རྩོམ་པ་པོ། སོན་པ།
བླ་མ་དང་ངོ་བོ་དབྱེར་མ་མཆིས་པ་ཁམས་གསུམ་ཆོས་ཀྱི་རྒྱལ་བོ་ཀུན་མཁྱེན་དོལ་པོ་སངས་རྒྱས་ཤེས་རབ་རྒྱལ་མཚན་དཔལ་བཟང་པོ་ཡབ་སྲས་བརྒྱུད་པར་བཅས་ལ་མགོ་བོས་ལན་བརྒྱར་ཕྱག་འཚལ་ཞིང་སྐྱབས་སུ་མཆིའོ། རྒྱུད་བྱིན་གྱིས་བརླབ་ཏུ་གསོལ། དུས་ནམ་ཀུན་ཏུ་ཐུགས་བརྩེ་བ་ཆེན་པོས་རྗེས་སུ་བཟུང་དུ་གསོལ།
འདིར་བརྗོད་འདོད་པའི་ཉིང་དགོས་ནི་ས་བཅད་གསུམ་གྱི་ནང་དུ་འདུས་པར་བྱས་ནས་བཤད་ཡོད་ལ།
དེ་ཡང་དང་པོ་གཙང་གི་ཇོ་མོ་ནང་ཀུན་སྤངས་ཐུགས་རྗེ་བརྩོན་འགྲུས་ཀྱི་གདན་ས་མཛད་ཚུལ། གཙང་གི་ཇོ་མོ་ནང་འདིར་ཐོག་མར་ཀུན་སྤངས་ཐུགས་རྗེ་བརྩོན་འགྲུས་ཀྱིས་གདན་ས་མ་མཛད་པའི་སྔ་རོལ་དུ་ཨུ་རྒྱན་གྱི་སློབ་དཔོན་ཆེན་མོ་པདྨ་འབྱུང་གནས་བོད་ཡུལ་དུ་ཕེབས་ནས་བོད་ཁམས་སྐྱོང་བའི་བརྟན་མ་བཅུ་གཉིས་ཀྱི་གནས་རྣམས་ཞབས་ཀྱིས་བཅགས་ཤིང་བྱིན་གྱིས་རླབས། རིམ་པར་ཇོ་མོ་ནགས་སྨན་རྒྱལ་མོའི་དབེན་གནས་སུ་ཕེབས་ནས་སྒྲུབ་བརྒྱུད་བསྟན་པའི་གདུགས་དཀར་འཛིན་མའི་ཁྱོན་ཀུན་ལ་ཁྱབ་པའི་དཔལ་གྱི་ཆོས་སྡེ་ཆེན་མོ་ད་ལྟ་དཔལ་ལྡན་རྒྱལ་བ་ཇོ་ནང་བའི་རི་ཁྲོད་ཆེན་མོ་གཙང་གི་ཇོ་མོ་ནང་ཞེས་ཡོངས་སུ་གྲགས་ཤིང་གྲུབ་པའི་གནས་མཆོག་དེ་རུ་བཞུགས་ནས་སྒྲུབ་པ་རྩེ་གཅིག་གིས་མཛད། གཞན་ཡང་གནས་མཆོག་དེ་རུ་དྲང་སྲོང་རིག་འཛིན་གྱི་སར་གཤེགས་པའི་སྣུབས་ཆེན་ནམ་མཁའི་སྙིང་པོ། ངམ་བྲེ་ཀླུའི་རྒྱལ་མཚན། སྣ་ནམ་པ་ཚུལ་ཁྲིམས་འབྱུང་གནས། འབྲོག་མི་ལོ་ཙཱ་བའི་སློབ་མ། མོ་གྲུབ་པ་ཐོབ་པ་བཞིའི་གཙོ་མོ་སྒོམ་སྒྲུབ་ལ་གུས་རྟགས་ལྷོད་མེད་བགྱིས་མཐར་འཇའ་ལུས་ཆོས་སྐུར་འགྲུབ་པའི་བཟང་སྒོམ་དཀོན་མཆོག་དང་མ་ཅིག་སངས་རྒྱས་རི་མ། འདར་འཕྱར་སོགས་གྲུབ་པ་ཐོབ་པའི་སྐྱེས་ཆེན་དུ་མའི་དབེན་གནས་ཉམས་དགའི་བསྟི་གནས་སུ་བསྟེན་ནས་སྒྲུབ་བ་ལྷུར་ལེན་གྱིས་བཞུགས། གྲུབ་པ་མཆོག་གི་གོ་འཕང་བརྙེས་པ་མང་དུ་བྱུང་།
དེ་རྗེས་ཟིན་ཙམ་ནས་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་ཉམས་ལེན་བྱིན་རླབས་དོན་བརྒྱུད་ཀྱི་རིམ་པ་རྒྱ་གར་གྱི་གྲུབ་ཆེན་དུས་ཞབས་པ་ཆེན་པོ་ནས་བརྩིས་པའི་ཐུན་མིན་སྙན་བརྒྱུད་ཀྱི་གདམས་ངག་ཞལ་ཤེས་པ་རྡོ་རྗེ་སློབ་དཔོན་བཅོ་ལྔ་བ་རྒྱལ་བ་ཇོ་ནང་བའི་གདན་རབས་དང་པོ། རིག་ལྡན་སྤྲུལ་བའི་སྐུ་མངོན་དུ་གྱུར་བ་ཀུན་སྤངས་ཐུགས་རྗེ་བརྩོན་འགྲུས་ཕྱི་ལོ་ཆིག་སྟོང་ཉིས་བརྒྱ་ཞེ་གསུམ་ལོར་མདོག་གི་དང་བ་ཕྱར་དུ་སྐུ་འཁྲུངས། མདོ་སྔགས་གཞུང་ལུགས་ཀུན་ལ་བློ་གྲོས་ཀྱི་སྣང་བ་མཆོག་ཏུ་རྒྱས་ནས་མདོ་སྔགས་