོས་སྒོ་དུ་མ་ཕྱེ། །
གང་ལ་གང་འདོད་དམ་ཆོས་དགའ་སྟོན་འགྱེད། །
སྤྲུལ་པའི་མཆོག་གྱུར་ཆོས་རྗེའི་ཞབས་ལ་འདུད། །
དོན་དམ་ཆོས་སྐུ་བདེ་སྟོང་ཟུང་འཇུག་དང་། །
དོན་དམ་དུས་འཁོར་བདེ་དགྱེས་གསང་འདུས་སོགས། །
དོན་དམ་ལྷ་སྔགས་རྒྱུད་དང་དཀྱིལ་འཁོར་དང་། །
དོན་དམ་གཞན་སྟོང་སྟོན་མཛད་རྗེ་ལ་འདུད། །
ཁྱད་པར་ཤམ་བྷ་ལ་ཡི་རྒྱུད་མཆོག་དང་། །
འགྲེལ་མཆོག་མན་ངག་མཆོག་རྣམས་ལེགས་རྟོགས་པས། །
ཟབ་མོ་མཐར་ཐུག་ཐུན་མོང་མིན་པ་ཀུན། །
ལེགས་པར་སྟོན་མཛད་ཆོས་ཀྱི་རྗེ་ལ་འདུད། །
མདོ་རྒྱུད་རྒྱ་མཚོའི་དོན་རྣམས་ཐུགས་ཆུད་ཅིང་། །
བསྟན་བཅོས་རྒྱ་མཚོའི་དོན་རྣམས་དབང་འབྱོར་བས། །
མཁས་བཙུན་རྒྱ་མཚོའི་གཙུག་གི་རྒྱན་གྱུར་པའི། །
ཆོས་ཀྱི་རྒྱ་མཚོའི་ཆོས་རྗེའི་ཞབས་ལ་འདུད། །
དབེན་གནས་རྒྱ་མཚོའི་ཏིང་འཛིན་རྒྱ་མཚོ་དང་། །
སངས་རྒྱས་རྒྱ་མཚོ་ཞིང་ཁམས་རྒྱ་མཚོའི་གཟུགས། །
ཡོན་ཏན་རྒྱ་མཚོ་འཕྲིན་ལས་རྒྱ་མཚོའི་དཔལ། །
ཤེས་རབ་རྒྱ་མཚོ་ཡེ་ཤེས་རྒྱ་མཚོར་འདུད། །
ཐུགས་མཆོག་ཆོས་སྐུའི་ངང་ལས་མ་གཡོས་བཞིན། །
གསུང་མཆོག་ཚངས་དབྱངས་རྫོགས་ལྡན་ཆོས་སྒྲ་སྒྲོགས། །
སྐུ་མཆོག་གློ་བུར་རྐྱེན་གྱིས་མི་གཡོ་བ། །
ཡེ་ཤེས་མཆོག་གྱུར་ཆོས་རྗེའི་ཞབས་ལ་འདུད། །
དུས་འཁོར་ལྷ་ཚོགས་དམིགས་མེད་སྙིང་རྗེའི་བདག །
དཀྱིལ་འཁོར་ཆེན་པོ་རྣམ་ཀུན་མཆོག་ལྡན་གཟིགས། །
དབྱེར་མེད་དོན་སྟོན་རྒྱུད་འགྲེལ་ཆེན་པོ་ཡིས། །
འཁྲུལ་པ་ཀུན་སེལ་ཆོས་རྗེའི་ཞབས་ལ་འདུད། །
ཉིད་ཐུགས་འཛིན་མར་ཟུང་འཇུག་ལྷུན་པོ་ནི། །
དགེ་རྟེན་འགྱུར་མེད་རྣམ་འཕྲུལ་བསམ་མི་ཁྱབ། །
རྐྱེན་དང་རླུང་སྟོབས་དྲག་པོས་སྐད་ཅིག་ཀྱང་། །
གཡོ་བར་མི་ནུས་ཆོས་རྗེའི་ཞབས་ལ་འདུད། །
བྱ་རྒོད་ཕུང་པོ་ཐུབ་པའི་དབང་པོ་ཡིས། །
ཐེག་མཆོག་ཕ་རོལ་ཕྱིན་ཚུལ་གསུངས་པ་ལྟར། །
བདེ་བ་ཅན་དུ་ཀུན་མཁྱེན་ཆོས་རྗེ་ཡིས། །
རྫོགས་ལྡན་ཆོས་འཁོར་བསྐོར་ལ་གུས་ཕྱག་འཚལ། །
སྨན་བླའི་ཞིང་ཁམས་དཔལ་ལྡན་སྣང་ཐང་དུ། །
སྨན་པའི་རྒྱལ་པོ་ཆོས་རྗེ་བྱོན་པའི་ཚེ། །
སྨན་པའི་ནུས་མཐུས་འབྱུང་བཞིའི་ནད་རྣམས་ཞི། །
སྨན་གཞན་དུག་གསུམ་ནད་སེལ་རྗེ་ལ་འདུད། །
བདེ་ཆེན་རྒྱ་མཚོ་མཁན་སློབ་རྒྱ་མཚོ་དང་། །
དགེ་འདུན་རྒྱ་མཚོ་མཆོད་སྤྲིན་རྒྱ་མཚོ་མཆོད། །
མདོ་རྒྱུད་རྒྱ་མཚོ་ཟབ་མོ་རྒྱ་མཚོ་གསུངས། །
ཉམས་རྟོགས་རྒྱ་མཚོ་སྐུ་བཞིའི་རྒྱ་མཚོར་འདུད། །
འགྲོ་བའི་མགོན་པོ་གང་དུ་བྱོན་པ་དེར། །
འགྲོ་རྣམས་བསླབ་གསུམ་ལམ་ལ་ལེགས་པར་བཀོད། །
འགྲོ་དྲུག་སྒོ་བཅད་ཆོས་ཀྱི་སྒོ་རྣམས་ཕྱེ། །
འགྲོ་རྣམས་འདྲེན་མཛད་ཆོས་རྗེའི་ཞབས་ལ་འདུད། །
དེ་ཚེ་ལྷ་ཀླུ་མི་དང་ལྷ་མི་རྣམས། །
མཁའ་ལས་མེ་ཏོག་ཆར་འབེབས་འཇའ་འོད་འགྱེད། །
རིན་ཆེན་བདུན་དང་བཀྲ་ཤིས་རྫས་བརྒྱད་སོགས། །
ཀུན་བཟང་མཆོད་སྤྲིན་རྒྱ་མཚོས་མཆོད་ལ་འདུད། །
