དགེ་བཤེས་དངོས་གྲུབ་དཔལ།
སྟོན་པ་ཐུགས་རྗེ་ཅན་ལ་གུས་ཕྱག་འཚལ། དེ་ལ་འདིར་བོད་བརྒྱུད་ནང་བའི་བསྟན་པ་ནི་ནང་བསྟན་བརྒྱུད་ཚུལ་གྱི་ཡུལ་ལུང་གཞན་དག་དང་མི་འདྲ་བར་མདོ་སྔགས་རིག་གནས་དང་བཅས་པ་འཐུས་ཚང་བའི་ངོས་ནས་རྒྱུད་འཛིན་དང་དར་སྤེལ་གྱི་ལམ་དུ་བསྐྱོད་དང་སྐྱོད་བཞིན་པ་ཞིག་ཡིན་པ་མིག་མཐོང་ལག་ཟིན་དུ་གསལ། དེ་འཛིན་སྐྱོང་སྤེལ་གསུམ་གྱི་ལྟེ་བ་དགོན་སྡེ་དག་ལ་ཆ་བཞག་ནའང་བསྟན་པ་འཛིན་ཚུལ་ནི་ཆོས་སྲིད་ཟུང་འབྲེལ་གྱི་ཐོག་ནས་འགྲོ་རྒྱུ་མ་ཡིན་པར་ཤིན་ཏུ་ཆོས་ཚུལ་ངོས་དག་པའི་ལམ་གྱི་སྲོག་ཤིང་གཞིར་བཞག་སྟེ་མ་འོངས་འབྱུང་འགྱུར་ཀུན་ཏུ་གྲ་དག་སྒྲོས་གཙང་གི་སྟོབས་ཤུགས་ཆེར་བསྐྱེད་ཀྱི་གུས་རྟག་གི་སྦྱོར་བ་ཟམ་མི་ཆད་པར་ནང་བསྟན་གྱི་མདུན་ལམ་འོད་སྟོང་འཕྲོ་བ་ཞིག་ཏུ་བསྙེག་རྒྱུ་ཧ་ཅང་གལ་ཆེན་དང་གཙོ་བོ་རྒྱལ་བ་ཉིད་དུ་ཆགས་ཡོད་སྙམ་སྟེ། དགོན་སྡེའི་སྤྱི་ཚོགས་ལ་ཆ་བཞག་ན་བྱམས་དང་སྙིང་རྗེའི་གཏེར་མཛོད་ཤེས་རབ་ཡང་དག་པའི་བདག་ཉིད་རྒྱལ་བ་ཐུབ་པའི་དབང་བོ་རྣམ་འདྲེན་བཞི་བ་མཆོག་གི་སྐུ་ཚེའི་གསང་གསུམ་གྱི་རྣམ་པར་ཐར་བའི་བཀའ་དྲིན་ནི་རྗེས་འཇུག་གདུལ་བྱའི་ཉམས་ལེན་གྱི་མཐིལ་དུ་གསུངས་པ་ལྟར་མིག་ལྟོས་བླ་ན་མཐོ་བའི་ཞིང་མཆོག་ཉག་གཅིག་ཏུ་འཁུམས་པ་སྨོས་མེད་རེད། དེ་ཡིན་ན་སྟོན་པ་སྙིང་རྗེའི་བདག་ཉིད་ཁོང་གི་སྐུ་ཚེའི་བརྒྱུད་རིམ་རགས་ཙམ་གཟིགས་ཤིག་དང་ཆོས་སྲིད་ཟུང་འབྲེལ་གྱི་སྒོ་ནས་བསྟན་པ་འཛིན་སྤེལ་དང་གདུལ་བྱའི་ཕན་བདེ་སྐྱོང་སྟངས་ཀྱི་ལམ་བུ་རླུང་ལ་སྤུར་ཞིང་ཆུ་ལ་བསྐུལ་ཏེ་ཆོས་ཚུལ་ངོས་གཙང་མའི་ལམ་པོ་ཆེ་རྨད་དུ་བྱུང་བར་མཐའ་གཅིག་ཏུ་ཞབས་ཟུང་བརྟན་པོར་བཙུགས་ནས་བགྲོད་ཡོད་པ་དེ་གཟུགས་ཅན་རགས་པ་བཞིན་དུ་གསལ་ཐིང་ཐིང་རང་ཅག་གི་སེམས་ལ་ཞིབ་མོར་བཀྲ་ཡོང་བ་ཞིག་སྟེ། དེ་ཡང་སྐུའི་མཐུན་སྣང་གི་མཛད་པ་སྟོན་ཚུལ་འདི་ལྟ་སྟེ། རྒྱལ་བ་ཤཱཀྱ་སེང་གེས་འཇིག་རྟེན་ན་རིགས་ཐམས་ཅད་ཀྱི་གཙུག་གི་ཅོད་པན་དུ་གྱུར་བ་རིགས་བླ་ན་མ་མཆིས་པའི་ཤཱཀྱའི་རིགས་ཀྱི་རྒྱལ་སྲིད་ཅེས་སྟོབས་རྩལ་མངའ་ཐང་གི་འབྱོར་བའི་གྲགས་སྙན་གཡེར་ཆེ་བ་ཕྱོགས་ཕྱོགས་སུ་སྒྲ་བརྒྱའི་དབྱངས་སུ་ལྡིར་བའི་ས་སྐྱོང་མིའི་དབང་བོ་རྒྱལ་བོ་ཟས་གཙང་མའི་སྲས་སུ་བཀྲ་ཤིས་ལུམྦི་ནའི་ཚལ་དུ་སྐུ་བལྟམས་པའི་མཛད་པ་བདག་གིར་བཞེས། དེ་ནས་ཁྲུས་རྫིང་གི་པདྨ་ལྟར་སྐུའི་ལྗོན་བཟང་སྐྱེད་དུ་སྲིང་བའི་གོ་རིམ་ཁྲོད་གཞོན་ནུ་དོན་ཀུན་གྲུབ་པའི་མཚན་གསོལ་ཅིང་མཛངས་མའི་ཡོན་ཏན་ལྷུན་འགྲུབ་ཏུ་རྫོགས་པའི་གྲགས་འཛིན་མ་དང་ས་འཚོ་མ་སོགས་ཁབ་ཏུ་བཞེས་ཏེ་འཇིག་རྟེན་མཐུན་འཇུག་གི་ཁྱིམ་གྱི་ལོངས་སྤྱོད་ཕུན་སུམ་ཚོགས་པ་ལ་རེ་ཞིག་དགའ་མགུར་རོལ་བའི་རྩེ་འཇོ་དཔག་ཏུ་མེད་པའི་མངོན་པར་དགའ་བའི་འདུ་འཛིའི་ཚལ་ཆེན་མོ་ལ་གཡེངས། མཚམས་ལན་རེར་མདུན