༄༅། །རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་འགན་འཛིན་༧ སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་༧ མཁན་སྤྲུལ་རྡོ་རྗེ་སློབ་དཔོན་༧ ངག་དབང་ཆོས་ཀྱི་སྣང་བ་མཆོག་གི་གཙོས་འགན་འཛིན་རྣམ་པ་དང་སློབ་སྟོན་པ་རྣམ་པ། གཞན་ཡང་འཛམ་གླིང་ས་ཕྱོགས་གང་སར་གནས་པའི་མཁན་བླ་སྤྲུལ་དགེ་བའི་བཤེས་གཉེན་རྣམ་པ། དགོན་སྡེ། ཆོས་ཚོགས། ཚོགས་སྡེ་ཁག་གི་དབུ་འཛིན། ས་རྒྱུན་རྣམ་པ། འབྲེལ་ཡོད་དད་ལྡན་སེར་སྐྱ་ཡོངས་ཀྱི་སྙན་ལམ་དུ།
གུས་པས་ཞུ་གསོལ། རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ནས་ལོ་རེར་ལོ་འཁོར་ཚོགས་ཆེན་ཞིག་སྐོང་ཚོགས་གནང་དགོས་པ་ལྟར་ད་ལན་གནས་མཆོག་རྡོ་རྗེ་གདན་དཔལ་རྒྱལ་བ་ཇོ་ནང་བའི་སྨོན་ལམ་ཆེན་མོ་དང་སྟབས་བསྟུན་ཕྱི་ལོ་༢༠༢༤ ཟླ་༠༡ ཚེས་༢༧ དང་༢༨ ཉིན་གཉིས་རིང་འཚོགས་རྒྱུ་གཏན་འཁེལ་ཡོད་པ་ལགས་ན། འགན་འཛིན་རྣམ་པ་དང་སློབ་སྟོན་པ་རྣམ་པ། དེ་མཚུངས་འཛམ་གླིང་ས་ཕྱོགས་གང་སར་བཞུགས་པའི་མཁན་བླ་སྤྲུལ་དགེ་བའི་བཤེས་གཉེན་རྣམ་པའི་གཙོས་དགོན་སྡེ་དང་ཆོས་ཚོགས། ཚོགས་སྡེ་ཁག་གི་དབུ་འཛིན་དང་ས་རྒྱུན་རྣམས་ངེས་ཕེབས་ཡོང་བར་ཞུ་རྒྱུ་དང་། དེ་བཞིན་ལྷག་བསམ་རབ་ཏུ་ཕྱུག་པའི་ས་རྒྱུན་རྣམས་ཀྱིས་འགན་དང་ལེན་ཐོག་སོ་སོའི་ཁྱབ་ཁོངས་སུ༌ཡོད༌པའི༌རྒྱ་ཆེའི་མང་ཚོགས་ཀྱིས་མ་གོ་མ་ཐོས་མེད་པར་གནང་རྒྱུར་བཀའ་དྲིན་ཆེ་ཞུ་རྒྱུ་དང་། མི་མང་གི་དགོངས་ཚུལ་གང་ཡོད་བསྡུ་རུབ་ཞུས་སྟེ་ཡིག་ངག་གང་རུང་ཐོག་ཚོགས་འདུར་བསྣམ་ཕེབས་རྒྱུའམ་ཕྱི་ལོ་༢༠༢༣ ཟླ་༡༢ ཚེས་༢༠ ལས་མི་འགྱངས་བར་ལྷན་ཚོགས་ཀྱི་གློག་འཕྲིན་དང་འཚམས་འཕྲིན་ (Email- WhatsApp) གང་རུང་ཐོག་བསྐུར་རོགས་གནང་རྒྱུ་བཅས་དེ་དོན་དགོངས་མངའ་ཡོད་པར་མཁྱེེན་མཁྱེན་ཞུ།
ཞེས་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་དབུས་རྒྱུན་ལས་ཁང་ནས།
ཕྱི་ལོ་༢༠༢༣ ཟླ་༡༠ ཚེས་༠༣ ཉིན་གུས་ཕུལ།