བྱམས་དང་སྙིང་རྗེ་བྱང་སེམས་མཐར་ཕྱིན་པས། །
སེམས་ཅན་རྣམས་ལ་བུ་གཅིག་ལྟར་དགོངས་ཏེ། །
འདི་ཕྱི་གཏན་དུ་བདེ་བའི་ཆོས་ཀྱི་སྒོ། །
རྣམ་མང་འབྱེད་མཛད་ཆོས་རྗེའི་ཞབས་ལ་འདུད། །
དབང་པོ་དམན་དང་འབྲིང་དང་མཆོག་རྣམས་ལ། །
ཉན་ཐོས་རང་རྒྱལ་ཐེག་པ་ཆེན་པོ་ཡང་། །
རྒྱུ་འབྲས་གཙོར་སྟོན་སྙིང་པོ་སྙིང་རྗེའི་ཚུལ། །
མདོ་སྔགས་སྟོན་མཛད་ཆོས་རྗེའི་ཞབས་ལ་འདུད། །
དུས་གསུམ་སྒྲིབ་མེད་གཟིགས་པའི་རིན་པོ་ཆེ། །
དུས་གསུམ་དུས་མེད་འགྲོ་བའི་དོན་ལ་བརྩོན། །
དུས་གསུམ་དངོས་གྲུབ་རྣམ་གཉིས་སྩོལ་མཛད་པའི། །
དུས་གསུམ་མཁྱེན་པའི་ཆོས་རྗེའི་ཞབས་ལ་འདུད། །
སྤྱན་རས་གཟིགས་དབང་དབུས་ལ་བྱོན་པའི་ཚེ། །
སྤྱན་རས་གཟིགས་ཀྱི་ལེགས་པར་ལུང་བསྟན་ཅིང་། །
སྤྱན་རས་གཟིགས་ཀྱིས་སྤྲུལ་བས་གདན་འདྲེན་པ། །
སྤྱན་རས་གཟིགས་དབང་རྣམ་འཕྲུལ་ཅན་ལ་འདུད། །
ཉོན་མོངས་རྣམ་བཞིའི་ཚ་ཟེར་གིས་གདུངས་པའི། །
སྐྱེ་གནས་རྣམ་བཞིའི་སེམས་ཅན་མ་ལུས་པའི། །
བསྡུ་བ་རྣམ་བཞིའི་བསིལ་ཟེར་གྱིས་བསྡུས་ནས། །
ཚད་མེད་རྣམ་བཞིའི་དཔལ་ཀུན་རྗེ་ལ་འདུད། །
ཟག་པ་རྣམ་བཞིའི་གློ་བུར་དྲི་མ་རྣམས། །
དགའ་བ་རྣམ་བཞིའི་ཆབ་ཀྱིས་ལེགས་སྦྱངས་ནས། །
རྣལ་འབྱོར་རྣམ་བཞིའི་ཟབ་ལམ་སྟོན་མཛད་པ། །
སེམས་དཔའ་རྣམ་བཞིའི་བདག་ཉིད་ལ་ཕྱག་འཚལ། །
ཀུན་བཏགས་ཡོངས་གྲུབ་ཆེན་པོ་ཆོས་ཉིད་དང་། །
ཀུན་རྫོབ་དོན་དམ་འཇིག་རྟེན་འཇིག་རྟེན་འདས། །
རང་སྟོང་གཞན་སྟོང་བྱང་ཆུབ་རྣམ་གཉིས་སུ། །
ལེགས་པར་རྣམ་འབྱེད་ལེགས་སྟོན་ཆོས་རྗེར་འདུད། །
ཐུགས་རྗེ་ཆེན་པོའི་ཞིང་འདིར་ཐུགས་རྗེ་ཡིས། །
སྤྲུལ་པའི་སྐྱེ་མཆོག་འགྲོ་མགོན་སྤྲུལ་བའི་སྐུ། །
སྨིན་གྲོལ་གཉིས་ཀྱིས་སེམས་ཅན་སྨིན་གྲོལ་མཛད། །
ཀུན་མཁྱེན་ཆོས་ཀྱི་རྗེ་ལ་ཀུན་ནས་འདུད། །
བསྟན་དང་སེམས་ཅན་མང་པོའི་དོན་གྱི་ཕྱིར། །
བསྟན་གཙོའི་དྲུང་བྱོན་ཀུན་བཟང་མཆོད་པས་མཆོད། །
བསྟན་རྒྱས་འགྲོ་རྣམས་བདེ་བའི་གསོལ་འདེབས་མཛད། །
བསྟན་འཛིན་འགྲོ་བའི་གཉེན་གཅིག་ལ་ཕྱག་འཚལ། །
ཐུགས་རྗེ་ཆེན་པོས་འགྲོ་ཀུན་བུ་བཞིན་གཟིགས། །
ཐུགས་རྗེ་མཐུ་སྟོབས་འཕྲིན་ལས་རྨད་དུ་བྱུང་། །
ཐུགས་རྗེའི་ལམ་ལ་འགྲོ་རྣམས་འདྲེན་པར་མཛད། །
ཐུགས་རྗེའི་མངའ་བདག་ཀུན་མཁྱེན་རྗེ་ལ་འདུད། །
ཤེས་བྱ་ཀུན་མཁྱེན་ཀུན་མཁྱེན་མཆོག་རབ་ཁྱོད། །
བསྟན་པའི་རྒྱལ་མཚན་རྒྱལ་མཚན་མཆོག་གཅིག་པོ། །
དཔལ་ལྡན་བླ་མ་བླ་མ་མཆོག་ཁྱོད་ཀྱིས། །
བསྟན་པའི་ལམ་སྟོན་ལམ་སྟོན་མཆོག་ལ་འདུད། །
བ་མོས་ཕོག་པའི་པད་ཚལ་རྫི་ཆབ་དང་། །
ཉི་མའི་འོད་ཀྱིས་རབ་འབར་ཆེར་རྒྱས་ལྟར། །
གང་གི་གསུང་མཆོག་རྫི་ཆར་ཉི་འོད་ཀྱིས། །
གདུལ་བྱའི་པད་ཚལ་དགའ་སྐྱེ་རྗེ་ལ་འདུད། །
དུས་བཞིའི་མཐའ་འདིར་རྒྱལ་བའི་བསྟན་པ་ལ། །
སྐྱབས་འགྲོ་ནས་བཟུང་དགེ་སྦྱོང་བསླབ་པའི་བར། །
སེམས་བསྐྱེད་བློ་སྦྱོང་སྨིན་གྲོལ་རིམ་པ་ཡིས། །
འགྲོ་བའི་བྱང་ཆུབ་རྒྱས་པར་མཛད་ལ་འདུད། །
ཁྱད་པར་ཟབ་ལམ་རྡོ་རྗེའི་རྣལ་འབྱོར་གྱི། །
སྣོད་གྱུར་སྐལ་ལྡན་སྟོང་ཕྲག་དུ་མ་ཞིག །
ཕྱིར་མི་ལྡོག་པའི་ས་ལ་ལེགས་པར་བཀོད། །
ཐམས་ཅད་མཁྱེན་པ་བདུན་ལྡན་ཞབས་ལ་འདུད། །
སྐྱེ་མཆེད་རྣམ་རྟོག་བརྒྱད་པོ་མཐར་ཕྱིན་པས། །
ཀུན་ནས་ལྡང་བ་བརྒྱད་དང་གདོད་ནས་བྲལ། །
འཕགས་པའི་ལམ་མཆོག་བརྒྱད་པོས་འགྲོ་རྣམས་སྒྲོལ། །
རྣམ་པར་ཐར་པ་བརྒྱད་ལྡན་རྗེ་ལ་འདུད། །
ཀུན་སྦྱོར་དགུ་ཡིས་འཆིང་བས་བཅིངས་པ་རྣམས། །
སྙོམས་འཇུག་དགུ་ཡིས་ཐར་བའི་ལམ་བསྟན་ནས། །
ཡོངས་གྲུབ་དགུ་ཡིས་འབྲས་མཆོག་སྩོལ་མཛད་པའི། །
མཁྱེན་པ་དགུ་ཡིས་བདག་ཉིད་རྗེ་ལ་འདུད། །
ཆོས་ཀྱི་སྐུ་ལས་གཡོ་བ་མེད་བཞིན་དུ། །
ལོངས་སྤྱོད་སྐུ་ཡིས་ཐེག་ཆེན་ཆོས་སྒྲ་སྒྲོགས། །
སྤྲུལ་པའི་སྐུ་ཡིས་ཕྱོགས་བཅུར་འགྲོ་དོན་མཛད། །
བདེ་ཆེན་སྐུ་བཞིའི་དབང་ཕྱུག་རྗེ་ལ་འདུད། །
ཆོས་ཀྱི་དབང་ཕྱུག་ཆོས་ཀྱི་དཔལ་དུ་འབྱོར། །
ཆོས་ལ་དབང་བསྒྱུར་ཆོས་བཞིན་རྒྱལ་སྲིད་སྐྱོང་། །
ཆོས་ཀྱི་གཟི་འོད་ཆོས་ཀྱི་མཚན་དཔེས་སྤྲས། །
ཆོས་ཀྱི་རྒྱལ་པོ་ཆོས་རྗེའི་ཞབས་ལ་འདུད། །
མཐའ་བྲལ་རྟོགས་པས་ཕྱོགས་འཛིན་མཐའ་དག་ཞིག །
བསྒོམ་མེད་བསྒོམ་པས་ཆད་པའི་བསྒོམ་པ་སྤངས། །
ཆགས་མེད་སྤྱོད་པས་འཇིག་རྟེན་ཆོས་བརྒྱད་བྲལ། །
བདེ་སྟོང་དབྱེར་མེད་ཆོས་རྗེའི་ཞབས་ལ་འདུད། །
རྨི་ལམ་ལྟ་བུའི་ཐུགས་དམ་ངང་ཉིད་ནས། །
བྲག་ཅ་ལྟ་བུའི་ཐར་བའི་ལམ་སྟོན་ཅིང་། །
སྒྱུ་མ་ལྟ་བུའི་སེམས་ཅན་མ་ལུས་པ། །
སྨིག་རྒྱུ་ལྟ་བུའི་སྲིད་མཚོ་སྒྲོལ་ལ་འདུད། །
ས་བཅུའི་ས་བཞུགས་དུས་གསུམ་སེམས་ཅན་གྱིས། །
ཤེས་བཅུའི་ཤེས་སྒྲིབ་བསླབ་གསུམ་གྱིས་སྦྱངས་ནས། །
དབང་བཅུའི་དབང་ཕྱུག་གསུམ་ཐོབ་མཛད་པ་ཡི། །
སྟོབས་བཅུའི་སྟོབས་མངའ་སྐུ་གསུམ་ལྡན་ལ་འདུད། །
ཡན་ལག་བཅུ་གཉིས་ཆོས་ཀྱི་འཁོར་ལོ་ཡིས། །
རྟེན་འབྲེལ་བཅུ་གཉིས་སྲིད་པའི་རྩ་བ་བཅད། །
དུས་སྦྱོར་བཅུ་གཉིས་ཁྱིམ་གྱི་འཁོར་ལོ་འགགས། །
བདེན་དོན་བཅུ་གཉིས་ཆོས་རྗེའི་ཞབས་ལ་འདུད། །
རྫོགས་ལྡན་མདོ་རྒྱུད་བསྟན་བཅོས་ཐམས་ཅད་ལ། །
ལེགས་གསུངས་གཞན་གྱིས་གོ་རྟོགས་མ་གྱུར་པའི། །
དོན་དམ་གཞན་སྟོང་བདེ་གཤེགས་སྙིང་པོའི་དོན། །
མངོན་སུམ་སྟོན་མཛད་ཆོས་རྗེའི་ཞབས་ལ་འདུད། །
རྣམ་ཤེས་ཡེ་ཤེས་ཉོན་མོངས་རྣམ་སྦྱངས་དང་། །
ཟག་བཅས་ཟག་མེད་དྲི་བཅས་དྲི་མ་མེད། །
རྣམ་རྟོག་ཆོས་སྐུ་སེམས་ཅན་སངས་རྒྱས་སོགས། །
འཁྲུལ་གཞི་མང་པོའི་འཁྲུལ་སེལ་རྗེ་ལ་འདུད། །
ལྷ་རྣམས་ཀྱིས་ནི་མེ་ཏོག་ཆར་འབེབས་དང་། །
རྣམ་པར་བཀྲ་བའི་འཇའ་འོད་སྤོས་མཆོག་དང་། །
ནམ་མཁའ་གང་བའི་སིལ་སྙན་རོལ་མོས་མཆོད། །
ལྷ་ཡི་ལྷར་གྱུར་ཆོས་རྗེའི་ཞབས་ལ་འདུད། །
ས་གཞི་ཐམས་ཅད་བསྒྲུབ་པ་ཕོ་མོས་གང་། །