་ན་འདོན་དང་བཅས་ཕོ་བྲང་གི་ཕྱོགས་ཀུན་ཏུ་ཤིང་རྟ་ལ་བཞུགས་ཏེ་སྤྱན་རྒྱ་བསྐྱེད་ཕྱིར་དུ་གཟིགས་མོ་ལ་ཕེབས་པའི་སྔ་གཞུག་ཀུན་ཏུ། ལས་ཉོན་གྱི་འཁོར་ལོ་བར་མེད་དུ་འཁོར་བའི་གཞན་དབང་གི་སྒྲོག་ཏུ་ཚུད་པའི་འགྲོ་བ་མིའི་སྟེང་གི་རྣམ་སྨིན་གྱི་ཕུང་བོའི་སྐྱེ་བ་དང་རྒ་བ་དང་ན་བ་དང་འཆི་བའི་སྐྱིད་སྡུག་རྣམ་པ་སྣ་ཚོགས་མཐའ་ཡས་པ་ཞིག་ཡང་དང་ཡང་དུ་ཁོང་གི་སྤྱན་གྱི་ལྕགས་ཀྱུ་ལ་ཐོགས།
དེ་ལྟར་སེམས་ཅན་སྐྱེ་བ་དང་སྐྱེ་བའི་གནས་ཀྱི་འཕེལ་འགྲིབ་དང་དར་རྒུད་ཀྱི་འཁོར་ལོ་མཚམས་མི་ཆད་པའི་གནས་སྟངས་ལ་ཐུགས་གཞིག་རྣོན་པོས་ཡང་དང་བསྐྱར་དུ་རྣམ་གྲངས་མཐའ་ཡས་པའི་སྒོས་བརྟག་པ་རྒྱ་གང་ཆེ་དང་གཏིང་གང་ཟབ་སྐྱོང་བའི་མཛད་པ་ལྷོད་པ་མེད་པའི་མུར། ཟག་པའི་སྐྱོན་གྱིས་གོས་པའི་འདི་སྣང་ཚུར་རོལ་གྱི་ཕུན་ཚོགས་ཟ་ཟིའི་རོལ་བ་དག་རེ་ཞིག་པའི་བདེ་བ་དང་བདེ་བ་ཙམ་མིན་ཞེས་སྐུར་བ་དེས་མི་ཕོད་ཀྱང་། ཉི་ཚེ་བའི་བདེ་བ་འདི་དག་ཆུའི་རླབས་གཉེར་ལྟར་སྐད་ཅིག་སྐད་ཅིག་གི་འགྲོས་ཀྱིས་སྡུག་བསྔལ་གྱི་རྒྱ་མཚོར་ཉེ་བར་གཞོལ་གྱིན་པའི་རྒྱུ་འབྲས་ཀྱི་འཇུག་ལྡོག་ཕྲ་རགས་ཐུགས་ཀྱི་མེ་ལོང་དུ་གསལ་བའི་རྐྱེན་མང་བོས་སྲིད་པ་འཁོར་བའི་ཆོས་ལས་ངེས་པར་འབྱུང་འདོད་ཀྱི་ཕྱིར་མི་ལྡོག་པའི་ཐུགས་ཀྱི་འདུན་མ་དྲག་པོ་ཁོང་ནས་བསུས་པར་བགྱིས། དགུང་ལོ་ཉེར་དགུར་སོན་པའི་ནུབ་ཅིག་ལྷའི་མཐུ་བོ་ཆེ་དག་གི་རོགས་དན་དང་བཅས་རྟ་མཆོག་སྔགས་ལྡན་བཅིབས་ཏེ། སངས་རྒྱས་རྣམས་ཀྱིས་བསྟན་པ་ཡི། །ལམ་གྱི་མཆོག་ནི་མ་ཐོབ་པར། །གྲོང་ཁྱེར་སེར་སྐྱའི་གཞིར་ནི་སླར། །ང་ནི་འཇུག་པར་མི་བྱའོ། །ཞེས་གཡོ་བ་མི་མངའ་བའི་ཆོད་སེམས་ཀྱི་དམ་བཅའ་བརྟན་པོ་ཐུགས་ལ་མདུད་དེ་རྒྱལ་བོའི་ཕོ་བྲང་ཉེ་འཁོར་དང་བཅས་པ་ལས་རིང་དུ་སྟེ་དཔག་ཚད་བཅུ་གཉིས་ཀྱི་ལམ་ཐུན་གཉིས་བརྒལ་བའི་ཤིན་ཏུ་དབེན་པའི་ནགས་ཁྲོད་ཅིག་ཏུ་སྐར་མདའ་འཕང་བ་བཞིན་ཕྱིར་མིག་མེད་པར་གཤེགས་པར་མ་ཟད། མཐོ་རིས་ཀྱི་ཕུན་ཚོགས་འབར་བའི་གནག་སྣུམ་སྐྲ་ཡི་ལྕང་ལོ་དེ་ཨུཏྤལ་སྔོན་པོའི་འདབ་མ་ལྟ་བུའི་རལ་གྲིའི་ཁ་ནས་འབྱུང་བ་ས་ལ་གཡུགས་ཤིང་སྲིད་པ་གསུམ་ན། མངོན་པར་སྒེག་པའི་གོས་ངུར་སྨྲིག་གི་རྒྱལ་མཚན་བསྒྲེངས། མཁའ་ལ་ཆར་སྤྲིན་འཐིབ་པ་ལྟ་བུའི་ཡན་ལག་བཞིའི་དཔུང་གི་ཚོགས་ཤིན་ཏུ་སྟུག་པོས་ཡོངས་སུ་བསྐོར་བའི་རྒྱལ་སྲིད་ཀྱི་མངའ་ཐང་གནམ་ལ་རེག་པའི་དཔལ་དང་ཕྱིའི་བཀོད་པ་དང་ནང་གི་རི་མོ་སོགས་ཕྱོགས་ཐམས་ཅད་ལས་མཛེས་སྡུག་རྣམ་པར་རྒྱལ་བའི་ཉི་ཟླའི་བགྲོད་པ། འགོག་པ་ལྟ་བུའི་ཕོ་བྲང་ཆེན་མོ་དང་མཛངས་མའི་ཡོན་ཏན་མ་ལུས་པས་གཞན་ཡིད་བརྟན་པ་འཐོར་བའི་སྒེག་ལྡན་མཛེས་མའི་འཁོར་གྱི་དཀྱིལ་འཁོར་སོགས་མཐོ་རིས་འདོད་པའི་ཡོན་ཏན་གྱི་གྱ་ནོམ་མ་ཚང་བ་མེད་པའི་ནམ་མཁའ་མཛོད་ཀྱི་སྒོ་མོ་རྒྱབ་ཏུ་བསྐྱུར་ཅིང་ཐད་དུ་གཡུགས་ཏེ་བློ་ལ་མི་ཤོང་བ་ལྟ་བུའི་བློས་བཏང་གིས་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་མདུན་ལམ་ལ། གསོལ་བ་རྩེ་གཅིག་དང་རྡོག་པ་ལམ་གཅིག་གི་དཔེ་ལྟར་དཀའ་ཐུབ་དང་བརྩོན་པ་བརྟན་པོ་སོགས་ཀྱིས་བསྙེགས་ཏེ་མཐར་འབྲས་བུ་བླ་ན་མེད་པའི་བྱང་ཆུབ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་བརྙེས་ནས་ལུང་རྟོགས་ཀྱི་བསྟན་པའི་གྲིབ་བསིལ་སྣུམ་པོའི་གདུགས་འོག་ཏུ་སྐྱེ་དགུ་འགྲོ་བ་བདེ་བའི་མཛད་རྗེས་གནམ་ལ་མི་ཤོང་བའི་འཕྲིན་ལས་ཀྱི་ཆུ་རྒྱུན་རིང་མོ་ད་བར་དུ་བཞུགས་སུ་གསོལ་ཡོད།
ཁ་དཔེ་ཞིག་ལ། རྐང་བས་ཉ་ཟིན་པ་དང་ལག་པས་བྱ་ཟིན་པ་བྱེད་དགོས་ཟེར་བ་ལྟར་དམ་པ་ལྷ་ཆོས་དང་འཇིག་རྟེན་སྲིད་ལུགས་གཉིས་ཀའི་ཐོག་ཏུ་རྐང་བཙུགས་ནས་སྟོན་པ་བཀའ་དྲིན་ཅན་གྱི་རྣམ་ཐར་ལ་རིང་དུ་གྱེས་ན་སངས་རྒྱས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་བའི་དོན་དག་མི་ཡོང་བ་ཕར་ཞོག་ཏ། ལྡོག་སྟེ་རྒྱལ་བ་ཐུབ་པའི་དབང་བོའི་བཤད་སྒྲུབ་བསྟན་པའི་ཆབ་རྒྱུན་གཙང་མ་དེ་འགལ་རྐྱེན་གད་སྙིགས་ཀྱི་ཕུང་བོས་ཡོངས་སུ་བསླད་དེ་བསྟན་པའི་མཚན་ཞབས་སུ་རྐང་མི་འདྲེན་པའི་སྲིད་པ་ག་ལ་ཡོད་དེ་མེད་སྙམ། གོང་ཞུས་ལྟར་སྟོན་པ་ཐུགས་རྗེ་ཅན་གྱི་རྣམ་པར་ཐར་བ་ལ་དཔག་ན་ཁོང་གི་ཞལ་སྔ་ནས་ཀྱིས་རྒྱལ་བོའི་ཁབ་ཀྱི་བརྟན་བརླིང་གི་རྩ་བ་ནི་གཙོ་བོ་དམ་པ་ཆབ་སྲིད་བརྟན་བརླིང་ལ་ཐུག་ཡོད་པའི་རྒྱུ་མཚན་གྱིས་ཤཱཀྱའི་རིགས་ཀྱི་རྒྱལ་བོའི་ཁབ་ཡར་རྒྱས་ལ་བརྩོན་ན་སྲིད་ཀྱི་དོན་དག་སྣ་ཚོགས་པ་ཞིག་ལ་ཉིན་མཚན་ཁོར་མོ་ཡུག་ཏུ་འབད་དགོས་པ་དེ་རྒྱུ་འབྲས་ཀྱི་ཆོས་ཉིད་ཅིག་ཡིན་པ་ལ་ཨང་། མི་རུང་ལྕགས་ལ་འབུ་ཞུགས། སྔོན་མོ་ཆུ་ལ་མྱེ་འབར་ཟེར་བའི་ཁ་དཔེ་བཞིན། དེ་ལྟར་སྲིད་ཀྱི་ཡོ་ལང་མཐའ་ཡས་པ་ཞིག་ལ་འབད་པ་སྟོང་གི་རྔུལ་ཆུའི་ཁྲོད་ནས་སངས་རྒྱས་ཀྱི་བསྟན་པའི་དར་མངོན་པར་ཕྱར་བ་དང་དུང་ལེགས་པར་འབུད་པའི་ཐབས་ངབཀོད་པ་སྟེ་འོས་འཚམས་ཀྱི་རིགས་པ་ཞིག་ཤེས་བྱ་ལ་མེད་པར་གཟིགས་པའི་མཛད་པ་གནང་སྟེ། ད་ནི་དམ་པ་ཆོས་ཀྱི་རང་ལུགས་དང་སྲིད་ཀྱི་དབང་ཆ་གཉིས་ཀའི་ནང་ནས་ཅིག་ཤོས་འདོར་ནས་ཅིག་ཤོས་མ་བཟུང་ན་གཉིས་ཀ་ལྷན་དུ་སྟེ་སྐབས་འདི་ལྟ་བུའི་ཆོས་སྲིད་ཟུང་འབྲེལ་གྱི་ལངས་ཕྱོགས་ནི་ཕུགས་བསམ་ཞིག་མ་གཏོགས་ལག་ལེན་གྱི་འབྲས་བུ་གཡུར་ཟ་ལྡེམ་པ་ཞིག་ཆོས་སྲིད་གང་གི་སྟེང་ལ་ཡོང་སྟངས་མེད་པ་བཟློག་ཏུ་མེད་པའི་ཆོས་ཉིད་ཅིག་ཡིན་སྟབས། ཆོས་སྲིད་ཟུང་འབྲེལ་ལ་གོ་སྟངས་མང་པོ་ཡོད་ནའང་གཞན་གྱི་དད་མོས་ལ་རྐང་བཙུགས་ཏེ་ཆོས་ཀྱི་བྱེད་སྒོའི་དར་ཆའི་འོག་ནས་རང་སྲིད་ཕྱོགས་སུ་མི་སེར་སྤེལ་བ་ལ་སོགས་པའི་བགྱི་བ་དག་གིས་བསྟན་པ་རིན་པོ་ཆེ་ངོས་གཙང་ཞིང་རང་རྐང་དག་པའི་འཕྲིན་ལས་རྣམ་དག་ཅིག་འཛིན་སྐྱོང་སྤེལ་བའི་ལམ་ཁ་ཞིག་གང་ན་ཡོད་དེ་མེད་པས་མི་ཚད་ད་དུང་བསྟན་པའི་དོན་ལ་འབྲས་བུ་ལྡོག་ཕྱོགས་ནས་སྨིན་པར་གོར་མ་ཆག་པར་མ་ཟད་འགྲོ་བ་མིའི་འདི་སྣང་བདེ་སྐྱིད་ཀྱི་རྩ་བ་འཆམ་མཐུན་གྱི་འདུ་ཤེས་སོགས་ལ་གཏོར་བརླག་དང་གས་ཆག་ཚབས་ཆེན་ཤོར་འགྲོ་བའི་ངང་ཚུལ་གཟིགས་ནས། སྟོན་པ་བྱམས་བརྩེ་དང་ཤེས་རབ་ཀྱི་བདག་ཉིད་ཁོང་གིས་བསྟན་པ་ལ་ཞུགས་ནས་ཐོག་མཐའ་བར་གསུམ་ཀུན་ཏུ་ཆོས་ཚུལ་ངོས་གཙང་མའི་ལམ་པོ་ཆེ་རྐྱང་བར་བགྲོད་པའི་རྣམ་ཐར་ལས་གཞན་དམིགས་སུ་མེད།
ཡང་སྟོན་པ་བཀའ་དྲིན་ཅན་གྱི་བསྟན་པར་རབ་ཏུ་བྱུང་བའི་སྤྱོད་འཇུག་རྩོམ་པ་བོ་རྒྱལ་སྲས་ཞི་བ་ལྷ་ཞེས་མཁས་དང་གྲུབ་པའི་ཁྱུ་མཆོག་དམ་པ་ཁོང་གིས་ཀྱང་ཡབ་རྒྱལ་བོའི་གདུང་འཚོབ་ཏུ་རྒྱལ་སྲིད་ལ་དབང་བསྐུར་བའི་ཆེ་བའི་ཆེ་བ་མངོན་མཐོའི་ཡོན་ཏན་དང་བླངས་མ་མཛད་པར་མ་ཟད་དེ་ལ་བཤོལ་ཞིང་བྲོས་ཏེ། དཔལ་ནཱ་ལེན་དྲའི་པཎྚི་ཏ་ལྔ་བརྒྱའི་ཁྱུ་མཆོག་རྒྱལ་བའི་ལྷ་ལས་རབ་ཏུ་བྱུང་ཞིང་ཆོས་ངུར་སྨྲིག་གི་རྒྱལ་མཚན་མཐོན་པོར་བསྒྲེངས་ཤིང་སྐུ་ཚེ་ཧྲིལ་བོ་དེ་ཆོས་སྲིད་ཟུང་འབྲེལ་གྱི་རྡུལ་ཙམ་མ་གོས་པའི་སྒོས་རྒྱལ་བའི་བསྟན་པ་དང་སྐྱེ་འགྲོའི་ཕན་བདེ་ལ་མཛད་རྗེས་རི་ལས་ལྕི་བ་བཞག་སྟེ་སྐུ་ཚེ་དང་ཆོས་ཚུལ་ངོས་གཙང་མའི་རྣམ་ཐར་བསྙམས་ནས་མཐར་གཞན་དོན་དུ་སྐུ་ཞི་བར་གཤེགས་སོ། །
ཟ་ཧོར་རྒྱལ་བོའི་རྒྱལ་སྲས་ཇོ་བོ་རྗེ་དཔལ་ལྡན་ཨ་ཏི་ཤས་ཀྱང་ས་སྐྱོང་ཡབ་ཀྱི་རྒྱལ་སྲིད་ལ་རྒྱབ་ཀྱིས་ཕྱོགས་ཏེ་ཆོས་ཀྱི་ཐུགས་བསྐྱེད་བརྟན་པོས་སྐུ་ཚེ་གང་བོ་དེ་བསྟན་འགྲོའི་དོན་རྒྱ་ཆེ་བའི་སླད་དུ་ཆོས་ཚུལ་ངོས་གཙང་མའི་ལམ་ནས་མཛད་རྣམ་དཔག་ཏུ་མེད་པ་གནང་སྟེ་སྐུ་ཚེ་མཐའ་འཁྱོལ་བར་བགྱིས་པ་སོགས་སྔོན་གཤེགས་བསྟན་པ་འཛིན་པའི་སྐྱེས་ཆེན་མཐའ་ཡས་པའི་རྣམ་པར་ཐར་བའང་དེ་དང་དེ་ཉིད་ལས་མ་འདས་སོ། ། སྐྱེས་མཆོག་དེ་དག་གི་རྗེས་འཇུག་ད་ལྟའི་དགོན་སྡེ་དག་གིས་ཀྱང་ཁོང་རྣམ་པའི་རྣམ་ཐར་རྣམས་ཅི་ནུས་གང་ལྕོགས་ཀྱིས་དགོངས་མཐིལ་དུ་བཞེས་ཨེ་ཐུབ་ལ་འབད་པ་བརྒྱ་ཡིས་རྔུལ་ཆུ་གཏོར་བ་ཧ་ཅང་གལ་འགངས་ཆེའོ། ། གཞན་ལུས་ལ་ངུར་སྨྲིག་གི་རྒྱལ་མཚན་བསྒྲེངས་ནས་འཇིག་རྟེན་སྲིད་ཕྱོགས་དང་འབྲེལ་བའི་མི་དམངས་ཀྱི་འཚོ་བ་ལ་གནོད་སྐྱོན་བྱེད་པ་དང་དཔལ་འབྱོར་གྱི་ལས་ཀ་སོགས་སྟོབས་གང་ཆེ་དང་རྒྱ་ཆེར་བསྐྱེད་སྒོས་དངོས་ཤུགས་བརྒྱུད་གསུམ་ནས་དཔུང་ཤུགས་རྩ་འཛུགས་དང་ཚོགས་པ་མང་སྤེལ་གྱི་ཐབས་ལམ་གྱི་གཡོ་ཇུས་ཡོད་དགུ་རྩལ་སྤྲུགས་ཀྱི་ཁྲོད་ནས་ནང་བསྟན་འཛིན་སྤེལ་སོགས་ཀྱི་བྱ་བའི་ཟོལ་རྣམས་ནི་བསྟན་པའི་བདག་པོ་རྒྱལ་བ་སངས་རྒྱས་ཐུགས་རྗེ་ཅན་གྱི་དགོངས་བ་རྩད་ནས་མ་ཡིན་ལ་དེ་ལྟ་དེ་ནི་ཆོ་མེད་པའི་ནང་བསྟན་གྱི་གཟུགས་བརྙན་ཆུ་ཤིང་ལྟ་བུ་དང་སྔ་སྲོལ་རྨོངས་དད་ཀྱི་མུན་པ་འཐིབ་དྲག་པའི་ལམ་བུ་རྒྱ་སྐྱེད་སྟངས་ཤིག་ལས་གཞན་མ་ཡིན་སྙམ། ལས་དང་ལམ་ག་འདི་