ཐམས་ཅད་ལ་ནང་བྱན་ཆུད་པར་བྱས། ཆུ་མིག་པ་སེང་གེ་དཔལ་སོགས་མཁས་སྙན་གྱི་གྲགས་པ་མཐོ་བ་རྣམས་ཟིལ་གྱིས་མནན། བར་སྐབས་ཤིག་ན་བོད་ཁམས་སྐྱོང་བའི་བརྟན་མ་བཅུ་གཉིས་ཀྱི་གཙོ་མོ་ནགས་སྨན་རྒྱལ་མོས་ཇོ་ནང་དུ་ཆིབ་སྒྱུར་གནང་རྒྱུའི་ཞུ་བ་ཡང་ཡང་བྱས་ཀྱང་རེ་ཞིག་དུས་སུ་མ་བབས་པས་མི་འཚལ་གསུངས། ལོ་གསུམ་གྱི་རྗེས་ནས་ཕེབས་ཞེས་ཁས་འཆེ་ཞིང་དང་དུ་བླང་པ་ལྟར་ཕྱི་ནང་རྟེན་འབྲེལ་གྱི་སྒོ་ཀུན་ནས་འགྲིག་སྟེ་ལོ་གསུམ་གྱི་མཚམས་སུ་སྤྱི་བྲག་ནགས་གསུམ་གྱི་མཁན་སློབ་ཀུན་གྱིས་གསོལ་བ་བཏབ་ཅིང་གུས་པའི་རྣམ་འགྱུར་ཀུན་གྱིས་ཆེད་ཞུ་ནན་གྱིས་བྱས་པའི་མཐུ་མངོན་དུ་བྱས་ཏེ་ཇོ་ནང་རི་ཁྲོད་དུ་ཆགས་ཕབ་མཛད།དེ་ནས་བཟུང་སྔར་གྱི་སྒྲུབ་གྲྭའི་རྒྱུན་མ་ཆད་པར་རྒྱ་གར་གྱི་མ་ཧཱ་པཎྚིཏ་ཆེན་མོ་གྲུབ་ཆེན་དུས་ཞབས་པ་ཆེན་པོས་བྱང་ཤམྦྷ་ལ་ནས་གདན་དྲངས་པའི་དུས་འཁོར་སྦྱོར་བ་ཡན་ལག་དྲུག་གི་སྒྲུབ་བརྒྱུད་བར་མ་ཆད་པར་ཆུ་བོའི་རྒྱུན་བཞིན་མུ་ནས་མུ་རུ་འབྱུང་བའི་ཉམས་ལེན་གྱི་གདམས་པའི་གསང་མཛོད་དུ་གྱུར། སྤྱི་ལོ་ཆིག་སྟོང་ཉིས་བརྒྱ་གོ་གསུམ་པའི་ས་བྱི་ལོ་ནས་བཟུང་ཀུན་སྤངས་པ་ཆེན་པོ་ཐུགས་རྗེ་བརྩོན་འགྲུས་ཀྱི་གདན་ས་ལོ་ཉེར་གཅིག་ཙམ་ལ་མཛད་ནས་རང་རེའི་མེ་ཏོག་ལྷ་བབ་ཀྱི་ལྷ་སྐལ་དཔལ་ལྡན་རྒྱལ་བ་ཇོ་ནང་པའི་གྲུབ་མཐར་གནས་ཀྱི་མིང་གྲུབ་མཐའི་མཚན་དུ་ཆགས་ནས་ཇོ་ནང་ཞེས་ཡོངས་སུ་གྲགས་པ་ཡིན་ནོ།། དེ་ནས་ཀུན་བྱ་བཞི་གྲགས་པ་བྱུང་། ཕྱིས་སུ་བྱང་སེམས་རྒྱལ་བ་ཡེ་ཤེས་གདན་ས་བསྐོས། ཀུན་སྤང་ཐུགས་རྗེ་བརྩོན་འགྲུས་ནས་མཁས་གྲུབ་བློ་གྲོས་རྣམ་རྒྱལ་བར་དུ་གདན་ས་འཛིན་པའི་སྐྱེས་ཆེན་སུམ་བཅུ་ཙམ་བྱུང་བ་དེ་དག་གི་རིང་ལ་ཆོས་འཆད་ཉན་དང་སྒོམ་ཉམས་ལེན་ལ་གུས་པ་ལྷུར་གྱིས་བཞེས་པའི་མཁས་མཆོག་མང་དུ་བྱུང་།
གཉིས་པ་འཛི་ཀའི་ཛཾ་ལྷའི་ཐང་དུ་དྲུང་བ་སྐུ་འཕྲེང་དང་བོ་རཏྣ་ཤྲཱིའམ་རིན་ཆེན་དཔལ་གྱིས་གདན་ས་མཛད་ཚུལ། དཔལ་ལྡན་རྒྱལ་བ་ཇོ་ནང་བའི་སྒྲུབ་བརྒྱུད་ཀྱི་ཤིང་རྟ་ཆེན་མོ་མཐར་ཐུག་ཐུན་མོང་མ་ཡིན་པའི་ལྟ་བའི་གདངས་ཀྱི་ང་རོ་སེང་སྐད་བཞིན་སྒྲོག་ཅིང་དབུ་མ་པར་རློམ་པ་མང་དག་ཅིག་གི་སྙིང་ཁམས་ཟུག་རྔུ་འབྱིན་པར་བྱེད་པ་སེམས་འགྲེལ་སྐོར་གསུམ་གྱི་མན་ངག་ལ་བརྟེན་ནས་ཐུགས་ཉམས་སྣང་དང་ལག་ལེན་དངོས་ཐོག་ཏུ་བྱུང་བ། ལྟ་བའི་བཤད་སྲོལ་གསར་དུ་རྒྱ་ཆེར་གསལ་བར་མཛད་པ་པོ་རྒྱལ་བའི་ལུང་བསྟན་ཀུན་མཁྱེན་དོལ་པོ་སངས་རྒྱས་ཤེས་རབ་རྒྱལ་མཚན་དཔལ་བཟང་བོ་སྐུ་མྱ་ངན་ལས་འདའ་བའི་ཚུལ་ལ་ཞུགས་ཁར་མ་འོངས་ལུང་བསྟན་གྱི་ཚུལ་དུ། ཆོས་ཀྱི་འོད་སྟོང་རཏྣའི་མཚན་གྲགས་པ།། མདོ་ཁམས་ཚ་བ་རོང་དུ་འབྱུང་བར་འགྱུར།། ཞེས་ལུང་བསྟན་པ་ལྟར་དྲུང་བ་སྐུ་འཕྲེང་དང་པོ་རཏྣ་ཤྲཱི་རིན་ཆེན་དཔལ་བཟང་བོ་ནི། འཛམ་གླིང་སྟོང་ཁུན་རྒྱལ་བོའི་ཡུལ་མཐའ་མདོ་ཁམས་སྨད་ཀྱི་ཆར་རྒྱལ་མོ་ཚ་བ་རོང་ཞེས་བྱ་བའི་ཡུལ་བྱེ་མའི་ཐང་དུ་ཕྱི་ལོ། ཆིག་སྟོང་སུམ་བརྒྱ་ལྔ་བཅུ་བོད་རབ་བྱུང་དྲུག་པའི་ལྕགས་ཕོ་སྟག་ལ་ངོ་མཚར་བའི་དགེ་ལེགས་ཀྱི་མཚན་མའི་ལྟས་དང་བཅས་ཏེ་སྐུ་བལྟམས། ཉིན་ཞིག་ཡབ་ཡུམ་གཉིས་དང་ཁྱིམ་མི་ཀུན་ལ་གསང་སྟབས་ཀྱིས་བྲོས་ཏེ་རི་བ་ཤེས་རབ་དཔལ་ཞེས་བྱ་བའི་དྲུང་དུ་ཉེ་བར་བཅར། ཇི་སྐད་དུ། བསླབ་པ་ཀུན་གྱི་གཞི་འཛིན་ཅིང་།། རིག་བྱེད་སྨྲ་བ་རྣམས་ཀྱི་རྒྱུ།། མིང་ཚིག་བརྗོད་པ་ཀུན་གྱི་གཞི།། ཡི་གེའི་སྦྱོར་བ་བཤད་པར་བྱ།། ཞེས་གསུངས་པ་ལྟར་འདོན་ཆོས་དང་ཡི་གེའི་སྦྱོར་ཀློག་སོགས་མཐར་ཕྱིན་པར་བྱས།དེ་ནས་རེ་ཞིག་གི་ཚེ་འདུལ་འཛིན་ཤེས་རབ་དཔལ་སོགས་ལས་སློབ་གྲངས་ཚང་བའི་སྒོ་ནས་སྲིད་པ་ལས་ཡོངས་སུ་གྲོལ་བའི་ཐབས་མཆོག་བླ་ན་མ་མཆིས་པ་ངེས་པར་འབྱུང་འདོད་ཀྱི་བསམ་པའི་རྩིས་ཟིན་ཏེ་ཚིགས་སྔ་མ་སྔོན་དུ་སོང་བས་སྒོ་ནས་དགེ་ཚུལ་གྱི་སྡོམ་པ་བཞེས། མཚན་ལ་རིན་ཆེན་དཔལ་ཞེས་གསོལ།
དགུང་ལོ་བཅོ་བརྒྱད་བཞེས་པ་ན་གཙང་ཕྱོགས་སུ་ཕེབས།དེ་ཡང་ལུང་བསྟན་ལས། ཁ་སྤུ་ལྡན་པའི་རཏྣ་ཤྲཱི་ཞེས་པ།། རི་ཁྲོད་ཆེན་པོ་འདི་ན་འོང་བར་འགྱུར།། ཞེས་མི་ཤིགས་རྡོ་རྗེ་བཀའ་ལུང་གིས་རྗེས་སུ་བསྔགས་པ་ལྟར་མདོ་ཁམས་དབུས་གཙང་ཕྱོགས་སུ་ཕེབས་ནས་མཁན་ཆེན་བྱང་ཆུབ་རྩེ་མོས་མཁན་པོ་དང་། གཞན་སློབ་དཔོན་གྲངས་ཚང་བའི་སྒོ་ནས་བསྙེན་རྫོགས་ཀྱི་སྡོམ་པ་ནོད། སྐབས་དེར་བོད་ཡུལ་ན་འཆད་ཉན་ལ་གྲགས་སྙན་གཟེ་བ་སྲིད་ན་མངོན་པར་མཐོ་བ་མཁས་པ་གསེར་རིའི་མུ་ཁྱུད་ལྟར་རིས་སུ་བཏབ་བའི་ལོ་ཙཱ་བ་ཆེན་མོ་ས་བཟང་མ་ཏི་པཎ་ཆེན་བློ་གྲོས་རྒྱལ་མཚན། ཆོས་རྗེ་ཕྱོགས་ལས་རྣམ་རྒྱལ། ཚད་མའི་མཛོད་ཆེན་ཆོས་གྲཊ་གཉིས་པ་ཉ་དབོན་ཀུན་དགའ་དཔལ། མཁན་ཆེན་བྱང་ཆུབ་རྩེ་མོ། འབྲི་གུང་ལོ་ཙཱ་བ། ཆོས་རྗེ་ཆོས་དཔལ་མགོན་པོ་སོགས་གཙུག་གི་བརྒྱན་གཅིག་པུར་བསྟེན་ནས་སེམས་འགྲེལ་སྐོར་གསུམ་དང་སྦྱོར་བ་ཡན་ལག་དྲུག་ཆ་ལག་དང་བཅས་པ་ཡོངས་རྫོགས། བྱམས་པའི་ཆོས་དང་འབྲེལ་བ་ཉི་ཤུ་སོགས་མདོར་ན་མདོ་རྒྱུད་ཀུན་གྱི་དབང་ལུང་མན་ངག་ཁྲིད་གསུམ་གྱི་གདམས་པས་ཐུགས་རྒྱུད་གང་བར་བྱས་ཏེ། ལུང་བསྟན་ལས། རོ་མཆོག་དམ་ཆོས་བདུད་རྩིས་རྒྱུད་ཚིམས་ནས།། ཞེས་གསུང་པ་ལྟར་དོན་ལ་ཡང་དེ་ལྟར་རོ།།
