གཅིག བསམ་པ་བཟང་པོ་དང་བྱང་ཆུབ་ཀྱི་སེམས་འདི་གཙོ་བོ་ཡིན་ཚུལ་གྱི་སྐོར།
༡ བསམ་པ་བཟང་པོ་དང་བྱམས་སྙིང་རྗེ་བྱང་ཆུབ་ཀྱི་སེམས་འདི་ལ་དོན་གཉེར་བྱས་ནས་རང་གི་རྒྱུད་ལ་སྐྱེ་བའི་ཐབས་སུ་འབད་རྒྱུ་དེ་ཧ་ཅང་གལ་ཆེན་རེད།
༢ འཕྲལ་ཕུགས་ཀུན་ཏུ་ཕན་པ་དང་བདེ་བ་རང་དང་གཞན་གྱི་དོན་རྒྱ་ཆེར་འགྲུབ་པར་བྱེད་པ་ལ། རིན་ཆེན་བྱང་ཆུབ་སེམས་ཀྱི་ཕན་ཡོན་ཤེས་པར་བྱས་ནས་སྤྲོ་བ་བསྐྱེད་དེ། སྡུག་བསྔལ་ཞི་ཞིང་བདེ་བ་འཐོབ་པའི་ཐབས་མཆོག་བྱང་ཆུབ་ཀྱི་སེམས་འདི་ཉིད་རང་རྒྱུད་ལ་ཨེ་སྐྱེ་བལྟ་རྒྱུ་དེ་གལ་ཆེན་དོན་གྱི་སྙིང་པོ་རེད།
༣ བྱང་ཆུབ་ཀྱི་སེམས་དང་རང་གི་རྒྱུད་གཉིས་ཀྱི་འབྲེལ་ཐག་ལྟ་བུ་དེ་བསམ་པ་བཟང་པོ་རེད།
༤ སྟོང་ཉིད་ཀྱི་ལྟ་བ་རྟོགས་པར་བྱེད་པ་ལའང་རྨང་གཞི་ལྟ་བུ་དེ་བསམ་པ་བཟང་པོ་རེད།
༥ ཉམས་ལེན་དང་བྲལ་བའི་ཐོས་པ་རྐྱང་པ་དང་ལྷག་བསམ་དང་བྲལ་བའི་ཤེས་ཡོན་རྐྱང་བས་ཆོག་ཤེས་མི་བྱེད་པར། རང་དང་གཞན་གྱི་འཕྲལ་ཕུགས་ཀུན་ལ་ཕན་ངེས་པའི་ཆོས་སྲིད་ལེགས་ཚོགས་ཀྱི་རྩ་བ་ལྷག་བསམ་མམ་བསམ་པ་བཟང་བོར་བསླབ་རྒྱུ་དེ་ནི་ཅི་ནས་ཀྱང་གལ་ཆེན་རེད།
༦ ཁྱོད་རང་ཚོའི་ནང་བསམ་པའི་ཉམས་ལེན་གྱི་སྟེང་ནས་ངེས་འབྱུང་དང་བྱང་ཆུབ་ཀྱི་སེམས། ཞི་ལྷག་གི་ཡོན་ཏན་ཡང་དག་པའི་ལྟ་བ། ཕྱིའི་སྤྱོད་པའི་ཕྱོགས་ནས་ཆོས་དང་མཐུན་པ་མི་གཞིའི་རྨང་གཞི་བསམ་བཟང་སྤྱོད་གཙང་གི་ལེགས་སྐྱེས་ཤིག་ཡོད་ན་དངོས་གནས་དགའ།
༧ རྒྱལ་སྲས་བྱང་ཆུབ་སེམས་དཔའ་ཐམས་ཅད་ཀྱི་ཉམས་ལེན་གནད་གཅིག་ཏུ་བསྡུས་ན་བསམ་སྤྱོད་བཟང་པོས་བསྟན་དང་འགྲོ་བའི་དོན་མཛད་རྒྱུ་མ་གཏོགས་ཡོད་ཚོད་མ་རེད།
༨ རང་རྒྱུད་ལ་ངེས་འབྱུང་དང་བྱང་ཆུབ་ཀྱི་སེམས། ཡང་དག་པའི་ལྟ་བ་ཁྱད་པར་ཅན་རེ་སྐྱེ་བར་དཀའ་བ་འདི་ཡང་སྡིག་ལྟུང་ཧ་ཅང་འཐུག་རྟགས་རེད།
༩ ང་ཚོ་འགྲོ་བ་སྤྱི་དང་བྱེ་བྲག་མིའི་འགྲོ་བ་ཚང་མ་ལ་གནས་སྐབས་ཀྱི་ཕན་པ་དང་གཏན་བདེ་མཐར་ཐུག་པ་ཞིག་འཐོབ་འདོད་ན། དེའི་ཐབས་ལམ་མ་ནོར་བ་དེ་བྱང་ཆུབ་ཀྱི་སེམས་འདི་ཁོ་ན་ཡིན།
༡༠ བྱང་ཆུབ་ཀྱི་སེམས་ནི་སྙིང་རྗེ་ལས་འཁྲུངས་ཤིང་། སྙིང་རྗེ་ནི་བྱམས་པ་ལས་འཁྲུངས། བྱམས་པ་ནི་དྲིན་ཤེས་དྲིན་གཟོ་ལས་འཁྲུངས། དྲིན་ཤེས་དྲིན་གཟོའི་རྒྱུ་སེམས་ཅན་ཐམས་ཅད་ཕ་མ་དྲིན་ལྡན་དུ་ཤེས་དགོས།
༡༡ རང་རྒྱུད་ན་བྱང་ཆུབ་ཀྱི་སེམས་མེད་ནས་བཟུང་སྟེ། ལྟ་སྣང་ལ་ངེས་འབྱུང་དང་སྐྱོ་ཤེས། སྒྲུབ་ཚུགས། ཀུན་སྤྱོད་སོགས་ཅི་འདྲའི་བཟང་པོ་ལྟར་དུ་སྣང་ཡང་ཚད་ལྡན་ཚུལ་མཐུན་ཞིག་ཡོང་རྒྱུ་དཀའ་མོ་རེད།
རྗེ་བཙུན་བླ་མ་མཁན་སྤྲུལ་ཡིད་བཞིན་ནོར་བུ་༧འཇམ་དབྱངས་སྦྱིན་པ་རྒྱ་མཚོ་མཆོག་གིས་༼སྐུ་ཚེ་སྟོད་ཀྱི་རྣམ་ཐར་༽ལས་ཁོལ་དུ་ཕྱུང་།