འདྲ་རྣམས་ལ་ཚོད་འཛིན་དང་འགོག་རྒོལ་གྱི་སྦྱོར་བའི་ཐབས་བརྒྱ་བསྟུད་མར་མ་བཤམས་པར་དེའི་གསོན་ཤུགས་དང་མདུན་ལམ་ལ་དོ་སྣང་དང་ཉམས་འཇོག་མ་བགྱིས་པར་མ་དག་རྒྱུན་འབྱམས་སུ་བསྐྱུར་ན་སྤྱི་ཚོགས་རིང་ལུགས་ཅན་གྱི་སྤྱི་ཚོགས་ཀྱི་སྒྲིག་གཞི་དང་འཕེལ་རྒྱས་ཀྱི་སྒོ་མོ་སོགས་ལ་འཐོར་རྒུད་ཀྱི་ཕྱོགས་ནས་ཤུགས་རྐྱེན་གདིང་ཟབ་མོ་ཐེབས་པ་སྨོས་མེད་དུ་གསལ་བར་མ་ཟད། ཁྱིམ་རྒྱུད་དང་རུས་རྒྱུད་དང་མི་རིགས་སོགས་ཀྱི་ས་མཚམས་མེད་པའི་བོད་བརྒྱུད་ནང་བསྟན་འཚེ་མེད་འཆམ་མཐུན་གྱི་དཔལ་ཡོན་ཕུན་སུམ་ཚོགས་པའི་འཕྲིན་ལས་ཀྱི་ཕྱོགས་ལ་སྒོ་ཀུན་ནས་རུལ་སུངས་དང་སྲོལ་སྙིགས་ཀྱི་མི་གཙང་བས་དར་ལ་སྣུམ་ཆགས་པའི་དཔེ་བཞིན་འབག་པ་ནི་གསལ་བོ་རེད། གདོད་མའི་སྤྱི་ཚོགས་ཀྱི་སྐས་ཐེམ་ལས་རིང་དུ་བརྒལ་ཏེ་སྤྱི་ཚོགས་གསར་བའི་ལོ་རྒྱུས་ཀྱི་དཀྱོགས་མཚམས་གསལ་བའི་དངོས་པོ་འཕེལ་རྒྱས་ཀྱི་མདུན་གྲལ་བསྙེག་པ་ལའང་རྩ་བའི་སྒུལ་ཤུགས་གཙོ་བོ་ནི་སྤྱི་ཚོགས་ཀྱི་ནང་གི་སེམས་ཁམས་དྭངས་གཙང་དང་བདེར་གནས་ཀྱི་ངོས་ནས་འཆམ་མཐུན་གྱི་བསམ་བློ་དང་ཆིག་སྒྲིལ་གྱི་འདུ་ཤེས་སོགས་བསམ་པའི་དཔལ་ཡོན་གྱི་ལོ་འདབ་རྒྱས་དགོས་པ་དེ་སུ་ཡང་བསྙོན་དུ་མེད་པའི་རྒྱུ་འབྲས་ཀྱི་བཟློག་ཏུ་མེད་པའི་ཆོས་ཉིད་དང་ཚན་རིག་གིས་ཀྱང་ར་གསལ་བོར་འཕྲོད། དེ་ལྟའི་ནང་བསམ་བློའི་དཔལ་ཡོན་གྱི་སྒོ་བརྒྱ་མཐོར་འདེགས་དང་ཡར་སྐྱེད་རྫོགས་པ་ལ་ནང་བསྟན་རིག་པའི་བསླབ་བྱ་དང་མཛུབ་སྟོན་གྱི་རིམ་པ་ཁག་ནི་ཁ་ཚ་དགོས་གཏུགས་ཀྱི་སྨན་རབ་ཏུ་བཟང་བོའི་ལྗོན་པ་ལྟ་བུ་ཞིག་ཡིན་པར་དངོས་པོའིསྟོབས་ཞུགས་ཀྱི་རིགས་པ་དང་མངོན་གྱུར་ཚན་རིག་གི་གཏན་ཚིགས་ཀྱིས་ཀྱང་གསལ་བོར་མཚོན།
མིག་སྔའི་འཚོ་བའི་ཉམས་མྱོང་དང་གཟུ་བོའི་སྒོས་ཀྱང་བསམ་ན་དེ་འདྲའི་ཚེ་འདི་སྣང་གི་བདེ་སྐྱིད་འཕེལ་རྒྱས་ཀྱིའང་གཤོག་པ་ལྟ་བུའི་ནང་བསྟན་རིག་པའི་འཕྲིན་ལས་ཀྱི་རྩ་བ་ནི་གཙོ་བོ་དགོན་སྡེ་དག་གི་ཁྲོད་ནས་རྒྱས་དགོས་པ་དེ་ཉ་མོ་ཆུ་ནང་ནས་གསོན་དགོས་པའི་དཔེ་དང་མཚུངས། གོང་ཞུས་ལྟར་དགོན་སྡེ་ཁག་གི་ནང་ནས་ནང་བསྟན་རིག་གནས་ཀྱི་གཙུག་ལག་འཛིན་སྐྱོང་སྤེལ་བའི་གོམ་པ་མདུན་ནས་མདུན་དུ་སྤོ་བ་ལ། འགལ་རྐྱེན་དུ་ཆེ་བའི་ནང་བསྟན་གྱི་གཟུགས་བརྙན་དང་རྨོངས་དད་ཀྱི་འཁོར་ལོ་སྐོར་བའི་ཆོས་སྲིད་ཟུང་འབྲེལ་ལྟ་བུའི་ལམ་དང་ལུགས་སྲོལ་དག་དགོས་པ་ཏིལ་ཙམ་མེད་ལ་དགག་བྱ་རི་བོ་ལས་ཆེ་སྟབས་དེ་དག་མཐའ་གཅིག་ཏུ་གཙང་སེལ་ཅི་ལྕོགས་དང་གཏན་དུ་དགག་པའི་ལངས་ཕྱོགས་སྲ་ཐག་ཐག་ཅིག་ལ་འགྲུས་པ་ཆེར་མེད་ན། སླ་ང་ལ་འགྲོགས་ན་དྲི་མའི་དཔེ་བཞིན་ཆོས་ཚུལ་གཙང་མའི་ལམ་ནས་ནང་བསྟན་རིག་པ་རྒྱུན་འཁྱོངས་ཀྱི་ལས་ཀ་དག་ལམ་ལྷོངས་ཡོང་རྒྱུ་ཧ་ཅང་དཀའ་བ་ལ་ཨང་། ང་ཚོས་རེ་བ་མཐོ་ས་ནས་བཟུང་ན། གྲ་སྒྲིག་སྡུག་ས་ནས་རྒྱག་དགོས་པའི་དཔེ་ལྟར་