ལུང་བསྟན་ལས། མ་ཀི་འཛི་ཀ་ཞེས་པའི་ས་ཕྱོགས་སུ།། ཆུ་བོའི་འགྲམ་ལ་བརྟེན་པའི་ལུང་པ་རུ།། ཨ་མི་སྐུ་མཆེད་དག་གི་བསྟན་པ་རྒྱས།། ཞེས་གསུངས་པ་ལྟར་ཀུན་མཁྱེན་ཕྱོགས་ལས་རྣམ་རྒྱལ་སོགས་ཀྱིས་སྔར་ལུང་གིས་བསྟན་པ་ལྟར་ཁྱེད་ཁམས་ཕྱོགས་སུ་ཕེབས་དང་བསྟན་འགྲོ་ལ་སྒོ་གང་ཐད་ནས་རླབས་ཆེན་ཕན་བདེ་འབྱུང་བར་འགྱུར་ངེས་པས་ཁྱེད་ལ་རྟེན་སྐལ་དུ་བཀའ་གདམས་མཆོད་རྟེན་དང་ཆོས་དུང་ཞིག་ཡོད་ལ་དུས་ནམ་ཞིག་གི་ཚེ་བོང་བུ་གར་ཉལ་དང་དུང་དཀར་རང་གྲགས་ཀྱི་དུས་དེ་ནི་རང་རེའི་ངེས་དོན་གྱི་སྒྲུབ་གཞིར་འཛུགས་པའི་གནས་མཆོག་ཡིན་ཞེས་གསུང་པ་ལྟར་འཇམ་དཔལ་མཚན་བརྗོད་ཞལ་འདོན་བྱེད་ཞོར་དུ་རིམ་པར་འཛི་ཀའི་ཛཾ་ལྷའི་མདུན་ཐད་ཀྱི་བག་རྒས་ལེབ་ཞེས་པ་དེར་སླེབ་པ་ན་བོང་བུ་ཉལ་ཏེ་དུང་དཀར་ཡང་རང་གྲགས་བྱུང་། ཞལ་འདོད་ཀྱི་ཚིག་མཚམས་ཀྱང་ཆོས་ཀྱི་རྒྱལ་མཚན་ལེགས་པར་འཛུགས།། ཞེས་གསུང་པ་དང་འཕྲད་པའི་རྟེན་འབྲེལ་ངང་གིས་འགྲིག་སྟེ་གནས་དེ་རུ་ཞག་སྡོད་བྱས། ཆུའི་ཕ་རི་ཛཾ་ལྷའི་ཐང་དུ་ཡོད་པའི་དགོན་པ་དེ་ལ་བོང་བུར་ལྷམ་ཞིག་བསྐུར་བ་ན་ཚུར་གདན་ཞིག་སྐུར་ཏེ་ཁྱེད་བཞུགས་དང་ཁོང་ཚོ་འགྲོ་ཟེར་བའི་བརྡ་བསྟན། ལུང་བསྟན་ལས། འཕྲིན་ལས་རྣམ་བཞིའི་ཟློས་གར་དྲ་བ་ཅན།། ཞེས་ལུང་བསྟན་བཞིན་ཞི་རྒྱས་དབང་དྲགས་ཀྱི་ལས་ལ་མངའ་བརྙེས་ཤིང་གྲུབ་པ་མཆོག་གི་གོ་འཕང་བརྙེས་པས་ཐབས་ཚུལ་སྣ་ཚོགས་ཀྱིས་བོན་རྣམས་ཁྱེད་ཅག་གནས་འདི་ནས་མྱུར་བར་མ་སོང་ཚེ་སྟོབས་ཆེན་དཔག་དཔུང་གིས་བསྐྲད་པར་བྱའོ།། ཞེས་གསུང་ཞིང་ཕྱི་ཉིན་པར་སྤྲུལ་བའི་དཔག་དཔུང་གི་ཤིང་རྟའི་ཤུལ་དང་རྟའི་རྨིག་རྗེས་སོགས་རྫུ་འཕྲུལ་ཡ་མ་ཟུང་གི་འཐབ་ཚུལ་གྱིས་གྲོང་གསེབ་ཀུན་ཏུ་ཁྱབ་པར་བྱས་པས་བོན་རྣམས་ཡུལ་གཞན་དུ་བཤོལ།
དེ་ཙམ་ན་ལུང་བསྟན་ལས། གནོད་སྦྱིན་གཏེར་བདག་མིང་གི་དགོན་པ་རུ།། དུས་ཀྱི་འཁོར་ལོའི་བཤད་སྒྲུབ་གཙོ་བོར་སྟོན།། ཞེས་གསུང་པ་ལྟར། ངེས་དོན་གྱི་ཆོས་གཞིར་མདོ་སྨད་ཇོ་ནང་བའི་དགོན་སྡེ་ཀུན་གྱི་ཐོག་མ་ཤར་ཛཾ་ཐང་ཆོས་རྗེ་དགོན་བསམ་འགྲུབ་ནོར་བུའི་གླིང་ནི་ཕྱི་ལོ་ཆིག་སྟོང་བཞི་བརྒྱའི་ལོར་གྲུབ་པའི་དབང་ཕྱུག་རྣམས་གཤེགས་ཤུལ། སྐལ་བ་དང་ལྡན་ཞིང་ཁམས་དྲུག་ལྡན་གྱི་སྐྱེས་བུ་རྣམས་སྙིགས་དུས་ཀྱི་ཚེ་ཐུང་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་མྱུར་ལམ། དཔལ་མཆོག་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་གི་གདམས་པ་ཉམས་སུ་ལེན་པའི་སྔགས་ཀྱི་ཞིང་མཆོག་ཤམྦྷ་གཉིས་པ་ཤར་ཛཾ་ཐང་ཆོས་རྗེ་དགོན