༄༅།།རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ་(༡༥༧༥-༡༦༣༥)དེ་ཉིད་ཀྱི་འཁྲུངས་གཞིས་ནི་ཇོ་མོ་ཁ་རག་གི་ཉེ་འདབས་འབྲང་ཕུ་ཞེས་འབོད་པའི་ལུང་པར་ཡོད་པའི་ཆོས་འཁོར་ལྡིངས་དགོན་གནས་དེར་ཡིན་པ། རྗེ་བཙུན་རང་རྣམ་དུ་འབྲང་ཞེས་བྱ་བའི་ཡུལ་གྲོང་ཁྱེར་གྱི་བཀོད་པ་ཡིད་དུ་འོང་བས་བརྒྱན་པ། བཟའ་ཤིང་གི་རྭ་བའི་སྐྱེད་ཚལ་དུ་མས་རྣམ་པར་ཁྱབ་པ། རི་བོ་སྨན་ལྗོངས་ཉམས་དགའ་བ་དུ་མ་དང༌། ཚལ་སྣ་ཚོགས་པས་མཛེས་པ། སྔོན་གཉོས་ཇོ་སྲས་རྡོ་རྗེ་བླ་མ་ལ་སོགས་པས་ཡུན་རིང་དུ་བསྟེན་པའི་གནས་གཞི་ཞིག་ཏུ་ཕྱིས་ཆོས་རྗེ་ཀུན་དགའ་སེང་གེས་ཆོས་འཁོར་སྡིངས་ཞེས་པའི་དགོན་གནས་ཆུང་ངུ་ཞིག་འདེབས་པར་མཛད་པ་འདི་ལགས་ཏེ། ཞེས་གསུང་པ་དེ་ལྟར་ཡིན་ཞིང་།
ཆོས་འཁོར་ལྡིངས་ཀྱི་དགོན་ཤུལ་ནི་ད་ལྟ་ཡང་མཇལ་དུ་ཡོད་པ་མ་ཟད། དགོན་གནས་དེ་ནི་རིག་གསར་བར་དུ་གནས་འདུག་ཅིང་། རིག་གསར་གྱི་རླུང་འཚུབ་ཁྲོད་གཟོད་འཐོར་ཞིག་ཏུ་སོང་ཞིང་ཕྱིས་སུ་བསྐྱར་གསོ་བྱེད་མཁན་བྱུང་མི་འདུག ཁྱད་པར་དུ་རྗེ་བཙུན་རིན་པོ་ཆེ་སྐུ་དངོས་སུ་འཁྲུངས་སའི་ཁང་པ་ད་ལྟ་ད་དུང་ཡང་བཞུགས་ཡོད་པ་མ་ཟད། འཁྲུངས་ཁང་གི་བདག་པོ་ཡང་སྨིན་རྒྱས་ཚང་ཞེས་པའི་མི་ཚང་ཞིག་ཡིན་པར་བཤད་ལ། སྨིན་རྒྱས་ཚང་ནི་རྗེ་བཙུན་ཏཱ་ར་ན་ཐཱའི་མ་ཡུམ་གྱི་ཁྱིམ་རྒྱུད་དངོས་ཡིན་པར་ཡུལ་མིས་བཤད། འོན་ཀྱང་ད་ལྟ་ཁྱིམ་གཞི་འཛིན་མཁན་གྱི་མི་ལ་དགོང་ན་མཐོན་པོར་སོན་པའི་སྤོ་བོ་ཞིག་མ་གཏོགས་ལྷག་མི་འདུག་ཅིང་། ཁོ་ཡང་ཉེ་བའི་ཆར་ལྷོ་ཁའི་སྲིན་པོ་རི་ཤམ་ལ་ཕར་གནས་སྤོར་སོང་ཟེར།
འབྲང་ཕུའི་གྲོང་བ་ཡང་ཐོག་མར་ཉིན་ངོས་ཀྱི་ཆོས་འཁོར་ལྡིངས་ཀྱི་དགོན་པའི་འཁོར་དུ་ཆགས་ཡོད་མོད། རྗེས་ནས་སྲིབ་ངོས་ཀྱི་རི་ལམ་གཡས་གཡོན་དུ་གནས་སྤོར་བཅས་འདུག་ཅིང་།ད་ལོ་ནས་ཡང་ལུང་པའི་མདའ་དང་རྡོ་རྗེ་བྲག་སོགས་སུ་གནས་སྤོར་བྱེད་དགོས་བྱུང་འདུག་པས། ད་ལྟ་འབྲང་ཕུ་ནི་མི་མེད་ལུང་སྟོང་། ཁང་སྟོང་། ཞིག་རལ་དུ་བྱིན་པའི་རྡོ་གྱང་མང་སའི་དབེན་ཡུལ་ཞིག་ཏུ་ཆགས་འདུག ཡུལ་མི་རེ་ཟུང་གིས་བཤད་ན་རྒྱལ་ཁབ་ཀྱིས་འབྲང་ཕུ་བརྒྱུད་ནས་ཕར་ཡར་འབྲོག་མཚོ་ཕྱོགས་སུ་ཕུག་ལམ་རིང་པོ་ཞིག་མི་འགྱང་བར་བཟོ་དགོས་པ་རེད་ཅེས་ཀྱང་བཤད་ཀྱིན་འདུག