ལུས་ངག་སེམས་ལ་ཡེ་ཤེས་རྡོ་རྗེ་ནི། །
ཕེབས་པ་རྣམ་འགྱུར་དུ་མས་བསུ་བར་བྱེད། །
གྲུབ་ཆེན་རྒྱལ་པོ་ཆོས་རྗེའི་ཞབས་ལ་འདུད། །
ཡངས་པ་ལས་ཀྱང་ཡངས་པའི་ཆོས་ཀྱི་དབྱིངས། །
གསལ་བ་ལས་ཀྱང་གསལ་བའི་འོད་གསལ་ཆེ། །
ཟབ་པ་ལས་ཀྱང་ཟབ་པའི་དོན་སྟོན་པའི། །
མཁས་པ་ལས་ཀྱང་མཁས་པའི་རྗེ་ལ་འདུད། །
དབུ་མ་ཆེན་པོ་ཕྱག་རྒྱ་ཆེན་པོ་དང་། །
ཤིན་ཏུ་རྣལ་འབྱོར་རྡོ་རྗེ་རྣལ་འབྱོར་དང་། །
སངས་རྒྱས་མཉམ་སྦྱོར་ལྷན་ཅིག་སྐྱེས་སྦྱོར་སོགས། །
རྫོགས་ལྡན་ཆོས་མཆོག་སྟོན་པའི་རྗེ་ལ་འདུད། །
རྒྱལ་བ་ཀུན་ལ་བྱང་སེམས་གཅིག་བསྡུས་པས། །
འགྲོ་བ་མ་ལུས་བུ་གཅིག་ལྟར་དགོངས་ཏེ། །
དམན་པ་རྣམས་ལ་ལྷག་པར་རྗེས་འཛིན་པའི། །
ཨེ་མ་ངོ་མཚར་ཆོས་རྗེའི་ཞབས་ལ་འདུད། །
ཀུན་རྫོབ་སངས་རྒྱས་བྱོན་རུང་མ་བྱོན་རུང་། །
གང་ཟག་རྣམས་ཀྱིས་རྟོགས་རུང་མ་རྟོགས་རུང་། །
ནམ་ཡང་གང་ནའང་རྟག་ཏུ་བཞུགས་པ་ཡི། །
ཡོངས་གྲུབ་དགུ་དང་བཅུ་གཉིས་སྟོན་ལ་འདུད། །
དེ་ལྟར་རེ་ཞིག་ཡོན་ཏན་བདུན་ལྡན་ཡང་། །
ཆུ་ཡི་ཆུ་བུར་རླུང་གསེབ་མར་མེ་བཞིན། །
མི་རྟག་འཆི་བ་ནམ་ཡོད་མི་ཤེས་ཞེས། །
ལེགས་པར་སྟོན་མཛད་ཆོས་ཀྱི་རྗེ་ལ་འདུད། །
རྒྱལ་བའི་ཞིང་འདིར་དོན་གཉིས་མཐར་ཕྱིན་པས། །
རྒྱལ་བའི་སྤྲུལ་སྐུ་ཞིང་གཞན་གཤེགས་བཞེད་དེ། །
རྒྱལ་བའི་བཀའ་དང་གདམས་པ་མ་ལུས་པ། །
རྒྱལ་བའི་སྲས་རྣམས་ཚིམ་མཛད་རྗེ་ལ་འདུད། །
ཚོགས་གསུམ་མཐར་ཕྱིན་བཞེད་པ་མཐའ་དག་རྫོགས། །
མ་དག་ཞིང་འདིར་གདུལ་བྱའི་སྐལ་ཟད་པ། །
མཁྱེན་བཞིན་ངོ་མཚར་ཆོ་འཕྲུལ་དུ་མར་བཅས། །
བདེ་བ་ཅན་དུ་གཤེགས་ལ་ཕྱག་འཚལ་ལོ། །
རྒྱལ་བའི་རྒྱལ་ཚབ་བྱམས་མགོན་དྲུང་དུ་ཡང་། །
རྒྱལ་བའི་སྲས་ཁྱོད་སེམས་དཔའི་མཆོག་གྱུར་ནས། །
རྒྱལ་བའི་རྔ་ཆེན་མདོ་མཆོག་ལེགས་གསན་པ། །
རྒྱལ་བའི་སྲས་མཆོག་བསམ་མི་ཁྱབ་ལ་འདུད། །
ཤམ་བྷ་ལ་ན་བྱོན་པའི་ཆོས་ཀྱི་རྒྱལ། །
ཤམ་བྷ་ལ་ཡི་ལྷོ་ཕྱོགས་གངས་ཅན་འདིར། །
ཤམ་བྷ་ལ་ཡི་ཆོས་མཆོག་སྐྱེ་བསྟན་ནས། །
ཤམ་བྷ་ལ་ཡི་གནས་གཤེགས་ལ་ཕྱག་འཚལ། །
ཨེ་མ་ཁྱེད་སྐུ་རྟག་བརྟན་འགྱུར་མེད་ཀྱང་། །
ཀྱི་ཧུད་སྐལ་ཟད་ལྟ་བའི་ཡུལ་མ་གྱུར། །
ཨེ་མ་ཁྱེད་གསུང་ཚངས་དབྱངས་རྒྱུན་ཆད་མེད། །
ཀྱི་ཧུད་སྐལ་མེད་ཉན་པའི་ཡུལ་མ་གྱུར། །
ཨེ་མ་ཁྱེད་ཐུགས་ནམ་མཁའ་ཆེ་ལྟར་གསལ། །
ཀྱི་ཧུད་སྐལ་ཟད་མ་རིག་སྤྲིན་གྱིས་བསྒྲིབས། །
ཨེ་མ་ཁྱེད་ཀྱི་ཡེ་ཤེས་བདེ་བ་ཆེ། །
ཀྱི་ཧུད་སྐལ་དམན་སྡུག་བསྔལ་བཙོན་རར་ཚུད། །
ཀྱེ་ཧུད་ཀྱེ་ཧུད་ཀྱེ་མ་འདི་འདྲའི་དུས། །
སྐལ་དམན་རྣམས་ཀྱིས་གང་དུ་ཇི་ཞིག་ནོང་། །
བསམ་གྱིས་མི་ཁྱབ་ངོ་མཚར་ཆོས་ཀྱི་རྗེ། །
རྒྱུན་ཆད་མེད་པས་ཐུགས་རྗེས་བཟུང་དུ་གསོལ། །
སེམས་ཅན་གཅིག་གིའང་དོན་དུ་སྐལ་མང་དུ། །
བཟོད་དཀའི་དམྱལ་བར་འཇུག་པའི་ཐུགས་རྗེ་ཅན། །