་བསམ་འགྲུབ་ནོར་བུའི་གླིང་ཐོག་མར་གསར་འཛུགས་བྱས་པ་ཡིན་ནོ།། འདེབས་པའི་ལོ་ཚིགས་ལ་གཞན་གྱིས་བབ་བཅོལ་སོགས་ཀྱིས་མཚོན་པའི་འདོད་ཚུལ་མང་དུ་འདུག་མོད། འདིར་འབའ་མདའི་བསྟན་རྩིས་ལྟར་བྲིས་པ་ཡིན་ནོ།། ཕྱིས་སུ་གདན་ས་ཆོས་རྗེ་སྐུ་འཕྲེང་དང་བོ་ཚད་མ་པ་རྒྱལ་བ་བཟང་ངམ་ཆོས་རྗེ་རྒྱལ་བ་བཟང་ལ་གཏད།ད་ལྟའི་བར་དུ་ཆོས་རྗེ་སྐུ་འཕྲེང་བཅུ་དང་དྲུང་བ་སྐུ་འཕྲེང་ལྔ་ཙམ་ལ་བརྒྱུད་ཡོད།
གསུམ་པ་རྗེ་བཙུན་ཀུན་དགའ་སྙིང་པོའམ་རྒྱལ་ཁམས་པ་ཏཱ་ར་ནཱ་ཐས་རྟག་བརྟན་དམ་ཆོས་དགའ་བའི་ཚལ་གསར་འཛུགས་བྱས་ནས་གདན་ས་མཛད་ཚུལ། དེ་ཡང་ཐམས་ཅད་གཟིགས་ཤིང་མཁྱེན་པ་ཆེན་པོ་མཚན་བརྗོད་པར་དཀའ་བ།དོན་གྱི་སླད་དུ་མཚན་ནས་སྨོས་ན་དཀྱིལ་འཁོར་རྒྱ་མཚོའི་བདག་ཉིད་གཅིག་ཆོག་ཏུ་གྱུར་པ་རྗེ་བཙུན་ཀུན་དགའ་སྙིང་བོའམ་རྒྱལ་ཁམས་པ་ཏཱ་ར་ནཱ་ཐ་ནི་ཕྱི་ལོ་ཆིག་སྟོང་ལྔ་བརྒྱ་དོན་ལྔ་པར་བོད་རབ་བྱུང་བཅུ་བའི་ཤིང་མོ་ཕག་ལོར་ཆུ་སྟོད་ཟླ་བའི་ཚེས་བརྒྱད་ལ་བྱང་སེམས་མིའི་ཟོལ་དུ་སྤྲུལ་བ་ཐམས་ཅད་ཀྱི་དབུས་སུ་འཆད་རྩོད་རྩོམ་པའི་བྱ་བ་ལ་རྒྱལ་མཚན་གྱི་རྩེ་མོའི་ཏོག་ལྟར་མངོན་པར་མཐོ་བ་འདི་ཉིད་སྐུ་བལྟམས། ཐུན་མོངས་མཐོང་སྣང་དུ་གྲུབ་པའི་ཡུལ་ཕྱོགས་ཐམས་ཅད་ལ་བཀྲིས་པའི་དགེ་ལེགས་ཀྱི་མཚན་མས་ཁྱབ། ཕྱག་སྲོལ་ལྟར་མེས་པོས་མཚན་ལ་པད་མ་སྲི་གཅོད་རྡོ་རྗེ་ཞེས་སུ་གསོལ། གདུང་ལོ་གཅིག་ཙམ་ནས་གསུང་མ་འདྲེས་ཤིང་ཐུགས་རྣམ་པར་དག་པས་ང་ནི་བླ་མ་ཀུན་དགའ་གྲོལ་མཆོག་ཡིན་ཞེས་ཡང་ཡང་གསུངས། སྐུ་ཚེ་སྔོན་མའི་སྦྱིན་བདག་དང་ཉེ་གནས་དཔལ་འབྱོར་གྱིས་ཞབས་ཕྱི་བགྱིས་ཚུལ་སོགས་སྨྲ་དག་པོས་ངང་ཡང་ཡང་གསུང་བས་ཀུན་ངོ་མཚར་ཏེ་ཧ་ལས།
དེ་རྗེས་དགུང་གྲངས་བཞིའི་སྟེང་སྟག་ལོའི་ཧོར་ཟླ་བརྒྱད་པའི་ཚེས་བཅོ་ལྔའི་ནུབ་མཁན་ཆེན་ལུང་རིག་རྒྱ་མཚོ་ལ་མཁའ་འགྲོས་ལུང་གིས་བསྟན་ཅིང་སྔར་རྗེ་གོང་མའི་ལུང་བསྟན་བཀའ་ཤོག་སོགས་དང་ཆེས་མཐུན་ཞིང་ཐུགས་ཡིད་ཆེས་པའི་དད་འདུན་ངང་གིས་འཕེལ་ཏེརྒྱལ་རྩེ་ནས་བྱང་ཞབས་དྲུང་བཀྲ་ཤིས་སྟོབས་དབང་པོའི་བར་གྱི་སྐྱ་མི་བརྒྱ་དང་དྲུག་ཅུ་རྩ་ལྔ་འཁོར་གཡོག་མང་པོ་དང་བཅས་ཏེ་མཁན་ཆེན་ཁོང་ཉིད་སྐུ་སྐྱེའི་བསླུ་ཞིང་མངའ་གསོལ་ཆེད་དངོས་སུ་ཕེབས།སྡེ་བདག་དང་ཡབ་ཡུམ་སོགས་ཀྱིས་སྤྲུལ་སྐུའི་བསླུ་ཁ་གཏད་ཅིང་ཡབ་ཡུམ་སོགས་ལ་ལེགས་མཆོད་དངོས་པོ་ཕུལ་ནས་མཆོག་གི་སྤྲུལ་སྐུའི་ཆིབས་ཁ་གཙང་ཕྱོགས་སུ་བསྒྱུར།ཆོས་ལུང་བྱང་རྩེ་ནས་ཁྲི་འདོན་མཛད་སྒོ་སྤེལ། རྗེ་གོང་མའི་བུ་སློབ་རྡོ་རིང་བ་ཀུན་དགའ་རྒྱལ་མཚན། ཐུགས་སྲས་ལྷ་དབང་གྲགས་པ། མཁན་ཆེན་ལུང་རིགས་རྒྱ་མཚོ། མཁས་དབང་བྱམས་པ་ལྷུན་འགྲུབ། རྗེ་དྲུང་ཀུན་དགའ་དཔལ་བཟང་སོགས་ཐུགས་སྲས་བུ་སློབ་ཀུན་ཞལ་འཛོམས་ཤིང་དགའ་སྟོན་རྟེན་འབྲེལ་གྱི་ཡོ་ལང་སྟོན་ཁའི་སྤྲིན་གྱི་འདུ་འགོད་ལྟར་རྒྱ་ཆེར་བྱས།