རྗེ་བཙུན་འཁྲུངས་གཞིས་སུ་རྡོ་རིང་ཞིག་དང་ཡང་ན་མཆོད་རྟེན་ཞིག་བཞེངས་ཏེ་ཕྱི་རབས་ཀྱི་བོད་པ་ཚོར་ངོ་སྤྲོད་ཅིག་དང་། བོད་གངས་ཅན་གྱི་ཆོས་དང་རིག་གཞུང་ལ་བཀའ་དྲིན་གཞལ་མཐའ་བྲལ་བའི་རྗེ་བཙུན་ཁོང་ལ་རྗེས་དྲན་ཞིག་ཐུབ་ན་ཤིན་ཏུ་ལེགས་པར་སེམས་མོད། དེ་ཕྱོགས་སུ་ལས་ཀ་དེ་འདྲ་ཞིག་བྱེད་པར་འགོག་རྐྱེན་སྣ་ཚོགས་ཤིག་འདུག་པ་ཀུན་གྱིས་ཤེས་གསལ་ལྟར་རེད། འོན་ཀྱང་ཐུགས་བསྐྱེད་ཆེན་པོ་ཅན་གྱི་སྐྱེས་བུ་ཞིག་གིས། སྐལ་བཟང་གི་ཉི་མ་ཞིག་ལ་ལས་སྨོན་གྱི་མཐུར་བརྟེན་ཅིས་ཀྱང་འཁྱོང་ཡོང་ངེས་བསམས་སོ།། འབྲང་གི་མི་ཚང་ཞིག་ཏུ་རྗེ་བཙུན་གྱི་མཆིལ་ལྷམ་ཆུང་ངུ་ཞིག་ཀྱང་ཡོད་པར་བཤད་མོད་ཐེངས་འདིར་མཇལ་རྒྱུ་མ་བྱུང་། གཞན་གྲོགས་མཁྱེན་ཡངས་སྔགས་རིགས་འོད་ཟེར་གོ་ཆ་བརྒྱུད་རྗེ་བཙུན་དམ་པ་ཁལ་ཁ་སྐུ་ཕྲེང་དགུ་བ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་མཆོག་གི་བོད་བཞུགས་ནང་མི་དང་ངོ་ཤེས་བྱུང་པ་མ་ཟད་ནང་ལ་བཅར་རྒྱུའི་སྐལ་བཟང་ཤར། རྒྱུས་ལོན་གྱི་སྐད་ཆ་ཡང་རོབ་ཙམ་ཞུ་རྒྱུ་བྱུང་སོང་བས། ང་རང་ཉིད་ལ་མཚོན་ན་རྗེ་བཙུན་དམ་པའི་ནང་ཚང་། རྭ་ལོ་ཙ་བའི་གདོང་རྒྱུད་མ་ནོར་བ། རྭ་ཤར་བ་འཁྲུལ་བ་མེད་པའི་མི་ཚང་དེེར་ངོ་ཤེས་དང་འབྲེལ་ལམ་བྱུང་བ་ལ་ནི་བསམ་བརྗོད་བྲལ་བའི་དགའ་ཚོར་བྱུང་། རེབ་འདིའི་རྗེ་བཙུན་འཁྲུངས་གཞིས་ལ་བསྐྱོད་རྒྱུ་བྱུང་བ་དང་། རྭ་ཤར་བའི་མི་རྒྱུད་དངོས་དང་འབྲེལ་བ་བྱུང་བ་སོགས་སྔ་ཕྱིའི་ལེགས་ཚོགས་ཇི་རྙེད་ཅིག་གྲོགས་མཁྱེན་ཡངས་སྔགས་རིགས་འོད་ཟེར་གོ་ཆ་དང་བསོད་ནམས་ཚེ་རིང་སོགས་ཆོས་མཐུན་གྲོགས་པོ་སྐོར་ཞིག་གིས་རོགས་པ་རྒྱ་ཆེན་གནང་པ་ལས་བྱུང་པས། གུས་པས་འདི་ནས་ཁ་ཙམ་མ་ཡིན་པར་སོར་བཅུའི་ཐལ་མོ་སྙིང་གར་སྦྱར་ནས་ཡང་བསྐྱར་ཐུགས་རྗེ་ཆེ་ཞུ་བ་ལགས་སོ།།
ནང་དོན་ཡོངས་ཁུངས། བློ་ཤེས་རིག་གནས་སྒྱུ་རྩལ་གླིང་།