སངས་རྒྱས་སྤྲུལ་བའི་ཞིང་གཞན་གཤེགས་པའི་ཚེ། །
ངོ་མཚར་མཚན་ལྟས་དུ་མ་སྟོན་ལ་འདུད། །
སྣོད་བཅུད་ཚུགས་ཉམས་བྲེད་སྔངས་ཆེན་པོ་གཡོས། །
རྒྱ་མཚོ་འཚོལ་བས་ནོར་བུ་ས་སྟེང་ཐོན། །
འོད་ལྡན་དེ་ཡིས་ཀུན་ཏུ་ཉལ་ལམ་ཅི། །
འོད་ཆེན་རྣམ་པར་སྣང་མཛད་རྗེ་ལ་འདུད། །
ཡང་ན་སྲིད་རྩེ་མང་བཅད་ཆེར་གཡོས་པས། །
ལྷ་ཡི་སྤོས་དང་མེ་ཏོག་རང་ཟག་ཤིང་། །
རྔ་ཆེན་འདར་བས་རང་སྒྲ་སྒྲོགས་སམ་ཅི། །
ཕྱོགས་བཅུར་ཆོས་ཀྱི་སྒྲ་ཆེན་སྒྲོགས་ལ་འདུད། །
རྒྱལ་བའི་བདུད་རྩི་སྤྱི་བོར་ལུད་པ་ལ། །
ཐོབ་འདོད་སྐྱེས་པས་བརྒྱ་བྱིན་ཉེག་བྱེད་དམ། །
གསང་བ་བསྡུ་ཞུགས་ཡ་མཚན་ལྟ་བའི་ཕྱིར། །
ལྷ་ཡི་ཚོགས་ཀྱིས་གུས་པས་མཆོད་ལ་འདུད། །
བསྟན་པའི་སྒྲོན་མེ་སྨག་ཏུ་གྱུར་པ་ལ། །
ནམ་མཁའི་ནོར་བུས་མ་བཟོད་དྲན་ཉམས་ཏེ། །
ས་ལ་ལྷུང་བས་ཆུ་གྱེན་མ་ལོག་གམ། །
རྣམ་འཕྲུལ་བསམ་མི་ཁྱབ་པའི་རྗེ་ལ་འདུད། །
དེ་ལྟའི་མཚན་ལྟས་རྨད་བྱུང་མཐའ་ཡས་པ། །
ནམ་མཁའི་ཚང་འདོད་སུ་ཞིག་འདོམས་ཀྱིས་འཇལ། །
བདེ་བར་གཤེགས་ཏེ་ཡོན་ཏན་རྨད་བྱུང་བས། །
བརྟག་པར་དཀའ་བའི་ཆོས་ཀྱི་རྗེ་ལ་འདུད། །
དེ་སྲས་སློབ་མ་བསྟན་པའི་ཁུར་འཛིན་པ། །
ས་བདག་ཆེན་པོ་དེ་དག་དཔོན་སློབ་ཀྱིས། །
དད་བརྩོན་བློ་གྲོས་གཏོང་ཕོད་ཆེན་པོ་ཡིས། །
རྒྱུན་ཆད་མེད་པར་མཆོད་པའི་རྗེ་ལ་འདུད། །
ཆོས་རྗེ་ཉིད་ཀྱི་གཙོ་མཛད་མཆོད་ཡུལ་ནི། །
དུས་གསུམ་རྒྱལ་བ་སྲས་བཅས་ཡི་དམ་ལྷ། །
མཁའ་འགྲོ་ཆོས་སྐྱོང་མཁའ་དབྱིངས་ཁྱབ་པ་ཡིས། །
ཕྱོགས་བཅུར་གཞན་དོན་མཛད་པའི་རྗེ་ལ་འདུད། །
མཆོད་པའི་རྫས་ནི་ཀུན་བཟང་མཆོད་སྤྲིན་གྱིས། །
རྒྱལ་བ་བཞུགས་ལ་མངོན་སུམ་མཆོད་པ་བཞིན། །
ཕྱི་ནང་གསང་བ་བླ་ན་མེད་པ་ཡི། །
མཆོད་སྤྲིན་རྒྱ་མཚོ་མཆོད་པའི་རྗེ་ལ་འདུད། །
ཆོས་རྗེའི་སྐུ་གདུང་རིང་བསྲེལ་ཕུང་པོར་གྱུར། །
ཨེ་མ་ངོ་མཚར་ཀུན་མཁྱེན་ཆོས་རྗེ་ཡི། །
སྐུ་གསུང་ཐུགས་དང་ཡེ་ཤེས་ཡོན་ཏན་གྱི། །
མཛད་པའི་ཕྲིན་ལས་རྣམ་འཕྲུལ་མཆོག་ལ་འདུད། །
རབ་འབྱམས་ཞིང་དུ་མཛད་པ་ཇི་སྲིད་པར། །
རྒྱལ་དང་རྒྱལ་སྲས་རང་རྒྱལ་དགྲ་བཅོམ་སོགས། །
རྣམ་འཕྲུལ་དུ་མས་འགྲོ་བ་མ་ལུས་འདུལ། །
གསང་གསུམ་མི་ཟད་རྒྱན་འཁོར་ལ་ཕྱག་འཚལ། །
ཁྱེད་ལ་རེ་ལྟོས་གདུང་བའི་སེམས་ཅན་རྣམས། །
ཕྱག་འཚལ་མཆོད་ཅིང་གསོལ་བ་འདེབས་པའི་རྟེན། །
སྐུ་གསུང་ཐུགས་དང་ཡེ་ཤེས་ངོ་བོ་ཉིད། །
སྐུ་བཞིའི་བདག་ཉིད་རྟེན་མཆོག་རྣམས་ལ་འདུད། །
ཁྱོད་ཀྱི་སྐུ་འབུམ་སྐུ་གཟུགས་གཞལ་ཡས་ཁང་། །
མདོ་རྒྱུད་བསྟན་བཅོས་བཀའ་འབུམ་ཁྱད་འཕགས་སོགས། །
དཔག་ཡས་ཐུགས་དམ་བཞེངས་པའི་ཕྲིན་ལས་ཀྱིས། །
འགྲོ་ལ་རྣམ་དག་ལེགས་ལམ་སྟོན་ལ་འདུད། །
ཁྱོད་ཀྱི་སྐུ་གསུང་ཐུགས་དང་ཡེ་ཤེས་རྟེན། །
མཐོང་ཐོས་རེག་པའང་འཁོར་བ་ལས་ཐར་ན། །
བཀའ་བཞིན་བསྒྲུབ་རྣམས་སྨོས་ཀྱང་ཇི་ཞིག་འཚལ། །