དེ་ནས་དགུང་ལོ་དྲུག་བཞེས་སྐབས་ཡི་གེ་འབྲི་ཀློག་ཕལ་ཆེར་དང་། ཁྱད་པར་དུ་ཡི་དམ་ཆོས་སྐྱོང་གི་མངོན་རྟོགས་རྩ་སྔགས་གཏོར་ཆོག་སོགས་སུས་ཀྱང་མ་བསླབ་པར་རང་ཤེས་སུ་ཕྱིན་པ་ནི་དམ་པ་གང་དེའི་ཐུགས་ཀྱི་གསང་བ་བསམ་ཀྱིས་མི་ཁྱབ་པའི་རྣམ་ཐར་རོ།།
རྗེ་བཙུན་དགུང་ལོ་བརྒྱད་ཀྱི་སྟེང་ཕྱི་ལོ་ཆིག་སྟོང་བརྒྱད་བརྒྱ་གོ་གཉིས་ལོར། བོད་རབ་བྱུང་བཅུ་པའི་ཆུ་རྟ་ཁྲུམས་སྟོད་ཟླ་བའི་ཚེས་བཅོ་ལྔར་ཆོས་ལུང་བྱང་རྩེར་དཔལ་སྟག་ལུང་པ་ཆེན་པོ་ཀུན་དགའ་རྒྱལ་མཚན་གདན་དྲངས་ནས་རབ་བྱུང་བསྒྲུབས། མཚན་ལ་ཀུན་དགའ་སྙིང་པོ་བཀྲ་ཤིས་རྒྱལ་མཚན་ཞེས་སུ་གསོལ། དག་པའི་གཟིགས་ངོར་སྤྲུལ་བའི་བཤེས་གཉེན་རྒྱ་གར་པཎ་ཆེན་ཛྭ་ལ་ནཱ་ཐས་ཏཱ་ར་ནཱ་ཐ་ཞེས་པའི་མཚན་གྱི་ཅོན་པན་གནང་།
རྗེ་བྲག་སྟོད་པ་ལྷ་དབང་གྲགས་པ། རྗེ་དྲུང་ཀུན་དགའ་དཔལ་བཟང་། མཁན་ཆེན་ལུང་རིགས་རྒྱ་མཚོ་སོགས་བསམ་སྦྱོར་གཉིས་ཀྱིས་གུས་པ་ཆེན་པོའི་བསྟེན་པ་ཉིད་ཤེས་བྱའི་ཡོན་ཏན་གྱིས་ལུས་མཛེས་པར་བྱེད་པའི་རྒྱན་དུ་མཐོང་སྟེ་ཚུལ་བཞིན་དུ་བསྟེན། ཕྱོགས་དང་རིས་སུས་མ་ཆད་པའི་གཞུང་ལུགས་རབ་འབྱམས་མང་པོའི་ཁྲིད་ལུང་དབང་གསུམ་དང་ཁྱད་པར་དུ་དཔལ་དུས་ཀྱི་འཁོར་ལོའི་གཞུང་ལུགས་མཐའ་ཡས་པ་གསན་བསམ་གནང་པས་ཉམས་དང་རྟོགས་པའི་དབང་ཕྱུག་ཆེན་མོར་ངང་གིས་གྱུར།
ཕྱི་ལོ་ཆིག་སྟོང་ལྔ་བརྒྱ་གོ་གཅིག་ལོར། བོད་རབ་བྱུང་བཅུ་བའི་ལྕགས་ཡོས་ཧོར་ཟླ་བཅུ་གཅིག་པའི་ཚེས་བཅུ་བདུན་ལ་འདུལ་འཛིན་ཀུན་དགའ་རྒྱལ་མཚན་སོགས། ལས་སློབ་གྲངས་ཚང་བའི་སྒོ་ནས་བསྙེན་རྫོགས་ཀྱི་སྡོམ་པ་བཞེས་ཤིང་ཕྱི་ལྟར་ཉན་ཐོས་ཀྱི་སྤྱོད་པ་ནང་ལྟར་རྒྱལ་སྲས་བྱང་སེམས་གསང་སྔགས་འཛིན་པ་ཆེན་པོ་མངའ་བརྙེས་པར་གྱུར། འདི་ལ་མི་མཐུན་པ་ཨེན་ཙམ་འདུག་མོད་རེ་ཞིག་འདི་ལྟར་བྲིས་པ་ལགས།
དགུང་ལོ་ཉེར་གཅིག་ཏུ་སོན་པ། ཕྱི་ལོ་ཆིག་སྟོང་ལྔ་བརྒྱ་གོ་ལྔ་ལོར་བོད་རབ་བྱུང་བཅུ་བའི་ཤིང་མོ་ཕག་ལོར་ཧོར་ཟླ་བརྒྱད་པའི་ཚེས་བརྒྱད་ཉིན། མཚན་ཉིད་དང་ལྡན་པའི་དཔལ་ལྡན་བླ་མ་དམ་པ་ཀུན་དགའི་མཚན་ཅན་དང་སློབ་དཔོན་རིན་པོ་ཆེའི་ཐུགས་བཀོད་ལྟར་དཔལ་ལྡན་རྒྱལ་བ་ཇོ་ནང་བའི་ཐོག་མའི་གདན་ས་ཆེན་མོ་ཇོ་ནང་དུ་ཕེབས་ནས་ངོ་མཚར་རྨད་བྱུང་གཟའ་སྐར་གྱི་འཕྲོད་སྦྱོར་ཕུན་སུམ་འཚོགས་པའི་དུས་བཟང་དེར་གདན་སར་འཁོད། དེ་ནས་སྐྱིད་ཕུག་བདེ་ལྡན་དུ་མཚམས་ལ་བཞུགས། ལོ་དེའི་ཆག་མེད་དུ་ཇོ་ནང་དུས་ཁྲིད་ཆེན་མོར་བཙུགས་ནས་ཐར་འདོད་སྐལ་ལྡན་གྱི་སྐྱེ་བོ་རྣམས་སྨིན་གྲོལ་ལམ་བཟང་གི་ཐེམ་སྐས་ལ་བཀོད།
སྔ་ཕྱི་དུ་མར་རྒྱ་གར་གྱི་སློབ་དཔོན་ཆེན་པོ་གྲུབ་ཆེན་གུ་རུ་སངས་རྒྱས་སྦས་པའི་མགོན་པོ། རྦཱ་ཎ་ཤྲཱི། པུརྞ་བཛྲ་སོགས་ཀྱིས་མཚོན་པའི་རྒྱ་གར་གྱི་མཁས་པ་ཆེན་པོ་མང་དུ་བསྟེན་ནས་ཕྱི་ནང་གི་སྒྲ་དང་རིགས་གནས་སོགས་མང་བོ་བསླབ། གསང་སྔགས་རྒྱུད་སྡེའི་སྐྱེད་རྫོགས་ཀྱི་དབང་ཁྲིད་མན་ངག་མཐའ་ཡས་པ་གསན་ནས་ཐུགས་ལ་འཁྲུངས་ཤིང་རྒྱུད་ལ་སྨིན།
དགུང་ལོ་ཉེར་དགུ་པར་ཇོ་ནང་དུ་བཞུགས་པའི་གནམ་གྱི་ཐོ་རེངས་ཤིག་ལ་རྗེ་བཙུན་བྱམས་པའི་ཞལ་གཟིགས་ཤིང་ཁོང་རང་ལ་ཐིམ་པའི་ཉམས་སྣང་དང་བཅས་ལྟ་བའི་མཐར་ཐུག་གཞན་སྟོང་དབུ་མ་ཆེན་མོའི་གྲུབ་མཐའ་ལ་ངེས་ཤེས་གཏིང་ནས་འཁྲུངས། ཀུན་ཁྱེན་དུས་གསུམ་སངས་རྒྱས་དོལ་པོ་པ་ཤེས་རབ་རྒྱལ་མཚན་དཔལ་བཟང་པོས་ཞལ་ཡང་ཡང་གཟིགས་ཤིང་ལུང་བསྟན་གནང་།
དགུང་ལོ་སོ་དགུ་པར་བོད་བཙན་པོའི་རྒྱལ་ས་དབུས་གཙང་ལྷ་ས་རུ་ཕེབས་ནས་ཆོས་རྗེ་ཀུན་ཁྱེན་ཆེན་པོའི་སྐུ་བརྙན་གསུང་འབྱོན་མར་མཇལ། སེམས་དགའ་སྣང་དང་སྐྱོ་གདུང་འདྲིས་མའི་ངང་སྨོན་ལམ་རྒྱལ་བ་རྒྱ་མཚོ་ལྗགས་རྩོམ་མཛད།
རྫེ་བཙུན་རིན་པོ་ཆེ་དགུང་ལོ་ཞེ་གཅིག་བཞེས་པ་ན་ལུགས་གཉིས་ཁྲིམས་བཟང་གིས་ས་ཆེན་པོ་ལ་མངའ་དབང་བསྒྱུར་བའི་གཙང་སྡེ་སྲིད་ཕུན་ཚོགས་རྣམ་རྒྱལ་གྱིས་སྤྱིར་ངེས་དོན་གྱི་བསྟན་པ་ལ་བྱ་བ་བྱེད་པ་དཀོན་ཞིང་། དཀོན་པ་ལ་རིན་ཐང་ཆེ་བའི་དཔེ་ལྟར་ཞེས་ངེས་དོན་གྱི་ཆོས་གཞི་འདེབས་དགོས་པའི་ཞུ་བ་ཡང་ཡང་བྱས་མཐར་ཕྱི་ལོ་ཆིག་སྟོང་དྲུག་བརྒྱ་བཅོ་ལྔ་དང་བོད་རབ་བྱུང་བཅུ་བའི་ཤིང་ཡོས་ཧོར་ཟླ་གཉིས་པའི་ཚེས་བཅུ་གཅིག་ཉིན་ཕྱི་ནང་གཟའ་སྐར་གྱི་འཕྲོད་སྦྱོར་མ་ཚང་བ་མེད་ཅིང་ལེགས་པ་བརྒྱད་འཛོམས་ཀྱི་ཉིན་རྫོང་མདུན་དུ་དཔལ་རྟག་བརྟན་དམ་ཆོས་དགའ་བའི་ཚལ་གསར་བཞེངས་བྱེད་པར་རྟེན་འབྲེལ་ལེགས་ཚོགས་མང་དུ་བྱུང་། དང་བོར་ས་སྦྱངས་ཆག་ཆག་མཛད། གསུམ་པའི་ཚེས་བརྒྱད་ལ་ཐིག་འདེབས་ས་ཆོག་ཆོ་ག་སོགས་རྒྱས་པར་བྱས། མཁའ་ལ་སྤྲིན་རས་ཀྱི་དྲ་བས་ཡོངས་སུ་ཁྱབ་ཅིང་བྱ་དང་བྱེའུའི་སྐད་སྙན་སྒྲོགས་ཤིང་འཇའ་འོད་གུར་ཁྱིམ་མང་པོས་རང་བྱུང་གི་དགའ་བ་ངང་གིས་ཤོར་བའི་རྟེན་འབྲེལ་བརྗོད་ལས་འདས།དེ་ནས་ལས་གྲྭ་བཙུགས་ཏེ་གཙུག་ལག་ཁང་ཉི་ཤུ་རྩ་དྲུག་དང་གྲྭ་ཁང་བརྒྱ་ཕྲག་ལྷག