ནང་བསྟན་འཕེལ་རྒྱས་ཀྱི་དཀའ་ཁག་དེ་དག་ལ་ཐུགས་སྤོབས་བརྟན་པོས་ཅིས་ཀྱང་གདོང་ལེན་བྱེད་དགོས་པ་དང་བྱེད་སྟངས་ཕྲ་རགས་སྣ་ཚོགས་པ་ཞིག་ཡོད་པ་ལས་གཙོ་བོ་ནི་ནང་བསྟན་འཕེལ་ཕྱོགས་ལ་འབྲེལ་བ་ཟབ་པའི་དགོན་སྡེ་དག་གིས། རྒྱལ་བ་རྫོགས་པའི་སངས་རྒྱས་རང་ཉིད་ལས་གཞན་པའི་ཉེ་སྲས་བྱམས་འཇམ་དབྱངས་སོགས་ལའང་མི་དབང་བའི་དམ་ཆོས་འདུལ་བ་རིན་པོ་ཆེའི་གཞུང་གི་ཕྱག་བཞེས་ཚུལ་ཤིང་འགྲེམ་པ་ལ་སོགས་པ་ལྟ་བུའི་དམངས་གཙོའི་ལས་རིགས་ཀྱི་སྤྱོད་པ་ཉམས་ལེན་རྒྱུན་སྐྱོང་ཡར་རྒྱས་ཡར་དར་སྒོས། བསྟན་པ་ཚུལ་བཞིན་རྒྱས་པའི་མཐུན་རྐྱེན་དགོན་པའི་ནང་ཁྲིམས་དོ་དམ་པ་དང་བསྟན་པའི་དབུ་ཁྲིད་སོགས་ལས་ཀའི་གནད་རིམ་དག་ཏུ་བསླབ་གསུམ་ཉམས་ལེན་གྱིས་སྒོ་གསུམ་མཛེས་པའི་སྡེ་སྣོད་འཆང་བའི་མཁས་པའི་དབང་བོ་རྣམ་པ་འོས་ཤོག་བླུག་འདེམ་ལྟ་བུའི་ལམ་ནས་བསྐོ་བཞག་གསོལ་རྒྱུ་ཤིན་ཏུ་རབ་ཏུ་གནད་འགག་ཅིག་རེད་སྙམ་སྟེ། གཞན་དུ་སྤྱི་སེམས་དང་སྙིང་སྟོབས་དང་ལག་ལེན་གྱི་བརྩོན་པ་ཡོད་ན་ཡང་ནང་བསྟན་འཕེལ་ཕྱོགས་ཀྱི་ཐབས་ལ་མཁས་པའི་ཤེས་རབ་ཀྱི་གྲོགས་དང་ཁ་བྲལ་བའི་སྤྱི་སེམས་སོགས་ཀྱིས་ཅི་ཡང་མི་འཁྱོང་ལ་གར་ཡང་མི་ཕྱིན་པ་ཕར་བལྟས་ཚུར་གསལ་ཡིན་པར་མ་ཟད་ལྡོག་སྟེ་གནོད་པ་ཐེབས་པ་དང་། ནང་བསྟན་རྒྱུན་ཤེས་ཀྱིས་དབུལ་བའི་སྟེང་སྤྱི་སེམས་ཡང་མེད་པ་སྐོར་ཞིག་གིས་རྨོངས་དད་ཀྱི་རྩིག་པ་ལ་བརྟེན་ཏེ་བསྟན་པ་རྒྱས་པ་དང་འགྲོ་བ་བདེ་བའི་དར་ཆ་ཁ་ལ་ཕྱར་ནས་ཆོས་དང་གང་ཟག ཐ་དད་ཀྱི་ལས་ཀ་ཞེ་མེར་བའི་ཁྲོད་སྒེར་དོན་རྐྱང་བ་ལ་རྟག་ཏུ་གཡེང་བའི་ལས་ཀྱིས་བྲེལ་ཞིང་བསྟན་པའི་དབུ་ཁྲིད་ཁུལ་བྱེད་པ་དེ་ཆོས་སྲིད་ཟུང་འབྲེལ་དང་བསྟན་པའི་མཛེས་སྡུག་ལ་དྲི་མ་བགོ་སྟངས་ཤིག་ལས་གཞན་མིན།
འབྱུང་འགྱུར་ཀུན་ཏུ་ནང་བའི་བསྟན་པ་གྲ་དག་པ་དང་སྤུས་གཙང་བའི་ཆོས་ཚུལ་དངོས་གཙང་བའི་ལམ་ནས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་འཆམ་མཐུན་དང་སྤྱི་ཚོགས་གནས་བབས་ཀྱི་ཞི་བདེ་སོགས་ལ་སྨན་ཞིང་ནང་བསྟན་གྱི་འཕྲིན་ལས་རྒྱལ་ཡོངས་རང་བཞིན་ཅན་དུ་འགྱུར་བའི་ཐབས་ཕྱོགས་རླབས་པོ་ཆེའི་དཔུང་བ་བརྟན་པོས་གཙུག་ལག་བསྟན་པའི་འཕེལ་ཕྱོགས་ཀྱི་རྒྱལ་མཚན་གནམ་དུ་འདེགས་པའི་ཁུར་ཐེག་པ་ལ་ནི་ཆུ་ཡི་ཉ་མོའི་ལག་ལེན་ཆུ་ལ་ཟབ་ཅེས་པ་ལྟ་བུའི་དཔེ་ཐོག་ནས་སྡེ་སྣོད་གསུམ་ལ་མཁས་པ་ཞིག་དགོས་པ་ལྟ་ཅི་སྨྲོས་ཨང་། དེ་ལྟའི་ལམ་བུ་ཞིག་དགོན་སྡེ་ཁག་གི་གཙོས་སྤྱི་ཚོགས་ཀྱི་ནང་དུའང་རྨང་བརྟན་པོ་སྲ་ཐག་ཐག་ཅིག་རྒྱུན་ཤེས་སུ་ཆགས་པའི་གོལ་ས་སེལ་བ་དང་མཐུན་རྐྱེན་འཛོམས་པའི་གྲོགས་དན་བཟང་བོའི་ཕྱོགས་ལ་འབྲེལ་ཡོད་ལས་ཁུངས་རིམ་པ་ཁག་གི་ངོས་ནས་ཀྱང་དངོས་ཤུགས་བརྒྱུད་གསུམ་ནས་ཐབས་ཇུས་སྣ་ཚོགས་པ་ཡུལ་དུས་རྣམ་པ་ཀུན་ཏུ་འབད་པ་སྟོང་གིས་བཤམ་རྒྱུ་ཤིན་ཏུ་གལ་ཆེ་བར་སེམས། མེ་