དེ་སླད་ཁྱོད་ལ་ཕྱག་འཚལ་སྐྱབས་སུ་མཆི། །
ཁྱོད་ནི་རྒྱལ་བ་རྒྱ་མཚོ་ཀུན་གྱི་དངོས། །
ཆོས་ཀྱི་སྒོ་མོ་རྒྱ་མཚོ་འབྱུང་བའི་གནས། །
འཕགས་པའི་དགེ་འདུན་རྒྱ་མཚོའི་གཙུག་རྒྱན་ཏེ། །
སྐྱབས་གསུམ་རོ་གཅིག་རྒྱ་མཚོ་ལ་ཕྱག་འཚལ། །
བདག་ནི་སྐྱབས་གནས་གཞན་པས་ཆེས་མཆོག་ཏུ། །
ཆེས་ཆེར་ལྷག་པར་དད་པའི་རྒྱུ་ཅིས་ན། །
མདོ་རྒྱུད་དུ་མར་རྣམ་གྲངས་མང་པོ་ཡིས། །
སངས་རྒྱས་བས་ཀྱང་བླ་མ་ལྷག་པར་གསུངས། །
ཁྱེད་ཀྱི་ཕུང་པོ་དྲུག་ནི་རྒྱལ་བ་དྲུག །
ཁམས་དྲུག་གཤེགས་མ་དྲུག་དང་དབང་པོ་དྲུག །
སེམས་དཔའ་དྲུག་དང་ཡུལ་དྲུག་སེམས་མ་དྲུག །
ལས་དབང་དྲུག་པོ་ཁྲོ་བོ་རྒྱལ་པོ་དྲུག །
ལས་དབང་ཡུལ་དྲུག་ཁྲོ་མོ་དྲུག་ཏུ་གསུངས། །
ཁྱེད་ཀྱི་སྐུ་ལ་རྟེན་དང་བརྟེན་པ་ཡི། །
དཀྱིལ་འཁོར་པ་རྣམས་ཐམས་ཅད་འདུས་པའི་ཕྱིར། །
ཁྱེད་ནི་སངས་རྒྱས་འདུས་པའི་སྐུ་རུ་གསུངས། །
དེ་ཕྱིར་འཁོར་བའི་སྡུག་བསྔལ་དྲན་པས་བདག །
སྒོ་གསུམ་དང་བས་ཕྱག་འཚལ་སྐྱབས་སུ་མཆི། །
ཀུན་བཟང་མཆོད་སྤྲིན་མཁའ་དབྱིངས་ཁྱབ་པས་མཆོད། །
སྡིག་པ་ཀུན་བཤགས་དགེ་ལ་རྗེས་ཡི་རངས། །
ཆོས་འཁོར་བསྐོར་ཞིང་རྟག་ཏུ་བཞུགས་གསོལ་འདེབས། །
དགེ་བ་གང་བསགས་བྱང་ཆུབ་ཆེན་པོར་བསྔོ། །
དེ་ལྟར་ཆོས་རྗེའི་ཡོན་ཏན་རྒྱ་མཚོ་ལས། །
བདག་བློས་སྐྲ་རྩེ་བརྒྱར་གཤགས་རྩེ་ལྟ་བུ། །
ཆུ་ཐིགས་ཙམ་ཞིག་འདིར་ནི་གང་བླངས་པ། །
བདག་བློ་དང་དབང་ལས་བྱུང་ཉེས་མཆིས་ན། །
ཆོས་རྗེ་རྒྱལ་བ་སྲས་བཅས་བསྲུང་མའི་ཚོགས། །
ཇི་སྙེད་མཁྱེན་གཟིགས་རྣམས་ལ་བཟོད་པར་གསོལ། །
རྒྱལ་བའི་རྒྱལ་མཚན་ཀུན་མཁྱེན་ཆོས་རྗེ་འདི། །
ཆོས་ཀྱི་དབྱིངས་ལས་ནམ་ཡང་མི་གཡོ་བཞིན། །
འགྲོ་བའི་དོན་མཛད་སྐད་ཅིག་རེ་རེ་ཡང་། །
སེམས་ཅན་བགྲང་ཡས་སྨིན་གྲོལ་མཛད་ལ་འདུད། །
རྟག་འཛིན་ཅན་རྣམས་རྟག་འཛིན་དགྲོལ་བའི་ཕྱིར། །
གཤེགས་ཚུལ་གསོལ་འདེབས་འོད་ཀྱིས་ཁྱབ་པ་དང་། །
སྐུ་གདུང་རིང་བསྲེལ་ངོ་མཚར་ལྟས་ཀྱིས་ཀྱང་། །
མཐོང་ཐོས་དྲན་རེག་གྲོལ་བར་མཛད་ལ་འདུད། །
སངས་རྒྱས་མྱ་ངན་འདས་པའི་དུས་སུ་ཡང་། །
བ་ལང་བདག་ལ་སོགས་པའི་འཕགས་པ་འགའ། །
མྱ་ངན་མི་བཟོད་རྫུ་འཕྲུལ་མིག་སྔར་ནས། །
རྒྱལ་བའི་རྗེས་སུ་མྱ་ངན་འདས་པ་ལྟར། །
ཆོས་རྗེའི་རྗེས་སུ་ཆོས་རྗེའི་ཐུགས་སྲས་མཆོག །
བྱང་ཆུབ་སེམས་དཔའ་མཁན་ཆེན་སྣར་ཐང་བས། །
གཙོ་མཛད་བསྟན་འཛིན་མཆོག་རྣམས་རིམ་གྱིས་གཤེགས། །
རླུང་སེམས་དབང་འབྱོར་འགའ་ཡང་ཆོས་དབྱིངས་བཞུགས། །
ཚད་མེད་བཞི་ཡི་འཁོར་ལོ་མྱུར་འགྲོ་ཞིང་། །
ཤེས་རབ་གསུམ་གྱི་འོད་ཟེར་སྟོང་ལྡན་པའི། །
བདེ་གཤེགས་སྙིང་པོ་ནོར་བུའི་སྙིང་པོ་ཅན། །
སྐུ་མཆོག་བྲི་བར་བྱེད་པའི་དཀྱིལ་འཁོར་ནུབ། །
བསྟན་པའི་རྒྱ་མཚོའི་དབུས་ནས་འཐོར་བྱེད་ཅིང་། །
མཁས་མཆོག་ཀླུ་དབང་ཚོགས་ཀྱིས་ཉེར་བསྟེན་ནས། །
གཞན་སྟོང་ཆོས་སྒྲའི་འོད་སྟོང་ཆེར་འཕྲོ་བའི། །