མཐའི་ལྕགས་རི་དང་བཅས་ལེགས་པར་མཛད།ནང་རྟེན་དད་པའི་དབང་པོ་འདབ་བརྒྱ་ཀུན་ནས་དཀྲོལ་བར་བྱེད་པ་ཉེས་ཚོགས་ཐམས་ཅད་ཀྱི་རྩ་བ་ར་རིའི་རོ་དང་བཅས་པ་མ་ལུས་པ་དྲུངས་ནས་བྱུང་ཞིང་ཐབས་ཤེས་ཟུང་འཇུག་གི་ཁོ་ལག་ཡོངས་སུ་རྫོགས་པ་སྲིད་གསུམ་འཁོར་མོ་ཡུག་ཀུན་ཏུ་སྙིང་རྗེའི་ཉིན་བྱེད་ཀྱི་རྟ་བདུན་གྱི་དབང་པོ་མངོན་པར་བྱེད་པ་སངས་རྒྱས་དཔའ་བོ་རབས་བདུན་གྱི་སྐུ་བརྙན་མཐོ་ཚད་ཆེ་ཞིང་བཟོ་རྩལ་ཁྱད་འཕགས་འབུར་དུ་དོད་པ། རྒྱུ་ཟངས་གསེར་ལས་གྲུབ་པ། གཞན་འཁོར་ལོ་སྡོམ་ཆེན་གྱི་སྐུ་ཞལ་ཕྱགས་ཡོངས་རྫོགས་ཚད་ཤིན་ཏུ་མཐོ་བ་སོགས་ཀྱིས་མཚོན་སྐུ་བརྙན་མང་དུ་བཞེངས། ཇོ་ནང་དུ་ལྷ་ཁང་གསར་བཞེངས་གསུམ་གྱི་ནང་རྟེན་གཙོ་བོ་བྱམས་ཆེན་ཐོག་ཚད་གཉིས་དང་བཅས་པ་ལེགས་པར་བཞེངས། རིམ་པར་སྤར་བརྐོ་བཟོ་རྩལ་གྱི་ལག་ཤེས་པ་གསོ་སྐྱོང་གནང་ནས་གཞན་ལ་རེ་བའི་གླ་རྔན་འཕྲད་མི་དགོས་པར་ཆགས་ནས་བཀའ་བསྟན་འགྱུར་རོ་ཅོག་ཚར་མང་པོ་དང་།བཀའ་འབུམ་སྐོར་པོ་ཏི་བཞི་བཅུ་ཤིང་པར་དུ་བརྐོས། བཟོ་བའི་ལག་རྩལ་ཁྱད་འཕགས་འབུར་དུ་དོད་པའི་གོས་སྐུ་ལེགས་པ་བཅོ་བརྒྱད། མཆོད་རྫས་དང་མཆོད་ཆ་བྱེ་བྲག་ཏུ་གར་འཆམས་ཀྱི་ཆ་ལག་རྒྱན་གོས། གཏོར་འཆམས་ཀྱི་གདོང་བརྙན་འབག་མགོ་སྣ་ཚོགས། རོལ་མོའི་ཚོགས་བརྒྱ་ཕྲག་མང་པོ་དང་བཅས་བཞེངས་བཀོད་ཀྱི་ཁྱད་པར་སྤྱི་ཙམ་བརྗོད་པ་ལས་བྱེ་བྲག་རེ་རེའི་སུ་ཞིག་གིས་བགྲང་བའི་རྩིས་ཀྱིས་ལོང་དེ་མི་ལོང་བའི་ཕྱིར་རོ།།
དམན་པ་བདག་ལ་མཁས་པའི་བློ་དང་རྣམ་དཔྱོད་ཅི་ཡང་མེད་ན་ཡང་། །མཐོང་ཐོས་བྱུང་བ་ཡིད་ངོར་གནས་པའི་དྲན་འཛིན་ཤོག་གུ་སྲབ་དྲག་པས། །བརྗེད་ངེས་རྐུན་པོའི་ཞེ་ལ་གནོད་ཀྱང་མི་བརྗེད་དྲན་པའི་ཟིན་ཐོ་འདི། །འདི་ལྟར་བྲིས་པས་རང་གཞན་ཀུན་ལ་ཕན་པའི་དགེ་ལེགས་ཡོངས་རྒྱས་ཤོག །མཇུག་ཏུ་སྨོན་ལམ་རྒྱལ་བ་རྒྱ་མཚོ་ལས། སྐྱེ་བ་ཀུན་ཏུ་རྒྱལ་བ་ཇོ་ནང་བ་ཆེན་པོ་ཁྱོད་ཀྱི་རྣམ་ཐར་བཟང་པོ་ལ་འཇུག་པར་གྱུར་ཅིགཅེས་དང་ཀུན་མཁྱེན་ཆོས་ཀྱི་རྒྱལ་བོ་དུས་གསུམ་སངས་རྒྱས་ཐམས་ཅད་ཀྱི་སྤྲུལ་བ། རྟོན་པ་བཞི་ལྡན་ཆེན་པོ་དོལ་པོ་པ། མཚན་བརྗོད་པར་དཀའ་བ་ཤེས་རབ་རྒྱལ་མཚན་དཔལ་བཟང་བོ་ཁྱོད་ཀྱི་བསྟན་པ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག མཇུག་སྨོན་ལམ་དང་བཅས་ཏེ་ཕྱི་ལོ་༢༠༢༡ ལོའི་༡༠ བའི་ཚེས་༡ཉིན་སོན་པ་རུ་འབོད་པ་གང་དེས་སྦྱར་བ་དགེ་ལེགས་འཕེལ། དམ་པའི་གསུང་དང་མི་མཐུན་ཞིང་མཁས་པ་ཆེན་པོའི་རང་ལུགས་དང་འགལ་བ་ཡོད་ཚེ་སྙིང་ནས་བཟོད་གསོལ་ཞུ།
ནང་དོན་ཡོངས་ཁུངས། བོད་ཡིག་འཕྲིན་སྟེགས་ཀ་ལཱ་པའི་གྲོང་།