ཏོག་པདྨའི་སྐྱེད་ཚལ་ཆུ་ལུད་ཉི་འོད་སོགས་ཀྱིས་གསོ་སྐྱོང་དགོས་པའི་རྒྱུ་འབྲས་ཀྱི་བླང་དོར་མ་འཆུགས་པའི་དཔེ་བཞིན་སྤྱིར་ཡུལ་དུས་རྣམ་པ་ཀུན་ཏུ་ནང་བསྟན་རིག་གཞུང་ནི་སྐུ་ཚེ་སྲིད་ལ་ལག་བརྐྱངས་ནས་མ་རྩ་རིང་ལུགས་སྲིད་དབང་སྒེར་གཅོད་དང་མ་འབྲེལ་བའི་ཆོས་ཚུལ་གཙང་དག་གི་ལམ་པོ་ཆེར་བསྙེགས་པའི་བསྟན་པའི་གཏད་རབས་སོགས་མོས་གུས་ཀྱི་ཞིང་མཆོག་བླ་ན་མེད་པ་དག་གི་རྣམ་ཐར་བཟང་བོ་མིག་དཔེར་ལྷུར་ལེན་པར་ཕྱོགས་ཏེ་ཕྱི་རབས་གདུལ་བྱ་ཚོས་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་གྱི་རྨད་བྱུང་སྐལ་བ་བཟང་བོའི་སྦྱོར་བ་ཡ་མ་བྲལ་བའི་ཤེས་རབ་ལེགས་པའི་གནད་ཀྱི་སྒོས་འཛིན་སྐྱོང་སྤེལ་གསུམ་དགོས་པ་བཤད་མི་དགོས་བཤམས་བཞག་ཡོད་པ་རེད་དེ། ལྷག་པར་དུ་ཤེས་རིག་སྣ་ཚོགས་པ་ཚ་ཚ་འུར་འུར་དུ་འཕྱུར་བའི་ཁ་རྩང་དེ་རིང་གི་འཛམ་བུ་གླིང་བའི་དུས་རབས་ལོ་རྒྱུས་ཀྱི་ཆུ་བོའི་བཞུར་ཕྱོགས་དང་བསྡུར་བའི་ཁྲོད་ནས་ནང་བསྟན་རིག་པའི་རྩ་ལག་ཐམས་ཅད་ཉམས་པ་སླར་གསོ་དང་མ་ཉམས་མཐོར་འདེགས་དགོས་པ་ལ་ནི་ཐོས་བསམ་སྒོམ་པའི་ཤེས་རབ་ཕུན་སུམ་ཚོགས་པའི་རྩལ་སྤྲུགས་ཡོད་དགུའི་ཕྱོགས་སུ་བློས་བཏང་གིས་འབད་པ་ཆེར་བསྐྱེད་དགོས་པ་དེ་དུས་རབས་ཀྱིས་གནད་དུ་བཏོན་པའི་འགན་འཁྲི་བསྙོན་མེད་ཅིག་ཡིན་པར་མིག་ལྡན་སུ་ལའང་ཞུ་མི་དགོས་པ་ལྟ་བུར་ཆགས་ཡོད། དེ་ཡང་སྡེ་སྣོད་ལ་རྣམ་དཔྱོད་ཀྱི་འཇུག་པ་གང་ལ་གང་འཚམ་ཡག་པོ་རེ་ཡོད་ཀྱང་ཁ་ཕྱིར་བལྟས་ཀྱི་ལེ་ལོའི་བྲན་དུ་གྱུར་བ་དང་སྤྱི་བའི་དོན་ལ་བརྩེ་བ་སྲབ་པ་དང་ས་གང་སྐྱིད་དང་ཉམས་དགའ་བའི་ཡུལ་གང་ཡོད་ལ་འཁྱལ་ནས་སྐྱིད་ཉལ་གཏོང་བའི་རིགས་ཀྱིས་བསྟན་པ་རྒྱས་པའི་ཕྱོགས་ལ་རྔོ་མི་ཐོགས་པ་གསལ་བོ་རེད།
སྤྱི་ཚོགས་ཀྱིས་ཚེ་འདི་སྣང་གི་འཚོ་བ་གཙོ་བའི་འགྲོ་བ་མིའི་རྩིས་ཐང་གཉེར་བའི་ལམ་ནས་དམངས་གཙོར་འབད་ཚུལ་དང་རྩ་བའི་གཞི་ཁོག་མི་འདྲ་བའི་དམ་ཆོས་འདུལ་བའི་གཙུག་ལག་གི་ལས་ཀྱི་ཆོ་ག་སོགས་དཔང་བོར་གསོལ་བའི་ཚེ་འདི་ལས་ཕྱི་མ་གཙོ་བའི་མིའི་རྩིས་ཐང་གཞིར་བཞག་པའི་དགོན་སྡེའི་དམངས་གཙོ་སྒྲུབ་སྟངས་ནི། མི་རིགས་སོགས་ཁ་བྲལ་ཆགས་སྡང་གི་འདམ་རྫབ་འཕྱུར་བའི་གཡུལ་གྱི་ས་མཚམས་ཀྱིས་མ་བསླད་པའི་བསྟན་པ་རིན་པོ་ཆེ་རྒྱས་ཐབས་དང་དེ་ཡང་ཆོས་ལུགས་དད་མོས་རང་དབང་གི་རྩ་བའི་ཁྲིམས་མཐུན་ལུགས་མཐུན་གཞིར་བཞག་སྟེ་ཚོགས་པ་དང་མི་སྒེར་སུའི་རྒྱུད་ལ་བསྟན་པའི་ལོ་འབྲས་གཡུར་དུ་སྨིན་པར་བརྩོན་པའི་ཐབས་ཤེས་ཉག་གཅིག་གོ །འཆམ་མཐུན་ལ་སོགས་པའི་ཐུགས་བསྐྱེད་རྒྱ་ཆེ་དང་འཚེ་བྲལ་བྱམས་བརྩེ་རིན་པོ་ཆེའི་ངད་མ་ཡལ་བའི་ཐབས་ཤེས་དེ་ཡང་མཐར་དེད་ན་རྒྱལ་ཁབ་དང་འགྲོ་བ་རིས་སུ་མ་ཆད་པའི་ཕན་བདེའི་ལམ་བཟང་ཤིན་ཏུ་ཡངས་བ་ལ་གཞོལ་བའི་ཐབས་མཁས་ཀྱི་འོད་ཟེར་འཚེར་བའི་སྒྲོན་མེ་ཞིག་ལས་གཞན་ཅི་ཡང་མིན་ནོ། །དེ་ལྟ་ན་དགོན་སྡེའི་དམངས་གཙོའི་ལམ་ཁ་གང་བྱུང་མང་བྱུང་དང་ཤེས་མེད་ཆགས་སྡང་གི་ཁ་ལྕེ་སུ་རྣོ་ལ་བློ་མི་བཅོལ་བར་མིག་གི་རྒྱང་ཆོད་ཅིང་བློ་སྣ་རིང་བ་དང་ལེགས་ཉེས་ཀྱི་ས་མཚམས་ཕྲ་རགས་ལ་མཁྱེན་སྤྱན་གང་འཚམ་ཡངས་པའི་སྟེང་། དོན་དངོས་ཀྱི་གནས་ལུགས་ཐད་དུ་བོར་བའི་གཞན་ངོ་ལ་ལྟ་བའི་བསམ་ཚུལ་ཉི་ཚེ་བ་སྣ་ཚོགས་པའི་བྲན་དུ་མི་འགྱུར་བར་ཤེས་རྒྱུད་ཤིན་ཏུ་གཟུ་བོར་བསྐྱེད་པའི་སྤོབས་པ་ལ་གནས་ཨེ་ནུས་སུ་གཞོལ་བ་དག་གཙོ་བོའི་ལམ་ནས། བཀས་བཀོད་རྒྱུད་འཛིན་ལྟ་བུའི་སྤྱི་ཚོགས་རྙིང་བའི་ལམ་སྲོལ་འཁོས་དོག་པའི་གྲལ་རིམ་སྣ་ཚོགས་པའི་ནང་གི་མིའི་ཆེ་མཐོང་གི་ལྟ་སྟངས་དྲི་མ་ཅན་སོགས་འབྱུང་བཞི་རླུང་ལ་བསྟིམས་ཅི་ཐུབ་ངང་རྒྱལ་བའི་བསྟན་པ་ལ་རིགས་མི་གཙོ་རུས་མི་གཙོ་བར་བསླབ་པ་རིན་པོ་ཆེ་གཙོ་ཞེས་སྟོན་པ་ཐུགས་རྗེ་ཅན་གྱི་ཞལ་ཆེམས་བུ་རམ་སྒོར་མོའི་གསུང་གསེར་ནག་གི་བཀའ་ལྕི་མོ་གཙུག་ཏུ་བཀུར་བའི་སྒོས། གདུལ་བྱ་སྨིན་པར་བྱེད་པའི་བསོད་ནམས་ཚོགས་ཀྱི་བསགས་སྒོ་ཁྱད་པར་བ་དང་ལྡན་ཞིང་ཚུལ་ཁྲིམས་ཀྱི་བསླབ་པས་རྒྱུད་ལེགས་པར་བསྡམས་པའི་སྟེང་རྒྱ་ཆེན་སྤྱོད་པའི་བརྩེ་བ་མཆོག་གི་གཞན་དབང་དུ་གྱུར་ཏེ་འཆད་རྩོད་རྩོམ་པ་དང་དབང་ལུང་མན་ངག་གིས་དུས་འདའ་བའི་མདོ་སྔགས་ཡོངས་རྫོགས་ཀྱི་དོན་གྱི་བདག་པོར་གྱུར་བ་གང་ན་སུ་བཞུགས་པའི་དམ་པ་ཚོ་བསྟན་པའི་དབུ་ཁྲིད་དུ་བསྐོ་བཞག་མངའ་གསོལ་གྱི་འབད་པ་མངོན་དུ་གྱུར་ན། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ཟློག་པར་བྱེད། །ཅེས་གསུངས་པ་ལྟར་བོད་བརྒྱུད་ནང་བསྟན་ལ་རྨ་འདོན་པའི་ཆོས་སྲིད་ཟུངའབྲེལ་གྱི་རིགས་སུ་གཏོགས་པ་རྣམས་དོན་གྱིས་སེལ་འགྲོ་བ་དང་ཆོས་ཚུལ་གྲ་དག་པའི་ལངས་ཕྱོགས་ངང་གིས་རྒྱལ་བའི་གོ་རིམ་ཁྲོད་ནས་བསྟན་པའི་ཆུ་རྒྱུན་གཙང་མ་ཡུན་གནས་ཞབས་བརྟན་ཡོང་བ་སྨོས་མ་དགོས་སོ། །རྒྱུ་མཚན་དེའི་ཕྱིར་འབྲེལ་ཡོད་གཞུང་སྒེར་སུས་ཀྱང་གོང་གསལ་རྒྱུ་འབྲས་བསླུ་བ་མེད་པའི་ཆོས་ཉིད་ཀྱི་རྒྱལ་ཁའི་བ་དན་དཀར་བོ་ཐུགས་ལ་འདོགས་པའི་སྒོས་དེ་དོན་བརྩོན་པ་ལྷོད་མེད་ཞུ་རྒྱུ་ཧ་ཅང་གལ་ཆེའོ་ཞེས་གསོལ་བ་ཕུར་ཚུགས་སུ་ཞུས་པ་ཡིན་ནོ། །
ཆོས་པ་ཕར་ཆེར་སྲིད་འབྱོར་འདོད་རྔམས་འབར། །
འཇིག་རྟེན་ཐམས་ཅད་དེ་ལ་ཡིད་སྨོན་ནས། །
བསྟན་པ་རྣམ་དག་མི་མངོན་དབྱིངས་སུ་ཡལ། །
སྙིགས་མའི་རང་མཚང་རྡོལ་བ་ཡིད་རེ་མུག །
བསྟན་པའི་གཟུགས་བརྙན་འཛིན་མའི་ཁྱོན་གང་ཡང་། །
བསྟན་པའི་སྙིང་པོ་ནུབ་རིར་ཡིབ་གྱུར་མོད། །
བསྟན་པ་མི་ཤེས་བསྟན་པ་དར་ཞེས་གླེང་། །
བསྟན་དང་བསྟན་འཛིན་རྨོངས་བས་རང་མགོ་བསྐོར། །
ཞེས་རྒྱལ་བསྟན་སྲིད་དང་མ་འདྲེས་པར་གཙང་མ་དགོས། ཞེས་བྱ་བ་འདི་ནི་དངོས་གྲུབ་དཔལ་གྱིས་བྲིས་པའོ། ། །
ནང་དོན་ཡོངས་ཁུངས། ཐུབ་པའི་རྗེས་རབས་བོད་ཡིག་སྤྱི་སྟེགས།