གསུང་མཆོག་རྒྱལ་མཚན་ཡིད་བཞིན་ནོར་བུ་སྟོར། །
འགྱུར་མེད་བདེ་ཆེན་ཆོས་དབྱིངས་ཡངས་པའི་མཁར། །
ཟུང་འཇུག་ཉི་ཟླའི་དཀྱིལ་འཁོར་རབ་རྒྱས་ཏེ། །
སྲིད་ཞིའི་མུན་སེལ་དཔལ་འབྱོར་བཟང་པོ་ཅན། །
ཐེག་མཆོག་བདུད་ཀྱི་ཆུ་འཛིན་འཐུག་པོས་བསྒྲིབས། །
ཀྱེ་མ་མགོན་ཁྱོད་མཐོང་བའི་ཐབས་ཚུལ་བྲལ། །
འོན་ཀྱང་ཁྱེད་ཀྱི་ཐུགས་རྗེ་ཆེར་བཟུང་ནས། །
དག་པའི་ཞིང་མཆོག་བདེ་བ་ཅན་ཉིད་དུ། །
སྐུ་བཞིའི་ངང་དུ་མཇལ་བར་བྱིན་གྱིས་རློབས། །
གནས་སྐབས་ཀུན་ཏུ་འཕགས་པའི་རིགས་མཆོག་ཏུ། །
དལ་འབྱོར་མཆོག་ཐོབ་མཐོ་རིས་ཡོན་ཏན་རྫོགས། །
འཕགས་པའི་ནོར་བདུན་རྣམས་ཀྱི་ལེགས་བརྒྱན་ཅིང་། །
ས་དང་ལམ་གྱི་ཡོན་ཏན་ཀུན་འགྲུབ་ཤོག །
ཆོས་རྗེས་རྟག་ཏུ་རྗེས་སུ་འཛིན་པ་དང་། །
ཆོས་རྗེའི་རྣམ་ཐར་རྒྱུན་དུ་སྐྱོང་བ་དང་། །
ཆོས་རྗེའི་སྨོན་ལམ་ཁྱད་འཕགས་བཏབ་པ་རྣམས། །
ཆོས་རྗེ་ལྟ་བུར་བདག་གིས་འགྲུབ་པར་ཤོག །
ཆོས་རྗེ་རྒྱལ་བ་སྲས་བཅས་མཐུ་སྟོབས་དང་། །
དོན་དམ་གཞན་སྟོང་ཆེན་པོའི་བྱིན་རླབས་དང་། །
བདག་གིས་དད་གུས་ལྷག་བསམ་དག་པའི་མཐུས། །
སྨོན་ལམ་འདི་དག་མྱུར་དུ་འགྲུབ་གྱུར་ཅིག །
དེང་ནས་བཟུང་ནས་སྐྱེ་བ་ཐམས་ཅད་དུ། །
ཆོས་རྗེའི་ཞབས་དྲུང་འབྲལ་མེད་མཉེས་བྱེད་ཅིང་། །
ཁྱོད་ཀྱི་ཡོན་ཏན་ཕྱོགས་བཅུར་སྒྲོགས་པ་དང་། །
སྲས་ཀྱི་ཐུ་བོ་ཉིད་དུ་བདག་གྱུར་ཅིག །
བཀྲ་ཤིས་མཁྱེན་བཞིའི་ཆོས་རྗེའི་བཀྲ་ཤིས་ཤོག །
བཀྲ་ཤིས་སྐུ་བཞིའི་རྒྱལ་བའི་བཀྲ་ཤིས་ཤོག །
བཀྲ་ཤིས་སྡོམ་བཞིའི་ཆོས་དབྱིངས་བཀྲ་ཤིས་ཤོག །
བཀྲ་ཤིས་ཆོས་བཞིའི་ཚོགས་ཀྱི་བཀྲ་ཤིས་ཤོག །
ཆོས་རྗེ་ཐམས་ཅད་མཁྱེན་པའི་རྣམ་ཐར་གྱི་སྒོ་ནས་བསྟོད་པ་ཡོན་ཏན་གསལ་བའི་ཉི་འོད་ཅེས་བྱ་བ་ཐང་ཆེན་པ་ཀུན་དགའ་འབུམ་གྱིས་སྦྱར་བའོ།། །།མངྒ་ལཾ། ཤུ་བྷཾ།
༄༅། །ཆོས་ཀྱི་རྗེ་ཐམས་ཅད་མཁྱེན་པ་ལ་བསྟོད་པ་ནོར་བུའི་འཕྲེང་བ་བློ་གྲོས་དཔལ་གྱིས་མཛད་པའོ། །
༄༅། །ན་མོཿགུ་རུ་ཝེ།
ཐུབ་པ་གཉིས་པ་ཀུན་མཁྱེན་ཆོས་ཀྱི་རྗེ། །
རྩོད་དུས་བསྟན་པའི་སྒྲོན་མེར་སྐུར་བཞེངས་ནས། །
ལྟ་ངན་ཚར་བཅད་བསྟན་པའི་རྒྱལ་མཚན་བཙུགས། །
རིགས་ལྡན་སྤྲུལ་པའི་ཀུན་མཁྱེན་ལ་ཕྱག་འཚལ། །
ལི་ཙཱ་བི་ཉིད་ཀླུ་སྒྲུབ་ཏུ་གྱུར་ནས། །
བསྟན་པའི་སྲོལ་འབྱེད་བདེན་གཉིས་རྣམ་དབྱེ་དང་། །
ཡོད་མེད་མཐའ་འགོག་བསྟོད་ཚོགས་རིགས་ཚོགས་གསུངས། །
ཚོགས་གཉིས་ཟུང་འཇུག་མཆོད་རྟེན་བྱེ་བ་བཞེངས། །
བར་སྐབས་འབྲི་གུང་ཆོས་རྗེར་ཚུལ་བསྟན་ནས། །
དགོངས་གཅིག་བཀའ་འབུམ་བདེན་གཉིས་རྣམ་དབྱེ་གསུངས། །
རང་བཞེད་གཞན་བཞེད་ཡིན་ལུགས་གཏན་ལ་ཕབ། །
རྟེན་གསུམ་ཁྱད་འཕགས་བཀྲ་ཤིས་སྒོ་མང་བཞེངས། །
ད་ལྟ་ཀུན་མཁྱེན་ཆོས་རྗེར་སྐུར་བཞེངས་ནས། །
བདེན་གཉིས་རྣམ་དབྱེ་བསྟན་པའི་གཤགས་རལ་མཛད། །
འབྲས་བུ་འོད་གསལ་དུ་མ་རོ་གཅིག་བསྟན། །
