༄༅།། མཁོན་རིགས་བསྟན་པའི་མངའ་བདག་༧དཔལ་ས་སྐྱ་ཁྲི་འཛིན་༧རཏྣ་བཛྲ་རིན་པོ་ཆེ་མཆོག་ནས་༧ཀུན་མཁྱེན་དུས་གསུམ་སངས་རྒྱས་དོལ་པོ་པ་དགོངས་པ་ཆོས་དབྱིངས་སུ་བསྡུས་ཏེ་ལོ་དྲུག་བརྒྱ་དྲུག་ཅུ་འཁོར་བའི་རྗེས་དྲན་གྱི་དུས་ཆེན་སྲུང་བརྩིར་བསྩལ་བའི་བཀའ་སློབ།

ལྷ་བཅས་སྲིད་བཞིའི་གཙུག་བརྒྱན་༧གོང་ས་ལྷ་མའི་རྣམ་འདྲེན་སྐྱབས་མགོན་རྒྱལ་བའི་དབང་པོ་མཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས། ཇི་སྐད་དུ། ཀུན་མཁྱེན་གོ་བོ་རབ་འབྱམས་པ་ཆེན་པོས་བདག་ནི་དཔལ་ལྡན་དུས་འཁོར་གྱི་གཙོ་འཛིན་གྱི་མཉམ་རྟོགས་མཐར་ཕྱིན་པའི་སྐྱེས་ཆེན་འདུས་པ་དེ་དག་ལ་ཡིད་ནས་ཤིན་དུ་དད་དེ་ཞེས་གསུང་བ་ནང་བཞིན་ངས་ངོས་ནས་དད་གུས་ཤུགས་དྲག་ཆེན་པོས་དེ་རིང་༸ ཁམས་གསུམ་ཆོས་ཀྱི་རྒྱལ་པོ་ཀུན་མཁྱེན་དུས་གསུམ་སངས་རྒྱས་རྟོན་པ་བཞི་ལྡན་དོལ་པོ་པ་༸ ཤེས་རབ་རྒྱལ་མཚན་དཔལ་བཟང་པོ་མཆོག་ཐུན་མོང་གདུལ་བྱའི་སྣང་ངོར་དགོངས་པ་ཆོས་དབྱིངས་སུ་ཐིམ་པའི་ཚུལ་ནས་བགྲངས་བྱ་མི་ལོ་ཧྲིལ་བོ་དྲུག་བརྒྱ་དྲུག་ཅུའི་འཁོར་བའི་རྗེས་དྲན་དང་འཕགས་ཡུལ་ཇོ་ནང་མ་དགོན་དབུ་བརྙེས་ནས་བགྲང་བྱ་མི་ལོ་ཉེར་ལྔ་འཁོར་བའི་དུས་དྲན། དེ་ག་ནང་བཞིན་སྐབས་དང་པོའི་ཇོ་ནང་རྟག་བརྟན་དགེ་བཤེས་ཀྱི་དམ་བཅའ་དང་བཅས་དུས་བཟང་པོ་གསུམ་འཛོམས་ཀྱི་མཛད་སྒོ་དངོས་སུ་འཕགས་ཡུལ་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ་འཚོགས་གནང་བའི་སྐབས་སུ་ཕེབས་པའི་བླ་ཆེན་རྣམ་པ་དང་སྐུ་མགྲོན་རྣམ་པ་ཡོངས་ལ་ཐོག་མར་ངས་ངོས་ནས་མཛའ་ཞིང་བརྩེ་བའི་འཚམ་འདྲི་དང་བཀྲ་ཤིས་བདེ་ལེགས་ཞུ་བ་ཡིན།
དེ་ག་ནང་བཞིན་སྤྱིར་བཏང་ཞུ་བ་ཡིན་ན། ང་རང་ཚོ་བོད་རྒྱུད་ནང་བསྟན་གྱི་རྗེས་འབྲིང་བ་ཚང་མ་ལ་ཐོ་མའི་ཀུན་སློང་བྱང་ཆུབ་ཀྱི་སེམས། བར་དུ་བསོད་ནམས་དང་ཡེ་ཤེས་ཀྱི་གཉིས་བསག་པ། མཐར་རྣམ་མཁྱེན་རྒྱལ་བའི་གོ་འཕང་རིན་པོ་ཆེ་ཐོབ་པའི་ཐོག་ལ་དགོངས་པ་གཅིག་དང་དབྱིངས་གཅིག་ཏུ་ཞལ་གྱི་བཞེས་ཀྱི་ཡོད་པ་རེད། ཁྱད་པར་སྤུ་ཙམ་ཡང་མེད་པ་ཡིན་པ་རེད། ཡིན་ན་འང་རྩལ་འདོན་ཕྱོགས་དང་དེ་འདྲིའི་ཐོག་ནས་ཆོས་རྒྱུད་ཆེན་པོ་ཆག་འགྲོ་བ་རེད། དེའི་ནང་ནས་སྐབས་སུ་བབ་པ་ཆོས་རྒྱུད་ཆེན་པོ་ཇོ་ནང་གི་ཆོས་རྒྱུད་འདིའི་བསྟན་པ་འཛིན་པའི་སྐྱེས་ཆེན་དམ་པ་མཚུངས་ཟླ་མ་མཆིས་པ་ཁམས་གསུམ་ཆོས་ཀྱི་རྒྱལ་པོ་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་མཆོག་ཐུན་མོང་གདུལ་བྱའི་སྣང་ངོར་བསྟན་དང་འགྲོ་བའི་དོན་དུ། སྲིད་པ་བཟུང་བར་བརྟེན་ནས་སྐུ་གཞོན་ནུའི་དུས་ནས་དམ་པའི་རང་རྟགས་ཐམས་ཅད་གསར་བར་མངོན་པར་མཛད་མཁན་ཞིག་དང་། གཞི་ཚུལ་ཁྲིམས་རྣམ་པར་དག་པ་ལ་གནས་པའི་ཐོག་ནས་བདག་ཉིན་ཆེན་མོ་་་་དང་ཤཀྱ་འབུམ་ལ་སོགས་བླ་མ་དུ་མ་བརྟེན་པར་མཛད་ནས་མདོ་དང་སྔགས་ཀྱི་ཟབ་པ་དང་རྒྱ་ཆེ་བའི་དམ་པའི་ཆོས་རྒྱ་ཆེན་པོ་ལ་གསན་བསམ་མཛད་པ་དང་། སྒོམ་པ་ཉམས་ལེན་མཛད་ནས་མཁས་ཤིང་གྲུབ་པ་མཉེས་ནས་གོ་འཕང་མཐོན་པོར་གཤེགས་པའི་སྐྱེས་ཆེན་དམ་པ་ཞིག་རེད། དགོང་ལོ་སོ་གཅིག་སྟེང་ནས་ཇོ་ནང་དུ་ཕེབས་ནས་མཁས་བཙུན་ཡོན་ཏན་རྒྱ་མཚོ་ལས་དུས་འཁོར་གྱི་དབང་དང་ཁྲིད་ལ་སོགས་པ་ཟབ་དང་རྒྱ་བའི་དམ་པའི་ཆོས་གསན་ནས་ཇོ་ནང་གི་ཆོས་རྒྱུད་ལ་ཞུགས་པར་མཛད།
དེ་རྗེས་སུ་ལྟ་བ་རྩལ་དུ་འདོན་པའི་གཞུང་རི་ཆོས་ངེས་དོན་རྒྱ་མཚོའི་གཙོ་བོར་བྱས་པའི་བསྟན་ཆོས་ཆེན་མོ་དུ་མ་རྩམས་གནང་བ་ནས་རི་བོ་རྩེགས་པའི་རྒྱ་མཚོ་རྡོལ་ཞེས་གསུང་པ་རེད། སྐབས་དེའི་རི་བོ་རྩེགས་པ་ཞེས་པ་དེ་བསྟན་བཅོས་རྩམ་པའི་བྱིན་རླབ་དང་། རྒྱ་མཚོ་རྡོལ་ཞེས་པ་དེ་སློབ་མ་གོ་གི་ཡོད་པ་རེད། ཆིམ་བློ་བཟང་གྲགས་པའི་སྤྱན་རིས་གཟིགས་སུ་གཟིགས་པ་དང་། དེ་ག་ནང་བཞིན་ཉེར་རྣམ་པར་གྲགས་པའི་འཇམ་པའི་དབྱངས་སུ་གཟིགས་པ་དང་ལ་སོགས་པའི་ལོ་རྒྱུས་ངོ་མཚར་ཅན་ཀུན་གྱི་དེང་བ་འདྲེན་པ་མང་པོ་བྱུང་ཡོད་པ་རེད། གང་ལྟར་ཡང་ད་རིས་དེ་འདྲ་བའི་དུས་ཆེན་གྱི་སྐབས་སུ་ངས་ངོས་ནས་རྗེས་སུ་ཡི་རངས་ཞུ་རྒྱུ་དང་། དེ་ག་ནང་བཞིན་ལོ་གཅིག་རིང་བཀའ་དྲིན་རྗེས་དྲན་གྱི་རྣམ་ཁར་མཐའ་དག་ཐུགས་བཞེད་ལེགས་འགྲུབ་ཡོང་བའི་སྨོན་འདུན་རྩེ་གཅིག་ཏུ་ཞུ་གི་ཡོད། ཐུགས་རྗེ་ཆེ།