ཚོགས་གཉིས་ཟུང་འཇུག་སྐུ་འབུམ་ཆེན་མོ་བཞེངས། །
རྔ་བོ་ཆེ་དང་མདོ་རྒྱུད་དུ་མ་རུ། །
རྟོན་པ་བཞི་ལྡན་བདུན་ལྡན་ཞེས་དང་ནི། །
ཀུན་མཁྱེན་ཞེས་སུ་རྒྱལ་བས་ལུང་བསྟན་པའི། །
སྤྱན་རས་གཟིགས་སྤྲུལ་དེ་ལ་ཕྱག་འཚལ་ལོ། །
དགེ་བས་མཁའ་མཉམ་སེམས་ཅན་ཕ་མ་རྣམས། །
ཉོན་མོངས་དུག་ལྔའི་དགྲ་ལས་རབ་རྒྱལ་ནས། །
འབྲས་བུ་ཆོས་དབྱིངས་སྐུ་གསུམ་མངོན་གྱུར་ཤོག །
སྐུ་གཉིས་ཐོབ་ནས་དོན་གཉིས་མ་གྲུབ་པར། །
ཀུན་མཁྱེན་ཡབ་སྲས་ལྟ་བུའི་བླ་མ་དང་། །
སྐྱེ་བ་ཀུན་ཏུ་འབྲལ་མེད་འགྲོགས་པ་དང་། །
ཆོས་ཆུ་ཞིབ་མོ་རྟག་ཏུ་འཐུང་བར་ཤོག །
ཆོས་རྗེ་ཐམས་ཅད་མཁྱེན་པ་ལ་བསྟོད་པ་ནོར་བུའི་འཕྲེང་བ་ཐང་པོ་ཆུང་བ་བློ་གྲོས་དཔལ་བས་སྦྱར་བའོ། །སརྦ་མངྒ་ལཾ། ཤུ་བྷཾ།
༄༅། །ཆོས་ཀྱི་རྗེ་ཐམས་ཅད་པ་ལ་བསྟོད་པ་ངོ་མཚར་རྟོགས་བརྗོད་ཅེས་བྱ་བ་བྷ་བྲོམ་པས་མཛད་པའོ། །
༄༅། །ན་མཿཤྲཱི་ཀ་ལ་ཙཀྲ་ཡ།
གང་གིས་མཐོང་ཐོས་རེག་པ་ཙམ་གྱིས་ཀྱང་། །
ཉོན་མོངས་ནད་དང་མྱ་ངན་ཀུན་སེལ་ཞིང་། །
དགའ་བདེའི་དཔལ་གྱིས་འགྲོ་རྣམས་ཚིམ་མཛད་པའི། །
གཞོན་ནུ་རོལ་རྩེད་ཆོས་རྗེའི་ཞབས་ལ་འདུད། །
ཡོན་ཏན་རྒྱ་མཚོ་ནོར་བུ་རིན་ཆེན་ནི། །
ཤེས་རབ་རྒྱ་མཚོ་རྒྱལ་བའི་མཚན་ཅན་གྱིས། །
མདོ་རྒྱུད་རྒྱ་མཚོའི་གཟིངས་སུ་ལེགས་ཞུགས་ནས། །
སེམས་འགྲེལ་རྒྱ་མཚོའི་ཐབས་ཀྱི་འདྲེན་ལ་འདུད། །
ཆོས་རྗེ་ཡོན་ཏན་རྒྱ་མཚོ་ཆོས་རྒྱལ་དེས། །
ཆོས་ཀུན་བདག་པོར་ལུང་བསྟན་ཆོས་རྗེ་ལ། །
ཆོས་ཀྱི་རིན་ཆེན་ནོར་དང་ཆོས་མཛོད་གཏད། །
ཆོས་ཀྱི་དབང་ཕྱུག་ཆོས་རྗེའི་ཞབས་ལ་འདུད། །
མཐའ་དྲུག་ཚུལ་བཞིའི་དོན་ལ་མངའ་བརྙེས་པས། །
མཐའ་དྲུག་ཚུལ་བཞིའི་ཆོས་ཀྱི་སྒོ་ཕྱེས་ནས། །
མཐའ་དྲུག་ཚུལ་བཞིའི་དོན་རྣམས་ལེགས་སྟོན་པའི། །
མཐའ་དྲུག་ཚུལ་བཞིའི་བདག་ཉིད་རྗེ་ལ་འདུད། །
རྒྱལ་བའི་རིང་བསྲེལ་མང་པོ་གཙོར་བྱས་ནས། །
ངོ་མཚར་རྟེན་གསུམ་མང་པོས་རབ་གང་ཞིང་། །
བཀྲ་ཤིས་མཆོད་རྫས་མང་པོ་བརྒྱན་པ་ཡི། །
སྐུ་འབུམ་ཆེན་པོ་འཛམ་གླིང་རྒྱན་ལ་འདུད། །
རྒྱལ་དང་རྒྱལ་སྲས་རྣམས་ཀྱི་བཀའ་བཞིན་དུ། །
དེ་དང་དེ་ཡི་ཁམས་དང་བསམ་པ་བཞིན། །
ཆོས་དང་ཆོས་ཉིད་ལེགས་པར་ཕྱེ་ནས་སུ། །
སྟོན་མཛད་སྟོན་པ་ཀུན་མཁྱེན་རྗེ་ལ་འདུད། །
ལྷ་རྣམས་ཀྱིས་ཀྱང་མེ་ཏོག་ཆར་འབེབས་ཤིང་། །
རྣམ་པར་བཀྲ་བའི་འཇའ་འོད་སྤོས་མཆོག་དང་། །
ནམ་མཁའ་གང་བའི་སིལ་སྙན་རོལ་མོས་མཆོད། །
ལྷ་ཡི་ལྷར་གྱུར་ཆོས་རྗེའི་ཞབས་ལ་འདུད། །
ཚོགས་གཉིས་མཐར་ཕྱིན་བཞེད་པ་མཐའ་དག་རྫོགས། །
མ་དག་ཞིང་འདིར་གདུལ་བྱའི་སྐལ་ཟད་པས། །
མཁྱེན་བཞིན་ངོ་མཚར་ཆོ་འཕྲུལ་དུ་མར་བཅས། །
བདེ་བ་ཅན་དུ་གཤེགས་ལ་ཕྱག་འཚལ་ལོ། །ཆོས་ཀྱི་རྗེ་ཐམས་ཅད་མཁྱེན་པ་ལ་བསྟོད་པ་ངོ་མཚར་རྟོགས་བརྗོད་ཅེས་བྱ་བ་བྷ་བྲོམ་པ་ནམ་མཁའ་རྒྱལ་གྱིས་སྦྱར་བའོ།། །།ཤུབྷཾ།